Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Демография

Мордовиясь арась теест омбоце кудкс


 

МЗЯРА ИДЬТОТ, СНЯРКСТЬ ПАВАЗУВАТ


 

КАТК СЕМЬЯСА ЭВОНДАЙ СЯДА ЛАМА ШАБАНЬ ВАЙГЯЛЬДА


 

КЕЛЬГОМАСНА, СЕДИЕНЬ ЛЯМБОСНА САТНИ СЕМБОНДИ


 

ЭСТЕЕНЗА МУСЬ ТЯДЯ, А АЛЯНЦТЫ—ОД РЬВЯ

Комсь кафкса кизоса рьвяянь ефси од и мезеньге колга аф пичеди стирь лангс. Мес? Ну, вдь минь, алятне, тяфтаптама: корхтатама, што тейнек эрявихть вернайхть и заботлюфт, а минць кочксесаськ сятнень, кинь мазы шамац и ронгоц. Тяфта мон и рьвяянь стирь лангс, кона аф аноколь рьвакс лисемати и тядякс арамати.
Семьяньке срадсь-каладсь. Явомда меле лядонь ниле кизоса церазень мархта. Рьвязе лиссь рьвакс лиянди и тусь мархтонза Москуву. Кяжиелень сембе мирть-масторть лангс, сяс Антошканди мархтон ульсь аф весяла. Лезнесть тядяне-аляне, конат сидеста сявондезь унокть ширезост. А мон «ваянь» бизнесс…
Весть тядязе мярьгсь, што тяфта сяда тов аф эряви—аньцек работамс и работамс, и рамась тейнек Антошкань мархта путевкат крымскяй пансионату. Тя ульсь киза, конада меле Антошканди тума школав и, конешна, теенза эрявсь лацкас ваймамс.
10.10.2013 №40

 

АЛЯЗЕ АШ? СПАСИБА ШКАЙТИ!

Шачень 5 кизода родительнень свадьбадост меле, идсь семьяса ськамонолень. Эста ни тядязень мархта алязе эрясть аф кода, но монь сяка шачфтомазь.
Мзярда тейне ульсь 4 кизот, а тядязти—29, врачне путсть теенза диагноз—«рассеянный склероз»—и мярьгсть, што теенза эрямс лядсь аф лама пинге. Алязе курокста ушедсь латцема эсь эряфонц: ну, а кода лиякс, тяфтама аля юмси!
Мяляфтса, кода сон тушендсь и сявондезень мархтонза щамонзон, коверхнень, телевизорть… Авардень, мярьгондень, штоба афоль тушенда, сяс мес пяк кельгине сонь. А сон монь ряфцодемань. Прань и лоткань авардемда. Ашкордайне тядязень и максонь вал, што киндинге аф максса сонь обжамс.
Сон тусь. Сяльде мрдась. И тяфта аф весть. Вестевок ашень корхне тядязень мархта синь фкя-фкянь еткса ладямаснон колга. Эрянь пцтай фалу щавазень мархта, сяс мес эряволень вятнемс садику, меле школав. Тядязень шире улендень ваймама шитнень, кда сон кятаволь, ушнине пянакудть, урятцине кудботмоть, лезнень пирьфонь тевса.
Тя тяни, 25 кизоса, шарьхкодьса и ужяльдьса. Конашкава кальдяв ульсь теенза эста! 29 кизоса—кальдяв врачень диагноз, мирдсь кадозе, 90-це кизотнень ушеткссна, ярмак аш, мезевок аш…
Кудть, алязень мярьгоманц коряс, савсь мимс, и тейнек сатсь пяк кржа ярмакта—сатсь аньцек ташта куднянь рамамс. Тявок кирдевсь.
Тядязень мархта ушедонь эряма од вастс етамда меле, и маряськ пряньконь ефси аф мала ломанькс. Щятязе щавазень мархта ульсть и лядсть сяда малакс. Щятязень мон пяк кельгине, ляпе седи ломанель, семьянь оцюня, афкуксонь аля…
А лия ширде ванозь, кда улель цебярь алязе—афоль уле кеме характерозе, афолень уле тяфтамкс, кодаман тяни, а характерозе аф весть лезнесь эряфсон.
Мезське аф ужяль, ужяль аньцек тядязе. Кельгса сонь, но малакс ашеме ара, етксонк оцюкс фалу улень мон, а аф сон. А што алязе аш—спасиба Шкайти. Тняра кальдяв тейнек тись.  Аф кирттяма мархтонза соткст, аньцек шумбракснетяма. Аф лувондса сонь афкуксонь алякс.
А щавазень и щятязень мархта идькс пингозе ульсь павазу. Синь маштсть полафтомс цебярьса сембе кальдявть. И тяни мон содаса, кодамот павазсь и кельгомась, и арьсян каземс тянь сай пингонь шабаненди. И аф карман арьсекшнема, явомс или аф, кда синь алясна кармай моннеть лаца. Шабатнень павазсна сембода питнись эряфса.
17.01.2013 №2

 

ЭРЯФСОСТ ЛЕЗНИ ФКЯ-ФКЯНЬ ШАРЬХКОДЕМАСЬ

Валентина Николаевна и Александр Александрович Воробьефне касфтыхть колма шабат. Синь—Рузаевскяй райононь Сузгярьге мокшень велеса шнама ломатть. Киндивок и мзярдовок кальдяв ашесть тие, ашесть арьсе. Валентина Николаевна шачсь-кассь Сузгярьгаса, Александр Александрович  кассь Казахстанца. Тядянц и алянц мархта етасть эряма Мордовияв. Эряви азомс, аляц шачемас коре Зубово-Полянскяй райононь. Тяни Александр Александровичень тядянза-алянза эряйхть Рузаевскяй райононь Красное Сельцо велеса.
Воробьефне работайхть велень хозяйстваса 2001 кизоста сявомок. Валентина Николаевна доярка, мирдец—машиннай доениянь слесарь. Эряфса семботь сатнесазь эсь вийсост. Аф юксни колгаст велень хозяйствань директорсь, администрациясь. Тянкса теест Воробьефне азондыхть оцю спасиба. Вдь колма идень касфтомста эряви лезкс.
Емла шабать мельге ванома да ванома. Аш месть корхтамс, аф теждя, мзярда семьяса касыхть колма итть. Но мзяра кенярдема кандыхть синь! Шабать пеедемац максы эрьгат и лезды сяськомс ся стакатнень-сталмотнень, конат эвондакшнихть эряфоньберьф.
Валентина Николаевна и Александр Александрович  тонафтсазь шабаснон трудть кельгома. Шиста шис синь тонаткшнихть, а тядясна-алясна няйсазь идьснон лезксснон. Стирнясь лезды кудса, а церанясь—пирьфса. Емланяське ни няфнесы сембонди, мезе машты: эрь мезне ласьки телефонти, мзярда сон гайфти. Касы—сонга кармай лездома кудса.
Сембода оцюсь, Ирина, тонафни сисемце класса, кельгсы мораманц, мекольдень пингть кармась шарфнема мяль спортти—футболти. Мзярс Валентина Николаевна и Александр Александрович аф содасазь,  мезть мархта стирнясна сотсы эряфонц: спортть или музыкать. Спортть мархта пара ялгакс арась и Артем церанясна. Сон пяк кельгсы футболса налхкомать. Арьсетяма, эздонза касы афкуксонь футболист. Артем тонафни ветеце класса. Сембода емлати, Павликонди, нинге колма кизонят. Сон якай Ключарева велеса идень саду.
Валентина мокшава, а мирдец руз, сяс иттне  шарьхкодихть и корхтайхть кода рузкс, стане и мокшекс. Вдь шабатнень касфтомаса пяк питникс уленди ся, штоба максомс и кемокстамс идти ваймосонза кельгомать родной кяльти, модати.
И.Пятина.
17.01.2013 №2

 

Сявф эряфста

«15 КИЗА НИ ЭРЯН КОДА УЧСЕМАНЬ ЗАЛСА!»
Тяфта эсь колганза корхтай содафозе Ангелина, кона эряй кафта странаса—Голландияса и Белоруссияса. «Цебярь? Да кода азомс…»—ушеды азондома цебярь и кальдяв ширетнень тя «ожиданиянь залть», коза повонды аф кржа ава, конат лисихть рьвакс лия странаса эряенди.
Петеронь мархта знакомондаме раднянень шире. Корхтаманьке ульсь теждя—туме фкя-фкянь мяльс. Тердемань инжикс Дутинхему. Сяльде сась Минскяи. А меле тердемань рьвакс. Мон арьсень… ниле кофт! Минскяйса церазе, уноконе, ялгане, работазе. Кода тянь семботь кадомс? Но эвондась возможность работамс омба масторса. И мон тунь Голландияв. Васенда маряйне прязень бта райса. Мольсь 1998 кизось, минь—дефолт, дефицит, косовок аш надияма. А тоса—цебярь эряф, павазу ломатть, магазинца сембось ули, мазы ошт. Минь стиреньке ся пингть вешсть омба масторонь миртть. Надиясть, што тянь мархта решандавихть сембе прябаласна. Но, кода няевсь, ня семьятне и аватне ульсть пяк аф павазуфт.
 
20.12.2012 №50

 

КИЗОНЕ ПИЧЕФКС АФ КАНДЫХТЬ

Тейне 38 киза—и тя пяк мялезон! Пелихть и виздихть эсь кизоснон эзда аньцек сят, кие пяк пичеди паспортонь каготкаса цифратнень инкса. Монь кизоне кодамовок пичефкст аф кандыхть. Тяни. А васенда ульсь сяда стака. Фалу няевонь сяда одста кизонень коряс, и 25-26 кизоти паспортфтома ашемазь нолне «детям до 16» фильмас. А тяни касомань-вииямань кись фтала. И пяк пара. Ули сатомшка опытозе—и эряфонь, и профессиональнай. Мон ладяйне эсь эряфонь правиланень. Киньге мархта мзярдовок аф спорсян, спокойнайста эрян и работан. Тонадонь ладямс ломаттнень мархта. 30 кизода меле кармат сяда кржа пичетькшнема, сяда кржа пинге шарфнят прябалатнень лангс, сяда видеста азомс, тяни прябалатнень решандакшнесайне, мзярда эвондайхть, а мяльсон аф кирдьсайне, конат нинге могут лисемс. Ули оцю стирезе. Теенза пцтай 18 киза. Переходнай пингсь фтала ни, и минь корхнетяма мархтонза фкакс. 25 кизоса минь пяк лама тевдонк: вдь эряви касфтомс шаба, кочкамс ярмак, эряви ваймамс ялга мархта. И ламось кадондови сяда товолдонди. Ушедонь кеняртькшнема аф ламняти, сяда лама пинге шарфнян эсь лангозон. Кие-бди арьси, што, мзярда туят пенсияс, аньцек эста ули кода спокойнайста касфнемс панчфт и серматкшнемс крестикса. Но мон арьсян, што тянкса аф эряви учсемс пенсиять—эряви ушедомс кеняртькшнема тяни! Да, пяле эряфсь етась ни, но инголе стане жа пяле эряф. Да нинге—верондан тянди—сядонга цебярь эряф!
 
Н.ДУЛИНОВА.
13.12.2012 №49

 

КОМАСА—КОЛМА ШИТ

2,5 кизоста арнине пцтай сембе Германиять, етафтыне сембе ярмакозень. Стака диагноз, аф кирдеви аф лоткси сярятьфсь…
Мон аф эсь прянь юмафтыян. Ламос ашесть сатне вийне… Но весть мирдезе тусь работама и ашемань пала. Тя бта ряфцодемань. И кенярдень тянди. Тя бта тиемань аф муворукс эсь арьсефозень инкса. Шобдава, 9 частса, аф арьсемок эсь тевозень колга, симонь снотворнаень 62 таблетка, станяк аф арьсезь, симонь водкада (кулендине, што тяфта эряви). Эстейне-арам, тиине семботь лац: мирдезе сай аф курок, васенда штай-нардай, сяльде няйсы, што удан, и аф стяфтсамань. А шобдава ули ни поздна. Тяфта и лисель. Но авозезе, кона 15 киза сашендсь ширезонк аньцек недляшиста (мон ашине нолне), сась вержиста. Кулине, кода сон чакась кенкшти, юватькшнесь, но ашезь ту, учезе мирдезень. Сон эстокиге сргозьфнесь эсон, тердсь «скорай». Идемазь…
Колма шит улень комаса. Сргоземда меле врачсь кизефтемань: «Таблеткатнень водкаса симить?» Мон комафтыне прязень. «Тон фкя пильгса улеть Тоса,—мярьгсь сон и кизефтезе:—Кода Тоса?» Мон мярьгонь, што мезевок аф мяляфтан… Тяда меле содаса: ангел-хранитель ули. Авозезе верондай Шкайти, а мон Библиятьке ашине лувонда. Но эсонза серматф, што стака пингста сон кучсы эсь лезксонц сермакс, гайфтемакс, ломанькс. Содаса кемоста, што идемазе—аф случайность. Ну и наказай тяни Шкайсь. Улень шумбра, а тяни—инвалидностьсан. Пади, Шкайсь няфнезе пельксть мекольце кофнень, но, ужяленди, мон тянь ашине няй. И вов сидестонь сярядемат.
Ломатть, кулхцонкшнеда сянди, мезе лисенди мархтонт! Арьсесть эсь тевонтень, эста сяда курок лисефтяда ся карафста, коза эсь прянтень эцесть. Сиптяда сяпида? Таргатада? Аф мялезонт эряфонте? Эрь ломанти сонценнесь—тя эряфонь закон. Содаса, што эряви тонафнемс лия ломаттнень эльбятьксса. Но кие тяфта тиенди?
06.12.2012 №48

 

 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин