Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930
АПК

30 ЛАМА КИЗА МАКССЬ ВЕЛЕНЬ ХОЗЯЙСТВАТИ

Раиса Алешинась шачсь-кассь Рузаевскяй райононь Рузонь Баймак аф оцю веленяса, лама идень семьяса. Сон идькс пингстонза киге содасы велень трудть. Стяшендсь атекшнень мархта рана шобдава и кярьмотькшнесь работати, покодсь, кода корхнихть, шобдаста шобдас. Эряви азомс, што велеса сембода инголькиге стяшендыхть жувата мельге якайхне. Велеса, кода содаф, тяни лядсть сят, кие седиса-ваймоса педсь родной модати. Ужяленди, мекольдень пингть колгаст серматкшнихть аф сидеста.
Но тячи мялезе азондомс Раиса Дмитриевна Алешинать, «ВКМ-Агро» ЗАО-са покодить, ингольдень дояркать колга, кона виень аф ужяльдезь трудендась тяса 30-да лама киза.
Рая шачсь Дмитрий Федоровичень и Александра Михайловна Мезиттнень сокаень-видиень семьяса и ульсь колмоце идькс. Аляц эряфоньберьф трудендакшнесь постуфокс, инголи колхозса, тяда меле «Мир» совхозса. Тядяц покодсь складонь заведующайкс, сяльде дояркакс. Идьснон Дмитрий Федорович и Александра Михайловна касфтозь цебярь ломанькс: тонафтозь добрайшити, честнайкс улемати и трудонь кельгомати. Марнек семьясост ульсь 8 итть. 5 сазорхт и 3 братт.
Мзярда Раиса тонафнесь школаса, урокта меле сидеста якась тядянцты фермав, эста и ушедсь жувата мельге якамань трудть кельгома. 70-це кизотнень ушетксста ламоц од ломаттне тушендсть ошу работама. Рая ульсь синь етксост. Инголи покодсь «Пластмасс» Рузаевскяй заводса, меле Саранскяйса—электроламповай заводса. Но велень стирнять седиец фалу таколдсь мрдамс шачема-касома уженязонза. Ошса Рая васьфтезе васенце кельгоманц. Лиссь рьвакс, но, ужяленди, эряфсонза лиссь зиян. Мирдец аф лама пингта меле шавовсь. Стирсь мрдась эсь велезонза—Рузонь Баймаку. Тя ульсь 1979 кизоня, мзярда совхозонь директоркс ульсь Николай Андреевич Начаркин. Ся пингть фермаса ашесть сатне животновоттне, а дояркатне—сяда пяк. Раянь сявозь дояркакс. Максозь теенза васенцеда вазыяй траксонь группать. Мельгаст якамста ашезь визне кизефнемс лезкс опытнай дояркатнень кядьста. Тянь ширде лама теенза лезнесть сяда опытнай дояркатне. Башка мяль шарфнесь тракснень кормаснонды. 80-це кизотнень жувататнень андомань рационцна ульсь аф козя. Но аф ваномок тянь лангс, Рая сатнесь инь оцю показательхть. 3000-3500 литра лофца кизоти.
Седикс-ваймокс покодеманкса Раиса Дмитриевнань фотокарточкац ашезь валхнев совхозонь Почетнай доскаста. А ламоц Почетнай грамотанза и благодарностенза, ужяленди, ашесть ванфтов, синь палсть кудонц мархта 80-це кизотнень.
Раиса Дмитриевнань омбоце мирденц мархта кафта стирнясна. Но зиянць тага чакась Раять кудозонза. Кулось омбоце мирдецка Николай.
Раиса Дмитриевна кафта кизода инголе тусь пенсияс, но аф ваномок тянь лангс, стаки покоди хозяйстваса. Касфни перень серот. Улихть уноконза. Синь сидеста сашендыхть инжикс щаваснон пяли. Мялезе седи ваксста поздравляндамс Раиса Дмитриевнань и сембе пенсионерхнень сире ломанень шить мархта и арьсян теест шумбраши, паваз и ламоняс эрямс.
В.КУДАШКИН,
трудонь ветеран.

04.10.2012 №39

Новости

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019   № 24
Минь поздравленияньке

Малаткшни Юбилейцень мархта, Геннадий Александрович!
Корхнихть, што ломанть эряфоц унксневи аф сяшкава кизоса, кода тевса, сянь мархта, мезе сон тись.
Вов ни 20 киза Старошайговскяй районть эряфса сембе  пара ушетксне, цебярь сатфксне сотфт Г.А.Мухинонь лемонц мархта. Нят ульсть пяк аф теждя кизот. Геннадий Александровичень самозонза районть колга корхнесть кода фталу  ляткшниень квалма. Валом-валом районць кармась лисендема касомань-вииямань кить лангс.
Пингсь и эряфсь няфтезь: Геннадий Александрович Мухинонь лангс ули кода надиямс. Сон цебярь руководитель, принципиальнай, еню и тевонь лац содай руководитель. Кельгсы дисциплинать и сембоса порядкать, седиец фалу панжада ломаттненди. Парста шарьхкодьсыне тячиень стакатнень-сталмотнень и лац няйсыне синь эздост лисемань китнень, перспективать.
13.06.2019   № 23
«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019   № 22
Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019   № 22
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин