Поиск по сайту: 
 

Архив
 апрель 
 2019 
пн вт ср чт пт сб вс
1234567
891011121314
15161718192021
22232425262728
2930     
Ветеранам о ветеранах

СЮКОНЯТАМА ТЯДЯТНЕНДИ

Тядя… Тя валсь эрь ломанть эряфса занци няевикс васта. Сон инь мала и питни эрь ломанти. Эсонза шить лямбоц и валдоц.
Тядять главнай призванияц—казендемс эряф. Тядяда сяда мала и питни ломань  масторлангса аш. Но арьседа, теждя или аф тядять эряфоц?! Кодама сталмот сон няйсь Великай Отечественнай войнань и сяда ингольдень аф теждя кизотнень! Ашезе ужяльде тядясь виензон мезьсовок, старандась лездомс кода-аф кода маласькофтомс сяськомать.
Тейне ульсь 8 кизот, мзярда ушедсь войнась. Лац мяляфтса, кода алятнень мархта ряцок тядятне тушендсть фронту и аф пелезь тюрсть врагть каршес. Сембе велень тефне прасть синь лафтуснон лангс. Аватне сокасть, видесть, касфтсть сера. Тядять ся пингоня сидеста можналь няемс тракторть рычагонзон, автомобильть руленц ваксста. А кодама вачаши няйсть аватне и синь идьсна тылса! Ламоцне вачашить эзда таргозькшнесть и кулсесть. Аф кржа эряф сявсь войнась. Тядятне явсесть идьснон, мирдьснон, сазорхне—брадснон, стирьхне—кельгомаснон инкса.
—Кодама сталмот савсть няемс ся пинкнень,—азонды Великай Отечественнай войнань и трудонь ветеранць Татьяна Степановна Назарова, кона тяни эряй Рузонь Баймакса. Ноябрень мани шиня сувань Назарофнень шири. Татьяна Степановна лямбоста васьфтемань. Аф ваномок кизонзон лангс, сон эрек, весяла и корхтафкшу.
Татьяна Степановна мекольцесь кафта браттнень и вете сазорхнень еткста. Тядянц мархта аляц кирдсть кафта тракст, ведраж, тувот, учат и несколька сараз. Сяс кудса тевда ульсь лама, сембе иттненди сатнесь, и Таняти тяфта жа.
1933 кизоня стирсь поступась тонафнема Кулишейскяй начальнай школав, конань шумордазе цебярь оценкаса. Эряфсь мольсь, ульсть арьсемат сай пингонди. Но семботь срафтозе-калафтозе войнась. Таняти ульсь 15 киза. Брадоц Иван аралась Родинать эса востокса. Пачкодемок куду, сон кулось получаф ранатнень эзда. Брадоц Степан юмась куляфтома Донбасть маласа. Аляц, Степан Иванович, империалистическяй войнань участниксь, кулось кудса. Татьяна Степановна мяляфтсы семботь. Лятфтазень васенце учителензон школаса. Надежда Николаевнать Од Усадста, Клавдия Никитичнань Рузаевкаста. Школать шумордамда меле, велень стирнясь, штоба лездомс тядянцты, кармась работама колхозса. Паксяса кочксесь розьбрят. Сяльде ушедсь тиендема сяда стака тефт. Колхозонь председательсь, няемок стирть старандаманц, путозе бригадиркс. Кизонда Татьяна Степановна стяшендсь атекшнень мархта. Кудонь тефнень тиемда меле,  етнезень сембе бригадань ломаттнень и азонкшнезе кодама работа тиема и мезе мархтост сявомс: пеелем, цянга, тарваз. Татьяна Степановна лац маштсь тишень капань марама. Тянди сельме кайсесть алятневок. Мзярда Кулишейка велесь сувась «Мир» совхозти, тостонь директорсь, Николай Андреевич Начаркин, тернезе Татьяна Степановнань капань марама Мордовско-Баймаковскяй и Од Усадскяй паксятнень лангса.
1946 кизоня Татьяна Степановна лиссь рьвакс фронтовикти Александр Дмитриевич Назаровонди. Мирдец пенсияс лисемозонза работась машина киса. Тяни сон аш шиса. Марса касфтсть вете итть.
Совестьс коре работаманкса Татьяна Степановна аф весть казентьф казнеса. Сидеста хозяйствать Почетонь доскаса ульсь сонь фотографияц. Кочксезь Од Усад велень Советонь и Рузаевскяй райсоветонь депутатокс. Сон ульсь соцсоревнованияса сяськикс.
Татьяна Степановна и пенсияс тумда меле работась «Мир» совхозса сисем кизот. Трудовой стажец—50 киза. Арьсетяма теенза шумбраши.
В.КУДАШКИН.
 

06.12.2012 №48

Новости

МОРДОВСКЯЙ ГОСУНИВЕРСИТЕТСА ПАНЧФ УЧЕБНО-НАУЧНАЙ ЛАБОРАТОРИЯ

2 апрельста Мордовиянь Оцюнясь В.Д.Волков ульсь Н.П.Огаревонь лемса      МГУ-са, коса ванозе лекарственнай средствань технологиянь учебно-научнай лабораториять и корхнесь од ученайхнень и студенттнень мархта.
Лекарственнай средствань технологиянь учебно-научнай лабораториясь панчфоль Физикань и химиянь институтть видеса 2019 кизоня университетть и «Биохимик» АО-ть марстонь вийса. Тянкса нолдафоль пцтай 4 миллиотт цалковай (фкя миллион цалковайсь—предприятиять). Лабораториясь козякофтф тяниень пингонь оборудованияса, кона максси возможность етафнемс аф аньцек учебнай занятият, но и фармацевтическяй субстанциятнень и анок лекарственнай форматнень технологияснон анокламанц коряс научнай исследованият. Лабораторияса студенттненди ули кода пяшкодемс лекарственнай препараттнень производстваснон действующай веществать синтезонц эзда сявомок анок продукцияти молемс. Лиякс мярьгомс, тевса варчсесазь университетса получаф содамошитнень.
11.04.2019   № 14
1 апрельста ушедсь 2019 кизоть омбоце пяленцты газетас и журналс сёрматфтомась

«Мокшень правдать» лувиензонды
Кельгома ялгат! 1 апрельста ушедсь 2019 кизоть омбоце пяленцты газетас и журналс, тяконь лувксса «Мокшень правда» родной кяльса-валса лисенди газетаньконди, сёрматфтомась.
Кафта кизода меле топоди 100 киза ёт кармась лисендема минь тинь мархтонт кельгома мокшень газетаньке. Сон лама лездсь эсь народонцты. Васенце номерстокиге лувихне газетать эзда няйсть пара ялга, тонафты, виень и содамошинь максси. Газетась лама тись национальнай культураньконь, кяленьконь кеподемаса-виияфтомаса, эсь лацонь коеньконь ванфтомаса, народоньконь духовнай козяшинзон азондомаса.
И тянивок сон эсь васень задачанц няйсы сянь эзда, штоба лездомс тейнек, мокшетненди, ванфтомс и виияфнемс родной кяленьконь, культураньконь, касфнемс национальнай самосознанияньконь и гордостеньконь.
11.04.2019   № 14
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин