Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031
Мокшень правде-100

ОЦЮ КИС БСЛАВАЗЕ...

Кишняков Ильянди кемгафтува кизоль, мзярда сон, Алякс велень церась, няезе менельса кожфонь шарть, кона лийсь Москуть ширде. Сон лийсь Ямской велеть шири. Ванць Илья и ашезе сода, кой-мзяра минутада меле кожфонь шарсь прай Потиж Слобода велеть малас, а эсонза лии стратонавттне Васенко, Усыскин и Федосеенко шавовихть. СССР-сь авардсь. Шавовсть кельгома церанза.
Тя ульсь 1934 кизоня. Герой стратонавттнень прахснон путозь Кремлянь стенати. Потиж Слобода велеть лемдезь Усыскинакс. Васенконь и Федосеенконь лемснон максозь Саранск ошса кафта ульцятненди. Меле вокзалть инголе колма стратонавттненди стяфтсть памятник.
А менельса лиендсь «ИЛ» самолет. Авиаконструкторть Сергей Владимирович Ильюшинонь лемоц лац содафоль кода марнек странасонк, стане и Аляксса, Пойвелеса, Глушкаса. Кадошкинскяй райононь эряйхне аф весть кочксезь Ильюшинонь депутатокс СССР-нь Верховнай Совету. Сонь портретоц эрь кудть стенасоль.
Кодама церань ашель мялец арамс летчикокс!
Кишняков Ильяньге крьвязсь седиец лиендемс!
 
Ильянь шачсь нинге фкя асувоц. Сон ушедсь серматкшнема «Мокшень правда» газетав и «Колхозонь эряф» (тяни «Мокша») журналу азкст и баснят. Тя ульсь 1938-1939 кизотнень. Весть Кишняков серьгядемань пялост и лувозе тейне «Китсь и Щукась» баснянц. Басняса азондовсь, кода Щукась тяряфнесь сускомс Китть, и врьгятсь лангозонза. А Китсь стане цяподезе нярти, Щукась прянц вельф цюцелондась и прась рдазти. Шарьхкодевсь, мезень колга баснясь. Сянь, кода Якстерь Армиясь каясь самурайхненди Халхин-Гол ляйть и Хасан эрьхкть маласа.
Аф стак кирдезе мяльсонза Кишняков Дальняй Востокть. Кемзисемге кизоса сон тусь тоза ялганзон мархта «Амурсталь» заводть строяма. Комсомолсь кучезень. Кода тоса работасть, кода строязь «Амурсталь» заводть, кода эрясть, Илья Кишняков лама кизода меле азондозе «Вешендьса эсь тяштезень» и «Монь тяштезе—менельсь» романонзон эса. Кишняков Дальняй Востокса аф аньцек завод строясь, сон тонафнесь аэроклубса, конань аделамда меле колма кизот тонафнесь военнай летчиконь школаса, арась летчикокс, лиендсь штурмовик самолетса.
Войнада меле Кишняков мрдась куду и музе эсь тевонц. Сонь сявозь работама «Мокшень правда» газетав. «Мокшень правдаса» ся пингть работасть ни Илья Девин, Максим Бебан, Василий Радин. Синь сувафтозь од Ильять эсь еткозост, кода пара ялгань, шназь сермадомань асувонц, лезнесть теенза.
Оржатольхть «Мокшень правдань» журналисттнень перасна. Сидеста серматкшнесть фельетотт и сялги статьят сятнень колга, кит кальдявста тиендезь эсь тевснон, кит исть заботенда ломаттнень инкса, обжсезь синь. Тевсь вдь коза пачкотькшнесь? Тяфта, Пойвелень «Виде ки» колхозонь правлениясь эсь заседаниясонза лихтсь постановления: аф нолдамс лугав кефкие тракс и фкя вазня. Тракснень аф нолямс кемонь шит, а вазнять—вете шит (вазнять цютькя ужяльдезь). Мес тяфта тисть? Туфталсь ся—ня жувататнень азорсна кой-мзяра ши ашесть лисенде колхозу работама, а работасть эсь пересост.
Илья Кишняков и сонь ялганза газетаса тяшнесть аф аньцек фельетотт и оржа статьят. Оцю войнаса сяськомась макссь ломаттненди од эрьгя и надиямат. Строявсть од завотт и фабрикат. Вели сашендсть тракторхт и комбайнат. Войнаста саф алятневок кярьмотькшнесть лажатф тевснонды. Эрь мода пакшкять старандасть сокамс и видемс, велеса серонь урядама лисендсть оцюнек-емланек.
Редакциясь сидеста кучсезе Кишняковонь вели. Тоста самдонза меле сон макссесь газетав очерк или статья велеть эряфонц колга. Сонь героензон еткса ульсть трактористт и комбайнерхт, звеньевойхть и дояркат, сят, кит виень аф ужяльдезь работасть аф аньцек эсь инксост, а марнек странать инкса.
Етась кой-мзяра пинге, и ашесть карма тяльгондема школатненди иттне. Эрявсть од школат, эрявсть од учительхть. «Учитель» валсь кайгозевсь вярьгак! «Мокшень правдав» серматкшнихне газетаса азондсть касы иттнень и синь тонафтыснон—учительхнень колга.
Весть кандозь Аляксу «Мокшень правдать», а эсонза Илья Кишняковонь «Учительница» очеркоц. Сон азондсь кельгома учительницаньконь Елена Алексеевна Соловьевать колга.
«Мокшень правдаса» Илья Кишняков ушедозе и писателень кинц. Войнань кизотнень армияса улемась, Дальняй Востокса границать ваномац, Япониянь милитаристтнень каршес тюремась, шачема крайть эряфонц мархта васедемась макссть теенза кели сельмованф, лихтезь оцю кис. Сембось тя комболфтозе од писательть седиенц, кошярязе сермадома. И эвондасть Илья Кишняковонь васенце азксонза: «Ниле шуфтонят», «Наследник», «Ефим атянь эльбятьксоц», «Монь ялгазе Ван У». А 1954 кизоня Мордовскяй книжнай издательстваса лиссь азксонь васенце книгац. Сонь лемоцоль «Наши будни». Лиссь рузкс, ламоц азксонзон од писательсь сонць етафнезень рузкс и печатлакшнезень «Молодой ленинец» (тяни «Республика молодая») газетаса и «Литературная Мордовия» альманахса.
1956 кизоня одукс ушедсть лисендема мокшень и эрзянь журналхне. «Мокшеть» ся кизонь васенце номерсонза печатлафоль Илья Кишняковонь «Васенце кельгомась» повестец. А журналть колмоце номерсонза лувихне азондозь ни эсь мяльснон тя повестть колга.
Илья Кишняковонь эряфонц ламошкац етась «Мокшень правда» газетаса, «Мокша» журналса, Мордовиянь Писателень союзса работазь. Вели якаматне, ошень эряфтьке лац содамац, лама ломанень мархта васетькшнемась оржаптозь писательть ванфонц, касфтозь сермадомань асувонц. Фкя-фкянь мельге лиссть «Васенце кельгомась», «Самолетсь повсь туцяс», «Пизел сёка» повестень и азксонь книганза.
1962 кизоня Саранскяйса нолдафоль Илья Прокофьевичень «Иссась шуди Волгав» повестец. Тя повестсь сяда меле лиссь рузкс «Исса течет в Волгу» лем ала (рузкс етафтозе Москувонь писательсь Георгий Ладонщиков). Рузкс нолдафоль кода роман. Эстоньберя мокшэрзянь литератураса «Иссась шуди Волгав» повестсь кармась лемневома романкс.
Войнада мельдень эряфсонк сталмотнень и прябалатнень колга сермадомаса кепотькс няфтсь Иван Антонов. «Ухабы на дорогах» очерксонза райкомонь секретарсь Бурмистров арась сялдомань лемкс. Бурмистров люпшнесь ломаттнень лангс аньцек сянкса, штоба «лисемс инголи» и, штоба сонь шнашендолезь. Иван Антоновонь «Ухабы на дорогах» и «Трудодень» очерконзон лувозень содаф писательсь Валентин Овечкин, и синь печатлафтольхть «Дружба народов» журналса.
Оржа кизефксне таколфтозь и Илья Кишняковонь. Сон сермадсь эсь прянь кельгихнень колга, сятнень, кит валса надияфнесть пара эряф, а тевса няфтезь ломаттненди сембе нужатнень. Кишняковонь сатирац сембода пяк оржамсь фкя актса пьесанзон эса («Цятконя», «Валазя ки», «Уледа шумбрат»). А меле марса Илья Девинонь мархта синь сермадсть комедия, конанди макссть «Урма» лем. Тя комедиясь мокшекс путфоль Рузонь драматическяй театрасонк.
Аф юкстави, кода 1976 кизоня Пойвелеса етась Мордовиянь Писателень союзть заседанияц. Сонь вятезе Илья Девин, писателень организацияньконь оцюняц. Вакссонза озафоль тястонь «Дружба» колхозть оцюняц Петр Ильич Спирин. Корхтамась мольсь мокшэрзянь литературать колга, и башка азомс, Илья Кишняковонь «Иссась шуди Волгав» романонц колга. Велеряенза арасть писательти паронь арьси критикокс. Лувозь книганц и азондозь колганза эсь мяльснон-арьсемаснон.
Дальняй Востокса работамста, аэроклубса и летнай школаса тонафнемста Кишняков вятсь дневник, коза серматкшнезень, мезе няендсь эрь шиня, мезсь кеняртьфнезе и мезсь пичефтезе. 1939 кизонь 1-це декабрьста дневниксонза сермадсь: «Ушеса лов. Павильонца, коса эрятама тянемс, якшама. Кафксонек тиенттяма тяфта: илять, работада меле, койканьконь шашфнесаськ фкя ужес—ряцоконя-ряцоконя, кочксесаськ сембе одеялатнень, сембе щамоньконь и пштитькшнетяма фкя-фкянди. А шобдава сргостяма—павильонцонк лов, вельхтерданьконь лангса лов».
4-це декабрьста сермадсь: «Ветенди макссть тейнек комната, эрятама: П.Киселев, Н.Холодов, П.Хохрячкин, В. Егоркин и мон. Комнатаньке лямбе, валда, ули электричества—мезе тага эряви! Илять кой-коста якатама кинос, лияста спектаклень или концертонь ванома-кулхцондома. Нюрьхкяняста азомс—эжеме аф ламняда. Мон библиотекаста сявондян книгат. Киселев Петькать мархта сидеста корхнетяма литературать колга: Горькаень, Маяковскяень. Кельговсть синь тейне».
Афоли эста, аф теждя пинкнень, сталмотнень лангс апак ватт, кассь Кишняковонь мялец лацкас содамс литературать, варжамс эстеензовок сермадома.
Кишняковонь дневниконц эзда содаськ сяньге, кода сон сась куду: «1947 кизонь 13 июньцта 15№ поездть шарыенза тжназевсть и сон лоткась Инсар станцияв. Пачкодеме. Васьфтемазь алязе и Натань шабанза. Канксонень явоськ—кинди мезе вийс коре и туме кинява Аляксу. Аньцек валгоськ дебанять, сатомазь Максим Данилович овоньке—Натаньконь мирдец, а монь эзназе. Канксоньке сядонга теждялгодсть.
А илять пуромсть пялонк идькс пингонь ялгане: Кузьмась, Петькась, Ванюшкась. Кафкса кизот ашелень кудса. Ровна кафкса кизот и фкя ши.
Алязе и Натаньке озафнемазь шра ваксс. Эзназе коста-бди мусь копордамбяльня и ушедоме васьфтема иланкса чекиема. Аф ламос ащезь Петькась кантфтозе шабатнень кядьста аккордеононц и тевоньке тусь. Минь моратама, а эзназе кштий пильгонь ерязь. Мельганза Натавок комотсь кштима, дуборфоц моли, шаронды мирденц перьф да частушкат лочай. Алязе ушедсь мокшень мора. Сельмоведенза аф кирдевихть, а сонць морай…»
Сонць эряфсь сувась Илья Кишняковонь азксонзонды, повестензонды, романонзонды, пьесанзонды.
А.ТЯПАЕВ,
Мордовиянь Народнай писатель.
Снимкаса: кержи ширде видити: мокшень писательхне В.Чукаров,
Е.Тимошкин, И.Девин, В.Волков, И.Кишняков, С.Кинякин.

11.08.2011 №31

Новости

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021   № 1
Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020   № 48
«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020   № 48
Республикань вятить Рузаевскяй районца улеманц колга

Мордовия Республикань Оцюнять аф лама пингс тевонзон тиендисна Артём Здунов 8 декабрьста рабочай визит мархта ульсь Рузаевскяй районца. Республикань вятись содафтсь «Стекольная компания «Развитие» ООО-ть производственнай мощностензон мархта, тяконь лувксса ванозе клянцеконь тарань нолямань цехть.
Заводть продукцияц пачфневи Россиянь ламоц региоттненди, а стане жа экспортс—Арменияв, Литвав, Грузияв, Польшав. Тяфта жа республикань вятись ётафтсь предприятияса «Рузаевка» ТОСЭР-нь резиденттнень мархта келептьф совещания, коса ванондовсть территориять касфтоманц коряс перспективатне. «Штоба сяда активнайста серьгядемс резиденттнень, эряви виияфтомс кинь и транспортонь инфраструктурать, тя пяк важна, карматама лездома»,—азозе Артём Здунов.
Тяка жа шиня республикань вятись ульсь идень технопаркса, коса ванозень работань сембе направлениятнень. Тяса дополнительнай образования получай 800 школаса тонафни.
Мордовия Республикань Оцюнять аф лама пингс тевонзон тиендисна стане жа ванозе идень ташта поликлиникать. 2021 кизонди Артём Здунов путсь задача—строямс идень од поликлиника.
Сяда тов региононь вятись ванозень Ухтомскяень лемса клубть одкстоптоманц коряс тефнень и ульсь «Рузхиммаш» АО-са. Тядде тяса арьсекшневи нолдамс 10 тёжятть вагон. Кафта ковда меле «Рузхиммашса» панжеви содамошинь и маштомошинь фабрика, коса кармайхть тонафневома несколька рабочай направленияс коре од специалистт.
10.12.2020   № 48
«Республикаса ули сембось сяда тов касомс-вииякшнемс»

Шуваланяста, 3 декабрьста, ётась Мордовия Республикань котоце созывонь Государственнай Собраниять ведьгемонь фкиеце сессияц. Сонь работасонза примасть участия Мордовиянь Оцюнять аф лама пингс тевонзон тиендисна А.А.Здунов, Мордовия Республикань Государственнай Собраниять Председателец В.В.Чибиркин, Правительствань члеттне, МР-ть эзга федеральнай органонь вятихне, муниципальнай райононь оцюнятне.
Сессиять работанц ушетксста Мордовиянь Оцюнять аф лама пингс тевонзон тиендисна А.А.Здунов залу пуромфненди мярьгсь:
—Тячи минь мархтонт васенцеда васедеме тяфтама составса. Васендакиге мялезе нинге весть азомс сюкпря Российскяй Федерациянь Президентти оцю довериянь максоманкса. Карман тиендема семботь, штоба Мордовиянь эряйхнень надиямаснон пяшкодемс эряфс. Республикаса ули сембось, мезсь эряви вяри касоманди и инголи молеманди, и тя тевса надиян тинь ширень кирдемантень лангс.
10.12.2020   № 48
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин