Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   
Демография

СЕМЬЯСОСТ ВАСЕНЦЕ ВАСТСА КЕЛЬГОМАСЬ

Торбеевскяй райононь Дракина велеса лац содаф Каликиттнень семьясна. Мирттне-рьвятне касфтыхть колма итть: кафта стирнят и цераня. Сембе синь пара ваймот и панжада седихть, ефси стапт, кодапт касфтысна. Кода мярьгсь Татьяна Петровна, эрь шабать касфтомаса васенце вастса ащи кельгомась. Улема, тяфтама семьятнень вельде кирди и кемокстай мокшэрзянь народсь.
Семьянь азорсь, Андрей Геннадьевич, шачсь-кассь Ленинградса, тяниень Санкт-Петербургса. Перестройкань кизотнень, мзярда цераняти 13 кизоль, семьяц етась эряма Торбеевскяй райононь Дракина вели—тядянц шачема ширезонза. Тонафнесь Жуку велень училищаса. Лама киза макссь велень хозяйствати. Работась шоферкс, трактористокс. Татьяна Петровна марнек эряфонц етафтозе шачема-касома Дракина велесонза. Школать шумордамдонза меле тонафнесь Н.П.Огаревонь лемса Мордовскяй государственнай университетть экономическяй факультетсонза. Мрдамок Дракинав, кармась работама велень Культурань кудса, коса трудендай тянемс.
 Аш месть корхтамс, колма иттнень касфтомасна аф теждя. Аньцек сембе сталмотне аф марявихть, мзярда нинге синць шабатне ушедыхть лездома тядяснонды-аляснонды и фкя-фкянди. Нльне кафта кизоняса Сонясь старандай лездомс, шаронды сяда оцюфнень перьфке. Сяда оцюфне лездыхть тядяснонды-аляснонды кудонь и пирьфонь тевса, ваныхть емлать мельге. Шабатне, кода сятяв гуленят, кулхцондыхть тядяснон эса, лездыхть теенза и учсазь илятть, мзярда сай алясна работама вастста.
Эрь шабать ули сонцень кельгома тевоц и налхкомац. Кепотьксонди, сембода емлась аф кадондсыне налхкшензон. Дима кудъетконь тевонь тиемда меле тушенды калонь кундама. Кода азондозе Татьяна Петровна, кизоньберьф ашезе кадонда ульмонянц, етка пингста эряскодсь атянц мархта маластонь эрьхконяти. А вов Аделина пяк кельгсы рисовандаманц.  Пади, касомок, сон рисавасы эсь шабакс пингонц, кона пяшксе валда лятфнемада.
 
И.Пятина.
 

25.10.2012 №42

Новости

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

Мордовиянь Оцюнясь Владимир Волков 15 январьста етафтсь 2019-2020 кизотнень федеральнай адреснай инвестиционнай программатнень, а стане жа национальнай проекттнень эса республикать участиянь примаманц коряс кизефкснень ваномаса рабочай совещания. Совещанияса примасть участия республикань Правительствать Председателец Владимир Сушков и министронь кабинетонь члеттне.
Владимир Волков китькстазе, што национальнай проекттнень эса участиянь примамась—тя афкуксонь возможность Мордовияти эряскофтомс виияфтомань сяда важнай направлениятнень коряс задачатнень решандамаснон, получамс федеральнай бюджетста ярмак ся проекттненди, конат эрявихть республикань эряйхненди и синь водендафт экономикать и социальнай сферать виияфтоманцты.
17.01.2019   № 2
Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019   № 1
10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019   № 1
Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018   №
Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018   №
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин