Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   
Религия

Пефтома мазышись котф лангса

Зубово-Полянскяй райононь Сире Байдеку велеса эряйхть пара вайме и асу ломатть. Эздост фкясь—Л.П.Пиваева. Мокшавась машты сюреса сермадома. Кудонц стенасонза повфнефт серматф картинат, шкайнят, шранзон лангса ацафт серматф скатертть, салайхть мяль тоду лангаксонза.
Шачсь-кассь Любовь Павловна Сире Байдекуса колхозниконь семьяса. Сембоц эздост ульсь ниле итть. Тядясна-алясна фалу старандасть тиемс стане, штоба идьсна кельголезь трудть, маштольхть тевса шарфтома и етка пингонь етафтома. Сяс Любовь Павловнань тянивок аш стама пингоц, мзярда сон ащель тевфтома. Сюреса сермадома Л.Пиваевать нинге емланяста тонафтозе тядяц. Стирнясь тянь курокста тонадозе.
Аделамок кафкса класст, Любовь Павловна тусь тонафнема Темникавонь медицин-скяй училищав. Кемзисемге кизоста сявомок сон кармась работама шабра Ширингуш велеса идень медицинскяй сестракс. Рьвакс лиссь 1977 кизоня эсь велень церанди. Мирденц мархта касфтсть, стяфтсть пильге лангс колма итть: стирь и кафта церат. Сембе вастоват, кажнайть синцень семьясна.
Эряфоньберьф Любовь Павловна фалу старандась тиемс сембонди аньцек цебярь. Шабатнень шумбрашиснон мельге ваномась арась теенза инь кельговикс тевкс. Ширингушу якамс сашендовсь эрь шиня вете вайгяльбет, сняра жа—меки.
Содаф, священниконь бславамафтома аф шкайнянь рисавама, аф сермадома киндивок аф мярьгондеви. Ширингушса работамста авась содафтсь тостонь церькавса служси отец Геннадиень мархта. Попсь бславазе авать шкаень сермадома. Эстоньбере Любовь Пиваева ушедсь аф сяшкава теждя тев—шкайнянь сермадомать. Сонь валонзон коряс, мярьгат, аф няеви вийхне максыхть эрьгя тянди. И шкайнясь сермадови сюреса тяфтама курокста и мазыста, мянь кивок аф верондай, што тя сембе паршись тиф кядьса. Тялоньберьф авась сермадсь вейхкса шкайхть. Кажнайть музе эсь вастонц. Конань кудозонза путозе, конань шабранцты казезе, конатнень – идензонды.
Мзярошка кизода инголе сон лядсь мирдьфтома. Сембе тефне прасть лафтувонзон лангс. Оцю лезкс Любовь Павловна няи кода идензон, раднянзон, стане и велеряензон эзда.  Шабранзон мархта сон эряй седикс-ваймокс. Мезе тиемс кудса-пирьфса, фалу анокт лездомс. Тиф тевть инкса ярмак синь аф сявихть. Сяс авась содасы, мазы картинать эзда синь аф атказайхть. Мяляфтови питни казнекс теест арсихть Любовь Павловнань сюреса серматф картинанза.
Любовь Павловнань тяни кафта уноконза. Церанятне кизоньберьф ваймосихть кельгома бабаснон ширеса. Лездыхть тевса, кой-коста синцьке сявондьсазь кядезост салмоксть, мяльсна сюреса сермадомс картина, кодама машты тиема аньцек бабасна. Кудъетконь тевонь аделамада меле Любовь Павловна уноконянзон мархта сявихть аньцек паньф пярякат, тага мезевок танцтиня, озайхть велосипед лангс и туйхть вирнять малас ваймосема. Кстынкса, пангонкса—тага велосипедса. Авась отькорьшиса аф лядонды уноконзон эзда. Эсь 55 кизостонза фалу кенерькшни сембе вастса: и сире тядянц варжамс, и раднянзонды инжикс молемс, сембонди лездомс. Кинди укол путома, кинди валса лездома. Кемоньшка кизода инголе больницять, коса покодсь Любовь Павловна, селгозь. Сяс теенза савсь пингта инголе лисемс пенсияс. Аньцек эсь профессиянц сон аф юкснесы тянемс.
И. Пятина.

09.08.2012 №31

Новости

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

Мордовиянь Оцюнясь Владимир Волков 15 январьста етафтсь 2019-2020 кизотнень федеральнай адреснай инвестиционнай программатнень, а стане жа национальнай проекттнень эса республикать участиянь примаманц коряс кизефкснень ваномаса рабочай совещания. Совещанияса примасть участия республикань Правительствать Председателец Владимир Сушков и министронь кабинетонь члеттне.
Владимир Волков китькстазе, што национальнай проекттнень эса участиянь примамась—тя афкуксонь возможность Мордовияти эряскофтомс виияфтомань сяда важнай направлениятнень коряс задачатнень решандамаснон, получамс федеральнай бюджетста ярмак ся проекттненди, конат эрявихть республикань эряйхненди и синь водендафт экономикать и социальнай сферать виияфтоманцты.
17.01.2019   № 2
Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019   № 1
10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019   № 1
Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018   №
Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018   №
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин