Лиссь стане, што мон нинге од стирькс явонь Сарга веленьконь эзда. Эстоньбере етась аф кржа пинге. Но, аф  ваномок тянь лангс, шачема-касома вастонязень мзярдонга ашине юксне и аф юкстаса снярс, мзярс шисан. Вдь тоса атяньконь-аляньконь калмосна, кудъюрхтсна, тоса эряйхть земляконе. Пяк пара улель, кда мокшень газетасонк лятфталеде мокшень веленьконь колга, азондоледе сонь историянц и тячиень эряфонц квалма. Татьяна Алямкина. Редакциять эзда: минь тячи пара мяльса пяшкодьсаськ лувиеньконь эняльдеманц. Тияк пачфнесаськ, што газетасонк сяда товга карматама азондома мокшень велетнень историяснон колга.  

     Кода лемоц тя ляйнять, и коза сон тяшкава эряскоды? А тя Мокшесь. Сон эряскоды кандомс ведензон Волга ляйти. Тя ляйть эзда ушеды Родиназень ушетксоц—Рыбкино велесь. Калень шяйть эзда, коса мзярда-бди ульсть пяк лама каркта. Но валом валом шяйсь сяда коськсь, каркне кадозь шачема крайснон, а Мокшесь стаки шуди, азонды эряфонц колга лия ляйхненди. Аф стак мокшень содаф поэтсь С.В.Кинякин эсь стихотворениясонза тяштсь.  

Атюрьевскяй райононь Шяйгужа велеса эряй-ащи Путяйкиттнень семьясна. Мирттне-рьвятне кафцьке трудонь ветератт,  шнама ломатть районца и велеса. Ванат лангозост и аф верондат, што теест 75 кизонь. Синь тяфтама жа отькорьхть, трудонь кельгихть, пяк ламось теест нинге вийс коре. Полатне пцтай 51 киза эряйхть марса. Эряйхть ладязь, кельгозь, фкя-фкянь шарьхкодезь. Николай Иванович коль шнай рьванц эса. Прасковья Васильевна кельгозь, ужяльдезь корхтай-азонды поланянц колга. И синь можнат шарьхкодемс.     Мирттне-рьвятне Путяйкиттне касфтсть кота стирьхть.  Трямасна аф тёждяль. Шобдаста шобдас работасть: шить колхозса, илять кудса. Ашельхть аф отпусксна, аф ваймама шисна. И мзярдовок ашесть пеняцякшне эряфть лангс. А тоса венемсть идьсна. Сяда оцюфне лезнесть ёмлатненди, тядятненди-алятненди.

Башкортостанонь Фёдоровскяй райононь Кузьминовка мокшень велеса 1970 кизоня эвондась «Пизелкс чувто» мокшэрзянь фольклорнай ансамбльсь, конанди пуроптыкс ульсь Татьяна Григорьевна Никитина. Ансамбльсь ушедозе тевонц кода художественнай самодеятельностень коллектив. И пцтай эстокиге сценать лангс кармасть лисендема мокшень и эрзянь моротнень мархта, конат пяк тусть ваныхнень мяльс. Ся пингста сявомок ансамбльть эрь концертоц—афкуксонь праздник мокшэрзянь моронь, сиде моронянь кельгихненди.

Азонттама Левжа велеста Канаефнень лама идень семьяснон колга
Рузаевскяй райононь Левжа мокшень велесь содаф асу, ёню, творческяй ломанензон, национальнайть, коеньконь-обуцяньконь, родной кяльть ванфтомаснон мархта. Сатомшка лятфтамс «Ару лихтибря» народнай хорть и сельминголет эстокиге эвондайхть мокшень щамса-карямса наряжаф аватне и стирьхне, конатнень коряй пайгонякс кайги вайгяльсна аф кадсазь озадонь седихть ащема кулхцондыть. Ня мокшаватнень эзда фкясь—Левжа велень Культурно-досуговай центрать директороц, вяре азф хорть художественнай руководителец, афкуксонь патриотсь, мокшавась Людмила Гавриловна Канаева. Лемоц содаф ламотненди уликс сатфксонзон инкса. Да аф аньцек Людмила Гавриловна, а Канаефнень марнек семьясна творческяй, музыкань кельги.
Тяддень июнть ушетксста Ульяновскяй областьса тифтольхть итокт «Успешная семья Приволжья—2017» V окружной фестивальти-конкурсти. Мокшэрзянь масторста тосоль Канаефнень лама идень семьясна. Сон азфоль инь цебярькс «Родительская слава» номинацияса. Тя конкурсти Канаефне якасть вейхксонест: Людмила Гавриловна, мирдец Алексей Геннадьевич, колма идьсна—стирьсна Олеся и Татьяна, цёрасна Геннадий, овсна Владимир, Олесянь и Владимиронь идьсна Арсений и Дарина, Людмила Гавриловнань авозец Прасковья Никифоровна.
12 июньцта—Россиянь шиня тя семьясь тернефоль торжественнай пуромксс Саранскяи Республикань Куду, коса васьфнесь Мордовия Республикань Оцюнять аф оцю пингс тевонзон тиендиснон В.Д.Волковонь мархта.
«Мокшень правдать» тячиень номерсонза содафттядязь Канаефнень лама идень семьяснон колга сяда келиста.

Свадьбась—тя инь мяляфтови шись семьять эряфса. Кунардонь пингть свадебнай обряттнень ульсть эсь лацонь смузьсна. Колгаст тейнек азондсь Ковылкинскяй райононь Цятна велень эряйсь Мария Павловна Резова. А теенза эсь пингстонза илать колга пачфтсь сонь тядяц Прасковья Андреевна Максакова.