Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Мокшане о мокшанах

Мокшавась Г.А.Сярдова: «Ковылкинань Сире Драка велесь козя коензон-обуцянзон мархта»

Галина Александровна Сярдова шачемас-касомас коре Мордовиянь Ковылкинскяй райононь Сире Драка велеста. Эряфонь киц ушедсь Вельмякиттнень лама идень семьясост, а меле пачфтезе мокшавать Тольятти ошу. Но мокшэрзянь масторть эзда ширеса эрямстовок Галина Александровна аф юксни минцень коеньконь-обуцяньконь колга, ванфтсыне синь и пачфни квалмаст содафонзонды.
Г.А.Сярдовать колга «Мокшень правда» газетаса пачфнеме «Мокшаваня» рубрикаса. Морафтыхнень мяльс тусь мазы вайгяль, асу, машты кядь мокшавась и сонь щамоц, конань эзда сельмоце аф явфтови. Тольятти ошса эрямста Галина Александровна ладясь кеме соткст тостонь Мокшэрзянь культурнай центрать и сонь участниконзон мархта, ушедсь морсема «Лайме порась» творческяй коллективса. Кочказень, пуроптозень марс мокшавань щамонзон-карямонзон и тяни гордостень марязь щашендсыне синь ётафневи пуромксненди (ужяль, но пандемиять сюнеда лувкссна ламода кирсь), фотосессиятненди.
19.11.2020 №45

 

Сталмотненди ашезь синдев

Эряфонь кувака и аф тёждя ки савсь ётамс Саранск ошень эряйти Ольга Алексеевна Пронинати. Тяддень 10 ноябрьста сиреняти топодсь 93 киза.
—Пцтай век ни эрянь, а цебярь мзярдовок ашень няе,—мярьгсь мархтон васедемста Ольга Алексеевна.—Ефси одняста лядонь удавакс, ськамон касфтыне-кеподине колма иднень.
Рьвакс Ольга лиссь 17 кизоса. Мирденц эзда, кода азозе, мзярдовок кальдяв валня ашезь куленде. Тя, кле, тяниень алятне рьваснонды апрякамань валснон аф ужяльдсазь, копордайхть сяпиняда и стаки вешендихть сялондомс туфталхт. А минь етксонк, мярьги, тяфтама ашель. Ужяль аньцек, павазоньконь срафтозе-калафтозе войнась.
Фронту тумань карша од мирдсь ашезь мушенда эстеенза васта, бта содазе—меки тяза ни аф мрдай. Ризфта пяшксель и Ольгать седиец. Но кядензон нолнемс ашель кода. Эрявсь работамс, штоба кеподемс кафта церанянзон и фкя стирнянц. Шиньберьф тядясь покодсь колхозса, аньцек кодама тевс ашезь кярьмотькшне. Тише копнань марамста алятневок сельме лангозонза кайсесть. Фатясы оцю цянгопалть и, мярьгат, сталмонцка аф марясы, ердасы мянь текшти. А куду самда меле нинге жуватанза эрявсть симдемс-андомс.—Синьфтемост велеса ефси ашель кода,—азозе Пронинась. Траксоньке, кле, цебярель, лофцоц аф аньцек эстейнек, но и мимска сатнесь. А вов модамарьсь пересонк касондсь кальдявста. Кизоньберьф якат перьфканза, а урожай аф сяват.
Ольга Алексеевнань мирдец, кода азфоль похоронкаса, шавовсь 1943 кизонь февральста. Но тяда мелевок авась, ряцок лиятнень мархта, стаки прважсесь фронту пракстат, варягат и кой-кодама ярхцамбяльхть.
Войнань кизотнень Пронинась етафтозень Саратовскяй областень Андреевка велеса, а меле идензон мархта сась Саранскяи. Тясовок савсь васьфтемс аф кржа стака-сталма мархта. Васендакиге, эрявсь вешемс эряма васта. Пяле кизоста колмонь квартира сашендовсь полафнемс. Пара, што иденза кассть сятявста, сембоса кулхцонткшнезь тядяснон. Колмоцьке получасть цебярь образования, пуроптсть семьят, мушендсть мяльс коре работавок. Но аф ламос Ольга Алексеевна марязе прянц инксост павазуста. Васенда оржа салмокс лаца седиенц сялгозе оцю церанц—Иванонь урмаськодоманц колга кулясь. Сон кулось ракть эзда. Сяльде аварияса шавовсь омбоце церац—Александр. Пингта тяда меле етась аф кржа, но тядянь седись стаки пяшксель ацергодомада и ризфта. «Киндивок аф арьсян тяфтама судьба—калмамс эсь шабатнень,—мярьгсь сельмоведеньбачк Пронинась.
Фкясь аньцек касфнесы сиренять мяленц, аф юксни колганза Мария стирец. Сон хуш эряй Саранскяйть эзда ичкоздень вастса—Оренбургскяй областьса, тядянц шири сашенды сидеста. А нинге Пронинась кеняртькшни колма уноконзонды и идень вете уноконзонды.
 Аф ваномок эряфкшу кизонзон лангс, Ольга Алексеевна аф пеняцякшни шумбрашинц лангс. Улихть нинге виенза и муськомс, и эсь мельганза урядамс. Аньцек пиленза кальдявста кулихть, но тянь сонь кизосонза аш кода лувомс оцю юмафксокс. Хуш кунара ни ловонь тюсса арась шяярец и срмафкскада пяшкодсь шамац, сембе сяка, лангозонза ванозь приметави кунардонь мазышиц. Сталмотне мяндезь сонь, но ашезь синде.
Ольга Алексеевна ломанць паронь арьси. Кельгсазь сонь шабранза, мархтонза фкя курняса эряйхне. Сон фалу весяласта васьфнесыне ширезонза сувайхнень, машты седикс-ваймокс корхнема, кда эряви, най максы смузю совет.
Перень-сёрот Пронинась тяни аф касфни ни, а вов панчфт куд пирьфсонза озафни эрь тунданя. Кизоньберьф эряма вастонц перьфке мазыши. Кудса сиренять ули телевизороц, но кельгома передачадонза, виденцясь, пяк кржа. Эрь шиц Ольга Алексеевнань ушеткшни Шкайти озондомаста. Стяй рана шобдава, кяшсыне мазы руцянянц алу шаржу шяярензон и арай шкайликонятнень инголи. Васенда анай шумбраши стиренцты, уноконзонды, идень уноконзонды, сяльде лятфтасыне эряфста туф шабанзон. А эстеенза тяни ни мезевок аф эряви.
О.ЕВДОКИМОВА.
19.11.2020 №45

 

Эряфонц лемдезе культурати

Мордовия Республикань культурань Заслуженнай работниксь, мокшавась Нина Васильевна Кулькова, конань колга минь тячи азонттама «Мокшаваня» рубрикасонк, лама киза ни эряй Темниковскяй райононь Темников ошса. А шачемас-касомас коре сон Ковылкинскяй райононь Од Пшень велеста. Серенц касозе простой крестьянонь семьяса. Аляц, Василий Андреевич, васенда работакшнесь велень колхозса, сяльде ушедсь якама ярмаконь добувама Саранскяи. Трудендась аф фкя предприятияса. Куду лядондсть рьвац, Екатерина Федоровна, и кота шабасна. Нина Васильевна лятфнесы: «Мзярда тядяньке тушендоль колхознай паксяв покодема, минь, шабатне, лядондолеме кудса «оцюкс», сембе тефне лангсонктольхть. Сембода пяк сатнесь эзрайхненди, синь и жуватань андыхне-симдихне, и ёмла дуганонь-сазоронь ваннихне. Но сембе сяка тя ульсь пара пинге, мзярда тонь аш пичефксне-ризфне, а кенярдема тейть казендсь одс рамаф анцяй налхкшкяське. Шабакс пяк кельгине якамс тядязень аканц шири, мон сонь лемнине Маша щавакс. Маша щавать ашельхть сонцень иденза, сяс сон най учсь эсон, кеняртькшнесь эрь самазти. Мон пара мяльса лезнень теенза, мезьса сафтовсь».
Тячиень героиняньке кассь отькорь шабакс. Школаса кенерькшнесь сембоса—и тонафнемаса, и общественнай тевса. Ёмла класса ульсь «звездочкань» командиркс, меле—дружинань советонь председателькс, комсомолонь комитетонь членкс. Пяк кельгозе мораманц. Нина Васильевнань тячивок мазы вайгялец, кайгозеви—седице солай. Школаса сон ульсь ёмла «тяштенякс», эрь иласа-пуромксса Нинась кштийсель-морайсель. Да аф най школаса. Эста тяфта ладяфоль, велень самодеятельнай коллектифне, артисттне якальхть велеста велес, няфнелезь фкя-фкянди маштомошиснон. Синь ётксост фалу ульсь тячиень героиняньке. Аф стак школада меле мялецоль поступамс тонафнема музыкальнай училищав. Но аляц кардазе, артистсь, кле, тя аф профессия, лия тевсь—учительсь.  Ашезе кола тряенц мяленц Нинась, максозень кагодонзон М.Е.Евсевьевонь лемса МГПИ-в, коса сатозе омба масторонь кялень тонафтыень специальностть. Студенткакс Н.В.Кульковась, кода и школаса, няфнезе прянц эрь кодама тевса: ульсь группань старостакс, институтонь профкомонь членкс, кафта кизот вятезе «Лингва» строительнай отрядть Темниковскяй райононь Тарханы велеса. Ся пингста сявомок эряфонь киц сотневсь Темниковань аймакть мархта. Институтта меле асу стирсь тертьфоль работама Урейскяй средняй школав. Колма кизот тонафтсь шабат, меле кефкие киза ульсь библиотекань директоркс. Но инь лама—комсь кафтува киза— мокшавась макссь культурати. Темниковскяй райононь администрацияса лама пинге вятезе Культурань управлениять. Сонць тянь колга аф лятфни, аф кельгсы прянь шнафтоманц, но тя аймаконь эряйхне лац мяляфтсазь, кодама оцю сереса ащесь райононь культурась Нина Васильевнань пингста. Тястонь оркестрась, ансамбльхне, мокшень творческяй коллектифне содафтольхть марнек республикаса. Мокшавась палозь палсь эсь тевонц инкса. Сонць арьсекшнезень концерттнень сценарийснон, улендсь артисттнень эрь репетициясост, фалу ащесь вешендемань ки лангса. Тяни Нина Васильевна пенсияса, но стак аф ащекшни, сон тячивок, кода корхнихть, стройса. Седиень-ваймонь путнезь покоди Темниковань Культурань кудса режиссёркс. Мокшавась аф ужяльнесыне виензон сянкса, штоба кеподемс райононь эряйхнень мяльснон, весялгофтомс-кеняртьфтемс синь. Тунда, содаф, республикасонк, кода марнек странаса, ладяфоль самоизоляциянь режим. Ламоц организациятне сёлкфтольхть, тяконь лувксса культурань учреждениятневок. Но Н.В.Кульковась тя пингтьке стак ашезе ётафне. Марса Культурань кудса покоди ялганзон мархта аноклакшнесь-ётафнесь мялень салай концертт онлайн режимса.
Нина Васильевна ломанць творческяй, сонць арьсекшни сиде моронят. Аньцек самоизоляциять пингста тяштсь колмогемонь колма сиде мороня. Эсост сон шнакшнесыне мокшень ломаттнень, Темниковань аймакть. Строчкатне эвондакшнихть прясонза апак фатяк кода, сидеста нльне веньгучкать.
Азома сявок, што лама киза ни Н.В.Кульковась вятьсы Мордовскяй (мокшень и эрзянь) народть Межрегиональнай общественнай организациянц Темниковскяй отделениянц. Лама вийда путни сянкса, штоба районца ванфневоль национальнай культурась, мокшень кяльсь, койхне-обуцятне. Нина Васильевна сонць пяк кельгсы сембе минценнеть, а сяс национальнайть вельмофтеманц коряс тевсь теенза пяк мала.
Тячиень героиняньке отькорь аф аньцек работаса и общественнай тевса. Сон нинге пяк цебярь кудазорава. Кельгсы пидеманц-панеманц. Аньцек мезе аф стряпай: и эчке пачат, и шуваня пачанят, и цюкорнят-месть. Пидефонц эзда кяльцень нильсак. Мзярда пуромкшнихть ширезонза иденза-уноконза, эрь мезне каваняй эсост мезень-мезень одняса. Миньге эняльдеме азомс танцти ярхцамбялень рецепт, конань тячи макссаськ лувиеньконди.
О.Евдокимова.
12.11.2020 №44

 

«Мокшень правдать» 100 кизонь топодеманцты

Фототне азондыхть, фототне лятфнихть
Минь кеняртькшнетяма, мзярда тейнек тяштихть синць лувихне. Синь сёрмасна пяк питнихть, эрявихть. Лезксфтомост журналисттненди нолямс интереснай и содержанияс коре козя газета стака, да и аш кода. Аф стак «Мокшень правдать» фкявок номероц аф лисенди аф штатнай корреспондентонь сёрмафтома.
Тяни, мзярда газетаньке моли эсь 100 кизонь юбилеенцты, аш кода аф лятфтамс ся автороньконь, конат лама киза кирдсть мархтонк кеме соткст, пачфнезь редакцияв эсь мяльснон-арьсемаснон эряфть, народоньконь судьбанц, кяленц и культуранц ванфтомаснон квалма и стак тов. Нят: Василий Максимович Сиркин и Михаил Васильевич Кондрашкин—Атюрьевскяй районцта, Алексей Павлович Четырев и Григорий Иванович Ларионов—Зубово-Полянскяйста, Иван Леонтьевич Житаев и Иван Матвеевич Сергушкин—Торбеевскяйста, Василий Дмитриевич Живайкин—Старошайговскяйста, Василий Петрович Резепов и Сергей Васильевич Нумолов—Темниковскяйста и ламотне лиятне.
Минь тячи макстама кафта фрагментт редакциять историяста. Фотоснимкатне, конатнень тиезень эстонь фотокорреспондентоньке А.Лияскин, сявфт редакциять архивста. Синь пачфнихть 1972 кизоня «Мокшень правдать» редакцияса рабочай и велень корреспонденттнень мархта ётафтф совещаниять колга. Тя пуромксса ванондовсь кизефкссь редакцияти аф штатнай корреспонденттнень лезксснон колга, няфтьфтольхть синь материалснон цебярь и лафча ширесна, азонтфоль, мезти шарфтомс башка мяль.
Совещанияса доклатт и сообщеният тисть редколлегиять членонза, эсь опытснон азондозь мокшень содаф журналисттне, цебярь предложеният и советт макссть синць рабочай и велень корреспонденттне.
Пингсь аф учи. Газетась сяда тов мольфтьсы эсь летописенц. Мезьса сон ули пяшкотьф, мезень колга кармай азондома ванды—тя ащи минь и тинь, кельгома луви ялганьке, марстонь работаньконь эзда. «Мокшень правдать» страницанза фалу панжадот теенть мялень-арьсемань и предложениянь азомс.
Снимкатнень эса:
Рабселькоронь совещаниянь участникне марса редакциянь сотрудникнень мархта;  Рабселькоронь совещаниянь президиумсь (кержи ширде): «Мокшень правдань» редколлегиянь члеттне 
М.С.Моисеев, Д.А.Любимкин, Г.И.Пинясов, партиянь Мордовскяй обкомть инструктороц П.П.Кулешов, газетать редактороц В.М.Сурков, редакторть заместителец Н.И.Учватов.
29.10.2020 №42

 

Морай Н.А.Шумкина

Н.А.Шумкинать лемоц лац содаф аф аньцек Атюрьевскяй районца, но и сембе мокшэрзянь крайса. Сиянь пайгонякс кайги вайгяленц аф весть кулендезь  республиканскяй сцена лангса. Сон тяфта жа морсесь странаньконь ламоц уженянзон эса. Кодама аньцек концертса, фестивальса ашезь примсе участия. И вестевок казнефтома ашезь сашенда. Сонь цёрац, Владислав Шумкин, примась участия Россиянь телевизионнай «Синяя птица» фестивальса-пялькстомаса и занязе тоса омбоце вастть. Шумкиттнень семьясна примась участия «Инь цебярь семьясь» Приволжскяй федеральнай округонь пялькстомаса, лиссь васенцетнень ёткс. А тяддень 17 октябрьста Шумкиттнень семьяса ульсь нинге фкя пяк оцю ила. Кельгома рьвяти, тядяти, авозти, бабати топодсь 50 киза. Странаньконь разнай уженянзон эзда састь Нина Алексеевнань лемс поздравленият.
—Нина—васенце идезе,—мярьгсь тядяц М.С.Абрашкина.—Монцьке нинге ёфсикс  одолень, солдаткалень. Мирдезе, А.И.Лемяскин, служась армияса. Стакаль, пяк стакаль эряфозе. Но спасиба Шкайти и цебярь ломаттненди, ульсть ужяльдине, лездыне, ширень кирдине.
Нина Алексеевнань аляц кулось ёфси одста. Ся пингста ётась лама киза. Но тянемс алянь раднятнень мархта кирди кеме соткст, якайхть фкя-фкянь пяли инжикс.
Нина Алексеевна шабакскиге пяк асуволь стирнясь. Тонафнесь Атерь велень 2№ средняй школаса. Нинге начальнай класса васенце учительницац М.С.Данина приметазе, конашкава лац морай ученицац. Тя кулясь пачкодсь Саранскяи, асу идень интернатонь эстонь директорти П.П.Тришевонди. Мокшалясь сась школав асу стирнять ваномонза, кулхцондомонза. Мялецоль фкя, сявомс интернату тонафнема. Каршек молема Мария Семёновна ашезь карма.
—Тусь Нина Саранскяи, кудозе шамсь,—мярьгсь мокшавась.—Сей ётан, тов ётан, мяльсон стирнязе, васень иднязе. И вдь молень инксонза, сявине меки куду.
Аф лама пингонь ётазь сась ширезост  П.П.Тришев. Кяжи, корхтафоц казяма.
Мария Семёновнанди корхтай:
—Улелеть стирезе, шна перьфкат шарфтолень. Мезенди асу стирнять талантонц модати калмасак. Теенза эряви тонафнемс, касомс, сонь ули валда и павазу вандыец.
Пётр Петрович ашезь васькафтов. Мария Семёновна тага кочказе стирьшабанц кис. Нинась сонцьке каршек молема ашезь карма.
Аделась интернатса вейхкса класст. Ульсь фалу васенцетнень ёткса. Ашель стама концерт, пялькстома, коса ба афоль прима участия. И фалу занцесь васенце вастт. Казендевсь дипломса, Почётнай грамотаса, лия питни казнеса.
Интернатта меле Нина Алексеевна тусь тонафнема Саранскяень Л.П.Кирюковонь лемса музыкальнай училищав. Сяньге аделазе пяк цебярьста. Шумордазе Саранскяйса Национальнай культурань институтть. А эряма, работама вастонди кочказе шачема Атерь веленц. Культурань отделть эста вятезе В.Е. Панфилов. Од специалистть, мокшень асу стирть Виктор Евгеньевич васьфтезе лямбоста. Нинась морась райцентрань культурань кудса. Мянь кафкса кизот покодсь Атерень культурань кудса. Тя— концертт райцентрань сцена лангса, райононь велетнень эзга. Сидеста морама якась Саранскяи, шабрань райоттнень эзга. А тоса сявозь покодема райононь искусствань школав, коса вов ни 22 киза сон и директор, и преподаватель. Кельгома музыкальнай инструментоц—скрипкась. Сонь мархтонза тонафнесь и интернатса, и музыкальнай школаса. Стиренц мяленц вестевок ашезе колсе и Мария Семёновна. Мянь Москуста ускфнесь мокшавась Нинати скрипка.
Виденц азомс, эсь стирензонды мокшавась мезевок ашезь ужяльне. Сембоц шачфнесь кота стирьхть. Фкясь кулось кизоняса. А лядыкс вететне арасть цебярь ломанькс, прянь шнафтома вастокс. Колмотне аделазь школаснон зрнянь медальса. Нинге кафттне тонафнесть «нилес» и «ветес». Сембонь высшай образованиясна. Елена—преподаватель, Татьяна и Юлия—юристт, Галина—экономист. Аньцек Нина сотозе эсь эряфонц культурать, искусствать мархта. И вестевок нинге ашезь каенда, што кочказе тя профессиять. Коса аньцек ашезь уле. Ульсь лама всероссийскяй фестивальхнень-пялькстоматнень эса. Сявондсь аньцек васенце и омбоце степенень диплопт. Лама тись сянкса, штоба Владислав Шумкин, омбоце цёрац, поволь центральнай телевиденияв «Синяя птица» пялькстомати. Сон пяк достойнайста аралазе Атюрьевскяй районть, республикать честенц. Лиссь финалу. Тя аф фкя шинь труд. Мзяра вий путсь, средства карьхцясь, содасы аньцек тядяц, Нина Алексеевна. Тяни сон нилеце курсонь студент, тонафни Москуса Гнеситтнень лемса академияса. Примси участия концерттнень эса, морси оцю сцена лангса. Ламоксть няфнезь центральнай телевиденияса. Сонць максси концертт. Получай нинге фкя высшай образования—юристонь.
Н.А.Шумкина—кельгома рьвя. Мирденц, Виктор Васильевичень мархта, эряйхть пцтай колмогемонь киза. Сонь профессияц сотф велень хозяйствать мархта, ичкозе ащи музыкать, искусствать эзда. Но сон семботь тиендьсы сянкса, штоба лездомс рьванцты, кирдемс сонь ширенц. Оцю кельгомаса шачсть кафта цёрасна. Владиславда башка нинге цёрасна Алексей. Сон аделась Вологдаса УФСИН-нь академия. Тяни покоди Явас посёлкаса УФСИН-нь управленияса. Сонцень семьяц. Нина Алексеевнанди казсь кафта уноконят. Костянди 11 октябрьста топодсь 3 кизот, София шачсь тяддень 25 сентябрьста. Оцю казне мокшавать юбилейс.
Нина Алексеевна и Виктор Васильевич сявсть касфтомс идень кудста стирня. Ксенья Журавлёва павазуста марясы прянц Шумкиттнень семьяса. Сон келькф, щаф-каряф. Кода и Нина Алексеевна, машты морама. Якай искусствань школас. Ксенья, аф ваномок эсь кизонзон лангс, примась участия лама Всероссийскяй пялькстомаса, морась республиканскяй, Атерень культурань кудонь сцена лангса. Кочкась лама питни казне. Од тядяц и аляц шнафтыхть мархтонза пря.
Тя кизось аф тёждяста ётай Н.А.Шумкинати. Кда аф пандемиясь, мзяра оцю ила ётафтоль сонць, мзяра иласа прималь участия. Тянивок, конешна, трудендай, но сембе работанц тиендьсы компьютер вельде. Тоса и морай, и азонды искусствань школать работанц колга. Но эряфсь аф ащи фкя вастса, аськоляй инголи. Нина Алексеевнавок ашезь кенере кафта пяли ваномс, эряфсонза оцю ила. Юбилей мархта, Нина Алексеевна!
И.ВЕШКИН.
29.10.2020 №42

 

Тяштемань тевса васенцесель


 

«Эряфсь, аф ваномок стакатнень-сталмотнень лангс, козя кенярдемаса и павазса»—

мярьгсь 91 кизоса мокшавась А.Ф.Гераськина
Минь странасонк  ломанць лувови ламос эряйкс, кда сон васьфтезе 90 кизонц. Тячи мялезе азондомс Анна Федоровна Гераськинать колга, конанди тядде топодсь 91 киза. Сон шачсь 1928 кизоня Краснослободскяй райононь Зайця велеса мокшень оцю семьяса. Тяса касозе серенц, лиссь эсь велень цёранди рьвакс. Миртть-рьват 1951 кизоня, мзярда нинге ашесть шаченда идьсна, тушендсть Куйбышевань            ГЭС-ть строяма. Тоса покодсть фкя киза, мирдец—Иван Николаевич—шоферкс, а Анна Федоровна—разнорабочайкс. Меле мрдасть эряма эсь шачема велезост, работакшнесть колхозса.
 Гераськиттнень семьяса шачсть 7 итть. Шабаснон касфтозь трудонь кельгикс, пара ломанькс. Анна Федоровнанди ульсь 75 киза, мзярда кулось мирдец. Тяни Анна бабань 17 унокоц, уноконь 23 идец и уноконь фкя унокоц. Кизонда сон эряй велеса эсь кудсонза, полас-полас сашендыхть варжамонза иденза. А тялонда стиренза сявондьсазь эряма ошу, эсь ширезост. Эряви азомс, Анна Федоровна пяк цебярь  корхтай ялга, аф ваномок кизонзон лангс, сонь оржа енец, валда мялямоц. Сонь кельгсазь велеряйхне, кудоц фалу пяшксе инжида: пялонза корхнема пуромкшнихть баба ялганза. Вов кода Анна баба лятфнесы идькс пингонц:


06.06.2019 №22

 

МЗЯРДА МОРОСЬ МОЛИ ВАЙМОСТА…


 

ЛЕМОЦ СЕРИ ВАСТСА

14.05.2015

 

КОРЯЙ ПАЙГОНЯКС КАЙГИ ВАЙГЯЛЕЦ

12.11.2014

 

 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин