Сери тёкшне сатовихть молити
Сире Шайгавть—районнай центрать эзда ветешка вайгяльбе вастса ащи мокшень фкя инь сире велесь—Сире Теризморгась. Тястонь краеветтне сашендыхть мяльс, што сон эвондась XVI  векть омбоце пялестонза. Мазы сонь перьфканза природась, касфни мяль кизоть любой пингстонза. Ёфси велеть вакска кандсыне ведензон Сивинь ляйсь. А сонь поймасонза лугатнень и паксятнень, мярьгат, песновок аш.
Самай тяса 1922 кизонь 20 июльста шачсь Мордовиянь Народнай поэтсь, Заслуженнай писательсь, РСФСР-нь культурань Заслуженнай работниксь И.М.Девин. Поэтть биографияц ламода шарфты ся пингонь ломаттнень ётаф киснонды. Цёранякс савсть содамс кудъётконь и паксянь тефне, тиендемс ряцок оцюфнень мархта оцювонь тефт. Но сон фалу прафтсь тонафнемати, сяс ульсь ламонь содайкс-маштыкс. Нинге школаса тонафнемста ушедсь варчсемост виензон литературнай творчестваса. Валом-валом стихонза, рассказонза, баснянза кармасть лисендема мокшень газетатнень и журналхнень эса. Сяс мес шачсь-кассь велеса, тяштсь васендакиге велеть тевонзон, сонь валда вайме ломанензон колга, моразе перьфпяльть мазышинц. Поэтть творчествац кемокстась, кочкась од вийхть  войнань кизотнень. Эряфсонза тя стакадонга стака пингть колга сон азонды «Шобдавань заря» васенце сборниксонза.

 «Од веле» (тяниень «Мокшень правда») газетась лисендемань васенце кизостокиге кармась пуропнемост эсь перьфканза мокшень асу од ломаттнень. Ламотне синь эздост варчсезь вийснон стихонь, моронь, рассказонь сёрмадомаса, рузонь аф оцю произведениянь мокшекс ётафтомаса.

 

Газетаса сидеста васьфневсть И.Г.Черапкинонь, Ф.И.Петербургскяень, Л.П.Кирюковонь, В.И.Ардеевонь фамилиясна. Сембода активнаель тя тевса Л.П.Кирюков. Леонид Петрович ётафнесь рузонь текстт мокшень кяльс, аф кржа поэтическяй произведения сёрмадсь сонцьке.

 

1926 кизоста сявомок «Од велесь» ушедсь устнай народнай творчествань кочкама. Васенда народнай моротне и теест нотатне печатлакшневсть газетаса, меколи редакциясь кармась нолямост синь башка приложениякс. А 1928 кизоня устнай поэзиянь ся произведениятне, конатнень кочказь редакциянь сотрудникне и печатлакшнезь газетаса, нолдафтольхть «Мокшеть моронза» книгаса. Тоза сувась 160-шка произведения.

 

Тя пингти газетась кемоста ни стясь пильге лангс, цебярьгодсь содержанияц и техническяй оформленияц, сонь эсонза участвовандама эрь кизоня сашендсть од вийхть. Вяре ни азф авторхненди прибавасть М.И.Безбородов, А.И.Кочетков (псевдонимоц Мокшони), Я.М.Пинясов, М.А.Бебан. Мокшень од литературась кармась касома стама вишкста, што теенза газетать страницанзон эса кармась улема тесна. Савсь кеподемс кизефкссь сянь колга, штоба газетада башка нолямс теенза питнефтома приложения—литературно-художественнай и общественно-политическяй журнал. Тя кизефкссь курокста ванфоль, и 1928 кизонь мартста сявомок ушедсь лисендема «Валда ян» эрь ковонь журналсь.

 

Тяка жа кизоть кучкаста, Мордовскяй национальнай округть тиемдонза меле, «Од веле» газетась и «Валда ян» журналсь Пензаста ётафтфтольхть Саранскяи. Тя сядонга эреклафтозе велень корреспонденттнень творчестваснон. Народти ни содаф поэттнень, прозаикнень, журналисттнень ёткс шоворькшнесть од и од лепт—Л.Макулов, И.Чумаков и П.Левчаев, И.Чудайкин и П.Клещунов, И.Васькин и Е.Пьянзин, Л.Бажанов и Г.Игнатьев, Ф.Руськин и А.Майоров и лама, лама лият.

 

Тячиень номерса макссаськ мокшень содаф писательхнень Яков Пинясовонь, Леонид Макуловонь и Иван Чумаковонь лятфнемаснон мокшень газетаньконь колга.

 

"Мокшень правдати"-90
Газетаньконди, кода ни содасаськ, топодсь вейхксогемонь киза. Оцю ила етафтфоль тя юбилейть честьс. Но тянь мархта праздничнай мероприятиятне ашесть шумордав. "Мокшень правдань" сотрудникненди арась ни тонатфокс коллективонь келеса якамс экскурсияс, лисендемс природав. Тя мезтьке тифоль тяфта.
Васендакиге киньке-яноньке вятемазь Краснослободск ошу, а сяда видекс-тостонь музеи. Тяда инголивок тейнек сашендовсь улемс тоса, ванондомс уликсть лангс. Но музеи тяниень экскурсиясь ефси лияль ингольцетнень коряс. Васендакиге лияль сон сянь мархта, што сембе тя козяшись-музейнай экспонаттне етасть "эряма" лия кудс-Краснослободскяень Культурань дворецу. "Дворец!"-лиякс сонь аш кода лемдемска. Сельмованф салай зданиясь уша ширде. Можна тяфта мярьгомс, што сон пяк мазоптозе кунардонь тя ошть. Аф азовомшка конашка мазыши мархта васьфтят потмоста.

«Мокшень правдати»—90 киза
«Мокшень правда» газетати топодсь 90 киза. Ня кизотнень пингста газетать редакцияса работась лама талантливай и еню журналист, конат кемокснезь и виияфнезь сяда тов мокшень кяльть, культурать. Тяфтама ломаттнень еткса ульсь мокшень цераньке Григорий Ильич Пинясов. Теенза ашель 18 кизовок, мзярда сась работама «Мокшень правда» газетав. Аф ваномок одксшинц лангс, сон работась ответственнай секретарькс кемоньда лама киза. Минь мархтонза пара ялгакс араме 1967-це кизоня. Эста сашендонь редакцияв материалонь кандома. Весть сон нежедсь тейне и пеедезь кизефтемань: «Тон Атереннят? Тоса эряй и работай монь ялгазе Рапин Иван Федорович. Содасак?» Мярьгонь: «Содаса. Сон ялгазе, марса тонафнеме». «Ну, пара, тяни кафксть мархтот ялгатама!» Г.И.Пинясов «Мокшень правда» газетаса работамстонза ушедозе писателень кинц. 1975-1976-це кизотнень тоса лиссь васенце оцю литературнай произведенияц: «Ветецесь» повестсь. Башка книганяса повестсь лиссь 1977-це кизоня. Тя ульсь Г.И.Пинясовонь васенце книганяц. Григорий Ильич, кода од писатель, аф весть сашендсь Атюрьевскяй району лувихнень мархта васедема.