Поиск по сайту: 
 

Архив
 май 
 2022 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Наука и жизнь

Мордовия Республикань Правительствать видеса гуманитарнай наукань НИИ-ть директороц, Россиянь военно-историческяй обществать Мордовскяй региональнай отделениянц председателец, историческяй наукань докторсь Г.А.КУРШЕВА: «РАБОТАНЬКЕ ВОДЕНДАФ ОБЩЕСТВАТИ ЦЕБЯРЕНЬ КАНДОМАНКСА»

—Галина Александровна, патриотическяй кодама работа тячи мольфти республикасонк Россиянь военно-историческяй обществать Мордовскяй региональнай отделенияц?

 

—Патриотическяй работась, конань вятьсы республикаса РВИО-ть Мордовскяй региональнай отделенияц, ащи лама ширеста. И эсонза няевикс васта занци региональнай историческяй компонентсь.

 

Кепотьксонди, тяддеть ушетксста сявомок региональнай отделениянь члеттне Саранск ошень вуснень, колледшнень, гимназиятнень и школатнень эса ётафнихть Мужествань урокт. Эсост азондови од ломаттненди Сурскяй оборонительнай рубежть строяензон, Советскяй Союзонь и лия Геройхнень—Мордовияса шачфнень-касфнень—подвигснон колга, конатнень синь тиезь Великай Отечественнай войнать пингста. И, тяда башка, Мужествань ня урокнень пингста од ломаттненди няфневихть историческяй сотксне, конат марс пуропнесазь аф фкя пингонь Геройхнень подвигснон, конатнень синь тиезь Отечествать врагта араламста.
 

14.04.2022 №14

 

Панжевсь национальнай литературань отдел

Кода пачфтезе тейнек Самарскяй областень мокшэрзянь национально-культурнай автономиять председателец Л.А.Колесникова, 15  июльста Сызрань ошень  Е.И.Аркадьевонь лемса Центральнай библиотекаса ётафтовсь «Марса тейнек тиеви сяда лама» лем ала культурань диалог. Пингстонза мероприятиять теманц коряс эсь мяльснон азозь ошень оцюнять васенце заместителец Алексей Романенко, социальнай политикать коряс заместительсь Татьяна Журкина, культурань управлениянь руководительсь Ольга Дидык, Сызрань ошень мокшэрзянь национально-культурнай автономиять председателец, кона стане жа Советса вятьсыне ошень межнациональнай кизефкснень коряс тефнень, Иван Кистанов.
Кода азозе пуромфненди Сызрань ошень мокшэрзятнень лидерсна И.Кистанов, Центральнай библиотекась сатомшка кунара ни арась цебярь площадкакс ошень сембе народнай национально-культурнай автономиятненди и культурань центратненди. Тяса сидеста ётафневихть областной и ошень фольклорнай илат, национальнай культуратнень, кяльхнень, койхнень-обуцятнень ванфтомаснон и виияфтомаснон коряс «круглай шрат», дискуссият и лия мероприятият.
Оцю васта синь ётксост занцихть форупне, конат лемтьфт мокшэрзянь  национальнай культурать, койхнень-обуцятнень, кяльхнень ванфтомаснонды и виияфтомаснонды. Тянкса И.Кистанов азсь седи ваксстонь сюкпря Е.И.Аркадьевонь лемса Центральнай библиотекань директорти Светлана Кочергинати.
Выступлениянц аделамда меле И.Кистанов казсь библиотекати книгань оцю коллекция, коза сувасть мокшэрзянь литературань классикнень книгасна, конат сёрматфт мокшень и эрзянь кяльса. Ня книгада башка, И.Кистанов казсь библиотекати мокшень и эрзянь валкст, музыкальнай фольклорть и мокшэрзянь народнай промыслатнень, костюпнень коряс справочникт и альбопт.
Центральнай библиотекань директорсь Светлана Кочергина эсь ширденза азсь спасибамань валхт Иван Кистановонди оцю лезксонкса библиотекати национальнай мероприятиянь анокламста и ётафтомста. Башка сюкпря сон азсь И.Кистановонди мокшэрзянь книгатнень инкса. Сон тяфта жа пачфтезе пуромфненди: кле, лувихненди ня книгатнень сяда курокста пачфтеманкса 16 июльста библиотекаса панжевсь мокшэрзянь литературань башка отдел. Сон сяда тов фалу кармай пяшкотькшневома книгаса, конат сёрматфт мокшень и эрзянь кяльса.
В.НЕСТЕРОВ.
29.07.2021 №29

 

«РАДНЯ ЛОМАТТЬ»


Лиссь од книга
Ломанти эряфсь макссеви весть. И кода сонь эрясак, ащи эсь эздот. Тянь пяк лац шарьхкодьсы Российскяй Федерациянь Заслуженнай юристсь, прокуратурань почётнай работниксь, Мордовия Республикань Оцюнять премиянц лауреатоц П.Е.Сенькин. Кагод лопась аф саты лятфтамс сонь сембе званиянзон, казнензон. Сон афкукс ащи гордостекс и прянь шнафтома вастокс республикаса, Атюрьевскяй районца. Сон кельгома мирде, аля, щятя.
Павел Ефимович эряфоньберьф тись аф кржа. А мекольдень кизотнень мрдась сянди, мезьста и ушедозе эсь эряфонь кинц. Кярьмодсь сёрмадомань тевти. Васенда нолдась фкя книга. Сонь лемоц «Жизнь в строчках» («Эряфсь строчкаса»). Тя автобиографическяй очерк. Эсонза П.Е.Сенькин азонды идькс пингонц, одонь кизонзон квалма. Кода трудендась районнай прокуратуратнень эса, кода вятезе Мордовия Республикань прокуратурать. Книгать лац васьфтезь лувихне и макссть теенза оцю питне.
Нинге ашесть сетьме корхтаматне тя книгать колга, П.Е.Сенькин нолдась нинге фкя. Лемоц «Родные люди» («Радня ломатть»). Сон лиссь мелянь сёксеть. Печатлаф Рузаевкань типографияса. Книгась лиссь мазыста, козя содержаниянь ширде. Павел Ефимович  эсонза азонды Сенькиттнень родснон-плямаснон колга. Книгать омбоце пялец лемтьф рьванц, Мария Павловнань, Босомыкиттнень родснонды-плямаснонды.
Сенькиттнень родсна инь оцюсь Атюрьевскяй районца. Ётксост аш фкявок кальдяв ломань. Атяснон-бабаснон колга кржа мезе ванфтовсь. А вов Павел Ефимовичень оцяц, Василий Дмитриевич, ульсь Великай Отечественнай войнаса. Куду ашезь мрда. Шавовсь 1945 кизонь мартста. Сон казьфоль Якстерь Тяштень, Славань III степенень орденца, «За боевые заслуги», «За отвагу» медальса. Рьвац, Ефимия Дмитриевна, ськамонза касфтозень кафта стирензон и цёранц. Иденза и уноконза арасть шнама ломанькс.
П.Е.Сенькинонь аляц, Ефим Дмитриевич, стане жа войнань ветераноль. Воявась сисем кизот. Васенда ульсь Советско-Финляндскяй, тоса—Великай Отечественнай войнатнень эса. Войнада меле пцтай 80 кизос трудендась Атерень «Память Ильича» колхозса. Сон ульсь почётнай колхозникокс. Рьванц, Анна Петровнань, мархта касфтсть ниле итть. Колма стирьдостоль: Мария, Татьяна, Анна. Эздост шиса аньцек Анна. Сон сембе эсь эряфонц максозе Атерень «Электротеплосетти». Лама казнедонза лац покодеманкса. Мирденц, Иван Филипповичень, мархта марсот ни пцтай ведьгемонь киза. Касфтсть кафта стирьхть. Марина эряй Атерьса, Елена—Торбееваса.
Гордостекс и прянь шнафтома вастокс Сенькиттнень родснонды ащи Павел Ефимович. Сонь козя биографияц, интереснай эряфонь киц. Сон шачсь Атерьса 1948 кизонь 2 январьста. Аделазе зрнянь медальса Атерень средняй школать. Аф лама пинге покодсь литсотрудникокс, велень хозяйствань отделонь вятикс Атерень «За урожай» районнай газетаса. 1972 кизоня аделазе Харьковскяй юридическяй институтть. Тяда меле трудендась Темниковскяй, Зубово-Полянскяй, Дубёнскяй райононь прокуратуратнень эса. Ульсь Мордовия Республикань прокурорти помощникокс, заместителькс. Кемонь кизот вятезе Мордовия Республикань прокуратурать, ульсь «Агрофирма «Октябрьская» ОАО-ть генеральнай директоронцты заместителькс. Ульсь и райсоветонь, и МР-нь Государственнай Собраниянь депутатокс. Тянивок Павел Ефимович кирди кеме соткст  шачема-касома Атерь веленц мархта.
Тя книгаса корхтави сянь колга, што эрявихть содамс эсь юрхне, радня ломаттне. Сенькиттне лама азондсть эсь родснон колга. Ужяль, конешна, што ашесть ванфтов ламоц историческяй документтне. Да и азондомаське ушеды атяснон-бабаснон, щятяснон-щаваснон эзда. Лиякс азомс, тяниень пингть колга. Книгань авторхне арьсихть, што мувихть родстост стама ломатть, конат поладсазь ушетф тевснон.
И.ВЕШКИН.
11.02.2021 №5

 

Н.П.ОГАРЁВОНЬ ЛЕМСА МГУ-нь СТУДЕНТТНЕ КОРХНЕСТЬ КОСМОНАВТТНЕНЬ МАРХТА

Международнай космическяй станциясь (МКС)—тя лама целенди арьсеф космическяй исследовательскяй комплекс, 14 странань марстонь проект. МКС-ть васенце элементоц ульсь нолдаф орбитав 1998 кизоня. Аппаратсь лиенди Модать вельхксса 400 вайгяльбень сереса и суткаста кемготувоксть шаронды планетаньконь перьфке. Станцияса апак лотксек ётафневихть научнай исследованият.
13 декабрьста, Москувонь пингть коряс 13:13 частста, МКС-нь российскяй  космонавттнень мархта радиоканалть вельде лисендсть связьс Н.П.Огарёвонь лемса МГУ-нь Физикань и химиянь институтонь студенттне. Самай тя пингть МКС-сь ётась Саранскяйть вельхкска. Студенттне кенерсть максомс Роскосмосонь космонавттненди Сергей Рыжиковонди и Сергей Кудь-Сверчковонди 10 кизефкст. Радиосвязень сеанссь мольсь 6 минутат. Мезень колга ульсь корхтамась, лувость алува.
—Ули-аш космонавттнень ваймама пингсна, мзяра частт суткати работатада? Сизсетяда-аф покодемань шида меле?
—Регламентс коре суткати минь работатама 7,5 частт и 2,5 часттне максфт эсь тевоньконь тиендеманкса. Шарьхкотьф, кудса работамась или покодема вастса эрямась—малат фкя-фкянди. А станцияса—тя ламода сяда стака. Сиземс, конешна, сизсетяма. Тяряфнетяма ваймосемс, кирдьсаськ удомань и ярхцамань режимть.
—Кода инь сидеста ётафнесасть ваймама пингонтень?
—Ваймамста уленттяма иллюминаторть ваксса, дивандакшнетяма планетаньконь мазышинцты. Тяни вов лийхтяма Родинаньконь вельхкска, ётаськ Волга ляйть. Лад мялезонк, мес тусть туцятне и ули кода вярде няемс эсь шачема мастороньконь.
Ульсть и лия кизефкст-ответт, марнек корхтамась ули кода мумс и кулхцондомс интернетса
https://youtu.be/K1e84bAz/r4 ссылкас коре. Сембонь, кит примасть участия тя мероприятияса, пароль мялезост, што арьсефсна пяшкодевсь эряфс.
Радиотехникань кафедрань преподавательть Я.А.Зазулинонь валонзон коряс, мяльсь лисемс     космонавттнень мархта связьс сась васенце курсонь студентти Андрей Кузнецовонди, кона тонафни «Радиоэлектронные системы и комплексы» специальностьс коре.
—Физикань и химиянь институтса инголькиге аноклафоль радиосвязенди оборудования, а институтонь корпусть кудбрясонза минь путоме антеннат,—азозе Ярослав Александрович.—Тяфтама мероприятиятне пяк эрявихть, сяс мес лездыхть студенттненди кочкамс исследовательскяй тевонди эрявикс направления, кона афкукс кармай теест мялень салайкс. Кепотьксонди, тяни огарёвецне арьсекшнихть тиемс эсь лацонь оборудования, конань вельде ули кода примсемс сигналхт метеорологическяй спутникнень эзда. Вятемок тяфта тонафнемань процессть, сай пингонь специалисттне козякофнесазь профессиональнай маштомошиснон, кочксихть опыт.
Т.ПЕТРОВА.
24.12.2020 №50

 

«Музыкафтома аф шарьхкодьса эсь прязень»

Тячи азонттама лувиеньконди аф лама музыкать и теенза тонафнемать колга. Газетаньконь инжиец—И.М.Яушевонь лемса государственнай музыкальнай театрань гобоень группань ведущай концертмейстерсь О.А.Видяскина. Ольга Александровна шачсь Саранскяйса, тонафнесь Л.П.Кирюковонь лемса Саранскяень музыкальнай училищаса, меле аделазе М.И.Глинкань лемса Нижегородскяй государственнай консерваториять. Театрань оркестраса морамда башка О.А.Видяскина заняф педагогическяй тевса. Сон тонафни студентт и итть гобойса морама Саранскяень музыкальнай училищаса и 4№ музыкальнай школаса.
—Ольга Александровна, ушетксонди, азонтт, пожалуйста, гобой музыкальнай инструментть колга.
—Гобойсь—тя шуфтста тиф духовой инструмент. Сонь историяц тушенды кунардонь пинкненди. Кепотьксонди, нинге Древняй Египетса минь эрадонк инголе III тёжянь кизотнень пингста содафоль гобойть атянь-атяц «мемет-сь». Средняй векста ульсть гобойть лаца лама инструментта пцтай сембе странатнень эса. Кепотьксонди, мокшэрзянь народнай музыкальнай инструменттнень ёткста ули кода лятфтамс шалмейть и нюдить, конат стане жа ащихть раднякс гобойти. Тя морамать гайнямац сембе инструменттнень ёткста лия, сон пяк кайги, мазы и седиень токай. Гобойсь ноляви тевс камернай музыкаса и симфоническяй оркестраса сольнай инструментокс. Сонь вайгяленц вельде латцеви марнек оркестрать морамац. Сидеста композиторхне нолясазь тевс гобойть музыкаса национальнай колоритонь няфтеманкса. Нинге азома ся, што тя инструментсь сувафтф Гиннесонь рекордонь книгати, кода мораманди инь стака инструментсь.
22.10.2020 №41

 

ТОНАФНЕМА ВАСТОНДИ КОЧКАЗЬ Н.П.ОГАРЁВОНЬ ЛЕМСА МГУ-ть

Кодама вишкста моли пингсь. Аф моли, а лиезь лии. Бта ефси аф кунара школатнень эса циннязевсь мекольце пайгонясь, тонафнихне тушендсть кизонь каникулас. А тячи синь тага ни озсесть партатнень ваксс. Республикань тонафнемань лия заведениятнень мархта ряцок 1 сентябрьста студенттненди кенкшензон панжезень Н.П.Огаревонь лемса Мордовскяй Национальнай исследовательскяй государственнай университетсь. Тядде вузу васенце курсти поступась колма тежяньда лама стирь и цера. Но тя нинге аф сембе. Омба масторонь студенттненди приемнай кампаниясь кармай мольфтевома сентябрть пес. Аноконди содаф, што тяддевок Мордовскяй госуниверситетть тонафнема вастонди кочказь лия региононь и странань лама абитуриент. Кода фалу, синь састь и нинге сайхть ширезонк масторлангонь инь ичкоздень уженятнень эзда.

 

Мес од ломаттне кочксесазь Мордовиянь вузть, пяшкодевсь-аш мяльсна-арьсемасна кочкаф тонафнема вастть коряс, корреспондентоньке содазе васенце курсонь студенттнень эзда.

Мария Кузьмина, экономическяй факультетонь студентка:

 

—Тонафнема Мордовияв сань Московскяй областьста. А шачемас коре мон Атюрьевскяй райононь Кяшал велеста. Тяфта лиссь, што семьяньке етась эряма Моску алдонь Воскресенскяй району. Кяшалса тячивок эряйхть щавазе и щятязе. Эрь кизоня ваймама пингста улендян синь ширесост. Монь пяк мялезон Мордовиясь. Саранск оштьке лац содаса. Тяса эряй монь аказе. Шабакс пара мяльса сашенкшнень ширезонза инжикс и эста ни арьсекшнень школада меле поступамс тяза тонафнема. Мзярда максыне единай государственнай экзаметтнень, тернемазь поладомс тонафнемать Москувонь и Коломна ошень вуснень эса, но мон кочкайне Мордовскяй госуниверситетть и пяк пара мялезон. Кода содаф, тонафнемань тя заведениясь российскяй вуснень (а эздост колма тежяньда лама) рейтингса занцесы 42 вастть. Тя корхтай сянь колга, што тяса ули кода пуроптомс козя содамошит, получамс цебярь образования.

 

 

 
10.09.2020 №35

 

«ТЕВОНЬКОНЬ МОЛЬФТЬСАСЬК ПИНГТЬ ВЕШФКСОНЗОН КОРЯС»

Мордовиянь Правительствать видеса гуманитарнай наукань научно-исследовательскяй
институтть директороц, Россиянь Военно-историческяй обществать Мордовскяй региональнай отделениянц председателец, историческяй наукань докторсь Г.А.Куршева:
—Галина Александровна, кода работай пандемиять пингста Мордовия Республикань Правительствать видеса гуманитарнай наукань научно-исследовательскяй институтсь?
—Конешна, пандемиясь институтть работас сувафтсь кой-кодама полафткст. Но, кда варжакстомс лия учреждениятнень тевснон лангс, миньцонк синь аф тяшкава ни оцюфт. Сяс мес работаснон,  эсь лацонь ширензон инкса, институтонь кой-кона сотрудникне тяда инголивок сидеста тиендезь кудса. А мзярда ушедсь пандемиясь, сембонь синь ётафтоськ удалённай работань режимс. Институтса работась аньцек дирекциясь.
20.08.2020 №32

 

Кяшалса ётасть XXVII Малькинскяй лувоматне


 

Школась—велеть шамаликоц, ваймоц


 

КРАСНОСЛОБОДСКЯЙ ПРОМЫШЛЕННАЙ ТЕХНИКУМСА АНОКЛАВИХТЬ СПЕЦИАЛИСТТ, КОНАТ ЭРЯВИХТЬ ТЯЧИЕНЬ РОССИЯТИ


 

 
 
 

 
НОВОСТИ

Зубово-Полянскяй райононь оцюнясь В.А.Поршин:«Эрь тевсонк васенце вастса ащи ломанць!»

Зубова Полянась васенцеда лятфневи 1680 кизоста сявомок Керенскяй засечнай чертань служилай ломаттнень Зубофнень фамилияснон коряс, синь тя ширеса азорхтольхть. Лемть омбоце пяльксоц пачфни, што тяса кужель, вирьса шуфттнень эзда ароптф вастоль. Сире пинкнень тияк ётнесть Шацк-Спасск алашань кись, Зубова Полянань почтовай станциясь. Машина кить строямста посёлкась вишкста кассь. Тяниень пингть Зубово-Полянскяй районца улихть оцю предприятият, конат лезнихть виияфнемс марнек Мордовиять экономиканц. Кепотьксонди, «Плайтерра» фанерань нолдай компаниясь и Вышинскяй деревообрабатывающай комбинатсь. Лама киза Зубова Поляна посёлкаса ноляй электроннай оборудования «Радиодеталь» заводсь. Оцю тефт тиендихть наказамань ётамань учреждениятне. Пцтай эрть эса улихть стамань цехт, шуфтонь и металлонь обработкать коряс производства. Аф кржа рабочай васта максси «Талина» компаниясь, кона мольфти районца аграрнай бизнес. Инголи моли технология мархта ня предприятиятне сявондихть работама сембе ширде аноклаф, квалифицированнай ломатть, сянкса зарплатавок пандыхть цебярь.
 
 

Корреспондентоньке аф кунара васьфнесь Зубово-Полянскяй райононь оцюнять Владислав Алексеевич Поршинонь мархта и кизефнезе, кода Мордовиянь инь оцю районца ётафневихть эряфс национальнай проекттне.

12.05.2022  № 18
 
 
 
 

МОРДОВИЯНЬ ОЦЮНЯСЬ ПОЗДРАВЛЯНДАЗЕНЬ ВЕТЕРАТТНЕНЬ

Шуваланяста, 5 майста, Артём Здунов васетькшнесь Мордовиянь ветеранскяй активть мархта. Васедемаса примасть участия республикань райононь ветеранскяй организациянь председательхне и члеттне.

 

Тяддень мартста организацияти топодсь 35 киза. Мордовиянь Оцюнясь азозе, што Ветеранонь советть оцю значенияц регионца, сон путни сатомшка оцю путкс од поколениять воспитандаманцты. Корхтафоль памятниконь тиемать коряс Военно-историческяй обществать мархта марстонь работать и Сурскяй рубежень строяйхненди музеень панжемать колга.

 

«Кда аф тинь советонте, тейнек улель стака ламоц важнай задачатнень пяшкодемста. Башка мяль тячи, конешна, эряви шарфнемс од ломаттнень воспитандамаснонды, сянди, мезе тиендеви школатнень эса. Интернетса лама аф видексонь информацияда, конань вельде ули кода тиемс кальдяв од ломаттненди, сяс кадондомс мялень апак шарфтт тя категориять аш кода»,—мярьгсь Артём Здунов васедемать панжемста.
 

12.05.2022  № 18
 

СЕДИЕНЬ ТАКОЛДОМА И ОЦЮ КЕНЯРДЕМА КАННИ ТЕЙНЕК 9 МАЕНЬ ШИСЬ!

Победань шиня Саранскяйса и Мордовиянь райоттнень эса ётафтовсть мероприятият, конат лемтьфтольхть 1941-1945 кизотнень Великай Отечественнай войнаса Сяськомать 77 кизонь топодеманцты.

 

Саранскяйса Победань площадьса ётафтовсь торжественнай митинг. Ся кизонь пелькс событиянь участникненди и свидетельхненди сюконяма, сяськиень поколенияти спасибань азома, сембонь сятнень лятфтама, кит тяни ашет мархтонк, сашендсть ошеряйхне и Мордовиянь столицань инжихне.

 

Торжественнай митингть панжемста Мордовиянь Оцюнясь Артём Здунов поздравляндазень пуромфнень странаньконь историяса Великай шить мархта: 

 

«77 кизода тяда инголе Советскяй народсь аралазе родной Отечестваньконь,  нолдазе воляс фашизмать  эзда ламоц странатнень и нароттнень. Республикасонк шачф-касф ломаттне тиендсть героень тефт сембе фронттнень эса: Брестскяй крепостть араламста, Москуть, Ленинградть, Севастопольть инкса ащемста, Сталинградть ала и Курскяй дугать лангса тюремста, Украинань, Белоруссиянь союзнай республикатнень и сембе Европать воляс нолдамста. Тылонь труженикне, аф ваномок ашушить и вачашить лангс, сатнезь Победать станокнень ваксса, паксяса, Сурскяй рубежса и госпитальхнень эса. Марса аватнень и сире ломаттнень мархта тылса стакат-сталмот кирдсть шабатне. Вечнай толть ваксса минь сюконяфнесаськ пряньконь сембонь сятнень лятфтаманкса, кие ашезь мрда войнаста, кие эреклафнезе народнай хозяйствать войнада меле. Сембось тя тиф минь инксонк, шабаньконь, сяськиень сай пингонь поколениятнень инкса!»

 

 
12.05.2022  № 18
 

«Бессмертный полк России» ООД-ть Мордовия Республикань региональнай отделениянц штабонц руководителец Н.А.КРУЧИНКИН: «ТЯДДЕ "БЕССМЕРТНЫЙ ПОЛК" ШЕСТВИЯСЬ КАРМАЙ АСЬКОЛЯМА МАРНЕК СТРАНАТЬ ЭЗГА!»

05.05.2022  № 17
 
 

Касы коронавируснай инфекцияса сярядихнень лувкссна

29 апрельста ётафтовсь коронавируснай инфекциять инголдаманц и келемоманцты кить персеманц коряс региональнай оперативнай штабть  заседанияц. Сонь работасонза примась участия Мордовиянь Оцюнясь Артём Здунов.

 

«Коронавируснай инфекцияса урмаськодомать мархта тефне Мордовияса ашесть полафта—300-та лама пациент пчксихть ковиднай госпитальхнень эса. Ваномс, штоба Маень праздникнень пингста массовай пуромксне афольхть ара урмаса сярятькстыхнень лувксснон касомаснонды туфталкс»,—мярьгсь регионть руководителец.

 

МР-нь Правительствать Председателенц заместителец Галина Лотванова азондсь эпидемиологическяй  тяниень пингонь ситуациять и коронавируснай инфекциять эзда населениять вакцинациянц мольфтеманц колга.

 

Ётай недялять коряс 19 процентта кассь госпитализированнайхнень лувкссна, сяда лама арась стационарса пчкафневи идьта. Коллективнай иммунитетсь кирсь и тячиень шити сон арась 52,7 процент.

 

05.05.2022  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин