Поиск по сайту: 
 

Архив
 март 
 2021 
пн вт ср чт пт сб вс
1234567
891011121314
15161718192021
22232425262728
293031    

 
 

 

Культура

Т.Н.МАКЕЕВА: «КОРХНЕДА ШАБАНТЕНЬ МАРХТА МОКШЕКС!»

Пяк пичефти ся, што кизоста кизос мокшекс корхтайда арси сяда кржа. Кда сявомс хуш монь идькс пингозень, 70-це, 80-це кизотнень велетнень эзга сембе шабатне корхтасть эсь родной кяльсост. Пеетькшневсть ся мокшетне, конат виздсть эсь кяльснон эзда. А 2000 кизотнень, Саранскяйса вузса тонафнемста, университетонь общежитияса, коса эрясть районцта саф тонафнема студенттне, шуроста васьфтелеть од ломань, кона ба афолезе сода эсь родной кяленц. Тоса и тяса кайгсь мокшень и эрзянь кяльсь.

 

Ётась аньцек 20 киза и ся пингста лама мезе полафтсь. Кепотьксонди, тяни Н.П.Огарёвонь лемса МГУ-нь филологическяй факультетста аф эсток муят од ломань, кона ба корхталь ару мокшень кяльса. Тяниень пингонь студенттнень эзда ламонцне, конат сафт мокшень и эрзянь кяльхнень тонафнема, аньцек шарьхкодихть, а  родной кяльса корхтама тяряфнихть тонафнема вузса, и тя, аф ваномок сянь лангс, што синь шачсть и эрясть велеса. Лисенди, тядясна-алясна ня касф шабатнень родной кяльть лангс мяль ашесть шарфне. А аньцек школаса «Мокшень кяль» предметть тонафнеманц вельде кяльсь роднойкс мзярдовок аф арай. Вдь роднойкс сон лувондови эста, мзярда тя кяльса шабась азсыне васенце валонзон. Шачемань кяльса ломанти инь лац азондовихть мяленза-арьсеманза, тя кяльса арьси сонь пряуец.

 

Кялень юмамась—тя прябала, кона ащи ёмла лувксонь эрь народть инголе.      ЮНЕСКО-ть даннаензон коряс, средняйста эрь 15 шиста юмси фкя кяль. Кда эсонза аш фкявок корхтай, сон лемневи кулофокс. Мекольце пинкнень башка мяль шарфневи мокшень и эрзянь кяльхненди, сембе минценнеть ванфтоманцты. Но тя тевса шарьхкодема ся, што ламось ащи эсь эздонк. Корхтатама-аф минць эсь кяльсонк? Лувонттама-аф шачема кяльсонк литература? Тонафтсаськ-аф кяльти иденьконь?

 

Таколфты ня кизефкснень колга ня шитнень корхнеме мокшень кялень и литературань тонафтыть Т.Н.Макеевать мархта. Татьяна Николаевна покоди Ковылкинскяй райононь Порапа велень средняй общеобразовательнай школаса. Тя пара вайме учительницать мархта корхнемста шарьхкодевсь, Татьяна Николаевна музе эсь вастонц эряфса, седишкава кельгсы эсь тевонц, эсь кяленц, народонц
28.01.2021 №3

 

ТАТЬЯНА ЩУРКОВАТЬ СУВЕНИРОНЗА УЛИХТЬ ОМБА МАСТОРСОВОК

Тячиень героиняньке Татьяна Петровна Щурковась шачсь и кассь Саранскяйса, творческяй ширде асу семьяса. Пяк ламотне радня ломанензон ёткста сафтсазь эрь кодама кядьтевса. Аляц, кепотьксонди, лац рисовандай, тядяц—мастерица стамать-кодамать коряс, атянза-бабанза маштсть сюрень кштирдема, цебярь плотниктольхть и строительхтельхть, а сире бабанза-щаванза котцельхть котфт и мазыста сёрматкшнельхть сюреса. Синь маштомошисна ётасть Татьянативок. Шабакс, тядянзон-алянзон мархта ульцява шарондомста, най ванондолезень тараткятнень-ункскятнень: мезень лангс шарфты, кона вастонц керомс, а коса—поладомс. Тя тевсь тячемс кельгови теенза, куду сидеста канни мялень салай тараткат. Пластилинць, сёвонць, краскатне, лаксь стане жа мархтонзот идькс пингста сявомок. Эздост Щурковать машты кядензон вельде эвондакшнихть няканят, звернят, ёмла сяканят, вяшкомат, сельмованфонь салай картинат и лама мезе лия.

28.01.2021 №3

 

Мордовскяй (мокшень и эрзянь) народонь Межрегиональнай общественнай организациять председателец, филологическяй наукань докторсь, профессорсь Ю.А.МИШАНИН: «ИНГОЛЕ—ТЕВДА ЛАМА!»


 

НАЦИОНАЛЬНАЙ КУЛЬТУРАТИ КЕЛЬГОЗЬ


 

Саранск ошень П.С.Кирилловонь лемса Краеведческяй библиотекать заведующаец Н.М.Бояркина: «ТЕВОНЬКЕ ЭРЯВИХТЬ РОССИЯНЬ ЛАМА НАЦИОНАЛЬНОСТЕНЬ НАРОДТИ"

—Нина Михайловна, кода работай коронавируснай пандемиять пингста Саранск ошень П.С.Кирилловонь лемса Краеведческяй библиотекась?

 

—Кода содаф, тяддесь Россиянь Президентть В.В.Путинонь Указонц коряс азф Славань и Мялямонь кизокс. Сяс библиотекать тяддень тевсонза васенце вастса ащи патриотическяй работась, конань эса минь вятьсаськ-ётафтсаськ  ёмла, од и эряфкшу лувиеньконь ёткса. Тя и лия работать пандемиять инкса ладяф ограниченияда инголе минь сяда сидеста ётафнеськ библиотекать зданияса. А мзярда ладяфтольхть ограниченият, сембе мероприятияньконь минь ушедоме ётафнема онлайн-форматса. Информациясь колгаст тяфта жа лихневи-латцеви библиотеканьконь страницаса, конат панчфт «ВКонтакте», «Одноклассники» социальнай сетьтнень эса и официальнай сайтсонк.

 

—Нина Михайловна, кодама мероприятиятнень вельде пачфнесасть од поколенияти атянь-атяснон Подвигснон колга, конатнень синь тиезь Великай Отечественнай войнать пингста фронтса и тылса, мялямть?

 

—Тяддеть ушетксста сявомок и тя пингс, Саранск ошень П.С.Кирилловонь лемса Краеведческяй библиотекась ётафтсь эряфс мероприятиянь целай цикла, конат лемтьфт воиттнень и тылонь труженикнень подвигснонды, а тяфта жа Великай Победать 75 кизонь юбилеенцты.

03.12.2020 №47

 

МОКШЭРЗЯНЬ ЩАМСЬ ШАБАНЬ СЕЛЬМОСА

Моли тялоть васенце ковоц—декабрсь. Коль сяда кржа пингта ляткшни 2020 кизоть шумордамс и Од кизоть самс. Тяддесь, коронавируснай инфекциять мяльса кирдезь, ульсь аф тёждя. Ломаттне, эрсь эздонк, пуроптозь марс вийснон и ушедсть тюрема апак учсек урмать каршес. И вов ни сембе минь аноктама васьфтемс 2021 кизоть. Кодамкс сон ули? Мезе канды? Кода, кле, Од кизоть васьфтьсак, стане и ётафтсак. Сяс арьсема тянь колга инголенди. Тядде ламоц пуромксне ётафтовсть онлайн-форматса. Интернетть вельде примафоль участия конкурснень, викторинатнень, фестивальхнень, флешмопнень эса. Конешна, тяфтама форматсь аф пяк тонатф, но тундаста сявомок тячиень шити  интернетса мероприятиятне мольфтевихть сяда тов. Активнайста тянь ширде эсь прянц няфтезе «Мокшень правда» газетать кунардонь ялгац—Самарскяй областень Тольятти ошень Мокшэрзянь культурнай центрась. Онлайн-флешмобонзон, конкурсонзон, лия мероприятиянзон колга пачфнеме сидеста. Лемтьфтольхть синь спортти, ялгаксшити, родной кяльхненди, нароттнень ёткса соткснень кемокстамаснонды… И вов Од кизонь каршеня Мокшэрзянь культурнай центрась азсь тялонь, улема, инь кельгома тя праздникти лемтьф «Мокшэрзянь костюмсь иттнень сельмоса» рисункань конкурс. Организаторть валонзон коряс, сонь целец—эвондафтомс иттнень эса наследиять ванфтоманц мархта сотф мяльхть-арьсемат, штоба подросткатне и шабатне содальхть сяда лама Россияса эряй национальносттнень, этнокультурнай питнишить, нароттнень койснон колга, конат няфтевихть национальнай щапнень и синь орнаментснон эса.

 

03.12.2020 №47

 

Инвалид-иттне апак юкстакт


 

«ТОРАМА» ФОЛК-ГРУППАСЬ—«ПОЛЕ ЧУДЕС» КАПИТАЛ-ШОУСА!


 

ТЯФТАМА ВАСЬФНЕМАТНЕ ЭЖНЕСАЗЬ ВАЙМОТЬ

Ётась «Волга–река мира» Международнай этнокультурнай XIX-це фестивальсь-экспедициясь

 

 

Арась эсь лацонь койкс эрь кизоня етафнемс Поволжьянь ошнень эзга «Волга–река мира. Диалог культур волжских народов»  этнокультурнай фестивальть-экспедициять. Тядде международнай тя форумсь пуроптфоль кевейхксыецеда. Кода фалу сонь работасонза примасть участия региональнай властень, национально-культурнай общественнай организациянь представительхть, содаф ученайхть, артистт, писательхть, журналистт, конат сашендсть Россиянь 14 регионцта. Сембоц пуромкшнесь 80 ломань. Фестивальсь арась теест васедема, инь пичефтить-таколфтыть колга седикс-ваймокс корхнема вастокс. Ваномс кепотьфоль лама оржа кизефкс, конат, васендакиге, сотфтольхть национальнай культурать, кяльхнень ванфтомаснон мархта. Якстерь сюре кикс таргавсь фестивалень программать эса военнай тематикась, вдь тядде минь васьфтеськ Великай Победать 75 кизонц.

 

18.09.2020

 

А.БАТЫРЕВ: «ТЕАТРАСЬ ВЕШСЫ АКТЁРТЬ ЭЗДА ПЕДА-ПЕС ПРЯНЬ МАКСОМАТЬ»

21 августста Мордовия Республикань Оцюнясь В.Д.Волков нолдась полафткс 78№-сь Указти, кона водендаф од коронавируснай инфекциять келемоманц каршес. Мордовияса панжевсть театратне и кинозалхне. Синь работасна ётнихть санитарно-эпидемиологическяй сембе вешфкснень мяльс кирдезь. Театрав сайхнень ункснесазь температураснон. Обязательна эрявкстыхть маскат и перчаткат. Залса ваныхне озафневихть кафта озама вастонь вельф. Залсь пяшкотькшневи аньцек 30 процентс. Спектакльда меле театраса ётафневи дезинфекция.

 

Мокшэрзянь Государственнай Национальнай драматическяй театрась карантинть пингста ётафтсь 35 онлайн-спектакль. А 28 августста ётась васенце спектакльсь залу пуромф ваныхнень мархта.

 

86-це театральнай сезонць панжеви тячи, 17 сентябрьста, 18:30 частста «Саня, Ваня, мархтост Римас» народнай драмаса, кона лемтьф Великай Отечественнай войнать 75 кизонь юбилеенцты. Актерхне кармайхть корхтама эрзякс, а кялень аф содайхненди ули кода нолдамс тевс наушникт, конатнень вельде кулеви спектакльсь рузкс. Омбоце премьерась ётай 20 сентябрьста. «Золушка. В ожидании чуда» спектакльсь-ёфкссь пуроптсыне залу иттнень.

 

 
18.09.2020

 

 
 
 

 
НОВОСТИ
 

Республикаса коронавирусса сярядихнень лувкссна кири

Мордовиянь Оцюнять аф лама пингс тевонзон тиендисна Артём Здунов 18
февральста ётафтозе республикаса коронавируснай инфекциять инголдаманц и
келемоманц коряс оперативнай штабть заседаниянц. Ванондовсть уликс
эпидемиологическяй ситуациять, COVID-19 эзда вакцинациять, здравоохранениянь
региональнай системать тевонь мольфтеманц, санитарно-эпидемиологическяй
вешфкснень ванфтомаснон мельге контролень вятемать коряс кизефксне.
Примсеви мератнень инкса республикаса коронавирусса урмаськодыхнень лувкссна
кири. Тяниень пингть ковиднай госпитальхнень эса пчкси 1000-да кржа пациент
(стака пинкнень ульсь 2000 ломань), кири лувкссна и амбулаторнайста
пчксихнень. Пчкафтомань учреждениятне меки мртцихть работань плановай
режимти, латцевихть специализированнай медицинскяй лезксонь максомань
объемтне.
Но райоттнень эзга тефне ащихть лиякс. Коса урмаськодыхнень лувкссна кири, а
коса меколанкт—касы. МР-нь Оцюнять аф лама пингс тевонзон тиендисна шарфтсь
тянь лангс башка мяль и кошардсь ваномс ся райоттнень эса тефнень
мольфтемаснон, коса эпидемиологическяй обстановкась аф цебярьготкшни.
«Ардатовскяй, Ельниковскяй, Большеберезниковскяй, Большеигнатовскяй,
Старошайговскяй, Чамзинскяй, Рузаевскяй, Ковылкинскяй и Кадошкинскяй
райоттне—тиньцонт урмаськодыхнень лувкссна сяда оцю, кда сявомс целайнек
марнек республикать эзга,—кемоста азозе Артём Алексеевич муниципальнай
райононь оцюнятненди.—Эряви максомс анализ ситуацияти, ваномс, кодама мерат
примсевихть».
Нинге  фкя таколфты кизефкссь—сядонга лама урмаськодыхнень лувксса эряфкшу
ломаньда. Ня даннайхнень кемокснесыне Роспотребнадзорсь.
«Тиемок анализ тя недялять урмаськодыхнень лувксснонды, минь няйсаськ, што
коронавирусса сярядихнень лувксса 65 кизоса и сяда сире ломаньда арась сяда
лама—27,7 процент, а ётай недяляня ульсь 23 процент, лиякс азомс, моли
касома,—отмечазе МР-ть эзга главнай санитарнай врачсь Татьяна Харитонова.—
50-60 кизосотнень ёткса урмаськодомась лядсь сяка уровеньца».
«Урмаськодыхнень лувкссна кири, но эряфкшу ломаттнень заразиндавомань
талекасна касы, а Ардатовскяй районца тя показательсь и ёфсикс няфни 40
процент»,—мярьгсь Артём Здунов.
Тянкса оперативнай штабсь кирдезе 65 кизоса и сяда сире ломаттненди
самоизоляциянь режимть сяда тов кувалгофтомань пингонц коряс предложениять.
Нинге фкя важнай темась, кона ванфоль заседанияса,—коронавирусть эзда
вакцинациясь. Мордовияса сон ётай активнайста, региону пачфтьф 33 тёжяньда
лама вакцинань комплект, прививка тифтсь пцтай 26 тёжянь ломанць.
Ладявсь аптекатнень эса лекарстватнень улемаснон мархта тевсь. Кой-кона
позициятнень коряс, кода азфоль, республикань государственнай аптекатнень
эса тиф запас  аф колма ковонди, а нльне кафтошка кизонди.
Но улихть прябалат льготнай лекарстваса обеспечендамать мархта, мезть лангс
шарфтсь башка мяль МР-нь Оцюнять аф лама пингс тевонзон тиендисна, и кемоста
азозе республикань Здравоохранениянь министерствати курокста ладямс тянь
мархта сотф ситуациять и сяда тов кирдемс башка контроль ала.
Оперштабть заседаниянц песта республикань руководительсь мярьгсь: сембе
главнай кизефксне, конат сотфт здравоохранениянь системать работанц мархта
пандемиять пингста, ванфнесазь эсь эрявиксшиснон. Од коронавируснай
инфекцияса сярятькстыхнень лувксснон кирьфтаманкса и сяда тов ситуациять
цебярьгофтоманкса организациянь руководительхненди,      республикань
эряйхненди эряви и сяда тов кемоста ванфтомс эсь прянь араламань мератнень и
санитарнай врачнень вешфксснон.
25.02.2021  № 7
 
 

МР-нь Оцюнять аф лама пингс тевонзон тиендисна Артём Здунов Москуса васетькшнесь Россиянь культурань министрть Ольга Любимовать мархта

15 февральста Москуса ульсь РФ-нь культурань министрть Ольга Любимовать и
МР-нь Оцюнять аф лама пингс тевонзон тиендиснон Артём Здуновонь рабочай
васедемасна. Васедемаса главнай кизефксокс ульсть велень Культурань клубонь
строямась и уликснень петемасна, а стане жа региононь культурань
учреждениятнень эса кинозалхнень оборудованиясна.
«Велень Культурань клупне ломаттненди эрявихть. Минь фалу кирттяма соткст
региональнай власттнень мархта и ваттама ня объекттнень эса сяда тов тевонь
мольфтемать мельге. Тя тейнек эряви, сяс мес од площадкань панжемась и
уликснень петемасна панчсихть ки ломаттнень творческяй маштомошиснон
виияфтомаснонды и мушендомс асуфнень»,—мярьгсь Ольга Любимова.
Эсь ширденза Артём Здунов азсь благодарностень валхт Россиянь Культурань
министерствать лемс Культурань куттнень строямаса лезксонкса и отмечазе, што
Мордовияти велетнень эса Культурань кудонь строямась—тевонь вятемань важнай
направлениясь.
18.02.2021  № 6
 
 

Ванондовсь инвесторхнень мархта экотехнопаркть строяманц коряс кизефкссь

Мордовиянь Оцюнять аф лама пингс тевонзон тиендисна Артём Здунов 3 февральста васетькшнесь «Террикон» компаниянь, кона тиенди кархчнень-ляткснень обработкаснон коряс объектт,  группать руководстванц мархта. Компаниясь Мордовиянь руководительти макссь ваномс экотехнопарконь, конанди сувси единай межмуниципальнай полигон и кархчень сортировандамань комплекс, строямать коряс проект.
Лятфтасаськ, «Экология» национальнай проектть эряфс ётафтомань рамкаса путф задача кирьфтамс полиготтнень эса кархчнень калмамаснон лувксснон и кеподемс производственнай процесса вторичнай сырьять лувксонц тевс ноляманц. 2030 кизоти арьсекшневи пцтай сембе ляткснень кучсемс переработкас.
Артём Здунов педа-пес ванозе няфтьф проектть, конань эряфс ётафтомац арьсекшневи государственно-частнай партнерствань механизматнень вельде инвесторть эсь средстванзон лангс кредитнай ресурснень сувафтозь. Инвестициянь объёмсь лувондови 2,4 миллиард цалковайса, рабочай вастонь панжемась—250 ломаненди.
Артём Здунов шарфтсь башка мяль сянь лангс, штоба аф нолдамс тиф расчёттнень эса эльбятькст, проектть эряви няфтемс «Российский экологический оператор» компанияти, кона эряфс ётафнесы    ТКО-нень обработкаснон коряс государственнай программать.
11.02.2021  № 5
 

Тяфтама продукцияти ули вешфкс сембе вастова

Мордовия Республикань Оцюнять аф лама пингс тевонзон тиендисна Артём Здунов ульсь «Оптикэнерго» компаниятнень группаснон предприятиянзон эса, кона, 2020 кизонкса рейтинговай оценканзон результатонзон коряс, лувондови лидерхнень эзда фкясь республикань промышленнай предприятиятнень ёткса.
Сембоц компаниятнень группасост 22 предприятия, промышленнай направлениясь няфтьф «Сарансккабель-Оптика», «ЭМ-Кабель», «ЭМ-Кат», «ЭМ-Пласт», «Сармат» завоттнень мархта.
Мордовия Республикань Оцюнять аф лама пингс тевонзон тиендисна лац-ряц содафтсь предприятиятнень мощностьснон мархта, улемок компаниятнень группаснон производственнай сембе площадканзон лангса. Кода азондозе «Оптикэнерго»  ГК-ть директоронзон Советснон председателец Эвир Боксимер, предприятиятне обеспечендасазь потребительхненди кабельнай продукциять марнек производстванц комплексонц (катанка—пролоп—кабель—арматура подвесонди), тяка пингть 2020 кизоня инновационнай продукциять объёмоц ня предприятиятнень эса ульсь 80 процент ноляви изделиятнень марстонь объёмснон эзда. Холдингть кабельнай продукцияц пачфневи оцю госкорпорациятненди и ноляви тевс странань знаковай ламоц  объекттнень эса.
Республикать руководителенцты стане жа азондсь компаниятнень группаснон предприятиянзон эса корпоративнай культурать и работникненди дополнительнай социальнай гарантиятнень колга, конатненди сувафневихть работас и работаста служебнай транспортса питнефтома пачфнемась, пси ярхцамбяльса обеспечендамась, медосмотратне.
Сембоц компаниятнень группасост тяниень пингть работай 1700-та лама ломань, промышленнай направленностень предприятиятнень эса средняй заработнай платась 2020 кизоня ульсь 50 тёжянь цалковай.
Мордовия Республикань Оцюнять аф лама пингс тевонзон тиендисна стане жа ульсь «Оптикэнерго»  предприятиянь музейса, коса содафтсь компаниятнень группаснон историянц мархта и кадсь почётнай инжиень книгати тяштькс, арьсемок сяда тов лац-ряц работамс производственнай од платтнень ётафтомстост.
11.02.2021  № 5
 

Мордовияв рабочай визит мархта сашендсь Россиянь промышленностень и торговлянь министрсь Денис Мантуров

5 февральста Мордовияв рабочай поездка мархта сашендсь РФ-нь промышленностень и торговлянь министрсь Денис Мантуров. Ведомствань руководительсь, конань мархта сотрудничендамань сотксонь кирдемась пяк эряви республикати социально-экономическяй ширде виияфтоманкса, макссь питне республикать промышленнай потенциалонцты, панчсь од производственнай линия «Биохимик» заводса, содафтсь региононь инголи моли предприятиятнень продукцияснон мархта и ванозень МР-нь Оцюнять аф лама пингс тевонзон тиендиснон Артём Здуновонь мархта промышленностень и торговлянь сфераса марстонь  проекттнень эряфс ётафтомаснон коряс кизефкснень.
Мордовияса министрть рабочай программанц васенце пунктокс арась «ВКМ-Сталь» заводсь—Россиянь инголи моли металлургическяй комплексонзон  эзда фкясь, кона заняф машина кинь, автомобильнай и нефтегазовай отраслятненди, велень хозяйствати литьень нолдамаса. Предприятияса Денис Мантуров ванозень производственнай линиятнень.
Вагоннай литьянь производствать коряс «ВКМ-Стальсь» сувси Россияса инголи моли колмотнень ёткс. 2020 кизоня нолдаф 48 тёжянь тонна товарнай продукция, оцю вагоннай литьянь производствань объёмсь ульсь 10 тёжяньда лама вагонокомплект. Ноляви продукцияти лувкссь несколька кизоста кассь 30-ть эзда ушедомок 500-ти  молемс.
Холдингть Президентоц Константин Данилов азондсь литейнай производствать одкстоптомань васенце этапонц меля шумордаманц колга, нолдавсь тевс тяниень пингонь электродуговой сталеплавильнай пянакудсь, конань ёмкостец—16 тонна.
Азфоль, што модернизациянь программась сяда тов кармай мольфтевома мелкай и средняй литьянь нолямать коряс мощносттнень касфтоманкса. Тянь инкса  панжеви пцтай 500 рабочай од васта. Проектнай мощностьс лисемась арьсекшневи 2024 кизоня, инвестициянь объемсь—3,7 миллиард цалковай.
Тевс ноляви технологиятненди вийс коре цебярьгофтомс трудонь условиятнень, сяда касфтомс производствать экологическяй ширде  арукс улеманц. Кепотьксонди, 2020 кизоня путф 20 миллион питнеса кожфонь аруяфтомань системась аруяфнесы кожфть  тяфта лемневи «рдазу» металлургическяй производстваса.
Башка токсевсь производствать диверсификациянц и кадратнень коряс темась. Денис Мантуровонди азондозь, кле, профессиональнай металлургонь анокламань системась ладяф ни несколька киза и тяниень пингть вузса тонафнемать пингста кочксевихть асу цёратне  и аф аньцек минцень регионцтонк. 
«Ушеткшнеськ кадрань кочкамать несколька кизода инголе кафта профессиональнай металлургста, тяни ни анокламе 50 специалист, и нинге кемоттне аделасазь тонафнемаснон тядде»,—мярьгсь «ВКМ-Стальть» управляющай директороц Николай Чалов.
Предприятияса средняй зарплатась 42 тёжянь цалковай.  «ВКМ-Стальсь» сувси республиканскяй 10 предприятиятнень ёткс, коса пандови ломаттненди оцю зарплата.
11.02.2021  № 5
 

Евгений Алушкин: «ТЕЙНЕ АШ КОДА ЛЯДОМС ШИРЕСА»

Россияса коронавируснай инфекцияса васенце сярядись муфоль 2020 кизонь 31 январьста. Пцтай киза ни минь эрятама тя пелькс урмать мархта. Тяддень 20 январти ковидть мархта савсь васедемс Мордовиянь 15173 эряйти. Кода аф ужяль, 119 ломанць (стане жа 20 январти) ёткстост кулость урмать сюнеда.
Пандемиять пингста, шарьхкотьф, сембода стакаста сашендови медицинскяй работникненди. Ащемок, кода корхнихть, передовойса, синь шинек-венек эсь прянь аф ужяльдезь тюрихть урмать каршес. Сидеста врачне аф сатнихть, теест лездома сашендыхть    студенттне—сай пингонь докторхне. Фкясь синь ёткстост од цёрась, Н.П.Огаревонь лемса МГУ-нь Медицинскяй институтонь тонафнись Евгений Алушкин. Аф фкя ков ни сон работай 5№ Республиканскяй клиническяй больницяса, кона пандемиять ушетксста ётафтфоль ковиднай госпиталенди, лиякс мярьгомс, тяса тяни пчкафневихть коронавируснай инфекцияса сярядихне. Аф кунара Евгениень мархта удалась корхнемс минь корреспондентоньконди. Сон азондсь аф тёждя тевонц колга, кода ётни рабочай шиц, мезсь сембода стакась и кода вятьсазь пряснон сярядихне.
04.02.2021  № 4
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин