Поиск по сайту: 
 

Архив
 июль 
 2022 
пн вт ср чт пт сб вс
    123
45678910
11121314151617
18192021222324
25262728293031

 
 

 

Мокшане о мокшанах

ТРУДОНЬ КЕЛЬГИ МОКШАВА


 

«МОКШЕТ, ЭРЗЯТ, МОРАДА!»

22 февральста Саранскяйса, Мордовия Республикань А.С.Пушкинонь лемса Национальнай библиотекать музыкань гостинайсонза, ётафтовсь творческяй васедема, коса  мокшэрзянь и рузонь моронь содаф морсихне, Мордовия Республикань Народнай артисткась А.Г.Атласова и республикань Заслуженнай артисткась Г.Н.Макшева азондсть васедемас пуромфненди эряфонь и творческяй киснон и сатфксснон колга.

 

Вятезь творческяй васедемать А.С.Пушкинонь лемса Национальнай библиотекань мокшэрзянь литературань отделонь заведующайсь Н.В.Бочканова и  главнай библиотекарсь В.И.Пронина.

 

Синь пачфтезь пуромфненди: кле, А.Г.Атласовать и Г.Н.Макшевать эряфонь и творческяй кисна фкя-фкянди пяк малат. Синь арасть афкуксонь профессионалкс, нежедемок эсь мокшэрзянь моронь культурать лангс. Сяльде синь репертуарснон келептезь и мазоптозь рузонь народнай моротне, коса сяка маряви мокшэрзянь мороть вайгялец.

03.03.2022 №8

 

Масланцяста пачатневок сяда ваихть, моротневок сяда кайгихть

Масланця, Масланцянь недяля, Кели Масланця—аф  фкакс мярьгихть теенза мокшень тя или тона велеса, но смузенц, улема, ламотне няйсазь ваи пачатнень, кайги моротнень, кильтьф алашаса арнематнень эса. Тяфтама лятфнембяльхне эряйхть эрть пряса фалу.  И катк шабакс улемста лац-ряц  и афолеть сода кодама тя праздниксь Масланцясь, но мархтонза сотф койхне-обуцятне эсьотям сашендыхть прязт, мзярда теенза ляткшни недяля-кафта. А вдь Масланцять ули эсь историяц, нльне эрь шиц ётафневи лиякс и эрть ули лемоц. Ялгат, ёфси курок ушеды сон—Кели Масланцясь. Эрьда лятфтатама колганза.
Масланцясь—сембонди содаф праздник, кона моли недяля и эрь кизоня уленди Великай постта инголе. Кирдемок мяльса, мзярда ули Очижись, Масланцясь полафнесы числанц. Тядде сон ушеды 28 февральста, а шумордави 6 мартста (Прощёнай недляшиня). Тя праздниксь сувси славянскяй странатнень эса ванфтф инь кунардонь праздникнень ёткс. И катк кой-конашкада полафтозе смузенц, народсь странасонк сонь  сембе сяка кельгсы и оцю мяльса учендсы эрь кизоня.
 Масланцясь явондови кафта пяльксова: Тяйня (понедельникста сявомок вержити молемс) и Кели (шуваланяста сявомок недляшити молемс). Тя недялять эрь шинц ули эсь лемоц и смузец.
Понедельниксь—Васедема. Тя шиня васьфневи Масланцясь. Ломаттне тиендихть шужярьста Масланцянь чучела, гуляндамань васттнень эса—ловонь пандонят и крепостть. Aноклакшнихть ярхцамбяльхть праздничнай шрати. Азораватне пицихть-панцихть пачат. Инголи васенце пачать максселезь ашу ломаттненди, штоба синь лятфталезь кулоф раднятнень лемснон. Рьвянятне тя шиня яксихть эсь тядяснонды-аляснонды инжикс.
Шавшись—Заигрыш. Шавшиста ушеткшнихть Масланцянь гуляндаматне: ломаттне  курькснихть пандонятнень лангста нурдса и нурдоняса, инголи оцюнек-ёмланек озсельхть карусельхненди. Тяда башка, ашезь юксне рьвянянь ладямань-ваномань тевть: од ломаттне яксесть инжикс и кочксеcть эстеест пола. Лувондовсь, кда ладясак сай пингонь рьвять Масланцяста, свадьбась вчёк Краснай горканди сави.
Вержись—Лакомка. Тя шиня сембе пицихть-панцихть пачат и якайхть инжикс. Офне якайхть пачада ярхцама авозьбабаснон ширес, а авозьбабатне, кода маштыхть, няфнесазь, што овснон пяк кельгсазь, анокт ваномс мяльснон.
Шуваланясь—Разгуляй. Тя шиня и ушеткшни Кели Масланцясь. Инголи тя шиста сявомок ламотне кадондозь эрь шинь тевснон и ушеткшнесть весялготкшнема: тюрсть мокшендаса, ётафнесть пялькстомат и конкурст, шарондсть хороводса, морсесть весяла морот, щашендозь инь мазы нарядснон.
Пяденцясь—Тёщань  иляднят. Пяденцяста инжиень кельги, васьфни ломанькс няфнезь эсь пряснон офне: ширезост пачада ярхцама сашендсть авозьбабасна и вятнезь мархтост ялгаснон. 
Ёткшись—Аклянь кудса ащемат. Тя шиня мирдть раднянза яксесть оттнень шири инжикс. Рьвяняти эряви пидемс-панемс пачат и каванямс раднятнень. Тя шиня акляти казендихть казне рьвянять раднянзон эзда.
Недляшись—Прощёнай недляши. Тя шиня аделсеви Масланцянь недялясь. Сембе анцихть фкя-фкянь кядьста прощения, эняльдихть простямс сембонкса. Недляшиста илять плхневи Масланцять чучелац.
Православнай календарьса Масланцяти мярьгондихть Сырнай недяля. Пингстонза аф мярьгондеви ярхцсемс сивольда. Сяс сон лувови ни Великай постти эсь лацонь ушедомакс или анокламакс.
Рузаевскяй райононь Мокшень Пишля велеса Масланцяти (пишляряйхнень ламосна мярьгихть теенза Масла) анокламась ушеткшневи инголенди. Масланцясь (бабась или авась) тиендеви Од кизоста лятф кузста—тя тевонди моли сонь ронгоц—Масланцять пондоц цебярь лисенди! А щапне-месне сташендовихть тястонь клубонь «Мастера и рукодельницы» творческяй мастерскойса лятф котфонь, сюрень ляткснень эзда. Потмоцка тяфта эцекшневи.
Ужяль уленди плхтамс тяфтама баяравать, но мезе тият? Тяфтама ни мархтонза сотф койсь-обуцясь.
Малаткшни Кели Масланцять мархта сембонь!
Т.Альшина.
24.02.2022 №7

 

ВАНФНЕСАЗЬ СИРЕ ПИНГОНЬ МОКШЕНЬ МОРОТНЕНЬ


 

РЕДАКЦИЯСЬ АРАСЬ ТЕЙНЕ ОМБОЦЕ КУДКС

Мордовия Республикань культурань Заслуженнай работниксь, Трудонь ветеранць, 1974-2018 кизотнень
 «Мокшень правда» газетать сотрудникоц Нина Васильевна Кубанцева:
 
—Мзярда сафоль мяльс ётамс эряма Саранскяи Рузаевскяй райононь Перхляй мокшень велеста, ваймозень «киськорязе» ся, што явома школать, тонафнихнень мархта. Мон, начальнай классонь учительсь, ванондонь партатнень ваксса озада ащи иднятнень лангс и прясон шарозь шарсь тяфтама мяльсь: кода ладяви эряфозе Саранскяйса, кодама тевс кундан тя ошса—поладса учителень кизень-янозень или?.. И вов тя самай «шись» республикать столицас эряма ётамдон меле вятемань «Мокшень правда» газетав, коза самдон меле ётайне редакциянь сембе «куцеманятнень» и пачкодень отделонь заведующаень вастти (мекольдень кизотнень тя должностсь лемневсь отделонь редактор). Васенце редакторозе ульсь В.М.Сурков. Работань мокшень содаф журналисттнень А.М.Терентьевонь, Г.Я.Пинясовонь, Д.А.Любимкинонь, Е.Я.Терёшкинать, Н.И.Учватовонь, П.П.Кулешовонь, М.Г.Имярековонь, И.Н.Кудашкинонь мархта. Сявондень эздост пример, тонафнень эздост. Оцю лезкс тейне макссесь И.С.Лушкин, кона эста партийнай отделонь заведующаель, а мон тя отделса корреспондентолень. Стямок сяда сери «куцеманяти»—пачкодемок отделонь заведующаень вастти, монцьке лезнень од сотрудникненди. Ламонцне эздост газетав работама самдост меле кемокстафтольхть экономикань отделу, конань вятине.
Мярьгомс, што тняра кизоста «Мокшень правда» газетать редакцияц арась тейне омбоце кудкс—тя аф азомс мезевок! 44 киза, эрь шиня, ваймама шида башка, аськоляйне рабочай кабинетть порогонц кенярдезь, творческяй од план мархта и тиендине журналистонь тевозень оцю мяльса.
Несколька киза ни ваймосян, но редакциять мархта кирдян кеме соткст, лажадозь учендса «Мокшень правдать» эрь номеронц. И хуш газетати топодсь 100 киза, сирекс сонь лемдемс аш кода. «Мокшень правдати» тя—вииямань-касомань, асувонь, творческяй сатфксонь пуроптомань пинге. Эрь недяляня мушендан мялезон тушенды материалхт тячиень темас, а стане жа—советт, рецептт, ответт кизефкснень лангс.
Седи ваксста поздравляндасайне газетать коллективонц—цебярь ялганень «Мокшень правдать» 100 кизонь топодеманц мархта. Арьсян творческяй од сатфкст и кеме шумбраши!
23.09.2021 №37

 

Сембонди сатни седиень лямбоняц

Тячи «Мокшаваня» рубрикасонк пара мяльса содафтсаськ лувиеньконь Саранскяйса эряй-ащи мокшавать, лямбе седи ломанть Алена Викторовна Лазаревать мархта.
Тячиень героиняньке заняф аф теждя, но тяка пингть пяк эрявикс тевса. Кафкса кизода ламос ни сон работай педагогокс-библиотекарькс Ялгинскяй идень кудса-интернатса. Алёна Викторовна пяк кельгсыне шабанятнень. А лиякс аш кода, иттненди кельгомафтома аш кода покодемс тяфтама учрежденияса. Лазаревась лятфнесы: «Мзярда васенцеда аськолдань «кудть» порогонц вельфке, няине тястонь эряйхнень пичефкста-ризфта пяшксе сельмоснон, седиезе люпштавсь. Сяшкава ужялькс няевсть синь тейне, аноколень сембонь сявомс эсь ширезон». Мокшавась машты мушендомс кит-ятт родителень заботафтома лятф шабанятненди, сятненди, кинь васькафтозь, кадозь эряфса инь мала ломаньцна—тядясна-алясна. Алёна Викторовна макссесы теест седиень лямбонянц, кельгсыне-ужяльнесыне синь  кода эсь родной иднянзон. Эрть ктмордасы, азы лямбе валня. Синцьке идень кудонь-интернатонь воспитанникне пяк кельгсазь Лазаревать, усковихть теенза. Сембода ёмланятне, конатненди аньцек-аньцек топодсь колма кизонят, нльне лемнесазь сонь тядякс. А оцюфненди Лазаревась ащи цебярь корхни ялгакс, советонь максыкс, пара тевс водендайкс. Мзярда лисенди стане, што шабатнень сявондьсазь семьяс, Алена Викторовнанди уленди стака явомс мархтост, сяшкава тонаткшни теест. Но омба ширде кеняртькшни инксост и озонкшни Шкабавазти, штоба ладяволь вастсна од семьяса.
Тяниень пингть Ялгинскяй идень кудса-интернатса эряй 57 шаба. Алёна Викторовна тонафты эсост эрь кодама тевс. Сембода лияда башка старандай шарфтомс мяльснон национальнайти. Тястонь библиотекать видеса сон пуроптсь мокшэрзянь кудботма лаца национальнай уженя, коса ули кода содафтомс атяньконь-бабаньконь сядынгольдень эряфснон-ащефснон мархта. Аноклакшни васедемат Мордовиянь писательхнень и поэттнень мархта, тонафни иттнень мархта стихотвореният, морот. Несколька кизода инголе А.В.Лазаревась пуропнесь идень кудса дуэт—«Ялганят», кона няфнезе прянц республикаса ётафневи эрь кодама иласа, конкурсса, занцесь призовой вастт.
Кода азозе педагогсь, идень кудонь эряйхне сатнихть аф ёмла сатфкст спортса, синь примсихть участия пялькстомаса аф аньцек эсь республикасонк, но и эздонза ширеса. Тяфта, эсь воспитанниконзон мархта Алёна Викторовна ульсь соревнованияса Оренбургса, Волгоградса, Казаньца, Самараса и лама лия вастса. Кизонь пингть шабанятне эсь педагогснон мархта пара мяльса ваймосихть лагерьса.
Шачемас-касомас коре тячиень героиняньке Татарстан Республикань Тетюшскяй райононь Киртели мокшень велеста. Мзярда теенза ульсь колма кизонят, семьясна ётась эряма Ульяновскяй области. Алёна Викторовнань тядянза-алянза мокшет. Тядяц, Надежда Филипповна, профессияс коре педагог, эряфоньберьф работцесь школаса, тяни сон пенсияса. Аляц, Виктор Викторович, кода корхнихть, тячивок стройса, работай Ульяновскяй «Авиастар» заводса, коса тиендихть самолетт. Мзярда героиняньке шумордазе школать, акац, кона эрясь Саранскяйса, тердезе тонафнема Мордовияв. «Ошсь кельговсь тейне эстокиге,—азозе Алёна Викторовна.—Мон кода тядянь-алянь кудс повонь, сяшкава лямбе и пара ульсь тяса». Содамошит Алёна Лазаревась пуропнесь М.Е.Евсевьевонь лемса МГПИ-нь (тяни МГПУ) дефектологиянь и психологиянь факультетса. Сяльде  пединститутонь филологическяй факультетса аделазе магистратурать. А пингонь ётазь работавок лиссь од специалистти—идень кудса. «Арьсян, павазу ся ломанць, кона шобдава пара мяльса сашенды работама вастозонза, а илять стане жа кепотьф мяльса эряскоды куду. Тейне тянь ширде удалась»,—азозе героиняньке.
А кудса Алёна Викторовнань учендсазь кельгома мирдец и кафта цёранза. Михаил Семёнович мокшаля. Сон Рузаевскяй райононь Мокшень Пишля велеста. Цёранза Лазаревать кафцьке творческяй ломатть. Оцюсь, Сергей, аделазе музыкальнай школать-интернатть, тяни тонафни Н.П.Огаревонь лемса МГУ-нь Национальнай культурань институтса. А аф кунара сонь тердезь морсема «Умарина» морамань и кштимань ансамбляв. Ёмлась, Александр, стане жа тонафни музыкальнай школаса, морай баянца. Кода мярьгсь Алёна Викторовна, цёранзон эса пяшкодевсть сонцень сембе мяленза-арьсеманза. И Сергей, и Александр лац содасазь мокшень кяльть, сяс мес сон най кайги семьясост. «Эсь мархтон тядяне-аляне, атяне-бабане фалу корхнесть мокшекс, шабакскиге тонафтомазь кельгомс родной валть, тякоти тяни мон водендакшнесайне эсь идненге»,—азозе Алёна Викторовна.
Ётка пингтонза тячиень героиняньконь хуш и уленди кржа, но стак ащекшнезь сонь мзярдовок аф ётафнесы. Мокшавась пяк кельгсы пидеманц-стряпшаманц. Сембода лияда башка семьянцты кельговихть модамарень пярякатне. «Пицесайне синь бабазень рецептонц коряс,—азозе Алёна Викторовна.—Сиренясь аноклакшнель тяфтама танцтиня эрь недляшиня и тя ульсь тейнек оцю праздникокс. Миньцонк синь лемневихть «пря мархта прякакс».
…Улихть ломатть, конат сембе эряфснон пингста арсихть примеркс лиятненди. Эздост ули кода тонафнемс прянь вятема, тевонь тиема, идень касфтома и стак тов. Синь ёткозост ули кода сувафтомс тячиень героиняньконь. Фалу весяла, эрьгав, паронь арьси, улема, кяжиякшнемовок ёфси аф машты. Корхнят-тият мархтонза и лад арси седиезт, сон, мярьгат, шинь сюролданя лаца эжнесыне вакссонза ащихнень. Сембонди сатни Алёна Викторовнань седиень лямбоняц.
О.ЕВДОКИМОВА.
20.05.2021 №19

 

Ульхть шумбра и павазу, Татьяна Тимофеевна!

Пара мяльса азонттама «Мокшень правдать» цебярь ялганц, родной кялень, коень-обуцянь кельги мокшавать, Ковылкинскяй райононь Сире Борку велеть асу стирензон эзда фкять, Москувонь эряйть Татьяна Тимофеевна Чумбаевать колга.
Тимкань Танясь. Тяфта Сире Борку велеса ламотне мярьгольхть мокшень стирти Татьяна Тимофеевна Капаевати. Шачсь-кассь сон лама идень семьяса, коса азорондасть фкя-фкянь шарьхкодемась, оцюфненди и эряфкшуфненди почётонь максомась и честень путомась, трудти кельгомась.
Татьяна кота шабатнень ёткста колмоцесель. Капаефнень кудсна пяшкодсь кенярдемада, мзярда кафта цёранятнень мельге белай свету эвондась кунара учсеф стирня-якстерня.
Ужяль, но семьянь азорсь,  Тимофей Кузьмич Капаев, рана тусь эряфста, кадомок 44 кизоса рьванц, Мария Филипповнань, кота идь мархта удавакс. Татьяна Тимофеевна стирьхнень эзда инь оцюсель, сяс, кода маштсь, лезнесь тядянцты и бабанцты кудъётконь тефнень тиемста, иттнень касфтомаса. Мзярда тусь Москуву, тядянь-алянь кудть ашезе юксне. Работась «Метрострой» организацияса. И пцтай эрь зарплатанц лангс  рамсекшнесь мезе-бди куду: то обоят уски и праздниконди тии ремонт, то Очижинди од занавескат Москуста рамай. Эрь самац арсесь семьянцты оцю праздникокс. «Метростройса» Татьяна Тимофеевна покодсь колмогемоньда лама киза. Фалу лажаткшнесь Мордовияти, ёмла родинати, тядянь-алянь кудти. Седисонза эрясь мокшеннети кельгомась. Минценнети лажадомать мокшавась ётафнезе моротнень вельде. Сазоронзон эзда фкясь, Наталья Тимофеевна Кувезенкова, мярьгсь: «Татьянаньконь аш кода явфтомс мороть эзда! Аказе морась фалу: шабакс, школаса тонафнемста, Москуса. Тяфта тевсь ащи тянемс».
Ёмла родинати лажадомать сон и колма сестранза ётафнесазь моронь, сиде моронянь морсемать вельде. Лама кизода инголе мокшаватне-баяраватне пуроптсть «Эх, мордовочка» ансамбль, конань колга аф весть пачфнеме «Мокшень правда» газетаса. Эрь концертсна, эрь выступлениясна тушенды ломаттнень мяльс, аф кадондсыне синь озадонь седихть ащема. Ня валрисьмотнень тяштемста мялезон лядсь вов кодама случайсь. Ардонь Москуву поездса. Озань Саранскяйста. Ковылкинаста купезонк сувась аля. Шумбракстсь. Корхтафкшу ломанькс няфтезе прянц. Москвичан, кле, пенсиясан, а Ковылкинав сашендонь тев мельге. Корхтаманьке пачкодсь мокшэрзятнень мороснонды, койснонды-обуцяснонды. И москувонь алясь азозе, што содасыне «Эх, мордовочка» коллективса морси ниле акатнень-сазорхнень, конат хуш и кунара эряйхть Москуса, но шачема ширеснон—Ковылкинскяй районть колга аф юкснихть, сашендыхть Ковылкинав концерт мархта. «Няелить мокшень щамснон-карямснон! Сельмоце аф явфтови эздост!»—мярьгсь купеса мархтон ардысь. Отвечань, што няине и аф весть, и акатнень-сазорхнень лац содасайне.
Лад арась мялезон, што зрнянь вайгяль мокшаваньконь колга содайхть ламотне и шнасазь синь творчестваснон.
Лятфтамок национальнай щапнень колга, мялезе башка мяль шарфтомс Татьяна Тимофеевна Чумбаевать мокшень нарядонзон лангс. Вов ни кие содасы эрь щамть историянц, «порядканц». Кепотьксонди, кона петьксть коса вастоц, мзярда сонь щама. Пуня петькс, столбаня петькс, золод петькс и стак тов—сембось моли кода эряви, а аф кода мяльце. Мокшавать эрь ожнанянза, эрь брошканяц кельгозь марафт башка футлярс и ванфтовихть арзянява. Мзярда концертта меле Татьяна Тимофеевна кайсесы панаронц, то петьксть путнесы тодлангаксть потмос, меле ни ашкорясы кода эряви.
Т.Т.Чумбаевать колга ули кода мярьгомс: шачф-удалаф. Эрь тевса сафтсы. Тяконь   лувксса и пидемаса-панемаса. Минцень национальнай ярхцамбяленьке занцихть мокшавать менюса башка васта. Офтонь мадятнень, суронь пачатнень, позать, сяканяса модамарень цюкорня мархта сивольть Татьяна Тимофеевна аноклакшнесыне эряфоньберьф и оцю мяльса каванякшнесыне ширезонза сашенды инжихнень сембе тя танцтинять мархта. Пачанза, позац вов ни лама киза улендихть Москуса ётафневи ся пуромкснень эса, коза терневихть странать столицаса эряй мокшетне, Мордовияста инжихне. Лама шнамань вал кулендсь Т.Т.Чумбаева, но аф тянкса сон пици-панци танцтидонга танцти ярхцамбяльхть, морси мокшэрзянь, рузонь морот, сиде моронят. Тянь тиендьсы сяс, мес тянь вешсы ваймоц.
Ярхцамбяльть анокламста фалу анок пачфтемс колганза, азондомс сонь историянц. Валонзон коряс, мокшетне фалу кельгозь танцтиста ярхцамаснон. Нльне завтракть пингста. Сидеста тевс нолязь сура или модамарь мархта пуштф сивольть. Тракссь эрь семьяса лувондовсь тряйкс-андыкс, сонь ванфтолезь. Аф мекольце вастть занцезь куднармоттне: сарасне, мацихне, яксяркне.
Кда корхтамс Т.Т.Чумбаевать семейнай эряфонц колга, то сон кельги и кельгома рьвя, тядя и щава. Мазы вайгялец стиренц Юлиять эзда уноконц Эмилиять. Кулемок сонь, ламотне эстокиге мярьгондихть, кле, тусь щаванц лаца.
Татьяна Тимофеевна пяк аккуратнай, арушинь кельги. Тяфтапнень квалма корхнихть, што кудсонза фкявок пульня аф муят. Мирденц, Сергей Ивановичень, мархта фкя-фкянь шарьхкодезь и фкя-фкянди лездозь эряйхть 38 киза.
Мокшавась фалу анок лездомс сянди, кие эняльди тянь колга, кулхцондсы эрь пшкядить. «Макссы мекольце цалковаенц»,—мярьгсь колганза сазороц Наталья Тимофеевна. И тя афкукс тяфта.
Т.Т.Чумбаевать лама грамотадонза, благодарностьтонза моронь, сиде моронянь морсеманкса, пуромкснень эса участиянь примсеманкса.
17 мартста Татьяна Тимофеевна Чумбаевать ульсь шачема шиц-юбилеец. Миньге поздравляндасаськ сонь тя праздниконц мархта. Арьсетяма кеме шумбраши, сатфкст и сембе цебярть! А шачсь сон 1961 кизоня.
Т.АЛЬШИНА.
25.03.2021 №11

 

Юбилей мархта, Степан Степанович!


 

Бабазе

 
 
 
 
Ломаттне, конат кир-
 дезь войнань кизонь
 стакатнень-сталмотнень, башка ломатть. Синь сяда пяк маряфтсазь лиянь сярятьфть-пичефксть, сяда пара ваймот и сяда стакаста кирдьсазь аф видешить. Война. Ниле кувака кизот… Синь тянивок няевихть пефтомокс… Эрь кудть вельхксса шарондсь зиянць, войнась чакась эрь кенкшти. Сон токазе и минь семьяньконь, бабазень и атязень судьбаснон.
Бабазень лемоц Пелагея Константиновна Чекмарёва (Горланова). Нльне кизос коре корязонза сяда оцюфне лемнезь сонь лемса-алянь лемса. Арьсян, тя аф сянкса, што работась учительницакс. Бабазе пара вайме ломанель. Мзярда  сон тусь эряфста, тейне эста аньцек ниле кизонятольхть, но лац мяляфтса сетьмофти вайгяленц, кона лувондозе тейне «У лукоморья дуб зелёный» произведениять. Сестразень мархта эняльткшнеме бабазти морафтомс. Эздонза васенцеда содайне Пушкинонь и Андерсенонь, Агния Бартонь и Сергей Михалковонь, Корней Чуковскяень и Шарль Перронь. Ламоц ёфкснень и стихнень содаськ книгати апак ватт, но эрь мезне сетьмосеме и пштетькшнеме бабазти, мзярда сон тага и тага панчсезень кельгома книгатнень и лувсь. А меле кулхцондоме кода луви Маша сестразе. Теенза сисем кизонятольхть ни, сон якась школав и кеняртькшнесь, што машты морафтома сонць, и тияк ёрась морафтомс стане, кода и бабазе. Вов тяфта, апак кошяряк, бабазе тонафтомазь морафтомати.
Кельгса морафтомазень тянивок. И эрь мезне, мзярда сявондян кядезон книга, лятфнеса бабазень. Лятфнеса кельгоманц. Мзярдовок киньге лангс ашезь пеняцякшне, киньге ашезь корхтафта. Мезьса афоль уле заняф, фалу кадондозень эсь тевонзон и шарфнесь мяль ломаттненди, конат теенза сашендсть. Маштсь кулхцондома, мушендсь эрявикс валхт эрти. Шабравась, Варя баба, сувай—пеняцяй урманзон лангс—бабазе венепти эрявикс лекарства, сонь фалу ульсь лама лекарствац. Рая баба эняльди мезевок стамс—и теенза аф атказай. Бабазень ульсь «Подольск» стамань ташта машинкац, вельденза сон стакшнесь идензонды щапт, занавескат.
Сашендсть ширезонза и работас коре ялганза. Раиса Петровна Макеева ся пингть работась завучекс Каргальскяй школаса. Бабазе, улемок пенсияса, куляксакшнесь школать эряфонц колга, и  Раиса Петровна азонкшнезе сембе однять, сидеста получсемок питни советт ингольдень учительницать эзда. Маласа ащи куттнень эзда иттне сашендсть бабазти уроконь тиема, и аф аньцек начальнай класснень эса тонафнемстост. Сон кулхцонкшнезень синь азондомаснон историять, химиять, физикать коряс, шнашендозень цебярь ответтнень.
Сидестонь инжикс ульсь Женя баба, бабазень щакац. Теенза сон пяк кеняртькшнесь. Женя баба эрясь ульцять омбоце ширесонза, кядьсонза байдеконя мархта ётнезе кить и сашендсь племянницанцты. Пяк кельгозе чайда симоманц. Чайть кельгозе бабазевок. Аньцек аськолясь Женя баба порогть вельхкс, бабазе путнезе чайникть, и мзярс сон ушеткшнесь лакама, сетьмоста корхнесть. Корхнесть фалу рузкс, сестразень мархта пяк дивандакшнеме тянди (Каргал велесь—мокшень). Бабазе  и мархтонк сяда сидеста рузкс корхнесь. Меле содаськ, што тядяц и аляц национальностьс коре рузонь ломаттельхть. Улема, тяфта лятфнезе эсь кудонц, идькс пингонц, тядянц и алянц…
Бабазень аляц, Константин Федорович Горланов, ульсь «Ленинонь заветоц» колхозть васенце председателец. Колхозсь пуроптфоль  1933 кизоня, эзонза сувсесть колма велет: Каргал, Красавка и Сбродовка. 1941 кизоня сире атязень сявозь войнас, раненияда меле мрдась куду и поладозе колхозса работаманц. Эрясь аф ламос, туфталкс тянди арасть ранениятне. Константин Федоровичень и Анастасия Трофимовнань семьяса бабазе васенце шабасель. Сяс, улема, фалу ульсь пяк ответственнайкс. Сембоса лезнесь тядянцты и кафта сазоронзонды Верати и Наташати. Шумордамок 1940 кизоня 7 класст, бабазе поступась Зубово-Полянскяй педагогическяй училищав. Стака пингть савсь теенза тонафнемс. Зубова Полянав, коса педучилищась, пачкотькшнесть ялга, сидеста кяпе, ванфтомок пильгс щаматнень, а училищать маласа ни карьсесть. А тяса нинге войнась ушедсь…
1944 кизоня начальнай классонь од учительницась ушедсь тонафтома иднят Ширингушскяй райононь Ивановка велень школаса. Школась велеса начальнаель, велеса ашель аф клуб, аф библиотека, аф лавка. Школась ульсь сембокс. Тяса ётнесть собраниятне, тяста прважсезь фронту алятнень, мирттнень, браттнень. Велень сембе эряйхне сашендсть сей эрь шобдаваня, штоба содамс фронтста кулятнень—школаса ладяфоль радио. Мольсь войнань колмоце  кизось.  Войсканьке сяськондсть лама вастова. Фронтста сашендсть цебярь кулят. Кулемок  синь, ломаттне срадондсть кудга, а Пелагея Константиновна ушеткшнезень урокнень. Работада меле ломаттне тага сашендсть школав. Синь эняльдсть учительницати морафтомс фронтста саф сёрматнень радня ломаньцнон эзда, лувондсь сон и похоронкат. Аватнень мархта авардсь, кулемок синь мала ломаньцнон эряфста тумаснон колга, и кеняртькшнесь, мзярда сашендсть цебярь кулят. Кой-кона сёрматнень Полясь морафнезень несколькаксть. Ломаттне ашесть  кема похоронкатненди и мяльсноль кулемс нинге и нинге, мезе теест тяштсть мирдьсна, алясна, брадсна, цёрасна.
1947 кизоня бабазе лиссь рьвакс Кузьма Федорович Чекмарёвонди, кона шачемас коре ульсь Ивановка велеста. Меле ётасть эряма Каргал вели, шапсть-путсть куд, касфтсть ниле цёрат. Бабазе работась начальнай классонь учителькс Каргальскяй школаса, а атязе механизатороль колхозса. Кузьма Федорович передовой работниколь, цебярь специалистоль, сяс теенза и максфоль работамс од техника, конатнень ёткса ульсь «Сталинец» прицепной васенце комбайнась. Сон вешфксуволь ломанць. Аф аньцек лац содазе и шарьхкодезе техникать, но  и пяк цебярь плотниколь, столяроль. Лац рисовандась, морась гармонияса и балалайкаса. Стака работась лафчептозе шумбрашинц, кулось 62 кизоса.
Бабазе работась Каргальскяй школаса 1985 кизоти самс. Сон «Трудонь ветеран», ули «Народнай просвещениянь отличник» казнец  (1976 к.). Бабазе тонафтсь велень идень аф фкя поколения, учениконза тяни работайхть учителькс и юристокс, врачекс и инженеркс, трактористокс и предпринимателькс. Ингольдень учениконза и тядясна-алясна лятфнесазь бабазень лямбе валса, кельгозь.
Ётасть кизот. Монга шумордайне сяка жа педагогическяй училищать, конань шумордазе бабазе, служань Армияса, получань высшай образования, работан. Ули семьязе, касы цёразе. И тяни теенза морафнесайне сяка жа ёфкснень, конатнень тейне морафнезень бабазе.
Константин Чекмарёв.
Зубово-Полянскяй районць.
25.03.2021 №11

 

Мария Пивкина: «Сире Теризморгав седиезе уски фалу»

Мокшэрзятнень этническяй культураснон эсь лацонь ширец—тя национальнай илатне, койхне-обуцятне, моротне, кштиматне. Сембось тя ули Г.И.Сураевонь-Королевонь лемса «Келу» фольклорнай ансамбльть творчестваса. Сонь репертуароц козя и аф фкя лацонне. Ансамбльсь кеме соткст кирди финно-угорскяй нароттнень мархта. Коса афоль сав улемс «Келути», фалу пяк маштозь, мялень салазь няфнесы мокшэрзятнень кунардонь национальнай культураснон. А конашкава мазыхть щамсна!
«Келу» ансамбльса морсихть асу, эсь тевонь лац содай-машты ломатть, конатнень седисна палы сембе минценнети пси кельгомаса. Ётксост МР-нь Народнай и Заслуженнай артистт, но улихть и од морсихть, конат тяни ни няфнихть морамань-кштимань тевса оцю маштомоши. Фкясь синь ёткстост од мокшавась Мария Пивкина. Аф кунара артисткась ульсь минь редакциясонк, коса пара мяльса отвечась корреспондентоньконь кизефксонзон лангс.

18.03.2021 №10

 

 
 
 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин