Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  
Наша усадьба

ШУРЬХКЯСЬ ВАНФТОВИ ТУНДАТИ

Касфтомс шурьхкянь цебярь урожай—пяле тев. Сяда стака ванфтомс сонь тундати. Сидеста кочкаф урожайсь урмаськотф шейковай наксадомаса и лия урмаса. Тянь сюнеда шурьхкясь юмай-арай ковда меле ни!
Урожайть ванфтомаса оцю васта занци сонь урядамац. Эряви ваномс кенереманц мельге (урядамань пингоц—шурьхкя лопатнень тюжалгодомасна) и кочкамс цебярь погода.
Коське погодаста урядаф шурьхкясь сяда лац ванфтови. Шурьхкясь урядави кафта этапса. Васенда тарксемат шурьхкяпрятне, меле кадомат 2-3 шис панденятнень лангс, мзярс синь аф коськихть. Тя пингть шурьхкяпрятне шарфнемат, штоба шись косьфталезень сембе ширде и ультрафиолетсь машфтолезень урматнень.
Кда молихть пизепт, то 1-1,5 недяляда инголе каймоса керсесазь ункскятнень 5 сантиметрада алу шурьхкяпрятнень эзда. Тяфта шурьхкясь лац кенери.
Аф эрявихть сязендемс и тапсемс шурьхкя лопатнень, тянь эзда шурьхкяпрятненди повондыхть наксадомань бактерият. Тапсеф шурьхкясь ламос аф ванфтови, нолдама тевс 2-4 недяляста.
Урядамда меле, шурьхкясь кадома лямбе вастс, коса якай кожфсь. Эста лопатнень эзда шурьхкяпряти молихть питательнай веществатне.
Аф эрявихть керсемс шурьхкя лопатнень. Сяда цебярь ули понамс синь сюралксокс и кадомс станяк. Шурьхкя лопатнень керсемат аньцек 3-4 недяляда меле, коськомдонза меле.
Кода шарьхкодемат гастяф шурьхкяпрятнень? Явфтость сятнень, конатнень сялдаскасна сувафтфт потму. Тя—шейковай наксадомаса урмаськотф касыксне. Тяфтама урожайсь курок наксады и наксафтсыне вакссонзотнень.
Емла шурьхкяпрятнень кочкасть башка и кадость тундати видемс (ванфтомат башка, емла температураса). А пяк оцю эчке сялдаскя мархтотнень нолдасть тевс эстокиге. Синь аф урмавуфт, но ламос аф ванфтовихть.
Ламос ванфтовихть шуваня, коське сялдаскя мархта шурьхкяпрятне. Синь кадондсазь станяк сюралксокс или керсесазь понафста, (но сялдаскять кадомс аф 4-7 сантиметрада кувакаста) и ванфтсазь картононь ящикса 0-20 градусса.
Сяда оцю температурась—сяда лац таркси вайме шурьхкясь и сяда лама летьке лихти. Бохарямса тялонда шурьхкя­прятнень эвондакшнихть ункс­сна. Сяс урожайть пяльксонц ванфтома холодильникса. Сонь можна нолдамс тевс тялоть аделамста, мзярда урожайть оцюшкац ули сивф.
Чеснокть и шурьхкять можна ванфтомс балконца лямбоста ашкотф коробкаса. Синь эендайхть, но ярхцамс кондястихть, кда сувафтомс и солафтомс. Солафне ламос аф ванфтовихть, сяс сувафнемат балконцта аф ламнянь.

25.10.2012 №42

Новости

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

20 октябрьста Саранскяйса Культурань Республиканскяй дворецса ушедсь мокшэрзянь масторса фкя инь кельгови илась—«Шумбрат, Мордовия!»—«Vivat, Чемпионат!» народнай творчествань республиканскяй фестивальсь. Тядде сон етафтови комсь кафтувоцеда и лемтьф 2018 кизонь футболть коряс Миронь чемпионатти. Тяддень фестивальть девизоц—«И тя сембось сонь колганза».
Кода фалу, ковда ламос Культурань Республиканскяй дворецса кармайхть етнема муниципальнай райоттнень и Саранск ошень округть отчетнай концертсна, а стане жа «Мокшэрзянь масторть мастерствац» декоративно-прикладной и изобразительнай творчествань выставкатне.
Ваныхненди ули кода няемс инь цебярь творческяй коллектифнень, артисттнень выступленияснон, содафтомс народнай мастерхнень работаснон мархта.

25.10.2018   № 42
Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018   № 40
Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018   № 39
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин