Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031
Наука и жизнь

Историческяй наукань докторсь, профессорсь, Рузонь географическяй обществань почетнай членць, Россиянь Писателень союзонь членць Н.Ф.Мокшин:

«НАРОДСЬ—ПРАВОСЛАВНАЙ ЦЕРЬКАВСЬ—ГОСУДАРСТВАСЬ ТИИХТЬ МАРСТОНЬ ТЕВ!»
 
—Николай Федорович, июль ковста Россиять, Украинать и Белоруссиять столицасост межгосударственнай уровеньца етафтовихть илат, конат лемтьфт Русть кстиндафтомань 1025 кизонь юбилеенцты. Тяда меле тя юбилейти лемтьф торжестватне келиста етафтовихть Россиянь регионга.
Кода тон арьсят, тя мероприятиятне кемокстасазь Россиянь лама нациянь народть еткса духовнай соткснень?
—Конешна, аф эзк, но юбилейти лемтьф торжестватне лездыхть кемокстамс духовнай соткснень Россиянь нароттнень еткса. А тя, кода минь лац шарьхкодьсаськ, сядонга виияфтсы Российскяй государствать.
Варжаксстама кунардонь пинкненди. Руссь кстиндафтфоль 988 кизоня. И ся пингста сявомок, Российскяй государствась ушедсь вишкста касома и вииякшнема. Марстонь православнай верась лездсь маласькофтомс фкя-фкянди нароттнень, конат эрясть ся пингонь Российскяй государстваса. И именна ся пингста мокшэрзянь народсь рузонь и лия нароттнень мархта ушедсь строяма, кемокстама и виияфтома Русть—Московиять—Российскяй империять!
—Кода мольсть кстиндафтомань процессне кунардонь пингонь Русьса?
—Христианствась—тя мировой религия. И сувафтомс сонь православнай формазонза ся пингонь языческяй нароттнень, конат эрясть Русьса, ульсь аф теждя тевкс. Васенцекс 988 кизоня эсь прянц кстиндафтозе Владимир Красное Солнышко князсь Корсунь (Херсон) ошса. А Киевса ни сон кстиндафтозень эсь дружинанц и маластонь народонзон. И аньцек тяда меле  валом-валом православнай верати ушедсть сувафневома лия нароттневок, конат эрясть рузонь кунардонь пингонь государстваса.
Лиякс мярьгомс, 988 кизонь кстиндафтомась сембе Русть кстиндафтоманцты арась аньцек ушетксокс. И кстиндафтомань процессь тяда меле мольфтевсь нинге аф фкя век. И сон, улема, ашезь аделав тя пингс. Аф стак вдь рузонь, мокшэрзянь и лия нароттне, улемок тяни православнайкс, тя пингс мяляфтсазь языческяй шкайснон.
—Николай Федорович, кода ученай и светскяй ломань, азк: мезьса малат и мезьса аф фкат язычествась и православнай христианствась?
—Религиознай ня кафцьке систематне азондыхть ломанти Эряфть колга. Но азондыхть сонь колганза эсь лацост. И тянь ширде христианствась тиендьсы тя тевть язычествать коряс, конешна, ламода сяда крхкаста и шарьхкодевиста.
Тянь лангса язычествать и христианствать малашисна аделсеви. Ушеткшнихть аф фкя лацонь ширетне, конат фкя-фкянь эзда тяфта жа ичкозет, кода модась менельть эзда. Кепотьксонди, язычникне озонкшнесть тумотненди, ляйхненди и стак тов. Синь тяфта жа арьсесть, што модать шачфтозе-тиезе кодама-бди нармонь или жувата. А атянь-атякс эстеест лувондозь офтть, яксяргть и стак тов.
Христианстваса—модать и менельть тиезень Шкайсь. Сон тяфта жа тиезень ломаттнень, нармоттнень, калхнень, животнайхнень, ляйхнень, морятнень… Лиякс мярьгомс, Шкайсь тиезе семботь, мезть тячи минь няйсаськ. И тянкса православнайхне озондыхть Шкайти и шнайхть Эряфть инкса аньцек Сонь эсонза!
—Лисенди, што, сувамок православнай верати, Россиянь языческяй нароттне эсь мировоззрениясост тисть оцюдонга оцю аськолкс инголи.
—Афкукс тяфта! Синь лувкссост тя аськолксть тиезе и мокшэрзянь народське. Тяда башка, сувамок христианствать Византийскяй формас—православияти, минь народоньке сувась вельденза мировой цивилизацияти. Сяс мес, лятфтаса нинге весть, христианствась—тя мировой религия.
—А тя аськолкссь ашезе олафта минь народоньконь национальнай шамаликонц?
—Миньцонк мекольдень пинкнень ушедсть кулевома вайгяльхть: кле, христианскяй Шкайсь—тя евреень Шкай. И ламось, кле, христианстваса тейнек аф шарьхкодеви. Сяс, кле, сась пинге оду мрдамс язычествати.
Ня корхтайхне кальдявста содасазь эсь народснон историянц. Именна православнай миссионерхне нинге 18 векста етафтозь мокшень и эрзянь кяльс Евангелиятнень и лия духовнай книгатнень. И аф аньцек етафтозь, но и печатлазь синь типографияса. И тяда меле ушедсть тонафтома мокшэрзянь народть эса сермадома и книгань лувома.
Именна Рузонь православнай церькавсь аноклазе мокшэрзянь научнай и творческяй васенце интеллигенциять. Етксост—мокшэрзянь народть великай просветителенза А.Ф.Юртов, М.Е.Евсевьев, Л.П.Кирюков и лиятне. И синь тевсна и трудсна ашесть юма стак. Сяс тячи минь народоньконь улихть: национальнай литературац, газетанза и журналонза, театрац и балетоц, национальнай профессиональнай музыкац и операц.
А сяда тов тя кизефксть коряс тейне азомс аш мезе!
—Сяс тячи лац шарьхкодеви, мес мокшэрзянь народсь шачфтсь тняра Ломаньда, конат тисть лама цебярьда аф аньцек эсь народснонды и Рузонь православнай церькавти, но и Российскяй государствати.
—И васенце вастса эздост ащи Москувонь и сембе Русень Патриархсь Никон! Именна сон ульсь мокшэрзянь народонь васенце просветителькс.
Сон тяфта жа етафтсь Рузонь православнай церькавса оцю реформа. Сонь пингстонза сембе духовнай книгатнень эса, конат етафтфтольхть греческяй кяльста и конатнень коряс вятевсть церькавса службатне, машфтфтольхть сембе эльбятьксне. Именна сон, патриархсь Никон, кода православнай идеолог азозе: кле, Москусь—тя колмоце Римсь! Нилецети аф улемс! И сон путсь лама духовнай вий, штоба тиемс Рузонь православнай церькавть Вселенскяй православнай церькавкс.
Тяса башка Патриархсь Никон каннесь «Великий государь» светскяй титул. Теенза тя титулть эсь Указсонза максозе оцязорсь Алексей Михайлович, Петр Перваень аляц. Сяс Патриархсь Никон тяфта жа вятсь-тись государственнай тефт. Именна сонь пингстонза, 1651 кизоня, етафтовсь Переяславскяй Радась, коса кемокстафоль Российскяй государствав Украинать сувамац. Именна сонь пингстонза рузонь первопроходецне пачкодсть Тихай океанть трвас. И тянь вельде няевиста келептезь Россиять границанзон. И нинге. Именна Патриархть Никононь пингста лиссь оцязорть Указоц Саранск ошть строяманц колга.
Сяс ся памятниксь, кона путф Патриархти Никононди Саранск ошть кучкаса, путф теенза аф аньцек кода Патриархонди и мокшэрзянь народонь великай церанди, но и Саранск ошень основателенди. А воеводась Козловский, кона строязень Саранск ошть и крепостть, аньцек пяшкодезе оцязорть Указонц.
Сяс Рузонь православнай церькавть историяса Патриархть Никононь коряс сяда великай Патриарх ашель и тя пингс аш!
Тяса, башка эряви азомс, мокшэрзянь народсь, Никонда меле, тя пингс казсь Россияти и Рузонь православнай церькавти нинге колма Патриархт. Нят—Патриархне Сергий, Пимен и тяниень Москувонь и сембе Русень Патриархсь Кирилл.
—Николай Федорович, Рузонь православнай церькавть историяса ульсь пинге, мзярда сон 200 киза эрясь Патриархфтома…
—Патриархонь институтть машфтозе Петр Первай оцязорсь, полафтомок сонь Святейшай Синодса. Тя органць государствать лемста вятезень сембе тефнень Рузонь православнай церькавса. И, конешна, государствась люпштась Церькавть эса, шорясь теенза духовнай тефнень вятемста. Сяс мес Синодса оцюнякс ульсть государственнай светскяй ломатть, конат цебярьста аф содамок тевть, тонафтсть священнослужительхнень эса.
Аньцек 20-це векть ушетксста нинге фкя мокшэрзясь—Санкт-Петербургскяй и Ладожскяй епархиянь митрополитсь Антоний Вадковский (1846-1912) тиезе семботь, штоба мрдафтомс  РПЦ-с Патриархонь институтть. И 1917 кизонь 5 ноябрьста Христос Спасителень храмса РПЦ-нь Патриархокс кочкафоль Москувонь митрополитсь Тихон (В.И.Белавин), Антоний  Вадковскяень ученикоц.
Сяс мон сермадонь митрополитть Антониень колга целай книга. И лемдине сонь «Митрополит родом с Вада». Сяс мес Антоний шачсь-кассь мокшень семьяса Зубово-Полянскяй райононь Ширингуши велеса. Но эсь веранц и ененц вельде кеподсь-кассь РПЦ-са пяк сери вастс. Лиякс мярьгомс, сон арась Рузонь православнай церькавонь выдающай деятелькс. И тянь мархта сувась мокшэрзянь народть великай идензон еткс!
—Корхтаманьконь аделамста, Николай Федорович, мезе тон нинге азат минь лувиеньконди?
—Миньцонк, Мордовиять столицаса, Русть кстиндафтомань юбилеенцты лемтьф торжестватне етафтовихть 2 августста. Арьсян сембонди васьфтемс и етафтомс синь валда ваймоса и мяльса. И тя шиня нинге весть лятфтамс: Русть эвондамста сявомок, странасонк народсь—Православнай церькавсь—государствась тиихть марстонь тев. Стама тев, кона эсь пингстонза тисы тя пингонь Россиять великай странакс!
—Спасиба.
В.НЕСТЕРОВ.

04.07.2013 №26

Новости

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021   № 1
Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020   № 48
«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020   № 48
Республикань вятить Рузаевскяй районца улеманц колга

Мордовия Республикань Оцюнять аф лама пингс тевонзон тиендисна Артём Здунов 8 декабрьста рабочай визит мархта ульсь Рузаевскяй районца. Республикань вятись содафтсь «Стекольная компания «Развитие» ООО-ть производственнай мощностензон мархта, тяконь лувксса ванозе клянцеконь тарань нолямань цехть.
Заводть продукцияц пачфневи Россиянь ламоц региоттненди, а стане жа экспортс—Арменияв, Литвав, Грузияв, Польшав. Тяфта жа республикань вятись ётафтсь предприятияса «Рузаевка» ТОСЭР-нь резиденттнень мархта келептьф совещания, коса ванондовсть территориять касфтоманц коряс перспективатне. «Штоба сяда активнайста серьгядемс резиденттнень, эряви виияфтомс кинь и транспортонь инфраструктурать, тя пяк важна, карматама лездома»,—азозе Артём Здунов.
Тяка жа шиня республикань вятись ульсь идень технопаркса, коса ванозень работань сембе направлениятнень. Тяса дополнительнай образования получай 800 школаса тонафни.
Мордовия Республикань Оцюнять аф лама пингс тевонзон тиендисна стане жа ванозе идень ташта поликлиникать. 2021 кизонди Артём Здунов путсь задача—строямс идень од поликлиника.
Сяда тов региононь вятись ванозень Ухтомскяень лемса клубть одкстоптоманц коряс тефнень и ульсь «Рузхиммаш» АО-са. Тядде тяса арьсекшневи нолдамс 10 тёжятть вагон. Кафта ковда меле «Рузхиммашса» панжеви содамошинь и маштомошинь фабрика, коса кармайхть тонафневома несколька рабочай направленияс коре од специалистт.
10.12.2020   № 48
«Республикаса ули сембось сяда тов касомс-вииякшнемс»

Шуваланяста, 3 декабрьста, ётась Мордовия Республикань котоце созывонь Государственнай Собраниять ведьгемонь фкиеце сессияц. Сонь работасонза примасть участия Мордовиянь Оцюнять аф лама пингс тевонзон тиендисна А.А.Здунов, Мордовия Республикань Государственнай Собраниять Председателец В.В.Чибиркин, Правительствань члеттне, МР-ть эзга федеральнай органонь вятихне, муниципальнай райононь оцюнятне.
Сессиять работанц ушетксста Мордовиянь Оцюнять аф лама пингс тевонзон тиендисна А.А.Здунов залу пуромфненди мярьгсь:
—Тячи минь мархтонт васенцеда васедеме тяфтама составса. Васендакиге мялезе нинге весть азомс сюкпря Российскяй Федерациянь Президентти оцю довериянь максоманкса. Карман тиендема семботь, штоба Мордовиянь эряйхнень надиямаснон пяшкодемс эряфс. Республикаса ули сембось, мезсь эряви вяри касоманди и инголи молеманди, и тя тевса надиян тинь ширень кирдемантень лангс.
10.12.2020   № 48
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин