Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 
Религия

ШИРЕЗОНК САШЕНДСЬ МОСКУВОНЬ И СЕМБЕ РУСЕНЬ ПАТРИАРХСЬ КИРИЛЛ

25 августста Саранскяи Первосвятительскяй визит мархта сашендсь Москувонь и сембе Русень Патриархсь Кирилл. Рузонь Православнай Церькавонь оцюнясь тага весть ульсь емла родинасонза—тоса, коса эрясть предканза и коса етась шабакс пингоц.
Патриархть Кириллонь ширезонк тяддень самац лемтьфоль мокшэрзянь народть Российскяй государствань нароттнень мархта ладязь эрямаснон 1000 кизоть топодеманцты.
Самдонза меле эстокиге Патриархсь Кирилл тусь Макаровка вели Иоанно-Богослов-скяй монастыри, коса панжезень Мордовиянь Митрополиянь Идень православнай лагерть и Мордовиянь Православнай од ломанень республиканскяй фестивальть.
Торжественнай тя пуромксса примасть участия Мордовия Республикань Оцюнясь В.Д.Волков, Самарскяй областень Губернаторсь Н.И.Меркушкин, Московскяй Патриархиянь тевонь управляющайсь, Саранскяй и Мордовскяй Митрополитсь Варсонофий, Рузонь Православнай Церькавонь архиерейхне, официальнай лия ломатть.
Инжихнень васьфтезь Саранскяй епархиянь од ломанень отделть председателец, протоиерейсь А.Пелин, Мордовия Республикань Од ломаттнень тевснон коряс госкомитетть председателец Л.М.Лисунова, воскреснай школань тонафнихне, кадеттне, шабань своднай хорсь.
Идень православнай лагерть и Православнай од ломанень фестивальть панжемста Патриархсь Кирилл приветственнай валсонза мярьгсь:
—Кенярдезь ванан сянь лангс, мезе няян. Кизода инголе улень тяса владыкать Варсонофиень мархта. Сон азондозень тейне эсь мялензон-арьсеманзон лагерть квалма. Но ся, мезе тячи няень, ламонь-крда етазень корхнеманьконь. Тя сембось—пяк цебярь ваймама васта, тяса ули кода етафнемс занятият, васьфнемс иттненди и од ломаттненди. Тянкса седи ваксста азан спасиба Мордовиянь власттненди, владыкати митрополитти Варсонофиенди, сембонди сятненди, кит макссть тя тевти средстват, кит путозь вийснон, штоба мокшэрзянь масторса эвондаль тяфтама цебярь и мазы васта—аф аньцек лагерь, а од ломанень афкуксонь центра, коса ули кода и ваймамс, и работамс, и тонафнемс, и вятемс духовно-воспитательнай и патриотическяй работа.
Лагери сашендоманц колга лятфнембяленди Патриархсь Кирилл казезе Христость Спасительть образонц, кона серматф фкя евангельскяй сюжетть коряс. Пуромфненди явонтфоль Патриаршай благословениясь—Божией Матерть Казанскяй шкайняц. Сяльде Москувонь и сембе Русень Патриархсь Кирилл ванозе лагерть, кона ащи кафта этажень кефкие эрямань корпусста. Строяф храм, коса кармайхть етафневома богослуженият. Нинге тиф культурнай центра, улихть спортивнай, тяконь лувксса футбольнай и волейбольнай площадкат,тенниснай корт, бассейна и стак тов. Фкя пингть лагери ули кода примамс 150 идь.
 
Т.АЛЬШИНА.

30.08.2012 №34

Новости

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019   № 42
Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019   № 42
МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019   №
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин