Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 
Религия

ТЯНЬ СОДАСЫ АНЬЦЕК ШКАЙСЬ!

Мзярда Масторти сай пе?
Мекольдень пингть лама корхтави ся шить колга, мзярда Масторти сай пе. Пцтай эрь кизоня тя или тона «предсказательть» валонзон коряс, ломаттне тага ушеткшнихть, кие кода машты, аноклама тя равжа шити. Вов и тянивок эвфнесамазь 21 декабрть мархта. Кирдемок тянь мяльса, «Мокшень правдать» корреспондентоц аф кунара васьфнесь Саранскяень Епархиять секретаренц протоиерейть Виктор Хохловонь мархта и эняльдсь отвечамс кизефксонзон лангс.
—Отец Виктор, лама корхтави тяддень 21 декабрть колга. Кле, тя шиня Масторти сай пе. Кода тянь лангс ваны церькавсь? Тя шава корхнемат или ули мезень лангса арьсемс?
 —Тяфтама  корхнемань нолямась кинди-бди канды эсь лацонь выгода. Тяфтама клят-млят пцтай эрь кизоня улендихть и синь ламода «шарфнесазь» ломаттнень еньцнон. «Модалангонь эряфть пец» аф сашенды, и ломаттне лотксихть пелемда тя шить эзда. Но ламоцне эряйхть фкя шиса, синь аф арьсихть вандыть колга, аф сявондьсазь прязост, што мзярдовок сави тумс тонашити. Синь ули эсь лацонь девизсна—«сявк эряфть эзда семботь». Минь аф арьсетяма, што модать лангса эряфсь максф сянди, штоба анокламс пря лия—пефтома эряфти.
—Мезе азолеть ломаттненди, конат афкукс аноклайхть 21 декабрень эсь лацонь «событияти»?
—Аф кунара улень фкя ошса, коса ломаттне пингта инголе занцихть, рамсихть  тя шити вастт ресторанца. Кле, ерасаськ васьфтемс тя событиять козяста, гуляндазь. Арьсихть, кода васьфтьсазь «мазыста», стане и кармай эряма ваймосна сяда тов. Лиятне рамсихть бункерхт, аноклайхть штатолхт, ярхцамбяль. Кизефкс: мезенди, кинди синь анокласазь тянь? Кда ся шиня масторти афкукс сай пе, мезенди тя эрявксты? Иисусть омбоце саманцты аноклама лиякс: сиденяста якама церькаву, каендама, озондома. Аф тиема сяда лама и сяда стака грех. Вдь кажнайть сонцень эряфоц и сонцень тевонза. И отвечай Шкайть инголе кажнайсь сонць. А сятненди, кит теждя-ста васькафтовихть шава кулянь ноляйхненди, мярьголень сиденяста якамс прьхчещандафтома, маласькофтомс ваймоснон Шкайти.
—Пади, улихть арьсемат сянь колга, мзярда, кодама шиня, кизоня сай Суднай шись?
—Арьсемат сянь колга, мзярда сай Суднай шись аш. Иисус Апостолонзонды азозе, што кармай Сонь омбоце самац. А мзярда тя ули—тянь аф содасазь нльне Ангелхневок. Иисус Христоссь корхтась аньцек сянь колга, мезе кармай масторть лангса Суднай шинь карша:  войнат, катаклизмат, коське и вачашинь кизот. Шяйтанть аф мялезонза, мзярда ломаттне эряйхть мирса, фкя-фкянь кельгозь, эсь еткова ладязь. Сон сялонтфтсыне мала ломаттнень, ялгатнень. Да месть корхтамс, нльне странатнень. Сяс фалу озондома Шкайти, штоба Сон афоль нолда ваймозонк кяж. Кальдяв тевоньконь мархта сядонга маласькофтсаськ Суднай шить, а цебярь тевоньконь мархта—меколанкт. Эрь пара тевсь «аралай» эсонк. Шкайсь кельгсамазь минь—ломаттнень, сяс макссь тейнек пинге кадомс кальдявть. Сон учи, мзярда полафттама цебярь шири. Кит сят ломаттне, конат сявихть эсь лангозост тяфтама ответственность: азондомс ся шить афкуксонь датанц? Кодама синь вийсна Шкайть инголе? Синь аф кулхцондомат.
—Спасиба.
И.ПЯТИНА.

20.12.2012 №50

Новости

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019   № 42
Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019   № 42
МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019   №
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин