Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 
Религия

«МОКШЭРЗЯНЬ НАРОДТЬ ИЛАЦ ТЕРДИ КЕЛЬГОМАТИ, ФКЯ-ФКЯНЬ МАРХТА ЛАДЯМАТИ!»

Саранскяй духовнай училищать ректороц, Богословиянь кандидатсь, протоиерейсь А.Пелин:
—Отец Александр, кода васьфтезь Мордовиянь православнайхне мокшэрзянь народть 1000 кизонь иланц?
—1000 кизонь илась и сонь идеологияц арась питникс сембонди—и православнайхненди, и лия верань ломаттненди. Сяс, мес илась терди нароттнень еткса ладямати и ялгаксшинь сотксонь кирдемати. Лиякс мярьгомс, тонафты сянди, мезти тонафтсь и тонафни тя пингс эсонк Шкайсь, Иисус Христоссь!
Сяс, монь койсон, 1000 кизонь илась эсь потмонь виенц вельде макссь лама цебярьда аф аньцек Россиянь, но и омба масторонь нароттненди. Мокшэрзянь народть илац сембонди няфтезе, кода эряви эрямс лама нациянь государстваса и странаса.
—Мекольдень пингть Россиянь православнай церькавть лангс ушедсть врьгятькшнема сят, кит лемнесазь эсь пряснон «творческяй ломанькс»…
—Мзярда ломанти, кона лувондсы эсь прянц «творческяй оцю ломанькс», аш мезе азомс народти, сон ушеткшни «мянцевома». И тя тиендеви сянкса, штоба шарфтомс эсь лангозонза лиятнень мяльснон. И синь, ня ломаттне, пяк эльбятькшнихть эсь равжа тевснон тиемста. Сяс мес, кода азф оцязорть Давидонь фкя псаломсонза, Менельса Озафсь киндивок аф сялдови! И тейне пяк ужяльхть ня ломаттне, конат тиендьсазь сянь, мезть синцьке аф содасазь. Синь молихть масторлангонь китнень ланга, кода сокор ломатть. И тяка пингть, пешкодыхть ня китнень лангса пиже шабакс: кле, ломатть, минь содасаськ афкуксонь видешить!
Но тя ефси аф тяфта. Кода мярьгсь Иисус Христоссь: вятеви ли сокорти сокорсь? Аф кафцьке ли прайхть лоткс?
И тянь мархта сембось азф.
—Минь эряфсонк, отец Александр, улихть нинге стама прябалат, конат эряйхть эсонк етай векста сявомок…
—Мон шарьхкодихтень. Тяниень пингть ломаттне сидеста панцихть оцю ярмакнень мельге. Но тяка пингть, ламотне эздонк тячи эряйхть аф пяк теждя эряфса.
Лия ширде: минь няйсаськ, кода эряйхть сят, кит сяда эрьгавста «тиендихть ярмак». Сяс минь государстваньконди эряви тиемс семботь, штоба сембе ломаттне странасонк марялезь пряснон аф обжафокс.
—Мекольдень кизефксса, отец Александр, нинге весть мрдатама 1000 кизонь илати.
—Сонь вельденза Мордовиясь арась содафокс сембе мирса. Тяда башка, минь сембе няйсаськ, кода полафтсь цебярь шири Мордовиять столицанц шамаликоц.
Сяс, катк сяда товга минь емла родинаньке, Мордовиясь, сидеста кармай арсема кепотьксокс сембе Россияти!
—Спасиба.
 
В.НЕСТЕРОВ.

04.10.2012 №39

Новости

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019   № 42
Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019   № 42
МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019   №
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин