Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031
Мокшень правде-100

ЭРЬ ВАЛНЯСЬ КАЙГОЗА ПАЙГОНЯКС

Ня лятфнематнень инголи ерань лемдемс—«Сермадома тонафтомань газетась». Ня валхне пяк видет и ладяльхть лятфнемань лемдемс. А сяльде арьсезевонь, а кда кивок лувихнень эзда кизефтьсы: «А школаса  мезе тиендеть?..» Сави теенза азондомс, школаса тонафнине букватнень, тонафнень эздост валонь, предложениянь кочксема. Сяльде диктантонь, изложениянь, сочинениянь сермадома. Но тя сембось идень налхксема газетань школать ваксса. Мяляфтса, кода васенцеда нинге студентокс сувань «Мокшень правдав», коза тердемань эстонь ответственнай секретарсь, сяда меле «Мокша» и «Якстерь тяштеня» журналхнень редакторсна, Мордовиянь Заслуженнай писательсь Григорий Ильич Пинясов. Сон вятнемань кабинетста-кабинетс, коза озафтольхть эряфкшу и од ломатть, конат сяшкава эряскодозь сермадсть, бта пельсть сявсазь кядьстост ручкать или норгсазь ингольдест кагодть. Г.И.Пинясов азозе, што тячи газетать лисема шиц и «алянь-цератне» пяшкотькшнесазь газетаса шава васттнень. Кода и мезьса синь пяшкотькшнемс, и мес газетать анокламста улендихть шава вастт, кармань содама аньцек эста, мзярда ушедонь работама «Мокшень правдаса».
Мокшень кяльса лисенди газетав покодема сань Ленинградскяй университетонь журналистикань факультетть аделамда меле. Тоса ашеськ тонафне мокшень кяльть. Сяс васень пингть ульсь пяк стака. Улень практикаса районнай и республиканскяй газетаса, конат лисендсть рузонь кяльса. Мзярда ушедонь покодема «Мокшень правдаса», шарьхкодине, што рузонь и мокшень кяльсь пяк ичкозет фкя-фкянь эзда. Да тага минь, Зубунь аймакса шачфнень, диалектоньке пяк ичкозель литературнай кяльть эзда. Минь корхтамасонк ульсть «рыбанят», «лягат» и лия валхт, конатнень лангса пеетькшнесть лия районца шачф-касф корреспонденттне и синь ашель кода нолдамс газетать лопанянзон лангс, штоба аф пеетьфтемс сембе лувихнень. Тячи виденцян, васенце информациянень, корреспонденциянень серматкшнине рузкс, сяльде етафнине мокшекс. Кие тяряфнесь тя тевть тиема, ся курок шарьхкодьсамань, рузкс серматф предложениясь валста-валс етафтомс можна, но сон аф кармай стане кайгома мокшень кяльса. Тяфтама жа палас поват, мзярда ушедат етафтома мокшень кяльста рузонь кяльс. Мзярда эсь муцяманень информациянь и корреспонденциянь сермадомста азондыне Сергей Васильевич Кинякинонди, эста сон работась «Мокша» журналса, а мон тоза макссине юморесканень, азксонень и стихонень. Содаф поэтсь азозе, кле, тиендян шава тев. Эрь валсь кайгоза пайгонякс, эста статьяцень, стихцень, азксцень лувсазь  мокшень лувихне. А мзярда вихца латцесайть фкя-фкянь мельге валхнень, предложениятнень—ся статьять, стихть или азксть, кда ушеды лувомонза ломанць, пенцты мзярдонга аф пачкоди. И эстокиге  лятфтазе М.Безбородовонь стихотворениянц:
Кизонда, вирняй,—
Пиже лопаняй.
Пси-мани шиня
Шида кяшиняй…
Мзярда аделавсь стихотворениясь, Сергей Васильевич сетьмось аф ламос, сяльде поладозе: «Марясак, эрь валнясь вастсонза,  пайгонякс цингорды, седи токай-кеняртьфти. Тон тонатт мокшень кяльть кулхцондомонза, тят визде сяда лама кизефнемс работас коре ялгатнень, лувонтт сяда лама—аньцек эста туй тевце».
Пади, мольфнень мяль эстонь отделонь заведующайхненди Д.А.Любимкинонди, И.С.Лушкинонди, Н.И.Зотовати, старшай корреспондент­тненди Н.Д.Шуляевонди, И.Н. Кудашкинонди, С.С.Бородкинонди и лиятненди. Кизефнень и кизефнень, кода етафтомс рузонь кяльста, кода сяда лац азомс мокшекс тя или тона валть. Тевозе валом тусь. Кда инголи серматфозень лангса петькста ульсь, улема, сяда лама серматфозень коряс, кизефнемада меле машинкаса печатлаф лопаняне ушедсть валдомома, петькста кармась улендема коль сяда кржа и кржа. Кармасть сяда сидеста лисендема азкскяне, стихоне, юморескане. Няезе тянь «Мокшень правда» газетать эстонь главнай редактороц, писательсь Н.И.Учватов, кошардомань вятемс «Кячказ» пеетькшнемань-сингорямань уженять, сяда тов—иттнеди лемтьф «Цятконя» уженять, а меле—«Литературнай страницать», коса печатлакшневсть мокшень писательхнень и поэт­тнень од произведениясна.
Главнай редакторсь тонафнемазь арьсема. Лияста шават пря, штоба анокламс тя или тона писательть стихонц или азксонц, аделасак, арьсят, што аноклать «шедевра», кона прянц лангс шарфтсы аф аньцек литературать, а марнек эряфть. Николай Иванович страницать вярдень уженязонза сермады аньцек фкя вал­—«Лафча». Нильсак сяпи надобиять, озат шрацень ваксс, кармат вешендемост произведениять лафча вастонзон. Арьсят-арьсят—мусайть. Пара, кда тонцень «произведениясь», а кда лия авторонь?.. Бта аньцек исяк шнайть серматфонц, а тячи эряви сялдомс, мрдафтомс. Мезе и кода теенза азомс, што серматфоц газетаса аф лиси. Арьсят и муят валхт.
Тя тевсь тонафтомань ломаттнень мархта корхнема, произведениятненди анализонь тиема, мезсь пяк эрявкстсь, мзярда ушедонь работама литературнай изданияса, сяльде—Писателень союзса, коса авторхне писательхть и содаф литераторхт.
«Эрь валнясь кайгоза пайгонякс». Конашкава оцю смузь ня валхнень эса. Тянь шарьхкодине, мзярда работань Илья Максимович Девинонь мархта «Якстерь тяштеня» журналса. Минь озафтолеме фкя кабинетса. Гайфтсть «Мокшень правдаста». Эняльдсть И.М.Девинонди сермадомс стих кодама-бди праздниконди. Сон инголи атказакшнесь, кле, сиредень, да тага эряви идень журналти материалхт анокламс… Мзярда ашезь атказав, шамац и нльне сельмованфоц полафтсть. Ломанти, конань поэтонь лемоц содафоль эрь мокшень велеса, эрь школаса, а кода корхнихть синць поэттне, кле, васенце полосати, «дежурнай» стихть сермадомац сяда теждя пиле пряцень ангоряманц коряс.
Аф, аф тяфтама поэттнень эзда ульсь Илья Максимович. «Заказть» сявомда меле сон курендась сяшкава сидеста, сигаретанц крьвяснезе аньцек палфть эзда, качамти аф курендай ломанць сельгонь прамс опамоль. Ветешка кагод лопаня сермадсь-вадендсь. Сяльде лопанятнень тонгозень зепозонза, куду тусь.  Омбоце шиня сась весяласта, азозе, кле, ульсь «Мокшень правдаса», сявозь стихонц, лиси праздникти васенце полосаса, пароль «штамс»…
Тяфта корхнесь Мордовиянь Народнай поэтсь, конань стихонза лисендсть эчке журналса, башка книгаса, печатлакшневсть Мордовиянь сембе изданиятнень эса, сидеста лисендсть Москуса, Российскяй издательстваса. И мон пяк лац шарьхкодьса, мес тяшкава кеняртькшнесь Народнай поэтсь. Тя сяс, мес соньге творческяй киц кемоста сотфоль мокшень кяльса лисенди газетать мархта.
Газетаса покодемста сидеста кучсемазь командировкас. Лияста рдазга, ловга пачкотькшнят тя или тона веленяти. Етай веконь 90-це кизотнень нинге ашельхть ламоц велетненди асфальтса вельхтяф кит, аф сяшкава сидеста якасть автобусне, такситнень колга аньцек кулендеме. Сяс командировкас якамста пяк сидеста сюцекшнеськ кучиеньконь. А тяни сюконян пильгозост. Сяс, мес эрь командировкась—васедемат лия ломань мархта. И хуш аф сембонь колга азондонь корреспонденциясон, статьясон и зарисовкасон, ся ломаттне или синь прянь вятемасна, характерсна сувасть азксозон и пьесазон. Сяс сидеста сашендови кулендемс валхт, кле, ашелеть Торбеевскяй или Темниковскяй районца, а азкссот, сценкасот, пьесасот минь велень ломаттне. Тяфтама лувихненди тага весть азса, што велесост улендень ефси од корреспондентокс, а кда ашелень, васьфнень азондома машты ломань мархта.
Кельгома газетазень юбилеенц карша арьсян газетать сембе ноляензонды кеме шумбраши и, штоба печатлаф эрь валнясь кайголь пайгонякс. Аньцек тяфта кульсамазь лувиеньке.
 
Н.ГОЛЕНКОВ,
Мордовия Республикань Заслуженнай писатель.
 

18.08.2011 №32

Новости

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021   № 1
Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020   № 48
«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020   № 48
Республикань вятить Рузаевскяй районца улеманц колга

Мордовия Республикань Оцюнять аф лама пингс тевонзон тиендисна Артём Здунов 8 декабрьста рабочай визит мархта ульсь Рузаевскяй районца. Республикань вятись содафтсь «Стекольная компания «Развитие» ООО-ть производственнай мощностензон мархта, тяконь лувксса ванозе клянцеконь тарань нолямань цехть.
Заводть продукцияц пачфневи Россиянь ламоц региоттненди, а стане жа экспортс—Арменияв, Литвав, Грузияв, Польшав. Тяфта жа республикань вятись ётафтсь предприятияса «Рузаевка» ТОСЭР-нь резиденттнень мархта келептьф совещания, коса ванондовсть территориять касфтоманц коряс перспективатне. «Штоба сяда активнайста серьгядемс резиденттнень, эряви виияфтомс кинь и транспортонь инфраструктурать, тя пяк важна, карматама лездома»,—азозе Артём Здунов.
Тяка жа шиня республикань вятись ульсь идень технопаркса, коса ванозень работань сембе направлениятнень. Тяса дополнительнай образования получай 800 школаса тонафни.
Мордовия Республикань Оцюнять аф лама пингс тевонзон тиендисна стане жа ванозе идень ташта поликлиникать. 2021 кизонди Артём Здунов путсь задача—строямс идень од поликлиника.
Сяда тов региононь вятись ванозень Ухтомскяень лемса клубть одкстоптоманц коряс тефнень и ульсь «Рузхиммаш» АО-са. Тядде тяса арьсекшневи нолдамс 10 тёжятть вагон. Кафта ковда меле «Рузхиммашса» панжеви содамошинь и маштомошинь фабрика, коса кармайхть тонафневома несколька рабочай направленияс коре од специалистт.
10.12.2020   № 48
«Республикаса ули сембось сяда тов касомс-вииякшнемс»

Шуваланяста, 3 декабрьста, ётась Мордовия Республикань котоце созывонь Государственнай Собраниять ведьгемонь фкиеце сессияц. Сонь работасонза примасть участия Мордовиянь Оцюнять аф лама пингс тевонзон тиендисна А.А.Здунов, Мордовия Республикань Государственнай Собраниять Председателец В.В.Чибиркин, Правительствань члеттне, МР-ть эзга федеральнай органонь вятихне, муниципальнай райононь оцюнятне.
Сессиять работанц ушетксста Мордовиянь Оцюнять аф лама пингс тевонзон тиендисна А.А.Здунов залу пуромфненди мярьгсь:
—Тячи минь мархтонт васенцеда васедеме тяфтама составса. Васендакиге мялезе нинге весть азомс сюкпря Российскяй Федерациянь Президентти оцю довериянь максоманкса. Карман тиендема семботь, штоба Мордовиянь эряйхнень надиямаснон пяшкодемс эряфс. Республикаса ули сембось, мезсь эряви вяри касоманди и инголи молеманди, и тя тевса надиян тинь ширень кирдемантень лангс.
10.12.2020   № 48
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин