Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   
Религия

КОВЫЛКИНСКЯЙ РАЙОНЦА ПАНЧФ ПРОСВЕТИТЕЛЬСКЯЙ ЦЕНТРА

Ковылкинскяй районца фалу мольфтевсь культурно-просветительскяй оцю тев. Ковылкинаса ули краеведческяй музей, Кочелаеваса содаф художникть Ф.В.Сычковонь музеец, Каз.Майданца—Боевой и трудовой славань велень музей, конань кочказь-пуроптозь мирттне-рьвятне Колодиттне. Пцтай эрь школаса, идень садса работайхть аф оцю музейхть. Эсост етафневихть пуромкст. Но тя районца аф кржа историческяй лятфнембялень вастта, конатнень лангс сатомшка мяль аф шарфневи.
Ковылкинскяй районца ламотненди содаф Россиянь государственнай деятельть, помещикть И.А.Араповонь лемоц. Тя ломанть эряфоц сотфоль машина кить и машина кинь станциять строямаснон мархта. Тяда башка, тянемс работай спиртонь заводоц. Районнай больницять маласа ванфтовсть кудоц, алашань кардонза и лия помещениятне, конат нолявихть тевс хозяйственнай постройка лаца, а историческяй памятниконь питнишисна ашет.
Кепотьксонди, шабратне—Пензенскяй областень Наровчатскяй райононь эряйхне историческяй памятниконь ванфтомать и синь тевс нолямаснон коряс молихть сяда инголе. Эрь шиня Наровчату сашенды аф кржа турист Россиянь сембе региоттнень эзда.
Н.П.Огаревонь лемса Мордовскяй государственнай университетть президентоц Н.П.Макаркин, кона шачсь Ковылкинскяй районца, азсь мяль панжемс Ковылкинаса Культурно-просветительскяй центра. Тя тевть эряфс етафтоманц коряс кочкафоль инициативнай группа. Теенза председателькс азфоль В.А. Еремин, кона инголи работась Боевой действиянь ветераттнень ассоциациясост. Группати сувасть А.С.Кичкин, Сире Пшень велень церькавть настоятелец отец Алексей, Н.П.Огаревонь лемса МГУ-ть Ковылкинскяй филиалонц директороц И.Е.Поверенов, лиятне. Сембе синь путсть лама вий-эрьгя, штоба организационнай комитету сувафтомс содаф ломатть, конат кельгсазь Ковылкинскяй районть, содасазь историянц, ванфтсазь культуранц.
Культурно-просветительскяй центрать тиеманц коряс оргкомитетти сувафтфтольхть И.А.Араповонь уноконь унокоц А.П.Арапов, Н.П.Огаревонь лемса МГУ-ть президентоц Н.П.Макаркин, Ковылкинскяй райононь администрациять оцюнянц заместителец Н.П.Комусов, академиксь, писательсь, журналистсь А.А. Цветков,  лиятне.
Академиксь А.А.Цветков сермадсь и нолдась 158 научнай труд кибернетикать и информационнай технологиятнень коряс, 100 статья—историянь и литературоведениянь темас. Эряй Москуса, а Воскреснай Лашма велеса ульсть раднянза. Вяти исследовательскяй тев А.С.Пушкинонь, А.И.Купринонь творчестваснон и эряфснон колга, тяштсь книгат И.А.Араповонь квалма. Академикти 79 киза. 27 сентябрьста сашендсь Ковылкинав, примась участия вяре азф центрать пуроптоманц коряс оргкомитетть пуромксса. Академиксь А.А.Цветков университетонь и строительнай колледжень студенттнень инголе корхтамста пачфтсь лама мезе одня И.А.Араповонь колга сонь биографиястонза. Генерал-лейтенантсь аф аньцек помещиколь, но и тевонь содай промышленниколь.
А.А.Цветков васьфнесь Ковылкинскяй райононь администрациять оцюнянц В.И. Ташкинонь и сонь заместителенц Н.П.Комусовонь мархта. Корхтамась мольфтевсь Культурно-просветительскяй центрать колга. В.И.Ташкин азозе, што сон кармай лезнема тя тевса.
Нинге академиксь ульсь вяре лятфнеф музейхнень эса, коза мархтонза якасть оргкомитетонь члеттне.
В.КУДАШОВ.
Снимкаса:
(кержи ширде) А.А.Цветков, Н.П.Комусов,
В.И.Ташкин.

11.10.2012 №40

Новости

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

Мордовиянь Оцюнясь Владимир Волков 15 январьста етафтсь 2019-2020 кизотнень федеральнай адреснай инвестиционнай программатнень, а стане жа национальнай проекттнень эса республикать участиянь примаманц коряс кизефкснень ваномаса рабочай совещания. Совещанияса примасть участия республикань Правительствать Председателец Владимир Сушков и министронь кабинетонь члеттне.
Владимир Волков китькстазе, што национальнай проекттнень эса участиянь примамась—тя афкуксонь возможность Мордовияти эряскофтомс виияфтомань сяда важнай направлениятнень коряс задачатнень решандамаснон, получамс федеральнай бюджетста ярмак ся проекттненди, конат эрявихть республикань эряйхненди и синь водендафт экономикать и социальнай сферать виияфтоманцты.
17.01.2019   № 2
Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019   № 1
10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019   № 1
Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018   №
Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018   №
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин