Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  
Наука и жизнь

СЛУЖАСЬ ЭСЬ НАРОДОНЦТЫ

Сире Шайгав велеса шачсь-кассь лама талантливай ломаньда. Лиякс мярьгомс, ули тяса кинь мархта шнафтомс пря, ули кинь инкса марямс гордость.
Тячи минь нюрьхкяняста азонттама эздост фкять—мокшэрзянь содаф ученайть, педагогть, общественнай деятельть, Великай Отечественнай войнань участникть Тимофей Васильевич Попковонь колга, конанди ня шитнень топодель 90 киза.
Т.В.Попков шачсь Сире Шайгав велеса 1923 кизоня, а кизода меле родителенза етасть эряма Старошайговскяй райононь Краснай Поляна поселкав. Тяса эрясь 1941 кизоть самс. Тонафнесь начальнай школаса. 1934 кизоня Попкофнень семьяснон сатозе оцю зиян—кулось алясна. Тядянцка кальдяволь  шумбрашиц. Сяс сяда тов тонафнемс изь сав.
1937 кизоня Тимофей тусь Москуву, коса работась ученикокс-маляркс. Но эряфонь условиятне пяк стакатольхть и савсь мрдамс шачема шири и кармась тонафнема школаса.
Школать аделазе отличия мархта и 1940 кизоня кучфоль работама учителькс тяка райононь Новотеризморгскяй начальнай школав.
Но сонь мялецоль улемс Краснай Армиянь офицеркс. Ся кизотнень ламоц од ломаттне ерасть улемс военнайкс, аралакшнемс Родинать вракнень эзда. Тимофей Попков ерась тиемс стане жа. И 1941 кизоня Великай Отечественнай войнать ушедомда инголе поступась тонафнема С.М.Кировонь лемса Киевскяй 1-це Краснознаменнай артиллерийскяй училищав. Тяса васьфтезе войнать. Кевейхксые кизоса сон офицероль ни, пушкань командироль. Пушкань снарядонза прашендсть и сязендевсть страназонк эци фашисттнень лангс 1942 кизоста сявомок 1944 кизонь ноябрти—стакаста ранендавомозонза. А ранендафоль Будапештть инкса тюремста. Сязевсь пильгоц. Пчксесь Тимофей пцтай киза.
Великай Отечественнай войнаса эряфонь аф ужяльдезь тюреманкса казьфоль Якстерь звездань, Отечественнай войнань I степенень, Отечественнай войнань II степенень орденца, «За отвагу» медальса.
1945 кизоня, куду мрдамдонза меле, Тимофей Попков эстокиге кярьмодсь сяда тов тонафнемати—арась Мордовскяй госпединститутонь студентокс. Аф теждяль инвалидти, но ингольдень фронтовиксь 1949 кизоня институтть аделазе отличнайста. Церать кадозь марксизмань-ленинизмань основань кафедрав ассистентокс, а сяльде, 1953 кизоня, шоворсь преподавательхнень еткс. Меле институтсь арась университетокс.
Байдек лангса нежетькшнезь (фкя пильгоц протезоль) сувсесь аудиторияв и студент-тне оцю мяльса кулхцонкшнезь лекциянзон. Сон ульсь педагогонь оцю асу мархта ломанькс. Теенза васенцетнень эзда фкяти максфоль «РСФСР-нь высшай школань отличник» знак.
Сяка кизотнень Тимофей Васильевич лац аделазе аспирантурать и Ленинградса А.И.Герценонь лемса пединститутса аралась историческяй наукань кандидатонь диссертация. 1965 кизонь 1 мартста Т.В.Попковонди максфоль доцентонь лем. 1966 кизоста сявомок 1970 кизоти ульсь историко-филологическяй факультетонь деканкс.
Т.В.Попков, кода ученай, оцю мяль шарфнесь од ломаттнень, национальнай политикань проблематнень лангс. Тя научнай аспекттнень коряс сермадсь аф кржа работа. Синь тянемс эрявкснихть и ашезь юмафта эсь актуальностьснон.
Т.В.Попков вятсь оцю научно-педагогическяй работа, мушендсь пинге и общественнай тевонди. Сон аф весть кочксевсь Саранск ошень Советонь депутатокс, РСФСР-нь «Знание» обществань правлениянь членкс. Вятсь партийнай работа.
Кулось Тимофей Васильевич Попков 1999 кизонь 1 январьста.

23.05.2013 №20

Новости

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

20 октябрьста Саранскяйса Культурань Республиканскяй дворецса ушедсь мокшэрзянь масторса фкя инь кельгови илась—«Шумбрат, Мордовия!»—«Vivat, Чемпионат!» народнай творчествань республиканскяй фестивальсь. Тядде сон етафтови комсь кафтувоцеда и лемтьф 2018 кизонь футболть коряс Миронь чемпионатти. Тяддень фестивальть девизоц—«И тя сембось сонь колганза».
Кода фалу, ковда ламос Культурань Республиканскяй дворецса кармайхть етнема муниципальнай райоттнень и Саранск ошень округть отчетнай концертсна, а стане жа «Мокшэрзянь масторть мастерствац» декоративно-прикладной и изобразительнай творчествань выставкатне.
Ваныхненди ули кода няемс инь цебярь творческяй коллектифнень, артисттнень выступленияснон, содафтомс народнай мастерхнень работаснон мархта.

25.10.2018   № 42
Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018   № 40
Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018   № 39
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин