Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930
АПК

ТЯЛОТИ АНОКТ

Аньцек крестьяттне содасазь, мзяра труд и вий эряви путомс, штоба шраньконь мазоптолезе танцти копшась.
Аф кунара васьфнень «ВКМ Сельхозпродукт» ЗАО-нь главнай агрономть Ринат Юнирович Арюковонь мархта и эняльдень азондомс хозяйствань земледелецнень тяддень сатфкс-снон колга.
Кода азозе главнай агрономсь, сембоц мельгаст 13489 гектар мода, эздост соксеви 10140 гектарсь, сера витцеви 5275 гектар лангса, 3700 гектарсь заняф кормовой культураса.
Планц коре арьсефоль получамс 30 центнер сера гектарста, получаф 23,6 центнер. Сембоц получаф 11790 тонна, а планц коре эрявсь сявомс 15700 тонна. Хозяйствань руководительть валонзон коряс, тяфта лиссь сяс, мес мелянь тялоть ашезь ванфтов 630 гектар озимой культура. Туфталсь—кувака и кельме тундась. Но хозяйстваса сембе тундань паксянь тефне тифтольхть эсь пингстонза. Техникась аноклафоль, кондиционнай видьмода ульсь сатомшка, минеральнай удобренияда ускфоль аф кржа.
Коллективса работайхть квалифицированнай механизаторхт. Кизонь паксянь тевса пример няфтсть механизаторхне Михаил Матвеевич Киреев, Геннадий Дмитриевич Мезин, Михаил Александрович Чаплюков и лиятне. Серонь видемста совестьс коре трудендасть МТЗ-1221 тракторса Александр Семенович Чуваткин. Сон планца арьсефть пяшкотькшнезе 150-160 процентс. Главнай экономистсь Лидия Михайловна Ключниковась   башка шнама валхт азсь механизаторхнень Сергей Николаевич Александринонь и Анатолий Кузьмич Милкинонь квалма. Тишень урядамста синь работасть шобдаваста илядьс. Хозяйстваса эрь жуватати аноклаф 42,8 центнер кормовой единица. А инголи, 80-це кизотнень, тя цифрась ульсь лия—10-12 центнер. Сянкса тялонда кормась ашезь сатне, а тише траксне ефси ашесть няенде.
Тялоти хозяйстваса аноклаф 1524 тонна тише, 13461 тонна сенаж, 9000 тонна силос, 3620 тонна шужярь. Озимойда видеф 2320 гектар, мезсь сяда кржа арьсефть коряс.
«ВКМ-сельхозпродукт»    ЗАО-сь тядде видесь стрелецкяй модаса 700 гектар яровой культура и 1300 гектарсь—«ваймафтомс». Сай пингть хозяйствась арьси нолдамс тевс Т.Пишлянь, Пайгармань и Хованщинань велетнень модаснон.
Серонь урядамста эрь шиня паксяв лисендсть 10 комбайнат. Васенце вастть, кода азозе главнай экономистсь Лидия Михайловна, сатозе комбайнерсь Сергей Владимирович Русскин, помощниксь—Геннадий Владимирович Бояров.
Оцю лезкс хозяйствати макссть студенттне. Эздост 13 ломанель. Синь примасть участия сембе паксянь тефнень эса. Башка эряви лоткамс тракторнай бригадать работанц лангс, коса бригадиркс Степан Андреевич Жидков.
Главнай бухгалтерть заместителец Надежда Николаевна Мезина вяти бухучет паксянь тефнень мельге. Сон, коса афоль работа, фалу няфни пример лиятненди. Трудовой стажец 40 кизоть малава.
 
В.Кудашкин,
Рузаевскяй районць.
Снимкаса: тракторнай бригадань бригадирсь С.А.Жидков.

20.12.2012 №50

Новости

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019   № 24
Минь поздравленияньке

Малаткшни Юбилейцень мархта, Геннадий Александрович!
Корхнихть, што ломанть эряфоц унксневи аф сяшкава кизоса, кода тевса, сянь мархта, мезе сон тись.
Вов ни 20 киза Старошайговскяй районть эряфса сембе  пара ушетксне, цебярь сатфксне сотфт Г.А.Мухинонь лемонц мархта. Нят ульсть пяк аф теждя кизот. Геннадий Александровичень самозонза районть колга корхнесть кода фталу  ляткшниень квалма. Валом-валом районць кармась лисендема касомань-вииямань кить лангс.
Пингсь и эряфсь няфтезь: Геннадий Александрович Мухинонь лангс ули кода надиямс. Сон цебярь руководитель, принципиальнай, еню и тевонь лац содай руководитель. Кельгсы дисциплинать и сембоса порядкать, седиец фалу панжада ломаттненди. Парста шарьхкодьсыне тячиень стакатнень-сталмотнень и лац няйсыне синь эздост лисемань китнень, перспективать.
13.06.2019   № 23
«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019   № 22
Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019   № 22
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин