Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Обратная связь (Газета - Читатель)

КУРТАШКАСЬ АРАСЬ ТЕЕНЗА РОДНОЙКС

09.07.2020

 

АФ ЯВОНДАН «МОКШЕНЬ ПРАВДАТЬ» МАРХТА


 

ЛИССЬ КНИГА ЁЖКА ВЕЛЕНЬКОНЬ КОЛГА

Аф кунара Ковылкинскяй райононь Ёжка велезонк сась кеняртьфти куля: Ковылкинань типографияса лиссь веленьконь колга од книга, конань лемоц  «Ежовка—село наше родное». Сонь авторонза Ёжка велень бизнесменць Андрей Яковлевич Веряскин и учительсь-пенсионерсь Аким Фадеевич Тремаскин.

 

Книгаса лувись мусы велеть историянц, мзярда сон эвондась, мес сонь тяфтама лемоц, кода эрясть велеряйхне революцияда инголе, Советскяй властть пингста, перестройкада меле, кодама эряфсь велеса тячи и стак тов. Книгась пцтай марнек лемтьф сире поколениянь ломаттненди, конат няезь и кирдезь сембе аф няематнень.

 

Авторхне якасть кудга, сёрматкшнезь синь эряфснон-ащефснон, кочкасть лама фотоматериалда, архивнай и статистическяй даннайда, а инь питнись книгаса ломаттнень эсь азкссна ся пингонь эряфснон колга.

 

Книгаса крхкаста максфт велеть, церькавть, школать, велень Советть, рыбопитомникть, торфартельть, коллективизациять, колхозть и велень сембе учреждениятнень и хозяйстватнень историясна.

 

Койсон, авторхне путсть пяк оцю честь войнань сембе участникненди, тылонь труженикненди, лама идень касфты тядятненди, войнаса шавфненди и войнань инвалиттненди, велень содаф ломаттненди.

 

03.07.2020

 

А.Т.Асташкина: «Мокшень правдась» монь кельгома газетазе»

Тяфтама ни тяни пингсь (пандемиять сюнеда), што тейнек, корреспонденттненди, сяда сидеста сашендови аф васетькшнемс ломаттнень мархта, а корхнемс телефононь пачк. Ня шитнень гайфнеме газетаньконь пара ялганцты Анна Трофимовна Асташкинати.
Кочетовка велень (Инсарскяй районць) мокшавать А.Т.Асташкинать лемоц лац содаф республикань эряйхненди. Анна Трофимовна РФ-нь культурань Заслуженнай работник, марнек эряфоц сотф морамать мархта. Лама пинге сон вятезе Кочетовскяй народнай хорть, конанди тядде топодсь 80 киза.
Шачсь Анна Трофимовна тяка райононь Пою велеса. Оцю семьясост сембе морай ломаттельхть: кие—кургса, кие—музыкальнай инструментса. Анна Трофимовнаньге казезе Шкабавазсь  мазы вайгяльса. А нинге сон пяк лац морай баянца. Тя тевса мокшавась, кода корхнихть, самоучка, сонць тонадозе  инструментть шабакскиге улемста. Школать аделамда меле А.Т.Асташкинась тонафнесь Л.П.Кирюковонь лемса музыкальнай училищаса, а мзярда аделазе, сась работама Кочетовкань школав музыкань учителькс. Тязк и покодсь пенсияс тумозонза.
Мзярда Анна Трофимовна вятезе Кочетовскяй народнай хорть, сон, мярьгат, путнезе коллективти ваймонь пяльксканц, палозь палсь инксонза. Лама вий-эрьгя макссесь сянкса, штоба козя улель хорть репертуароц, мазыхть морайхнень щамсна-карямсна, штоба артисттнень сценать лангс эрь лисемасна ламос мяляфтоволь ваныти. И теенза тя удалсесь.
11.06.2020 №22

 

«МОКШЕНЬ ПРАВДАСЬ»—МИНЬ ЯЛГАНЬКЕ

Атюрьевскяй райононь Мокшень Козловка велень поселенияса 2020 кизоть васенце пяленцты сёрматф пяле сядода лама экземпляр «Мокшень правда».

 

—Эсь кяльсонк газетать сёрматфнесазь и Мокшень Козловкаса, и Боражса, и Сире Кушкса,—азозе связень отделениянь оцюнясь В.И.Норкина.—Монь родительне, Иван Васильевич и Нина Фёдоровна Борисофне, учительхть. Покодсть Боражень основной общеобразовательнай школаса. Кода мяляфтса, кудсонк фалу ульсь «Мокшень правда» газетась, и минь сонь пара мяльса морафнеськ, и морафнесаськ тянемс.

 

Связень отделенияса покодихть кафта почтальонкат, кафта мокшават З.В.Фокина и В.Ф.Морозова. Васенцесь каннесы почтать Мокшень Козловкань, омбоцесь—Боражень эряйхненди. Ломаттне синь шнасазь. Аватне эсь тевснон тиендьсазь совестьс коре.

 

Фалу оцю мяльса лувондсы «Мокшень правдать» велень поселениянь оцюнясь В.Н.Шукшин. Профессияс коре сон историянь учитель. Лама пинге покодсь школаса. Тяни    трудендай велень поселенияса. Тевоц аф тёждятнень эзда, но Владимир Николаевич старандай тиендемс сонь седикс-ваймокс.

 

 

19.03.2020 №10

 

«Мокшень правдать» кунардонь ялганза

Кяшалсь—кунардонь мокшень веле Атюрьевскяй районца. Тяса шачсь и кассь лама содаф ломаньда. Синь ётксост поэтсь А.С.Малькин, содаф руководительхне Ф.П.Девятаев, А.А.Аверясов, А.И.Карьгин и лиятне.
2020 кизоть васенце пялестонза «Мокшень правдась» канневи Кяшалса 50-да лама кудс. Ламонь киза эсь кяльса газетать сёрматфнесазь М.Ф.Тиштяпкина, Е.П.Поршина, О.П.Чепайкина, А.И.Кашуркина, А.П.Балашова и ламонцне лиятне.
Кепотьксонди, педагогическяй трудонь ветеранць Ф.А.Богданова «Мокшень правда» сёрматфни ведьгемоньда лама киза. А морафнемонза ушедсь нинге стирнякс. Эста эрясь Зубово-Полянскяй районца. Аляц, Алексей Егорович, фалу тяштьфнесь «Мокшень правда». Зубова Полянань педучилищада меле Фаина Алексеевна ушедсь покодема Кяшалса. Вятсь мокшень кялень и мокшэрзянь литературань урокт. Эсь кяльсонк газетафтома ёфси ашель кода. Сон лездсь тонафтыти урокс и аф класснай мероприятияс анокламста. «Мокшень правдань» кельгикс ульсь и мирдец—РСФСР-нь и Мордовскяй АССР-нь Заслуженнай учительсь В.С.Богданов.
20.02.2020 №6

 

МОРАФНЕСА ПАРА МЯЛЬСА


 

САЛАЗГОРЬСА УЛИХТЬ «МОКШЕНЬ ПРАВДАТЬ» ЯЛГАНЗА


 

Велетнень историяста


 

Лувись—газетать колга


 

 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин