Поиск по сайту: 
 

Архив
 июль 
 2022 
пн вт ср чт пт сб вс
    123
45678910
11121314151617
18192021222324
25262728293031

 
 

 

Ветеранам о ветеранах

выставкась лемтьф Мода алдонь гарнизонть подвигонцты

 Саранскяйса 1941-1945 кизотнень военнай и трудовой подвигонь Мемориальнай музейса панжевсь «Мода алдонь гарнизонть подвигоц» лем ала выставка. Лемтьф сон Аджимушкаень каменоломнятнень араламаснон 80 кизонь топодемати и гарнизонть командиронцты Павел Ягуновонди. Выставкать панжемань церемонияс сашендсть ошень школаса тонафнихне.
 
 
Стирнятнень и цёранятнень мархта корхнемста Мемориальнай музеень директорсь Николай Кручинкин азондозе: тядде топодсь ведьгемонь киза, кода Аджимушкаень каменоломнятнень эса ушедовсть вешендемань экспедициятне. Мордовиянь поисковикне улендихть тоса 1990 кизоста сявомок и фалу мушендыхть паршихть, конат лездыхть сяда лама содамс ся шитнень колга, мзярда мольфтевсь оборонась. Муфт и солдаттнень ляткссна. Сембе синь оцю почесть мархта калмафт братскяй калмотненди. Николай Андреевич азондозе шабатненди, кода марясак пряцень ня лабиринттнень эса. Тоса фалу кельме, кожфсь летьке. И шобда… Аджимушкаень аралайхненди сашендовсь эрямс тя шобдаса пяле киза. Оборонать историяц пяк седиень ацергофты. Тянь колга азондсь и фильмась, конань няфтезь выставкать панжемста.
02.06.2022 №21

 

ЭРЬ ПОКОЛЕНИЯТЬ СОНЦЕНЬ ГЕРОЕНЗА!

Великай Победать лемс Мордовия Республикаса ётафтф лама и аф фкя лацонь мероприятия. Фкясь синь эздост «Эрь поколениять сонцень Героенза» лем ала ётафтовсь Мордовиять столицаса 1941-1945 кизотнень Военнай и трудовой подвигонь Мемориальнай музейса.
 

 

 

Сонць форумсь ащесь кафта пяльксста. Васенцеса ванондовсть «Фронтовой портрет. Солдатонь судьба» Всероссийскяй проектть, конань эса работасть Мемориальнай музеень сотрудникне, тяддень итогонза. Тя проектть рамкаса вешендевихть Великай  Отечественнай войнань боецне, конатнень графическяй портретсна рисавандафтольхть фронтса. Фкять синь эздост вешезь-музь Мемориальнай музеень научнай сотрудникне.

 

Мероприятиять панжемста музейть директороц Н.А.Кручинкин мярьгсь пуромфненди: кле, музеень фондса ванфневи Великай Отечественнай войнань пингонь 100 лама портрет, конатнень эса рисавафт солдатт и тюремань сценат. Сембе ня картинатнень казезь Мемориальнай музейти москувонь музейхне нинге 1995 кизоня, мзярда тя музейсь панжевсь Саранскяйса.

 

12.05.2022 №18

 

ИДЬКС ПИНГСНОН НЕЛЬГОЗЕ ВОЙНАСЬ


 

Геройть мяляфтсазь велеса


 

АТЯЗЕНЬ ЛЯТФНЕМАНЗА

Атязень лемоц Мефодий      Елисеевич Белкин. Шачсь 1936 кизонь 16 июльста Зубово-Полянскяй райононь Велезем велеса, коса и эрясь. Фалу пяк кельгине мархтонза корхнемазень, кизефнине эряфонц, шабакс и одкс пингонц колга. Тя кода фкя пильгса аськолдамс ётай пингти, ётафтомс эсь потмоват ся  стакатнень-сталмотнень и кенярдематнень, конат прашендсть атяньконь-бабаньконь эряфонь киснон лангс. Уленди, лакафттама мархтонза чай, сиптяма эсь нешкоперестонк медня мархта, эхи танцти!.. Озатама шра ваксс и саворне, сетьме веднякс шудезеви корхтаманьке.

 

«Семьясонк ветенектолеме: аказе, альняказе, мон и кафта  дуганне. Улель эздонк сисем, аньцек кафта брадне нинге ёмласта кулость. Школав тунь, мзярда аньцек ушедсь войнась. Алязе и альняказе туфтольхть воявама. Тонафнема ашель мезьса якамс, ашель мезьда ярхцамс. Пялес вачень пект эста эряме. Куттне кельмот, пенгат аш, вальмятне эихть.  Тядязе стяй шобдава ранакиге, кодавок тол аф муй, штоба крьвястемс кизякнень. Меле ушеды модамарень или лямонь пидема. Сиволь ни ашель, тянь колга аш месть корхтамска! Тушенттама школав: кинь каренза, кинь кямонза, а кинь мезецка аш... Ся козовок афи туй, кудса ащи. Велень ламоц иттне  школав якасть аньцек сёксенда, а тоса мянь тундас кудса нюрьксесть. Тялонда вдь кяпе аф молят.
 
05.05.2022 №17

 

ПОДВИГОЦ АПАК ЮКСТАК


 

СТРАНАНЬ ВАСЕНЦЕ ГЕРОЙТЬ ОМБОЦЕ ПИЛОТОЦ

Евгений Михайлович Конкин шачсь 1896 кизонь 10 июльста Ковылкинскяй райононь Казённый Майдан велеса. Гражданскяй и 1941-1945 кизотнень Великай Отечественнай войнатнень участниксна, полярнай лётчик. Сон ульсь васенцекс сятнень ёткста, конат кулезь «Од ломаттне авиацияв!» тердемать. 170 цёрать эзда комиссиясь кочказе аньцек кемголмувоть, ётксост ульсь и Евгений Конкин. Странати эрявсть лётчикт, сяс киза пяле мархтонди арьсеф теоретическяй курсть курсанттне ётазь 8 ковста. Теенза савсь тонадомс самолётть, кона рамафоль Италияста,  и ялганзон мархта марса тя самолётса сон лийсь Одессаста Владивостоку.
1930 кизонь январьста примасть участия Хабаровскяйста Сахалину кожфонь линиять панжемасонза. Синь самолётсна ушедсь пачфнема пассажирхт краевой центраста  ичкоздень острову 5-6 частста, инголи тя кись занцесь 13 сутка. Васенда мялезонза тусь линейнай службась, мяленц салсезь аф содаф васттне, ломаттнень мархта васьфнематне. Меле «кусторксста кусторксс» лиендемань трассась мяль мольфтсь. Рейсовай пилотсь ёрась тиемс мезевок дивандафты, оцю, эрявикс. Подвиг? Аф, мезевок эрявикс Родинати. Сонь ускозе тоза, коса сяда стака. Ичкоздень Северть колга азондоматне, конатнень кулезень лётчикнень эзда, сяшкава салсезь Евгений Михайловичень мяленц, што сон анась  пря Севернай морской кинь Главнай управлениять полярнай авиациязонза. Ламонцне, улема, кулезь «Челюскин» пароходть мархта сотф историять. Тя ледоколса 1933 кизонь 10 августста северонь исследовательхне тусть Мурманскяйста Владивостоку севернай кить вешемонза. Экспедицияти оцюнякс ульсь содаф учёнайсь Отто Юльевич Шмидт. «Челюскин» пароходса ульсть разнай профессиянь ломатть: морякт, учёнайхть, радистт, водоласт, инженерхт, плотникт, слесарьхть, пидихть-панихть, оператор, фотограф и нльне художник, сай пингонь академиксь, «Опять двойка» картинать автороц Федор Решетников (сембоц 105 ломанель). Разведывательнай аф оцю самолётти-амфибияти пилотокс ульсь Михаил Бабушкин. 105 пассажирть ёткса—кемонь ават и 2 стирнят. 1934 кизонь 13 февральста Чукоткать ваксса корабльть люпштазе эйсь и сон ваясь. Ломаттне фатязь эсь мархтост корабльста семботь, мезсь теест сявовсь. Омбоце шиня, 14 февральста, тянь колга радиоть вельде пачфтьфоль Москуву. Правительственнай совнархозть председателенц В.В.Куйбышевонь эзда сась телеграмма, конань коряс лётчикненди-полярникненди, конат «Провидения» бухтасот, эрявихть примамс мерат араламанди. Сафоль мяльс васендакиге араламс самолёттнень вельде. Синь лангозост сембода пяк надиясть. Ледовитай океанть трванц маласа работасть полярнай лётчикне Куканов, Ляпидевский и Конкин. Евгений Михайлович ульсь севернай отрядонь командиркс и авиагруппань командиронь заместителькс. Полярнай лётчикненди Ляпидевскяенди, Кукановонди и Конкинонди эрявсть сявомс пассажирхнень ся корабльхнень эзда, конат тялоть ётафнезь Биллингсонь мысонц маласа. Но «Челюскин» пароходсь ваясь, и Е.М.Конкин лиендсь омбоце пилотокс челюскинецнень лагерьс Анатолий Ляпидевскяень самолётса. «Смоленск» пароходть мархта кучфтольхть лётчикне Молоков, Святогоров  и Каманин, Северу моли колмоце пароходть мархта—лётчикне Доронин,  Липп и  Галышев. Америкать пачк (Нью-Йорксь-Аляскась-Уэлен мыссь) кучфтольхть полярнай лётчикне Леваневскяй и Слепнев, «Врангелень» островонц исследователец и «Севернай Модаста»—Ушаков. Погодась кальдяволь. Туста сюнересь и коволхне нюрьгсть Уэленть вельхксса несколька сутка. Эрь шиня вийхне пуромкшнесть Чукоткать малас. Полярнай и военнай авиациянь лётчикне аф пелезь «кяльсть ки» Северу. 1934 кизонь 5 мартста Е.М.Конкин лисендсь омбоце пилотокс «АНТ-4» самолётса А.В.Ляпидевскяень мархта (Советскяй Союзонь васенце Геройсь). Аралакшнезень челюскинецнень Чукотскяй моряса. Погодась аф цебярель. Но меле вармась сетьмось и састь мяльс лиемс. А.В.Ляпидевскяй озафоль самолётть штурвалонц ваксс, омбоце пилотокс ульсь Е.М.Конкин. Погодась тага кальдявгодсь. А.В.Ляпидевскяй шарондсь самолётса, но самолётть ашезе озафне, уфась вии варма. Е.М.Конкинонь мяльс тяфтама маневрась ашезь ту. Сон мярьгондсь озафтомс самолётть. Но Ляпидевскяй тянь ашезе тие. Тевсь пачкодсь сялондомати. И вов Е.М.Конкин сембе ответственностть сявозе эсь лангозонза, озась штурвалть ваксс и озафтозе самолётть. Лётчикнень ломаттне кепсезь кядьснон лангса и ёрязь вяри.  Васенцекс бортти сявфтольхть сембе аватне и Алла и Карина стирнятне. Аватне пращасть челюскинецнень мархта, куцсть самолётти, но кабинати тяльгсть аньцек ниле ават, кафттне савсть сявомс кабинать маласа пацять лангса, вельхтямок, штоба афольхть эенда, брезентса. Лётчикнень кабинасна пяшксель. Моторхне «урокодсть». Сембонь фатязень кенярдема. Тяни эрявсь пачкодемс Уэлен севернай посёлкав. 2 частта 20 минутада меле няевсь Уэленць. Ломаттне аралафтольхть. А меле нинге ульсть лиендемат. Сембе челюскинецне аралафтольхть. Мзярда шумордавсь челюскинскяй эпопеясь, Ляпидевскяй ашезь юкста пачфтемс сялондомать колга коза эряви. Примафтольхть мерат. Тяфта юмасть Ковылкинскяй райононь Казённый Майдан велеса шачфть Е.М.Конкинонь колга советскяй официальнай источникнень и челюскинскяй трагедиять колга книгатнень эзда официальнай даннайхне. Аньцек полярнай лётчикть Михаил  Каминскяень «В небе Чукотки» записканзон нолдамдост меле (1967 кизоня), ульсь кода лувомс «Конкин Е.М.» статьять.
1935 кизоня аф ламос ваймосемда меле сон легкомоторнай паркть отрядонц мархта тусь Зяблов ялгать экспедицияс, а меле  инженерть Аушкинонь группазонза, заняфоль полезнай ископаемайхнень вешендемаснон коряс разведкать мархта. Активнай участия примсесь навигационнай пингть Севернай Ледовитай океанть  эензон эса советскяй суднатнень ётафтомаснон коряс мероприятиятнень арьсемаснон эса. Правительствась отмечазе сонь трудонц «Знак Почёта» орденца. 1938 кизоня сон путови Чукотскяй авиаотрядонь командиркс. Материкста воздушнай армиять Севернай полюсть пачк Врангелень островонцты, Шмидтонь мысонцты и «Провидения» бухтав лиеманц обеспечендаманкса казьфоль Ленинонь орденца. Работас коре ялганза шарфнесть мяль, што Е.М.Конкин лётчикнень эзда вешсь смелши и инициатива.
Великай Отечественнай войнань 1941-1945 кизотнень «ИЛ-2» штурмовикнень подразделениясна, конанди командиркс ульсь Е.М.Конкин, эвондафнесть фашисттнень эса пелькс Мурманск, Петрозаводск ошненди маладомста. Тяфта ульсь и «Штурм Берлина» операциять пингста. Е.М.Конкинонди максфоль  Ленинонь нинге фкя орденоц. Евгений Михайлович казьфоль: Ленинонь 2 орденонзон, «Красного Знамени», «Знак Почёта» ордеттнень, I степенень «Отечественной войнань 1941-1945 кк.» кафта орденца, «Красной Звезды» орденть мархта, «За оборону Советского Заполярья», «За боевые заслуги» медальхнень мархта. «ИЛ-2» авиационнай эскадрильянь лётчикне кельгомга мярьгондсть теенза «Наш Батя». Войнада меле Васенце номер  Геройть соратникоц, полковниксь Е.М.Конкин лемдезе эряфонц отечественнай авиациять виияфтоманцты. Целец фкяль: тонафтомс Родинати военнай опытнай лётчикт, конатненди вийс коре вятемс сверхзвуковой самолёттнень. Лама пинге Е.М.Конкин работась      СССР-нь Военно-воздушнай Вийхнень эса, а 1954 кизонь майста урмать сюнеда тусь отставкас. 1969 кизоня апак учсек кулось Москуса. Казённый Майдан велень эряйхне мяляфтсазь сонь и вешендьсазь биографиястонза аф содаф пакшнень. Ся лётчикть, кона 1934 кизоня СССР-нь Геройть А.В.Ляпидевскяень мархта вятезе Шмидтонь лагеренцты      «АНТ-4» самолётть и кона васенцекс озафтозе сонь Чукотскяй полярнай морять эенц лангс и сявозе курсть Родинать шири васенце челюскинецнень мархта.
Материалть аноклазе Ковылкинскяй райононь Казенный Майдан велень «Боевой и Трудовой Славань» историческяй музейть руководителец, краеведсь А.В.Колодина.
08.07.2021 №26

 

Отечествань аралайхне мяляфтомат фалу!

Мзярда ушедсь Великай Отечественнай войнась тейне ульсь кафкса кизот. Лац мяляфтсайне эстонь васенце шитнень, кода алятне эсь мяльс коре сашендсть призывной пункту, велень Совету, коста синь получсесть повесткат и тушендсть фронту.
Ся пингть алязе ульсь велень Советонь председателькс и сон военкоматонь представительхнень мархта сявондсь фронту прянь анайхнень кядьста заявленият. Фронту туйда ульсь лама. Тядязень, Надежа Михайловнань, мархта миньге сашендоме Отечествать аралама туйхнень прважама. Ниле-вете крандазс озсефтольхть иттне и эряфкшу ломаттне. Военнай представительхне                        макссесть команда и обозсь сявондсь курс—районнай центрать шири. Ламоц прважайхне авардсть. Фронту туй алятне морасть солдатскяй морот гармошкать коряс и мольсть ялга. Алязень, Максим Яковлевичень, кальдяв шумбрашинц инкса фронту ашезь сяве. Но сянкса сявфтольхть Павел и Никита щеняне. Никифор щенязе ульсь ушедыкс эрь тевса. Сон лац морсесь гармошкаса солдатскяй морот. Никифоронь кота кизоса Иван цёраняц, кярьмодемок алянцты, авардсь кайги вайгяльса, авардсь и сонь тядяц—Таня щаказе.
Аф нардавихть мялямста кели паксятне, конат сувсесть «XVIII партсъездть лемса» колхозти. Ламошкасна видефтольхть макса. Вов тя касыксть вакска киге прважафтольхть фронту велеряйхне.
Тейне, эряфкшу ломанти, маконь паксясь тянемс аф юкстави, сон лядсь лятфнемакс войнать ушедоманц колга.
Аф тёждяль войнань пингсь аф аньцек солдаттненди, но и велеса аватненди и од ломаттненди.
Мялезе лятфтамс Рузаевскяй райононь Рузонь Баймак велеста Татьяна Павловна Мезинать эряфста пакш. Эста Т.Мезинати кафкса кизонятольхть. Сон тейне азонкшнесь войнада ингольдень пингть колга. Кемонь кизоса ни, кода и кеветие и кемзисемге кизоса брадонза, работась колхозса. Сон, стирьшабась, маштсь пулфонь сотома, сёронь тяляма и траксонь потяма. Тялонь кофнень тядянц мархта кштирдсь сюре, кодась котфт.
Лиссь рьвакс Дмитрий Мезинонди, но павазуфтольхть аф ламос. Кизовок ашезь ёта, кода тердезь служама. А меле ушедсь аеркс войнась. Аф тёждяль авати ськамонза касфтомс стирнянц. 1942 кизоня райононь власттнень эзда сась указания—прважамс стирьхнень и од аватнень Сура ляйть видеса оборонительнай траншеянь шувома. Татьяна Павловна ульсь ётксост. Седиец пяк таколдсь куду катф стирнянц инкса. Пингонь ётазь кельмофтевомать сюнеда урмаськодсь и тусь ялга куду. Кафта шит мольсь стирнянцты.
Мирдец  пачкодсь мянь Берлину. Куду самдонза меле семьясост шачсть нинге вейхкса итть! Лама идень шачфтоманкса-касфтоманкса 1967 кизоня Т.П.Мезинась казьфоль «Мать-героиня» медальса.
Ингольдень учительницась, тылонь труженицась П.П.Максимова азонкшнесь: «Тянемс мяляфтса, кода ярхцсеме наксада модамарьда, палакста, марожень кшида. Аф ваномок сянь лангс, што войнань кизотнень колхозса покодихне трудендасть пцтай стак, ломаттне паксяса работасть шобдаваста илядьс, штоба сяда лама ярхцамбяль прважамс фронту».
А вов мезе азондсь войнань и трудонь ветеранць Кулишейкань эряйсь Т.С.Назарова: «Мзярда ушедсь войнась, тейне кеветие кизоль. Алятнень и аватнень сявозь фронту. Колхознай паксянь и фермань тефне лаподсть лангозонк. Сокаме и нуме, кудъётконь тефнень тиемска кенерькшнеме».
Кулишейскяй велень Советса Отечествать аралама тушенды  500 лама ломань. Ламотне сембе пингс лядсть тюремань паксятнень лангс. Аф кржаль ранендафта.
Николай Дмитриевич Максимов шачсь Рузонь Баймак велеса. Тядянза-алянза ульсть трудонь кельги ломатть. Мезьса маштсь лездсь тядянцты. 1943 кизонь тунданя тертьфоль Родинать аралама.
«Тядяй, тон тят пичеде. Сёксети меки мрдатама. Карман сиденяста тяшнема сёрмат, тят лажна»,—мярьгсь тумстонза Николай тядянцты.
Николай кучфоль запад шири. Тоса армияньке Курск и Орёл ошнень араламдост меле мольсь наступленияс. Максимов пачфтьфоль Дальняй Востоку. Тоса тюремста стакаста ранендафоль. Савсь ламос пчксемс госпитальса, куду танкистсь мрдась 1947 кизоня. Мяштьсонза ульсть Якстерь Звезда, Отечественнай войнань II степенень ордетт, несколька медаль.
Улемок Саранскяйса Военнай и трудовой подвигонь музейса блокнотозон тяштине: «За 1418 дней и ночи (столько длилась война) наша Родина не досчитала 27 миллионов своих сыновей и дочерей. Это значит 20 тысяч убитых ежедневно, 800 человек в час, почти 15 человек каждую минуту. Вот что такое 27 миллионов!.. Было разрушено 1710 городов, более 70 тысяч деревень и сёл, 32 тысячи промышленных предприятий, 48 тысяч километров железных дорог, 427 музеев, 1570 церквей и памятников культуры.
Из Республики Мордовия на фронт ушли более 246 тысяч человек. Погибли более 131 тысячи человек. Более 100 тысяч уроженцев Мордовии награждены орденами и медалями. За годы войны 104 человека—уроженцы нашей республики получили звание Героя Советского Союза. Мордовия дала фронту: 50 миллионов пудов хлеба».
Вот  тяфтама питнеса сатфоль Сяськомась. Кржа лядсь фронтовикта и тылонь труженикта. Сяс фалу мяляфтомат Отечествань аралайхне кода шистотне, стане и кулофне! Тя минь долгоньке!
Василий КУДАШКИН,
Россиянь Журналистонь союзонь член.
24.06.2021 №24

 

Великай Отечественнай войнань участникть, мокшалять С.И.Алямкинонь лемоц сувафтф народнай альманахти

Аф кунара Москуса тифтольхть итокт «Незабытые истории Победы» народнай альманахти историятнень конкурсснонды. Жюрись, конанди сувсесть Россиянь Геройхть, и вяре азф конкурсть оргкомитетоц кочказь межнациональнай ялгаксшить, фкя-фкянди лездомать и героизмать колга, конань няфтезь разнай национальностень представительхне Великай Отечественнай войнать пингста, инь мялень салай историятнень.
Моску ошень, лия ошень и региононь эряйхне кучсть эсь радняснон—Великай Отечественнай войнань участникнень и тылонь труженикнень колга 1022 история. Сембе азксне ульсть архивнай фотография, военнай кизонь документ мархта. Ня материалхне сембе пингс максовсть ванфтомс Россиянь Вооружённай Вийхнень главнай Храмснон, кона ащи «Патриот» культурань и ваймамань Военно-патриотическяй паркть территориянц лангса, «Дорога памяти» Мультимедийнай музейнай комплексть архивозонза.
Тя ульсь торжественнай пуромксса, кона ётась 6 августста Москуса Российскяй Федерациянь Торгово-промышленнай палатаса. Тя пуромксть пингста казьфтольхть сяськи историятнень авторсна. Эрти эздост максфоль изданиять печатнай вариантоц и Диплом.
20.08.2020 №32

 

КАФТА ВЕТЕРАТТ


 

 
 
 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин