Поиск по сайту: 
 

Архив
 июль 
 2022 
пн вт ср чт пт сб вс
    123
45678910
11121314151617
18192021222324
25262728293031

 
 

 

Демография

ТЯСТЬ ЮКСТА ТЯШТЬФТЕМС ЭСЬ ПРЯНТЕНЬ!


 

«ЦЕЛЬСЬ ФКЯ: АФ КИРЬФТАМС МОКШЭРЗЯТНЕНЬ ЛУВКССНОН!»

Ётай недяляня Саранскяйса мордовскяй (мокшень и эрзянь) народонь Межрегиональнай общественнай организациять председателец, профессорсь Ю.А.Мишанин ётафтсь рабочай васедема Межрегиональнай организациять Мордовиянь районнай активонц мархта. Пингстонза келиста и крхкаста кепсевсть кизефксне, конат сотфт Населениянь Всероссийскяй переписть ётафтоманц мархта.

 

Рабочай васедемаса ульсть Мордовия Республикань Оцюнянь Администрациянь, Правительствань, Мордовия Республикать эзга государственнай статистикань Федеральнай службань территориальнай органонь представительхне, а тяфта жа Межрегиональнай организациянь Исполкомонь члеттне.

 

 

Мордовскяй (мокшень и эрзянь) народонь Межрегиональнай общественнай организациять председателец, профессорсь Ю.А.Мишанин:

 

 
—Кельгома ялгат, минь ётафтоме Населениянь Всероссийскяй переписти лемтьф ни аф кржа и аф фкя уровенень мероприятия. И тячиень васедемада мелевок тейнек эрявихть ётафтомс аф фкя форматонь форупт, конатнень эса нинге весть шарфтсаськ мокшэрзянь народть мяленц и ванфонц тяддень Всероссийскяй переписть лац-ряц ётафтоманц лангс.

 

Тевсь ащи вов мезьса. Населениянь Всероссийскяй мекольдень переписнень итогсна няфнесазь: мокшэрзянь народть лувксоц эрь переписень ётафтомда меле няевиста кири. Мзярда—100 тёжянь, а кой-мзярда мянь пцтай 200 тёжянь ломаньда. Сяс тейнек тяддень переписть пингста эряви пачфтемс Россиянь эрь мокшети и эрзяти: сон пови мокшэрзянь народть лувксс аньцек эста, мзярда эсь национальностенц сёрматфтсы «мордвин, или мордвин-мокша, мордвин-эрзя, мордвин-шокша, мордвин-каратай» валса. Кда кивок эздонк эсь национальностенц сёрматфтсы аньцек «мокша, эрзя, шокша, каратай» башка валса, сон аф сувай мокшэрзянь народть марстонь лувксс. А сувафтови «прочие народы» марстонь лувксти.

 

28.10.2021 №42

 

МОКШЕТ И ЭРЗЯТ!


 

Трускляй велень школаса сембось тиф, арьсеф иттненди

Рузаевскяй райононь Трускляй велень школась фкясь инь цебярьхнень эзда марнек республикаса. Сонць школась аф од, но сембось, мезе тяса тиендеви, сотф тячиень и вандыень шить мархта. Трускляень цёранятне и стирнятне сявондихть васенце и омбоце вастт эрь кодама олимпиадатнень и пялькстоматнень эса, школаса ётафневихть семинархт, васедемат мокшень кяльть и литературать сяда тов вельмофтемаснон коряс. Тяса афкукс ванфнесазь минцень коеньконь-обуцяньконь, школань музейса кочкаф велеть сембе историяц. Тянь ширде оцю работа тись школань тонафтысь Ф.Ф.Полынов, кона казьф «Патриот России» медальса. Тя сон шабатнень мархта якась велеряйхнень кудга, кизефнесть, кочксесть сире пингонь кядьгонят, щапт-каряпт, котфонь кодама станокт, самовархт, утюкт и лама лия мезе. Тяни сембе тя паршись мазопнесы велень школань музейнай комплексть. Лиякс аф азсак, сяс мес тяса кочкафт сядот экспонат.
—Мон ба мярьголень тяфта, школасонк сире пингонь эряфсь васедсь, сотовсь сяда тов аськоляй тячиень и вандыень эряфть мархта,—ушедсь азондома Трускляй велень школань директорсь, Российскяй Федерациянь общай образованиянь Почётнай работниксь Л.П.Иляева.—Видец, минь школасонк тяни ули сембось, штоба шабатне афолезь юксне сянь, коста молихть синь юрсна, мезькс и мезьса работасть синь атянь-атясна, кода ингольдень койхнень-обуцятнень сотомс тячиень эряфть мархта. Школасонк тонафнихть мокшет, руст, лия национальностень шабат, но сембе синь васенце вастса кирдьсазь фкя-фкянь шарьхкодемать, ялгаксшить. Мокшень цёранятне и стирнятне мяль вельде, кода маштыхть, тонафнесазь лия кялень шабатнень содамс минь кяленьконь. И ванат, аф лама пингонь ётазь пцтай аруста корхтайхть мокшень кяльса. Тяфта ульсь школаса исяк, тячи и кармай вандывок.
Няевиста, лац ладяф школаса патриотическяй воспитаниясь. Тяса сидеста ётафневихть васедемат войнань участникнень и тылонь труженикнень мархта, шабатне кепотьф мяльса примсихть участия военнай темас лемтьф слёттнень эса. Школать видеса аф васенце кизось ни лац работай «Наследие» поисковай группась. Шабатне вешендихть од фамилият, даннайхть сятнень колга, кие ашезь мрда фронтста, школав каннесазь синь фотографияснон, фронтста кучф сёрмаснон. Тянкса теест сюконяйхть аф аньцек воиттнень-боецнень мала ломаньцна, но и марнек велеряйхне.
—Минь школаньке лама мероприятия ётафтсь 9-це майда инголе и Победань шиня,—сяда тов азонды директорсь Любовь Иляева.—Вятсть вахта войнаса шавф воиттненди путф памятникть ваксса, озафнесть панчфт, урядазь перьфснон, архнесть, тисть лама лия тев. Школасонга Победань шити панчсефт уженят фронтовикнень фотографияснон мархта, сембе шабатне якасть георгиевскяй лентаня мархта, азондсть стихт, морасть войнань темас морот.
Мяленьке нинге азондомс сянь колга, кода школаса ётафневи эряфс «Точка роста» Российскяй программась. Сембось тя няеви и шарьхкодеви специальнай тя темас панчф класса. Целец тя программать сянь эса, штоба и велень шабатне афольхть ляда ширеса тячиень тонафнемань процессти однянь сувафтомаса. Тя класса мезе аньцек аш, фотографиятне тянь колга лац азондыхть. Латцефт тяниень пингонь программа мархта од компьютерхт, ётафневихть эрь кодама налхксемат, козя спортивнай инвентарсь, иттне заняфт шахматса, шашкаса. Сембось тя азонды аф аньцек иттнень содамошиснон кемокстамаснон, но и сяда лац эсь пряснон анокламаснон колга вандыень эряфти, профессиянь кочкамати. Ня занятиятне ётнихть интереснайста, иттне тяза сашендыхть оцю мяль вельде, эрь шиня. Аф эрь школась шнафты пря тяфтама класс мархта, Трускляень шабатненди тянь ширде удалась. И синь сюконяйхть сембонди, кие лездсь тя классть панжемаса, тяза тняра оборудованиянь, налхксемань инвентарень путомаса.
Н.ЛОБАНОВ.
20.05.2021 №19

 

В.Н.ВОЛКОВА: «СЕМБОДА ГЛАВНАЙСЬ ТЕЙНЕК—ВАНФТОМС ТЯДЯТЬ И ОДС ШАЧИТЬ ШУМБРАШИСНОН»

Демографиянь кизефксне кода республикасонк, стане и марнек странаса лядондыхть оржакс. Пичефти, мес кизоста кизос кири одс шачихнень лувкссна, а кулсихнень, меколанкт, касонды. Мекольдень пингть тя прябалать машфтоманкса лама тиендеви федеральнай уровеньца. Тяфта, кафта кизода тяда инголе, тевс сувафтфоль «Демография» национальнай проектсь, конань васенце целенза—касфтомс шачихнень лувксснон и кувалгофтомс ломаттнень эряфснон. Васенцетнень ёткса проектть эряфс ётафтоманцты поладсть шачфтома куттне. Ня шитнень корреспондентоньке ульсь «Шачфтома куд» МР-нь ГБУЗ-са, коса корхнесь главнай врачть клинико-экспертнай работать коряс заместителенц, высшай категориянь врачть В.Н.Волковать мархта. Валентина Николаевна азондсь учреждениять работанц колга, а стане жа макссь советт аватненди, конатнень мяльсна арамс тядякс и шачфтомс шумбра шабат.

 

01.04.2021 №12

 

Идьснон эса эряфснон смузец

Корхнихть, павазу ся семьясь, коса кайгихть идень вайгяльхне. Саранскяйста Кузнецофнень ули кода лемдемс ветень-крда павазукс, вдь полатне Юлия Валерьевна и Алексей Владимирович касфтыхть мянь вете шабат! Синь эсост мирттнень-рьвятнень эряфснон смузец.
…Лама идень тядясь Ю.В.Кузнецова фалу арьсекшнесь оцю семьянь колга. Пяк кельгозень шабатнень. Тя и шарьхкотьф, вдь сонь колма ёмла сазоронза, конатненди Юлия ульсь ванникс, можна мярьгомс, синь кассть кядьсонза. А вов мирдец, Алексей Владимирович, семьяса кафонестольхть аканц мархта. Шабакс сон кайсесь сельме цёрашаба ялганзон лангс, конатнень ламоль сазордост-дугандост. Сяс рьвяямдост меле Юлия Валерьевна и Алексей Владимирович эстокиге састь фкя мяльс—шачфтыхть-касфтыхть сняра шаба, мзяра максы Шкайсь.
Кузнецофнень шабраснон, содафснон эзда кулят колгаст аньцек пара валхт. Кудсост фалу сетьме, аф марят сялонкшнемат-спорсемат, казяма валхт. Шабаснон полатне касфтсазь оцю кельгомаса, эсь примерснон лангса тонафнесазь фкя-фкянь шарьхкодемати, ужяльдемати. Идьснон цебярь воспитаниясна, синь лац тонафнихть, якайхть кодама повсь кружокс. Азонттама аф лама эрть колга.
Оцюсь—Кристина, теенза 18 киза, сон колмоце курсонь студентка. Стирсь тонафни техникумса технологонди. Ётка пингонц Кристина лемнесы волонтерствати. Примси участия лама мероприятияса. Тяни, коронавируснай инфекциянь пандемиять пингста, сон максси лезкс эряфкшу ломаттненди, рамси-пачфни теест лекарстват, ярхцамбяльхть и стак тов. Стирсь аделась художественнай школа, лама пинге якась кштимань кружокс, коса тонафнесь бальнай и тяниень пингонь кштиматненди.
Кузнецофнень омбоце стирьсна, Регина, тонафни 8 класса. Сон, кода и Кристина акац, якай художественнай школав. Регина пяк лац рисовандай. Сонь работанза нльне няфневсть С.Д.Эрьзянь лемса изобразительнай искусствань музейса. Стирсь варчсесыне виензон сёрмадомань тевса, тяшни аф оцю азкскат, ёфкст, комикст, конатненди картинкатненьге рисовандакшнесыне сонць. Касомок,  мялец арамс врачекс—нейрохирургокс. Ули Регинань нинге фкя кельгома тевоц—фотографиянь тиендемась. Тядде Регина примась участия «Мялень кузня» Всероссийскяй акцияса. Стирть сёрманц Од кизонь кузнять лангста валхтозе МР-нь Правительствать Председателец В.Ф.Сушков. Сермать эса Регина азозе, што кельгсы фотографиянь тиендеманц и пяк мялец, штоба улель цебярь фотоаппаратоц. Од кизонь карша Владимир Фёдорович ульсь Кузнецофнень ширеса и пяшкодезе Регинать мяленц—казсь теенза тяниень пингонь цифровой фотоаппарат. Стирсь афи явонды мархтонза, тись ни пяк лама мялень салай фотография.
Александра, Кузнецофнень колмоце стирьсна, шачсь 2009 кизоня. Тяни сон тонафни ветеце класса. Александра отличница, сембе предметтнень коряс сявонди аньцек «ветет». Кода азозе тядяц, Юлия Валерьевна, Сашась варчсесыне виензон эрь кодама тевса, тяряфни шарьхкодемс, мезсь теенза сяда мала. Сёрматкшни ёмла стихкат, сявондьсыне кядезонза краскатнень-карандашнень (сон стане жа якай художественнай школав), кельгсы кштиманц.
Нилецекс Кузнецофнень семьяса шачсь кунара учентф цёранясь, конань полатне лемдезь Игорькс. Теенза кота кизот. Мзярс сон якай идень саду, но тядде ни моли школав. Юлия Валерьевна и Алексей Владимирович лама тиендихть сянкса, штоба школав цёранясь молель лац аноклафста. Игорь машты ни морафтома, лувома и сёрмадома. Теенза тяни ни кельгови спортсь, оцю мяльса якай боксонь секцияв.
Сембода ёмланяти, Максимканди, нинге аш кизонявок, теенза 9 кофт. Семьяса сон ащи няканя лаца. Аканза, кодак аньцек эвондакшни ётка пингсна, оцю мяльса налхксихть мархтонза.
Стирьхне сидеста примсихть участия эрь кодама конкурсса, пялькстомаса. Кепотьксонди, 2017 кизоня научно-техническяй творчествань республиканскяй конкурсса сяськоманкса Кристина казьфоль Мордовия Республикань Оцюнять премиянц мархта.
Кузнецофнень семьясна пяк кельгсы пуромкшнемс марса. Семьянь келеса улендихть вирьса, курькснихть панда пряста, соксса. Ваймама шиста сембе марса пицихть мезень-мезень танцтиня, кепотьксонди, тортт или пярякат. Ковти хуш весть обязательна улендихть музейса или театраса.
Шарьхкотьф, аф тёждя касфтомс-трямс вете шабатнень. Но полатне вестевок аф пеняцякшнихть. Юлия Валерьевна аф лоткси шнакшнемда мирденц эса, сон сембоса лезни теенза. Аф курендай, сяпиняти аф прафты, а кяденза, кода корхнихть, зрняннет. Машты сон и пидема-панема, и строяма, и ремонтонь тиема. Кудсост лама мезть мебельть эзда тиезе эсь кядьсонза. Тияк Игорь цёранцка тонафнесы ни алянь тефненди.  Марса, кепотьксонди, тисть хомяконди кудня. Игорь машты ни работама пилать, отвёрткать, шуруповертть мархта.
Мирттне-рьвятне Кузнецофне касфтсазь шабаснон ляпе седи ломанькс, тонафтсазь шарьхкодезь малаткшнемс лиянь ризфти-пичефксти, аф ётнемс вакска, кда киндивок эряви синь лезкссна. «Инь оцю павазсь тядятненди-алятненди, кда шабасна кармайхть шумбрат и инксост мзярдовок аф сави визделготкшнемс»,—мярьгсь лама идень тядясь Юлия Валерьевна. Арьсетяма полатненди, штоба теест идьсна фалу ащельхть гордостень маряма вастокс.
О.ЕВДОКИМОВА.
11.02.2021 №5

 

СТЕНЮШКИТТНЕНЬ СЕМЬЯСНА ПОЛУЧАЙ КАЗНЕ РОССИЯНЬ ПРЕЗИДЕНТТЬ КЯДЬСТА


 

ТЯДА ТЮРЕ МИРТТНЕНЬ-СИМИЛАТНЕНЬ ИНКСА—ВИЕНТЕ АФ САТЫХТЬ!


 

ВЕТЕ ИДЕНЬ ТЯДЯ


 

ТЯ ШИСЬ КАРМАЙ ЦЕБЯРЬ


 

 
 
 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин