Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  
Ветеранам о ветеранах

Славань орденонь полнай кавалерть М.П.Азыркинонь 90 кизонь топодеманцты

МЯЛЯМСЬ КОЛГАНЗА ЭРЯЙ ЛОМАТТНЕНЬ СЕДИСА
Михаил Павлович Азыркин шачсь 1921 кизонь 29 ноябрьста Инсарскяй райононь Кочетовка велеса крестьянонь семьяса, коса ульсть сисем итть: ниле стирьхть и колма церат. Эрясть Азыркиттне ашуста, сяс, мзярда эвондасть колхосне, васенцекс сувасть колхозу. Арьсесть цебярь эряфонь колга. Мольсть кизотне, иттне кассть. Михаил тонафнесь школаса и лезнесь тядянцты-алянцты кудъетконь тевса, МТС-са работай оцю брадонцты. Плугарькс улемста кайсесь сельме брадонц лангс, кона тевонь содай трактористоль. Мзярда брадонц сявозь армияв, Михаилонь тердезь вастозонза. Церась пяк кенярдсь! Старандась семботь тиендемс лацонза. Но вов теензовок сась пинге молемс Армияв. Коллективонь келеса прважазь, азсть лама лямбе вал и эняльдсть службада меле мрдамс родной колхозу.
Кода трактористонь, Михаилонь кучезь танковай полку механикокс-водителькс. Сон старандась тонадомс од техникать, мезенкса получсесь благодарностть командиронц эзда. Сембось мольсь лац, но зиянць сась апак учентт—ушедсь войнась. Врагонь танкатнень М.П.Азыркин няезень васенце шиня ни—22 июньцта. Полксна эстокиге ушедсь воявама пограничнай зонаса. Но вийхне аф фкатольхть, савсь потамс. Потамс родной масторгат—кали солдатти ули мезевок сядонга мялень колай. Стакаль няемс аватнень, ит-тнень и эряфкшуфнень сельмованфснон. Полкса оцюфтольхть юмафксне. Мумок цебярь рубеж, сафоль мяльс молемс контратакас. Танкисттне анокласть тюремати.
Варьхмодемста максфоль сигнал, ушедсь бойсь. Командирсь мярьгсь Азыркинонди етамс немецнень сяда алга вастова. Мзярда пачкодсть подъемти, конань фталоль немецкяй артиллериясь, перьфкаст модась кеподсь снаряттнень эзда. Но потамс ашель кода, сафоль мяльс люпштамс немецнень тракттнень мархта. Михаил вятезе «БТ»-нц толть каршес. Экипажста наводчиксь ляцендсь пяк видеста… Михаил эряскодсь, шарьхкотькшнезе, што эздонза ащи экипажть эряфоц. Тапамок врагть батареянц, теенза максфоль приказ молемс тюремать центрас. Но машинась комотсь вяри, сяземок гусеничнай лентать. Командирсь мярьгсь Михаил Павловиченди кадомс танкать, но церати ужялель машинась, и эняльдсь тиемс теенза прикрытия, а сонць ерась кярьмодемс ремонтти. Сязьф снарядсь ранендазе Михаилонь лафтус, но сотнекшнемс пинге ашель, эрявсь курокста лихтемс танкать прицелть алда.
М.П.Азыркин сась ежес госпитальса. Теенза тисть операция, ранендафоль стакаста и  нинге юмафтсь лама верда, сяс госпитальса савсь пчксемс  кафта ковда ламос. Тя боенкса получазе васенце казненц—«За отвагу» медальть.
Славань васенце орденонц получазе Одесскяй областень Раздольная станциять инкса.
1944 кизонь 4 апрельста веть 134 танковай полксь лиссь исходнай рубежти. Эрявсь молемс атакас передовой позициятненди Раздольная поселкати. «Катюшаньке» ушедозь бойть. Ляцендевсь эрь метрась.
Етамок нейтральнай полосать, врагсь абондсь артобстрелть эзда. Азыркинонди етавсь подъемсь. Но немецне, «самок ежес», тапазь взводстост колма танкатнень. Михаил Павловичень танканцты и нинге кафта танкатненди оцю скоростьса удалась етамс машина кинь станцияти, косотольхть боеприпасне, техникась и горючай мархта вражескяй эшелоттне. Синь пякстазь киснон и ушедсть паровоснень ляцендема. Меле получасть од задания. Колма экипашне перязь врагть кинц маластонь веленяса. Немецкяй автоколоннать няемдонза меле, Азыркин анась разрешения молемс таранц. И тя теенза удалась. 134 полксь педа-пес пяшкодезе заданиянц, сявозь станциять и поселкать.
Славань омбоце орденць Михаил Павловиченди максфоль Одессать маласта Столбцы ошть инкса. Противникть оборонац кемоль, врагсь аноколь васьфтемс миннетнень. Несколька танканди эрявсь етамс машина кинь седти и кирдемс сонь, мзярс аф сайхть виеньке. Азыркинонь экипажец васенцекс сувась фашист-тнень еткс, тияк машфнезень толонь позициятнень. Заданиясь пяшкотьфоль, станцияса немецт ашесть ляда. Но тя бойса ранендафоль командирсь, кона меле кулось.
Славань орденонь полнай кавалеркс М.П.Азыркин арась венгерскяй ошть инкса тюремста. 1944 кизоня сексенда Советскяй Армиясь лиссь Венгриянь границати. 6 октябрьста Украинскяй фронтонь войскатне ушедозь Дебреценскяй операциять. Тя ошсь мянць свободас, но Ньиредъхазу ошть инкса савсь воявамс пцтай колма недялят. Михаил няфтезе прянц тя бойса афкуксонь воинкс. Меле казьфоль I степенень Славань орденца.
Сяльде нинге ламос воявась. Азыркинонь, кода тевонь содай водителень, кучезь танковай училищав од стака танкатнень тонафнема. Михаил эняльдсь Победать самс кадомс фронтса, но сонь ашезь кулхцонда. Меле служась киза, мрдась куду. Кулясь, што Михаил мрдась Славань орденонь полнай кавалеркс, эстокиге пачкодсь сембе земляконзонды. Виде, аф сембе шарьхкотькшнезь, мезе тя тяфтамсь. Царскяй Армияса служай атятне арьсесть эсь лацост. Михаил, кле, Георгиевскяй орденонь полнай кавалер.
М.П.Азыркин работась местнай школаса военрукокс, велень Советонь председателькс, торговляса. Рьванц мархта касфтсть сисем итть, сембонди макссть высшай образования.
Кулось Михаил Павлович 2002 кизонь 29 сентябрьста. Теенза 80 кизоль. Мекольдень кис прважазь аф аньцек Кочетовкань, но и маластонь велень эряйхне, районць.
Сонь военнай подвигонзон колга мялямсь эряй аф аньцек мала ломанензон седиса, но и азондыхть колганза Кочетовкань краеведческяй музейса, коса улихть фотографиянза и документонза. Сидеста лятфнесазь М.П.Азыркинонь райононь краеведческяй музейса.
 
Е.МОЧАЛОВА,
Инсарскяй историко-краеведческяй музейть заведующаец.

24.11.2011 №46

Новости

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019   №
Сёрматфтода «Мокшень правда» уцез (льготнай) питнеса

24.05.2019   №
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин