Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031
Мокшень правде-100

МАШТАТ РАБОТАМА, МАШТТ И ВАЙМАМА

"Мокшень правдати"-90
Газетаньконди, кода ни содасаськ, топодсь вейхксогемонь киза. Оцю ила етафтфоль тя юбилейть честьс. Но тянь мархта праздничнай мероприятиятне ашесть шумордав. "Мокшень правдань" сотрудникненди арась ни тонатфокс коллективонь келеса якамс экскурсияс, лисендемс природав. Тя мезтьке тифоль тяфта.
Васендакиге киньке-яноньке вятемазь Краснослободск ошу, а сяда видекс-тостонь музеи. Тяда инголивок тейнек сашендовсь улемс тоса, ванондомс уликсть лангс. Но музеи тяниень экскурсиясь ефси лияль ингольцетнень коряс. Васендакиге лияль сон сянь мархта, што сембе тя козяшись-музейнай экспонаттне етасть "эряма" лия кудс-Краснослободскяень Культурань дворецу. "Дворец!"-лиякс сонь аш кода лемдемска. Сельмованф салай зданиясь уша ширде. Можна тяфта мярьгомс, што сон пяк мазоптозе кунардонь тя ошть. Аф азовомшка конашка мазыши мархта васьфтят потмоста.
Юрий Николаевич Черентаев-Культурань дворецть директороц, вятнесамазь искусствань тя храмть эзга. Тя пингть дворецса кулевсь Мендельсононь вальсоц. Мезе тя? Меле содавсь, што тоса самай ся пингть тиевсь-пуроптовсь од семья. Рьвяяйхне весялат, павазуфт. Тяни эрь од семьясь эряфонь васенце аськолксонзон ушеткшнесыне тяста.
Аськолятама омбоце этажга. "Тяса,-мярьгсь Юрий Николаевич,-выставочнай залсь". Суваме, ванондсаськ местнай художникнень картинаснон, Краснослободскяень художественнай школань тонафнихнень, велеряйхнень работаснон. Шарфтыхть лангозост мяль шужярьста тиф поделкатне.
Пряхин Александр Филипповичень-тястоконь художникть работанзон вакска аф етат озадонь седихть ащезь. Сон тяни эряй Сивиньца, стаки аф явонды кельгома тевонц эзда. Шарьхкотьф, теенза, велеряйти, пяк мала велень темась. Местнай "самородок"-тяфта лемнесазь Александр Филипповичень.
Сембе ня поделкатне аноклакшневихть художественнай школань мастерскойса. Ламос кельксезь ванондоме выставочнай залса уликсть лангс, а меле суваме тостонь музеи. Ковальчук Нина Николаевна-краеведческяй музеень заведующайсь няфнесы-азондсы эрь экспонатть эвондаманц-шачеманц. Маладоме мокшень щамса щаф-каряф экспонаттненди. Тяфтамоса якасть велень аватне, сире ломаттне. "Гармония" кямотне лувондовсть праздниконь нарядкс, а стак шитнень щашендсть пяле кямонят. Но карьхне стане жа лувондовсть васенце вастса. Ряцок мокшень щапнень ваксса, татаронь костюм. А ряцок декабристть А.В.Веденяпинонь уженяц. Тоса ламось сотф декабристть эряфонц мархта.
Интерес мархта ванондсаськ картинать, коса няфтьф Красная Слобода крепостсь. Краснослободскяйсь тиевсь 1570 кизоня. Инголи сон лемневсь крепостекс, кона Мокшеть берякса сери вастса. Занцесь аф конашка площадь. Ульсь тоса и церькав, пруд и стак тов. 1950 кизоня шувфоль  ся вастса котлован и таргафоль шуфтонь колода (лазкст), коза калмосевсть эряфста туфне. А кодама мялень салайхть сюлгапне, конат таргафт мокшень калмоста раскопкатнень пингста. Краснослободскяйса муфтольхть и пакарьста тиф салмокст, конатнень мархта сташендовсть щапт, первобытнай ломаттнень каменнай орудиясна.
Кода эрясть инголи крестьяттне, тянди музейса максф целай уженя. Тяса и зернань яжамс кефт, пихтембарь ваень пихтемс, сура ямксонь томбамс шоварня, кодвастт, коса котцевсть котфт, ватулат-месть, и, конешна, идень нюрям и лама лия, мезсь эрявкснесь эстонь эряйти, крестьянонь семьяти.
Экскурсияс сафне ламос нинге ванондсть музейса, выставочнай залса, да целайнек Культурань дворецса сембе уликсть лангс и тяка пингть арьсесть, што пяк пара, мес пяшкодевсь Краснослободскяень эряйхнень мяльсна-панжевсь синьцост тяниень пингть вешфксонзон коряс строяф искусствань тя храмсь, мазыдонга мазы Культурань дворецсь, конань строямац учсевсь аф фкя кемотть киза.
Шумордавсь экскурсияньке Краснослободскяйса. Сяда тов киньке-яноньке вятемазь природав. А конашкава мазы сексень вирсь! Шарозь валгсть шуфта пряста золотань тюсса лопатне. Синь бта сетьмоняста тошкасть пилезонк: "Ванода, кельксесть тя мазышить". Етай мзяра пинге и тя золотань тюссь, тя мазышись вельхтяви-кяшеви акша ловса. Но тя аф ламос. Сай тундась, моразевихть нармоттне, эреклай перьфпяльсь и тага сембось кочкасыне эсь красканзон. Тяфтамот ни эряфть закононза.
Н.КУБАНЦЕВА.

20.10.2011 №41

Новости

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021   № 1
Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020   № 48
«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020   № 48
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин