Поиск по сайту: 
 

Архив
 июль 
 2019 
пн вт ср чт пт сб вс
1234567
891011121314
15161718192021
22232425262728
293031    
Мокшень правде-90!

УДАЛАЗА И ВАЛДОНЯ УЛЕЗА КИЦЕ, КЕЛЬГОМА ГАЗЕТА!

В.М.ЛОБАНОВ, "Мокша"  журналть главнай редактороц:
-Мокшень кяльса лисенди газетаньконь ня шитнень оцю илац-теенза топоди 90 киза! Сон тейне арась ушетксокс, эсь лацонь шудерькскакс сермадомань тевсон. Нинге школаса тонафнемста варчсине вийнень и кучсень "Мокшень правдав" аф оцю материалхт. Эста лемнеськ синь заметкакс. Бта аф оцю пакшкя лисель, а печатлалезь-кенярдемати ашель пе! Газетань ся номерть мархта ласькондят велева и раднятненди, ялгатненди, учительхненди няфнесак.
Москуса Литературнай институтса тонафнемстон васенце практикас сань "Мокшень правдав". Редакторкс ульсь фронтовиксь, Сталинград ошть аралаец В.М.Сурков. Коллективса работасть содаф писательхне Ю.Ф. Кузнецов (вятезе культурань отделть), И.Н.Кудашкин, Г.И.Пинясов (ответственнай секретарель), П.П.Кулешов, газетать эсь корреспондентоц В.В.Каргин. Сембе синь тевонь содай, пара вайме ломаттельхть. "Мокшень правданьконь" тячиень юбилеец-тя и сятнень оцю иласна, кит тяни ашет шиса, но конат путсть пефтома эрьгя, лама киза макссть кельгома изданияньконди. Вдь кой-коста теест сашендовсь крандазса (машинада нинге ефси кржаль) якамс велева, васьфнемс колхозонь председательхнень, покоди ломаттнень мархта. И мезе тиендевсь мокшень велеса-ялганьке маштозь пачфнезь газетав.
Мокшетнень ули тяфтама валсна-"кода цебярь котнай". Котнайсь (нарвайсь) лефксонзон инкса анок кавалть лангс комотемс, араламс синь. И вов "Мокшень правдась" цебярь котнайкс пацянзон алу валомне-валомне пуроптомазь минь-заметкань серматкшнихнень. Кепотьф мяльса васьфнеса газетаньконь оцю иланц-90 кизонц! Арьсян тииензонды творческяй од вийхть, эрьгя! Аф кунара етась "Россиясь-спортонь мастор" Международнай форумсь, коза сашендсь пяк лама инжи. Мокшэрзянь масторть лемоц тага кайгсь странать келес! Республиканьке тага сувась сяськихнень еткс! И вов катк фалу сяськонди Мордовиясь и сонь газетац-"Мокшень правдась"! Удалаза и валдоня улеза киц сяда тов-90 кизода меле! Надиятама, цебярь сатфксса пачкоди 100 кизонь юбилейти!

22.09.2011 №37

Новости

«Сембось ушеткшни ёфксста!»

Тяддень 24-27 июньцта Мордовия Республикаса, республикань Общественнай палатать тердеманц коряс, рабочай визит мархта ульсь советскяй и российскяй содаф писательсь В.А.Бахревский.
24 июньцта Мордовия Республикань Пресс-центраса сон васетькшнесь республикань писательхнень, поэттнень и журналисттнень мархта. Васедемать вятезе Мордовия Республикань Общественнай палатать председателец, историческяй наукань докторсь И.В.Капитонов.
Васедемать ушетксста Иван Владимирович пуромфненди нюрьхкяняста азондсь писательть эряфонь и творческяй кинзон колга. Владислав Анатольевич Бахревский—советскяй и российскяй прозаик, поэт, идень писатель, драматург, публицист, критик—шачсь 1936 кизоня Воронежса. Сермадсь и нолдась иттненди и оцюфненди 30-да лама книга. Инь содафокс арасть сонь «Василий Шуйский», «Никон», «Аввакум», «Страстотерпцы» и лия историческяй романонза. Тяфта жа арасть содафокс «Дворец Золушки», «Кот в сапогах с секретами», «Первоклассник Митя и кролик Ушки-на-макушке» емла лувити ефксонза и азксонза.
27.06.2019   № 25
Саранскяйса казезь «Победань диктантса» сяськихнень

22 июньцта, Лятфнемань и ризнамань шиня, Мордовиять столицаса казезь «Победань Диктант»—Великай Отечественнай  войнань темас коре Всероссийскяй диктантть сяськиензон.
Сяськихнень чествовандазь 1941-1945 кк. военнай и трудовой подвигонь Мемориальнай музейса. Синь поздравляндазень и макссь питни казнет «Единая Россия» партиянь МРО-ть Секретарец, партиять Генеральнай советонц членоц Владимир Васильевич Чибиркин.
—Минь аф аньцек лятфнесаськ геройхнень, но и мяленьке шарфтомс общественностть мяленц етай шинь пелькс событиятнень лангс. Историять эряви содамс и мяляфтомс сембонди, штоба куломань канды войнась, кона сявсь 27 миллион ломанень эряф, афоль уле  вестевок. Историять содаманц касфтоманкса и героическяй етай пингть аф лац няфнеманц аф нолдаманкса «Единая Россия» партиять инициативанц коряс сембе странать эзга 7 майста етафтовсь Великай Отечественнай войнань темать коряс Всероссийскяй диктант—«Победань Диктант».
27.06.2019   № 25
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин