Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 
Религия

КИНДИ ЭВОНДАКШНЕСЬ БОГОРОДИЦАСЬ

Сяда сидеста ломаттненди эвондакшни Богородицась-заступницась—ломаттнень аралайсна и покровительницасна.
Аралазень аф муворуфнень…
Мзярда Иван Вороновонь 1942 кизоня тердезь фронту, прважамстонза  тядяц максозе теенза Божий Матерть ликонянц, мярьгомок, што сон ванфтсы, кда церась кармай теенза озондома. Иван прянц лувозе Шкаенди аф верондайкс, но тядянь казнеть ванфтозе кода эсь сельмонзон. Весть солдатонь группать мархта сон повсь вирьса окруженияс и ранендафоль. Тумс ся вастста можналь шяю вастова, но пяк оцюволь пелькссь ваямати. Лятфтамок ликонять колга, сон салава таргазе и эняльдсь: «Богородица, кда Тон улят—лезтт!». Тяка пингть вирьса эвондась сире бабаня: «Эрьгодеде, церат? Моледа мельган, мон няфтян теенть киня!». И лихтезень шяю вастть эзда минценнетненди. Пращамста Иван мярьгсь: «Ну, пара ломань, аф содаса, кода пандомс парцень?»—«А тон тейне эряфоньберьф кармат служама!». И юмафтсь, бта кожфть келес срадсь.
Пачкодемок мянь Берлину, Иван макссь вал, што, кда ляды шиса, арай монахокс. Меколи сембе мирсь-масторсь содазе сонь кода Псково-Печерскяй монастырень великай наместниконь архимандритть Алипиянь.
Чуда лиссь и 2008 кизонь 8 августста Цхинвал ошса, кона фатяфоль толса. Мзярда грузин-скяй войскатне сявозь Южнай Осетиять, инь вишке бойхнень пингста ломаттне илядень шобдать пачк приметазь, кода Рождество Пресвятой Богородицы храмть куполста валгсь пяк мазы ава, кона щафоль пиндолды акша щамса, и тусь рузонь солдаттнень каршес, аф шарфнемок мяль снаряттнень и пулятнень лангс. Аланскяй епископсь Георгий васенда ашезь веронда няихнень азксснонды. Но несколька шида меле сон сонць эсь сельмоса няезе Богородицать, кона лиссь храмста.
Кода арьсекшнихть священникне, Божий Матерсь валгсь менельста, штоба араламс ошть. Сон целайнек валгонды тоза, коса ломаттненди инь стака, и тяда меле бойсь шумордави сяськомаса. Грузинскяй бомбатнень и ракетатнень мархта машфтфоль лама церькав, осетин-скяй несколька храм плхтафоль марса священникнень и прихожаттнень мархта. Главнай соборть пирьфс, коста няезь Богородицать, повсь аф фкя кемотть снаряд, но фкяське ашезь тие кодамовок зиян.
Богородицась петфтазе прять
Саудовскяй Аравияста    Ш.Д.-ть пяк мялецоль, штоба синь шачель идьсна.  Ашесть лезда аф врачне, аф паломничестватне. 2004 кизоня сон тусь путешествияс Сирияв, мезенкса сиводсь такси. Кулемок прябаланц квалма, водительсь мярьгсь молемс Сиднайскяй пяк кунардонь авань монастыри, кона Дамаск ошса. Тоса Богородицать чудотворнай ликоняц, конанди лезксонкса сашендыхть мянь язычникне и мусульматтне. Вдь корхнихть, што Богоматерсь лезни шабафтома семьятненди.
Ш.Д.-сь и сонь рьвац ульсть монастырьса, маладсть чудотворнай ликоняти, озондсть и симсть емла куцюнянь святиндаф вай лампадаста, кона крьвястьфоль святой образть инголе. Эстокиге ваймозост арась пяк пара и верондасть, што синь арьсефсна пяшкодеви. Арабсь мянь сюконязь надияфтсь: кда синь шачи идьсна, максыхть монастыри лама ярмак, да и водительтьке аф юкстасазь. Вейхкса ковда меле синь шачсь наследниксна. Павазу алясь тусь Дамаск ошу. Ш.Д.-ть мялецоль максомс 80 тежянь доллар монастырти и нинге 20 тежянь—таксистти, конафтома сон афоль куле тя святой вастть колга. Но водительсь сась мяльс сембе ярмакнень кадомс эстеенза.     Ш.Д.-ть васьфтема сась ялганзон мархта. Монастыри ардомста, мзярда машинась пачкодсь ломаньфтома вастс, арабть пикссезь, нельгозь ярмакнень, и мекпяли керозь прянц. Путомок ловажать багажнику, тусть сяда тов, штоба сонь калмамс. Ки лангса апак учсек машинась синневсь. Тя малава етай ломанць приметазе, што багажникста путняй вер, и пачфтсь полицияв. Муворуфне кундафтольхть эстокиге. Мзярда панжезь багажникть, кона валфоль верса, ловажась кармась шерьхкома и стясь пильге лангс: «Аньцек тяни Пресвятой Девась шумордазе сялдазозень стаманц»,—мярьгсь кашкомф вайгяльса и няфтезе кргастонза свежай шрамть. Тя кулять эзда шавихне арасть еньфтомокс и синь савсть прважамс психиатрическяй больницяв.
Зиянц повфсь мяляфтозе семботь, мезе тисть мархтонза, тяка пингть аф аньцек эста, мзярда шавозь, но и сяда меле. Васенда сон няезе маластонза Шкабавазть, а меле приметазе, кода сонь ловажанц вельхксс комась Богородицась… Пингонь етазь дамасскяй медикне пачфтезь, што стафксне афкукс путфт ефси аф кунара, полатфтольхть мянь инь емла сосудатне и нерватне. Сембось тя пяк лац поладсь. Тяда меле аф аньцек Ш.Д.-сь и сонь рьвац, но и ламотне семьястост арасть христианкс.
 

27.09.2012 №38

Новости

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019   № 42
Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019   № 42
МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019   №
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин