Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930
Мокшане о мокшанах

КЕЛЬГСАЗЬ ИТТНЕ

Т.М.Кабанова лама киза рузонь кялень и литературань учителель Атюрьевскяй райононь Перевесье велень средняй школаса. Сонь кельгозь иттне и родительхне. Учитель ялганза лятфнихть колганза аньцек шнама валса.
Татьяна Михайловна семьянц мархта эряй Курташкаса. Лама пинге сашендовсь якамс шабра вели. Тяни учительть сявозь работама Курташка велень средняй школав, коса сон вяти мокшень кялень и литературань, рузонь кялень и литературань урокт. Од коллективса тевонза молихть аф кальдявста. Тянь лац няфтезе Курташкань средняй школаса етафтф мокшень кялень и литературань учительхнень районнай семинарсна. Татьяна Михайловна панжада уроконц лемдезе мокшэрзянь поэзияти. Кайгсть А.П.Тяпаевонь, Р.К.Орловать, А.С.Малькинонь, С.В.Кинякинонь, В.И. Нестеровонь, В.М.Лобановонь и лиятнень стихсна. Т.М.Кабановать урокоц етась пяк мялень салайста.
Школать дирекцияц азсь учительть колга аньцек шнама валхт.
—Татьяна Михайловна цебярь учитель, класснай руководитель,—мярьгсь аф класснай работать коряс завучсь Н.А. Пиксаева.
Татьяна Михайловнань кельгома поэтоц Р.К.Орлова. Аф стак сонь тернезь Курташкань средняй школань коллективть мархта васьфтема. Тя оцю илась мокшень кялень и литературань тонафтыти мяляфтови ламос.
И.СИДОРОВ.
Снимкаса:
Т.М.Кабанова поэтть Р.К.Орловать мархта.

20.12.2012 №50

Новости

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019   № 24
Минь поздравленияньке

Малаткшни Юбилейцень мархта, Геннадий Александрович!
Корхнихть, што ломанть эряфоц унксневи аф сяшкава кизоса, кода тевса, сянь мархта, мезе сон тись.
Вов ни 20 киза Старошайговскяй районть эряфса сембе  пара ушетксне, цебярь сатфксне сотфт Г.А.Мухинонь лемонц мархта. Нят ульсть пяк аф теждя кизот. Геннадий Александровичень самозонза районть колга корхнесть кода фталу  ляткшниень квалма. Валом-валом районць кармась лисендема касомань-вииямань кить лангс.
Пингсь и эряфсь няфтезь: Геннадий Александрович Мухинонь лангс ули кода надиямс. Сон цебярь руководитель, принципиальнай, еню и тевонь лац содай руководитель. Кельгсы дисциплинать и сембоса порядкать, седиец фалу панжада ломаттненди. Парста шарьхкодьсыне тячиень стакатнень-сталмотнень и лац няйсыне синь эздост лисемань китнень, перспективать.
13.06.2019   № 23
«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019   № 22
Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019   № 22
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин