Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      
Мокшень правде-90!

«СЮКПРЯ, ШАЧЕМ КЯЛЕНЬ ГАЗЕТАНЯЙ!»

«Мокшень правдась» ськамонза тяконясь марнек масторлангса. Лия газета мокшень кяльса косовок аф лисенди. Тядде топоди теенза 90 киза. «Мокшень правдась» семботь тиендезе и тиендьсы сянкса, штоба кулеволь лиятнень еткса мокшень кяленьке, кайгольхть мокшень мороньке, афольхть юкснев коеньке-обуцяньке.
Сяда тов корхтамазень ушедса сянь эзда, кода пачкодень родной газетазти. Тя ульсь 1958 кизоня—средняй школать и Краснослободскяй техническяй училищать аделамда меле примафолень мокшень газетав. Эста «Мокшень правдаса» главнай редакторкс ульсь Федор Сергеевич Руськин. Сон путомань сермань и рабселькоронь отделонь заведующайти, Герасим Андреевич Игнатьевонди, лездома. Меле работань литературнай сотрудникокс, а сяльде кемокстафолень сермань и массовай работань отделонь заведующайкс. Эста ни главнай редакторсель Василий Михайлович Сурков.
Отделса тевда ламоль, ульсь помощникозе—Надежда Сергеевна Девятаевась. Ся пингть редакцияв сашендсь пусмонь серма аф аньцек республикань райоттнень и велетнень эзда, но лия областтнень и шабрань республикатнень, крайхнень эзда. И сембе васенда савсть лувондомс тейне, а сяльде каннемс главнай редакторти визань путомс. Лиякс мярьгомс, эрь сермась кодама отделу эрявсь максомс. Отделда ульсь вете: сермань и массовай работань, партийнай эряфонь, велень хозяйствань, культурань и бытонь и промышленностень.
Редакцияв аф шуроста сувсесть мокшень ломатть—газетать эзда лезксонь, видешинь вешема. Васьфневсть синь седи ваксста, мялень петезь савсь мархтост корхнемс. Сашендовсь аф кржа серма кучсемс мерань примамс партийнай, советскяй оргаттненди, и тяшнемс обжаф ломанень араламанкса. Кода сермань отделонь оцюня—кирнень кеме соткст республикань наружнай контролень комитетть мархта. Улень мон комитетонь аф штатнай инспекторкс, серьгятькшнемазь Мордовиянь народнай контролень комитетть заседанияс, тоста макссекшнень репорташт и отчетт.
Газетаста кучф пеняцяматнень каршес ответтне макссевсть «Мерат примафт», «Минь материалоньконь коряс», «Хоть сермась и апак печатлаколь» рубрикатнень ала. Лиякс мярьгомс, газетаса действенностть коряс сембе тевсь прашендсь сермань и массовай работань отделть лангс, конанди вятикс улень мон.
Редакцияса работамстон етафневсть рабочай и велень корреспондентонь совещаният, печатень шинь пуромкст и лия илат. Синь анокламасост сталмотнень оцюшкасна прашендсь сермань отделть лангс. Сембось тиентьфоль сянкса, штоба лацкас етафтомс ня мероприятиятнень. Газетаса лама киза и цебярьста работаманкса казьфан Мордовскяй АССР-нь Верховнай Советть Президиумонц кафта Почетнай грамотаса, Мордовия Республикань Почетнай грамотаса и СССР-нь Журналистонь союзть правлениянц Почетнай грамотаса.
Массово-политическяй работать вятемста пуроптовсь лама содаф ломаньда и ялгада. Аф весть серьгядеманьконь коряс сашендсть ширезонк и тяшнесть мяльс туф материалхт мокшень ученайхне и писательхне И.Е.Автайкин, В.С. Ивашкин, М.Г.Имяреков, О.Е.Поляков, В.Н.Корчеганов, В.М.Лобанов, Г.И.Пинясов, И.М.Девин, М.Л.Сайгин, А.П.Тяпаев и ламотне лиятне. Кой-кит тяни ашет шиса, а кой-конат тянивок кирдихть газетать мархта соткс.
Тяни пара валса лятфтасайне журналистонь тевти тонафтомать инкса газетать ингольдень главнай редакторонзон, конатнень пингста работань—Ф.С.Руськинонь, В.М.Сурковонь, Н.И.Учватовонь, П.П.Кулешовонь, конат ашет шиса и тяниень главнай редакторть И.С.Лушкинонь.
Тейне, национальнай журналистикань ветеранти, 60 киза топодсь 1997 кизоня. Но мон тяда мелевок кота кизот покодень кельгома газетасон. Тунь ваймосема аньцек 2003 кизоня, хуш тяни мокшень газетать штатса аф работан, но тостонь коллективть мархта кирдян кеме соткст и синьге монь аф юкснесамазь. Вдь эряфстон 45 кизоть максыне родной газетазти.
Вишкста моли пингсь. «Мокшень правдати» тядде топоди 90 киза. Пара мялезон, мес эсь эряфстон и газетать эряфста нильгемонь ветиеть максыне родной газетазти. Арьсян сонь коллективонцты оцю паваз, творческяй сатфкст, оцю вийса-эрьгаса аськолямс снярс, мзярс модать вельхксса валдопты шинясь!
Д.ЛЮБИМКИН,
национальнай печатень
ветеран, Россиянь
Журналистонь союзонь
член.
 

01.09.2011 №34

Новости

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020   № 29
МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020   № 29
ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020   №
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин