Поиск по сайту: 
 

Архив
 апрель 
 2019 
пн вт ср чт пт сб вс
1234567
891011121314
15161718192021
22232425262728
2930     
Ветеранам о ветеранах

ГЕНЕРАЛТИ БОЛДИНОНДИ— 120 КИЗА

Армиянь генералть И.В.Болдинонь, Советскяй Союзонь Геройть боевой кинц колга можна лувомс Великай Отечественнай войнать колга справочникнень, энциклопедиятнень эзда.
Иван Васильевич Болдин шачсь 1892-це кизоня Инсар-скяй уездса Высокое велеса сокаень-видиень семьяса. 1917-це кизоня Великай Октябрьскяй революцияда, Советонь властень кемокстамда меле Иван Васильевичень кучезь Пензенскяй губернияв. Сонь кочказь Инсарскяй уездонь исполкомонь председателькс, а сяда меле етафтозь Пензенскяй губисполкомонь Председателень заместителькс. Гражданскяй войнать пингста Пензенскяй партиянь губкомсь кучезе Иван Васильевич Болдинонь РККА-в.   1919-це кизоня октябрьста Иван Васильевич тюрсь Юденичень каршес. Эста сон ульсь ротань батальононь командиркс.
1920-це кизоня кемокстафоль 6-це стрелковай дивизиянь 52-це стрелковай полконь командиркс. 1925 кизоня аделазень «Выстрел» высшай стрелковай школань курснень.
Тоса тонафнесь и земляконьке Максим Алексеевич Пуркаев. Тонафнема пингть синь арасть ялгакс и воявасть Колчаконь и Юденичень каршес. Войнада ингольдень кизоня Иван Васильевич Болдин тонафнесь М.В.Фрунзень лемса Военнай академияса. А мзярда ушедсь Великай Отечественнай войнась, Иван Васильевич Болдин кемокстафоль Западнай фронтонь командующайти заместителькс. 1941 кизоня ноябрь ковста аралафоль Тула ошсь. Эста сон ульсь 50-це армиянь войскатненди командующайкс.
Иван Васильевич Болдин няфтезе прянц тевонь содай полководецокс. 50-це армиясь тапазень фашисттнень Тулать маласта. Сяльде Калугань и Зайцевонь Пандть воляс нолямста виень аф ужяльдезь тюрсть немецнень мархта.
Меле 50-це армиясь и Брянскяй фронтть мархта воляс нолязь Белоруссиянь велетнень и ошнень. Аф лама пингста пачкодсть Восточнай Пруссияв. Стака бойхть мольфтсть Кенигсбергть сявомста.
Войнада меле Иван Васильевич Болдин лама киза работась Украинскяй 3-це фронтонь командующайти заместителькс, меле—Восточно-Сибирскяй военнай округонь войскатнень лангса оцюнякс, Киевонь военнай округонь командующайти заместителькс.
1965-це кизоня Иван Васильевич Болдин кулось. Сонь калмазь Киевса. Отважнай командирть лемоц аф юкстави мзярдовок. Минь, мокшэрзятне, марятама гордость генералть Иван Васильевич Болдинонь инкса.

20.12.2012 №50

Новости

МОРДОВСКЯЙ ГОСУНИВЕРСИТЕТСА ПАНЧФ УЧЕБНО-НАУЧНАЙ ЛАБОРАТОРИЯ

2 апрельста Мордовиянь Оцюнясь В.Д.Волков ульсь Н.П.Огаревонь лемса      МГУ-са, коса ванозе лекарственнай средствань технологиянь учебно-научнай лабораториять и корхнесь од ученайхнень и студенттнень мархта.
Лекарственнай средствань технологиянь учебно-научнай лабораториясь панчфоль Физикань и химиянь институтть видеса 2019 кизоня университетть и «Биохимик» АО-ть марстонь вийса. Тянкса нолдафоль пцтай 4 миллиотт цалковай (фкя миллион цалковайсь—предприятиять). Лабораториясь козякофтф тяниень пингонь оборудованияса, кона максси возможность етафнемс аф аньцек учебнай занятият, но и фармацевтическяй субстанциятнень и анок лекарственнай форматнень технологияснон анокламанц коряс научнай исследованият. Лабораторияса студенттненди ули кода пяшкодемс лекарственнай препараттнень производстваснон действующай веществать синтезонц эзда сявомок анок продукцияти молемс. Лиякс мярьгомс, тевса варчсесазь университетса получаф содамошитнень.
11.04.2019   № 14
1 апрельста ушедсь 2019 кизоть омбоце пяленцты газетас и журналс сёрматфтомась

«Мокшень правдать» лувиензонды
Кельгома ялгат! 1 апрельста ушедсь 2019 кизоть омбоце пяленцты газетас и журналс, тяконь лувксса «Мокшень правда» родной кяльса-валса лисенди газетаньконди, сёрматфтомась.
Кафта кизода меле топоди 100 киза ёт кармась лисендема минь тинь мархтонт кельгома мокшень газетаньке. Сон лама лездсь эсь народонцты. Васенце номерстокиге лувихне газетать эзда няйсть пара ялга, тонафты, виень и содамошинь максси. Газетась лама тись национальнай культураньконь, кяленьконь кеподемаса-виияфтомаса, эсь лацонь коеньконь ванфтомаса, народоньконь духовнай козяшинзон азондомаса.
И тянивок сон эсь васень задачанц няйсы сянь эзда, штоба лездомс тейнек, мокшетненди, ванфтомс и виияфнемс родной кяленьконь, культураньконь, касфнемс национальнай самосознанияньконь и гордостеньконь.
11.04.2019   № 14
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин