Тяниень пингть пяк лама аф фкя лацонь периодическяй изданияда. Но инь удалафсь еткстост, койсон, «Мокшень правдась». Шять, сяс сон лиятнень коряс сяда мала седити, мес лисенди тядянь-алянь родной кяльса. Но аш кода аф азомс и сянь, што газетась пяк козя и мялень салай содержанияс коре. Тя изданияста мусаськ семботь: мезе однясь республикаса, кода мольфтевихть тефне промышленностьса и велень хозяйстваса, кодамот полафтксне образованияса, медицинаса, культураса. Сембось тя тяштьф шарьхкодеви, теждя кяльса.
Газетать лувондомонза ушедонь пяк кунара. Ся пингста «Мокшень правдась» ламода полафтсь. Васенце полосась и кучка лопанятне тяни лисендихть разнай тюсса, мезенкса газетась арась сядовок удалафокс. Изданиять эса эвондась  лама од темада.
Тушенды мялезон «Мазыхть мокшень стиреньке» конкурссь. Ня материалхнень эса аф аньцек пачфневи мокшень стирьхнень мазышиснон, удалаф тевснон, сатфксснон колга, но и няфневи мокшень щамть-карямть мазышиц.

1 сентябрьста ушеды од подписной кампаниясь
Кельгома ялгат! 1 сентябрьста ушеды 2019 кизоть васенце пяленцты минь тинь мархтонт кельгома «Мокшень правда» газетаньконди сёрматфтомась. Сон тяконясь-фкянясь странасонк, марнек масторлангса. Лия газета мокшень кяльса-валса косовок аф ноляви. Сон ськамонза, сяс тейнек кородозь ванфтома.
97-це кизось ни лисенди «Мокшень правдась». Тняра киза лезды эсь народонцты, мокшэрзятненди, штоба сяда лац содамс сянь, коса шачеме-касоме, кодама ки ётаме, мезе тиеме и сатоме, лезды ванфтомс сембе минценнеть, роднойть.
Мокшень газетаса покоди журналисттнень пландост, арьсемадост лама. И синь семботь кармайхть тиендемонза сянкса, штоба газетась тушендоль лувихнень мяльс, штоба сембоса отвечаль тячиень вешфксненди.

«МОКШЕНЬ ПРАВДАТЬ» МАРХТА ЯЛГАКС АРАНЬ ПЯК КУНАРА»
М.И.Бикеева, Мордовия Республикань культурань Заслуженнай работник, Старошайговскяй райононь Лемдяй велень эряй:
—«Мокшень правда» газетать мархта ялгакс арань пяк кунара. Мзярда васенцеда повсь кядезон, морафтыне педа-пес. Мялезон пяк тусь ся, мезень колга и кода тяштсть мокшень    журналисттне. Ётасть кизот, а газетать стаки лувондса. Эрь номерста мушендан мезевок одня. Велень ломанян, сяс васендакиге вешсайне велень эряфть, тяса эряй ломаттнень, лиякс азомс, семботи тянди лемтьф тематнень. Кельгома тевозе—сюреса сёрмадомась. Малат тейне тяфтама асуса казьф машты кядь ломаттнень квалма материалхне. Аф кржа эздост уленди «Шумбрат, Мордовия!» народнай творчествань республиканскяй фестивальса. Монцьке эрь кизоня примсян участия выставкатнень эса.

Тяниень пингть аш прябалат коста мумс информация тя или тона темас. Кулхцонтт хуш радио, сувак хуш интернету, ванонтт телевизор, лувонтт газетат, журналхт. Но сембода мала тейнек, сембода кельговикс—«Мокшень правда» газетась. Колмогемоньда лама киза эрян эсь шачема велесон и сембе пинкнень мон серматфнеса кельгома изданиязень. Мес васенце вастти путнеса «Мокшень правдать»? Васендакиге сяс, мес сон лисенди эсь родной кяльсонк. А минь нинге ашеськ юкста эсь кяленьконь и тянксонга оцю спасиба «Мокшень правдати». Тя изданияста мусак семботь: мезе однясь республикаса, кода мольфтевихть тефне промышленностьса и велень хозяйстваса, кодамот полафтксне образованияса, медицинаса, культураса. Семботь тянь колга газетать журналистонза азондыхть шарьхкодеви кяльса, эрь статьясь, корреспонденциясь, репортажсь токасы седицень, мяльце лувомс газетать педа-пес, а кой-кона заметкатнень—афи весть. Газетань лама номер кирдян эсь архивсон, коса улихть цебярь советт шумбрашить кемокстаманц, эсь хозяйстваса тефнень маштозь вятемаснон, од породань жуватань, нармонень касфтомать, сявф урожайть ванфтоманц квалма. Бта тяфтавок ламось содаф, но однясь ня кизефкснень эса най кондясти.
Велень администрациянь оцюнякс монь кочкамазь аф кунара. И тиса семботь, штоба «Мокшень правдась» Пою велеса улель эрь кудса, эрь семьяса. Пара и ся, мес газетась аф юкснесы веленьконь, эсь лопанянзон эса сидеста азонды содаф ломаненьконь, велесонк полафткснень колга, мезсь пичефтьсамазь и таколфтсамазь. А кельгома изданияти арьсян сяда лама серматфтыда и газетать 100 кизонь юбилеенц васьфтемс оцю сатфксса, лама интереснай материалса.