Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930
Ветеранам о ветеранах

Москуть инкса 1941 кизонь тюремать годовщинанцты

МЕКОЛЬЦЕ ПОДОЛЬСКЯЙ КУРСАНТТЬ КОЛГА ЛЯТФНЕМБЯЛЕНДИ
Аф кунара топодсь 71 киза Москуть инкса тюремати. Гитлеровскяй армиясь, кона вяри прянь кандозь сяськома мархта етась марнек Европава, тяса васенцеда сяськфоль сонць. Москуть маласа немецнень наступленияснон ульсь политическяй и социально-психологическяй оцю смузец. Сон инголдазе Германиять ширес войнати Япониять и Турциять сувамаснон.
Историяса лиссь стане, што столицаньконь оборонанц инь критическяй пингстонза (мзярс ашесть малада Дальняй Востокста и Сибирьста резервнай армиятне) бойти тревогас коре сувасть подольскяй военнай кафта училищань курсанттне-новобранецне. Кафта ковда кржас синь етнезь военнай подготовкать. Теест савсь ушедомс боевой действиятнень учебнай сире оружияса. Но вакссост ульсть тевонь содай командирхт—училищань преподавательхть, конат тевс нолязь тактикать, синь кафта недяляда ламос кирнезь гитлеровецнень моторизированнай армадаснон. Синь честь мархта пяшкодезь Верховнай Главнокомандованиять мархта путф задачать. Ламотне максозь тянкса эряфснон.
Курсанттнень еткса ульсть Мордовскяй госпединститутонь оцю курсонь ингольдень  студенттне. Синь тиезь васенце (особай) батальонть, няфтемок аф пелемаснон противникть окопонзон эса рукопашнай тюремать вельде. Батальонцта шиса лядсь аньцек несколька ломань.
2012 кизонь 24 августста Саранскяйса стакаста сярядемда меле кулось легендарнай подольскяй мекольце курсантсь—отставкаса гвардиянь подполковниксь Евгений Дмитриевич Фролов. Теенза ульсь 92 киза.
Нюрьхкяня биографическяй справка. Е.Д.Фролов шачсь 1920 кизонь 11 августста Саранскяйса служащаень семьяса. Мяль салси ся, што семьясост поколенияста поколенияс етнесь военно-патриотическяй тевсь. Аляц, Дмитрий Ильич Фролов, нинге 1917 кизонь революцияда инголе служась рядовой матросокс Балтийскяй флотса. 1915 кизоня боевой крейсерса Императорть Николай II и сонь рьванц Александра Фёдоровнань ингольде теенза максфоль старшай командирть араламста аф пелемань няфтеманкса Георгиевскяй Крёз. Сонь лемоц серматф золотань букваса Москувонь Кремлять Георгиевскяй залсонза колоннатнень эзда фкаса. Строевой выправканц мархта од моряксь пяк тусь царствующай особатнень мяльс (ваность 1915 кизонь фототь).
Е.Д.Фролов васенце шабасель лама идень семьяса. Шумордазе Саранскяйса средняй школать и поступась пединститутть историческяй факультетозонза. Улемок цебярь спортсменкс и комсомольскяй активистокс, тяштсь заявления Краснай Армияв войнань васенце шитнень, но ашезень кенере максомс выпускной экзаметтнень. Нюрьхкяня военнай сборда меле Саранск ошть маласа военнай лагерьса (Нижняй Вирть районца—тяни Юго-Запад), ингольдень студенттнень мархта марса кучфоль Москуть алу Подольскяй пехотнай училищав (ваность 1941 кизонь фототь).
Сексень бойхнень шумордамдост меле нолдафоль Верховнай Главнокомандующайть И.В. Сталинонь Приказонц мархта кафта ковс отпускс, штоба Саранскяйса экстерна шумордалезе пединститутса тонафнеманц. Сяльде мрдась военнай училищав, конань курокста аделазе, получась офицеронь звания и тага кучфоль фронту.
Войнать аделамс Е.Д.Фроловонди савсь етамс лама вайгяльбе Второй Белорусскяй фронтть лувксса Белоруссиява, Польшава, Германиява. Шумордазе войнать Балтийскяй морять маласа Даниять границанзон видеса. Казьф Отечественнай войнань колма орденца и комозьда лама медальса.
Сяльде, кода разведкань еню офицер, кучфоль тонафнема Москуву Военно-дипломатическяй академияв, конань цебярь сатфкс мархта шумордазе кафта кизоста. Киза работась Польшаса дипломатическяй корпусса. Семьять мархта сотф туфталхнень инкса етафтфоль Россияв (СССР-у). 5 кизот служась Забайкальскяй военнай округса.
1953 кизоня демобилизовандавсь и мрдась родиназонза. Работась Саранскяйса Трудовой Резервонь Управлениянь начальниконь заместителькс, 17№ средняй школань директоркс, «Электровыпрямитель» заводса техническяй обучениянь отделонь начальникокс. Пенсионнай кизоса пуроптозе заводть видеса Боевой и трудовой славань музейть, коса заведующаель. Несколька киза работась 21№ профессиональнай лицейса.
Профессиональнай тевонзон мархта ряцок фалу вятсь общественнай оцю работа. Пцтай комсь киза Участковай избирательнай комиссиянь председателель. Сувсесь заводонь и ошень ВОВ-нь ветеранонь Советонь руководящай составти. Ламоксть васьфнесь школань, училищань тонафнихнень и университетонь студенттнень мархта и корхнесь мархтост военно-патриотическяй темас. Казьф ламоц правительственнай грамотаса и памятнай знакса.
Е.Д.Фроловонь войнать квалма лятфнеманза аф весть лисендсть республиканскяй и заводской газетатнень эса. 2005 кизоня сонь статьяц занязе колмоце вастть военнай темас   конкурсса, кона ульсь «Саранский курьер» газетаса. Тячи макссаськ разнай кизонь статьянзон эзда пакшнень. Теест поладови «Курсанттнень боевой действиянь районцна» картась, конань тиезе сонць ветеранць. Фотографиятненди и картати компьютерть вельде реставрация тись инженерсь Л.А.Куликов.
«Минь главнай задачаньке и надияма вастоньке ня шитнень и часттнень—Подольскяй училищатне…»
К.Телегин,
Московскяй военнай округонь Военнай Советонь членць.
Юмафтомок лама ломань Смоленскяй сраженияса, 15 сентябрьста немецне аф лама пингс лоткафтозь наступленияснон, штоба пяшкодемс «Центр» группань армиятнень од частьса и боевой техникаса.
Мзярда немецнень корязонк нилексть сяда оцюволь пехотасна, котоксть-кафксоксть—артиллериясна, кемгафтувоксть сяда ламоль самолеттост, сентябрть песта командованиясна тись «Тайфун» кодовай лем ала вии, оцю наступления Вязьмать и Брянскть маласа. Оборонаньке сязьфоль фронтть коряс 500 вайгяльбеда, окруженияс повсть колма армияньке. Лама кемотть тежянь солдат и офицер шавовсть веры тюрематнень эса, а 600 тежянць повсть пленц.
Москуву кись панчфоль. Основной бойхне вятевсть столицать маласа—Волоколамскяй, Можайскяй и Малоярославецкяй направлениява. Авиационнай разведканьконь даннаензон коряс, немецкяй танкань и мотопехотань колоннась, конань кувалмоцоль 25 вайгяльбе, шаштсь Волоколамскяй шоссева. Сон пцтай ни маладсь Юхнов ошти. Положениясь пяк стакаль.
Вязьмать и Брянскть маласа войсканьконь пораженияснон инкса советскяй командованиять ашельхть сатомшка виенза и средстванза, штоба лоткафтомс противникть од наступлениянц. Востокста резерватне нинге ашесть пачкоде. Тя критическяй пингоня Верховнай Главнокомандующайсь И.В.Сталин макссь приказ мезе ули вийса кирдемс противникть наступлениянц хуш недяляс, мзярс аф сай Ставкань резервсь.
Малоярославецкяй направленияса тянь эрявсь тиемс Подольскяй пехотнай и артиллерийскяй училищатнень студентснонды. Сай пингонь од офицерхненди, конат аньцек ушедозь военнай тевти тонафнемаснон, эрявсь васьфтемс врагть рядовой боецокс.
…5 октябрьста 15 частть малава Московскяй военнай округонь штабста получафоль приказ: тяникиге тревогас коре кеподемс фкя ротать и кучемс сонь передовой отряд лаца Подольск—Малоярославец—Медынь—Юхнов маршрутть коряс тяфтама задача мархта: маладомс противникти и тюремс мархтонза, мзярс оборонать аф сявсазь Ильинскяй военнай училищатне.
Отрядсь озафтфоль машинава и эстокиге тусь противникть каршес. Подольск ошста лисемста теенза поладсь артиллерий-скяй училищань дивизион.
Сяка шиня илять передовой отрядсь пачкодсь Изверь ляйть восточнай берякозонза. Нинге тоса ульсь авиадесантниконьконь группасна, конат потасть Юхновть эзда (ваность картать: «Курсанттнень оборонаснон васенце линиясна»).
6 октябрьста 6 частста шобдава курсанттне и десантникне артдивизионть лезксонц вельде етасть наступленияс, ердамок гитлеровецнень Угра ляйть фталу. Гитлеровецне кадсть боень паксяса 300 ломань и палф 5 танкат. Но тя рубежса ашесть ляда и потасть Изверь ляйть фталу.
6-11 октябрьста передовой отрядсь тюрсь противникнень мархта. Отрядсь лиссь Ильинскяй рубежти, пяшкодемок инголенза путф задачать (ваность картать: «Курсанттнень оборонаснон омбоце (основной) линиясна»).
Мзярс передовой отрядсь мольфтсь сдерживающай тюремат, Ильинскяй рубежса мусть васта Подольскяй пехотнай и артиллерийскяй училищатнень основной вийсна. 12 октябрьста тосовок ушедсть стака тюремат. Противниксь ерась сяземс оборонаньконь, сяс панчсь даволкс ащи артиллерийскяй тол марнек фронтса. Кожфста бомбат ерясь авиациясь, фронтста атакас мольсть танкатне и самоходкатне. Минь ульсть аньцек винтовканьке и гранатаньке, пулеметоньке и теждя минометоньке. Немецнень коряс сяда кржаль пушкадонк.Самолетоньке ашельхть ефси.
Тюремась мольсь 14, 15, 16 и 17 октябрьста. Авиациянь артобстрелть и бомбардировкатнень инкса педа-пес срафтфтольхть-калафтфтольхть противотанковай укрепленияньке, доттнень ламошкасна. Курсанттнень вийсна пцтай маштсь. Тя пингть армиянь Подольскяй пехотнай училищань начальниксь, генералсь Смирнов, кона ульсь боевой действиянь руководителькс, нолдазе тюремати мекольце резервонц—капитанть Чернышень командованиянц ала 1-це батальононь кафта ротатнень. Батальонть лувксса ульсть Саранскяйста, Мордовскяй пединститутста цератне. Тя институтонь студентокс улень монга. Курсанттне эцесть противникть боевой порядказост, штыкса, гранатаса, прикладса машфтсть 150 гитлеровец, кирдсть фашистскяй сисем атакат, пачкотькшнесть мянь рукопашнай тюремати. Васенце батальонцта ашезь ляда кивок.
Курсанттне кирдсть куломозост. Инголи моли немецкяй армиять сяда тов шаштомац лоткафтфоль. Приказть коряс, курсанттненди эрявсь кирдемс недяля, синь кирдсть кафта недялят.
Кода содавсь меле, немецкяй фельдмаршалсь, кона руководителель Москуть ала наступательнай операцияти, ся пингть кяждонза кафксть тяшнесь картать лангс: «Zwei Offiziersсhule»  («Офицерскяй кафта школат»). Мяленьконь курокста азозень младшай политруксь Клочков, кона тюрсь боецонь группаса Волоколамскяй шоссеса: «Россиясь великай, а потамс аш коза. Фталонк Москусь!»
Няемок кемошиньконь, фашисттне ерасть мархтонк работамс пропагандистскяй метоттнень вельде. Несколькаксть самолетста ерясть листовкат, конатнень эса лемнемазь «доблестнай якстерь юнкеркс», мярьгондсть максомс пря (сдаться), надияфнесть ванфтомс эряфоньконь, лац примамс, но курсанттнень еткса ашезь мув фкявок предатель.
18 октябрьста содафоль, што немецне етасть курсанттнень позицияснон вакска Калужскяй направленияса и занязь Малоярославецть. Минь тылсолеме. Да и вийхть ашельхть ни. Эрявсь потамс 43 армиянь командующайть приказонц коряс.
19-20 октябрьста веть курсантонь Ильинскяй группась шаштсь Варшавскяй шоссеть эзда сяда севернайста 43 армиянь частьтнень мархта соединениянди, конат маладсть и занязь оборонать Нара ляйса. Бойста эздонк лиссь 600-700 ломань—тя сембе, мезе лядсь Подольскяй училищатнень 2000 курсантснон эзда (ваность картать: «Курсанттнень оборонаснон колмоце линияц»).
Задачась, кона путфоль инголенк—любой питнеса кирдемс противникть, мзярс аф сайхть Главнокомандующайть Ставканц резервонза—честь мархта пяшкотьфоль училищатнень курсантснон эряфснон вельде.
Подольскяй курсанттнень подвигснонды максфоль оцю оценка маршалть Г.К.Жуковонь и лия военачальникнень мемуарснон эса. Артиллериянь маршалсь Ю.П.Казаков сермадсь, што Подольскяй пехотнай и артиллерийскяй училищатнень курсантсна няфтезь «кемошиснон, отвагаснон и врагть пиксома маштомошиснон».
Подольскяй курсанттненди лемтьфт стихт и морот, кафта кинофильмат. Лемснон каннесазь Москуса и Подольск ошса ульцятне. Ладяфт памятникт Подольскяйса и боевой действиянь рубешнень эса. Тоса жа  пуроптф  «Ильинские рубежи» музейсь, конань эса няфтьфт курсанттнень боевой действиясна.
Отмечамок Саранскяень цератнень героическяй действияснон Московскяй сраженияса, ладяф Лятфнембялень знак Мордовиять столицаса Саранск ошть Юго-Западнай районцонза, лицевой ширесонза золотань букваса тяштьф: «Подольскяй курсанттнень честьс, конат геройкс аралазь Москуть 1941 кизонь октябрьста». Панжемс Лятфнембялень знакть мярькфоль тейне Подольскяй пехотнай училищань ингольдень лия курсантть—Георгий Иванович Васильевонь мархта. Панжемстонза ульсть Мордовиянь, Саранскяень и тя ошень райононь руководительхне.
Войнать аделавомс тейне савсь етамс нинге лама вайгяльбе Белоруссиянь, Польшань, Германиянь военнай китнень эзга и шумордамс войнать Балтийскяй морять видеса Даниять границанзон маласа.
Боевой действиятнень пингста тейне савсь няемс и кирдемс аф кржа критическяй ситуация. Но Московскяй битвась лядсь мялямозон сембе пингс. Сон ульсь тейне аф аньцек васенце «кстиндамакс», но и сембода трагическяйкс и главнайсь—ответственнай тюремакс, сяс мес тянь эзда ащесь Родинаньконь седиенц—Москуть судьбац.
Е.Д.Фроловонь лятфнеманзон эзда.
(Материалть аноклазе Д.Е.Фролов, 10.12.2012).

10.01.2013 №1

Новости

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019   № 24
Минь поздравленияньке

Малаткшни Юбилейцень мархта, Геннадий Александрович!
Корхнихть, што ломанть эряфоц унксневи аф сяшкава кизоса, кода тевса, сянь мархта, мезе сон тись.
Вов ни 20 киза Старошайговскяй районть эряфса сембе  пара ушетксне, цебярь сатфксне сотфт Г.А.Мухинонь лемонц мархта. Нят ульсть пяк аф теждя кизот. Геннадий Александровичень самозонза районть колга корхнесть кода фталу  ляткшниень квалма. Валом-валом районць кармась лисендема касомань-вииямань кить лангс.
Пингсь и эряфсь няфтезь: Геннадий Александрович Мухинонь лангс ули кода надиямс. Сон цебярь руководитель, принципиальнай, еню и тевонь лац содай руководитель. Кельгсы дисциплинать и сембоса порядкать, седиец фалу панжада ломаттненди. Парста шарьхкодьсыне тячиень стакатнень-сталмотнень и лац няйсыне синь эздост лисемань китнень, перспективать.
13.06.2019   № 23
«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019   № 22
Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019   № 22
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин