https://mokshapr.ru
10.06.2022 №
 |
Архив | |
| апрель | ||||||
|---|---|---|---|---|---|---|
| 2024 | ||||||
| пн | вт | ср | чт | пт | сб | вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | |||||
 |
|
«КОВ СЯДА ЛАЦ РАБОТАТАМА, ТОВ СЯДА КОЗЯ УЛИ РЕСПУБЛИКАНЬКЕ»,— мярьгсь корреспондентоньконь мархта корхнемста Чамзинскяй муниципальнай райононь «Россия» СПК-нь вятись В.Н.Аношкин.Валерий Николаевич хозяйствать эсь «пацянзон» алу сявозе кеветие кизода инголе. Тевонь содай и эрьгада пяшксе тя руководительсь тись оцю аськолкс хозяйстваса тефнень цебярь шири полафтомаснон коряс. Сембода лияда башка, сон оцю мяль шарфни инновационнай ширети, од технологиятнень тевс нолямаснонды. Ульсть пинкт, мзярда хозяйстваса няевсь шамордома, но пингонь етазь руководительть старандаманза стак ашесть юма—«Россиясь» арась прибылень кандыкс. Кодама хозяйствать тячиень эряфоц, кода латцеви тевсь тяни, азондови алува.
—Да вдь менельста коволнявок аф няеви, пиземнясь тя пингть пяк ни ладяль-эряволь,—варжакстомок вяри, мярьгсь Валерий Николаевич.—Аньцек афоль уле тяда ингольдень пингть лаца,—стаки корхтась руководительсь.
Валерий Николаевичень таколдоманза шарьхкотьфт. Ламось, пяк ламось синь работасост ащи погодать эзда, сянкса, улема, тя мезтьке корхтаманц ушедозе тянь эзда. Сяда тов отвечась кизефксоньконь лангс.
—Валерий Николаевич, мзяра видесонт соксеви и витцеви модада и кода етнихть тундань паксянь работатне?
—Тячити самс соксетяма-витцетяма тежянь гектар мода. Ниле сятт гектарть занцесаськ сахарнай якстеряпсса, лядыксть—озимой тозерса и ячменьца, кукурузаса.
—Кукурузать витцесасть зернанди или…?
—Силосонди.
—Колмошка кизода инголе, мзярда васетькшнеме мархтот, Валерий Николаевич, модань площаденте ламода сяда оцюфтольхть. Кооперативонтень мельге, мяляфтса, кемокстафоль 2242 гектар велень хозяйствань угодия, конатнень эзда 2035 гектарсь соксеви модат. А тяни, няйсак, лядсь аньцек тежянь гектар. Мезьса азондсак тя киремать?
—Торкнень пингста, конатнень етафтозень Чамзинскяй администрациясь, тежянь гектарсь «тусь» эздонк.
—Кода ладяфт тефне животноводстваса?
—Сянкса и савсь кирьфтамс жувататнень лувкссна. Вазнятне, ведрашне мифтольхть Чамзинкань птицефабрикати—корматнень мархта саволь васьфнемс сталмот. Сембоц тяни кооперативсонк лувондови 350 жувата, конатнень эзда 200 потяви тракст.
—И кодама синь продуктивностьсна?
—Колма тоннат кафта сятт литра потьневи. Лисенди, што эрь траксста суткаста получсеви 16-17 килограмма лофца.
—Коза мишендьсасть продукциять?
—Чамзинкань «Мечта» маслозаводу. Питнесь панневи эсь пингстонза.
Кода няйсасть, васень тевоньке—сахарнай якстеряпсонь, зернань касфнемась, лофцонь получамась. Сахарнай якстеряпсть мишендьсаськ Ромодановань сахарнай заводу. Меля пачфтеме тоза 10 тежятть 650 тонна якстеряпс. Тя пцтай 16 миллион цалковаень питне. Лофцть, кода ни азыне,—молочнай комбинату, сероть оцюшкац моли фураженди и сероса мрдафнесаськ шумоньконь «Развитие села» ГУП-ти. А нинге Отраднай велень эряйхнень модань пайснон инкса стане жа макссетяма сёра. Сявондихть ломаттне и зарплата лангс. Пцтай вете гектархт пайда. Ячмень или тозер сявомс, тянь азондсазь синць паень азорхне.
—Коллективонте оцю?
—Колмогемонь ломань тяни. Ульсь тяда инголе ведьгемонь. Мезе азат тянь коряс: калсь веши крхка ведь, ломанць—сяда оцю зарплата и сяда теждя тев. А миньцонк, кода мярьгондихть, аш каникулат. Но тяниень коллективоньке кенерькшни тиемс сембе эрявиксть. Зарплата панневи эсь пингстонза, пеняцямат аф улендихть. Лишнай цалковайсь, шарьхкотьф, киндинге афоль шоря, но сембось тиендеви возможностьс коре.
—Кой-кит жувататнень лувксснон касфнесазь омба масторста ускфнень вельде. Валерий Николаевич, тинь тяфтама решения аф примсетяда?
—Аф. Тястонь условиятне ефси лият, да вдь минцень жуватаньковок максыхть аф кржа продукция, кда ванфтомс технологическяй и лия вешфкснень. 215 ведраж рамаме населениять (Чамзинка, Атяшево) кядьста. Тяфта касфтоськ и продуктивностть, и жувататнень лувксснон. Но сяс, мес кирсть модань гектархнень лувкссна, савсь кирьфтамс и жувататнень лувкссна.
—Эрь ломанць арьсекшни платт эряенди. Кодамот тонь, Валерий Николаевич?
—Ванфтомс сембе уликсть, касфтомс продуктивностть. Инголи якстеряпсса занцефтольхть аф оцю площатть, тяни пачфтеськ сяда ламоти. Вов тянь эзда аф эряви тушендомс шири.
—Кода арьсят, велень хозяйствань производительть ули сай пингоц?
—Эрятама Россияса надиязь. Минь атяньке, бабаньке и синь тядясна-алясна, мзярда строязь Магниткать, Днепрогесть, мзярда пуроптозь колхоснень, пяк аф теждятольхть ся 30-це кизотне, но эряф надиязь. Меле ульсь кяжи войнась. Можна мярьгомс, кулуфнень потмоста савсь лисемс, но сяськомс. И тянивок тяфта. Сталмотне, надиятама, машфтовихть. Ваность, мекольдень вете-кота кизотнень жуватань-мезень кирдемс мзяра оцю комплекс строяф, Мордовияса кассь лофцонь получамась, од техника эвондась, разнай агрохолдинкт стройсевихть. Тя аньцек шнама. Но вярдень лезкс велень хозяйстваса фалу эрявксты, а вдь мекольдень кизотнень тянь коряс финансированиясь коль кири. Кда корхтамс ГСМ-нь-меснень колга, эрь кизоня синь питнияйхть, а вов лофцонясь ляткшни эздост. И ламода. И кда кайгиста азондови, што газти-мезти питнетне кеподихть, мярьктяма, кеветие процентта, то лофцсь-мезсь афи лятфневи. Мзярс, мярьголень, тевс нолявихть внутренняй резерватне. Эсь опытстон содаса, мзярда ингольть коряс цебярьгодсть результатоньке. Сяка жа лофцонь потямать коряс. Тяконь можна азомс и урожаень получамать колга. Удобренияда инголивок сатомшкаль, но тевс нолявсть аф рациональнайста. Пингсь тонафтомазь лувомс эрь трешникть. Да тяфта эряви.
—Техниканте сатомшка?
—Тянь коряс аш пеняцямат. Работайхть мархтост опытнай специалистт.
—Мезсь тячи пичефтьсы руководительть?
—Кадратне. Сиретькшнихть работниконьке. А оттне аф ляткшнихть вели. Но тя лия кизефкссь, мезти мрдатама оду васедемстонк.
Н.КУБАНЦЕВА. |
