Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   
Культура

АФ ЮКСТАВИ ВАСЕДЕМАТ ВОЛГА ЛЯЙТЬ ЭЗГА УЕНДЕМСТА

Аньцек ня шитнень шумордавсь «Волгась—миронь канды ляй» международнай этнокультурнай XII экспедициясь-фестивальсь.
«К.А.Тимирязев» теплоходсольхть наукань, культурань деятельхть, учительхть, артистт, мокшень и эрзянь национально-культурнай автономиянь вятихть и журналистт.
Экспедициянь участникне ульсть Саратовса, Самараса, Ульяновскяйса, Казаньца.
Сембе ня региоттнень эса эряйхть мокшет и эрзят, конат шарфнихть мяль национальнайть ванфтоманцты, школаса вятевихть мокшень и эрзянь кяльхне, етафневихть родной кялень шит.
Вятикс тя экспедицияти ульсь финно-угорскяй народонь культурань Поволжскяй центрать директороц, профессорсь Ю.А.Мишанин.
 
Теплоходса уендемста етафневсть семинархт, «круглай шрат». Мокшэрзянь педагокне, наукань и культурань деятельхне, лия участникне пара мяльса азондсть фкя-фкянди и Волгать трвава эряйхненди мокшэрзянь народть историянц и тячиень тевонзон колга. Синь седикс-ваймокс корхнесть фкя-фкянь мархта, панчcезь седиснон, азондозь эсь пичефкс-снон и кенярдемаснон, марса морсесть мокшень, эрзянь, рузонь и лия народонь морот.
Васенце ошекс, кона васьфтезе экспедициять, ульсь Саратовсь. Пара койс коре, экспедициянь участникнень мархта ульсь «СОФУН» финно-угрань народонь обществать председателец Ф.П.Чатуров.
А теплоходса работась панжевсь Мордовиянь декоративно-прикладной искусствань выставкаса. Вятезе сонь Ковылкинскяй райононь «Марлюня» Народнай фольклорнай ансамбльть руководителец Р.В.Кубасова. Фкя ансамбльса морай ялганц З.Г.Кимеевать мархта синь панчсть мокшень мазы панаронь афкуксонь салон! Усксть мархтост сняра мокшавань панар, ожнаста тиф крганят, мокшень нарядса щаф-каряф някат. Ломаттне малаткшнесть теест, ванондозь, кизефнезь, кода синь тиемс-анокламс. И кафта отькорь мокшаватне няфнесть мастер-класс. Тянди синь тонафтозь велень сире ломаттне, конат тянемс кородозь ванфтсазь сире койхнень-обуцятнень.
Тяфта жа няфтьфоль шуфтста керсемать коряс выставка. Тавлань налхкшнень сембонь ингольде машты кядьса керсезень шуфтста Россиянь народнай мастерсь В.Г.Ширманкин.
Омбоце ошекс, кона примазень инжихнень ульсь Самарась. Васьфтема лиссть Самарскяй областень «Масторава» мокшэрзянь общественно-культурнай центрать председателец Л.А.Колесникова, областень Губернаторть администрацияста национальнай и конфессиональнай политикать коряс управлениять вятиец Н.П.Осипова, лия ялгат. Сембе шумбракшнесть и фкя-фкянь мархта корхнесть мокшень и эрзянь кяльса-валса.
Самараса экспедициянь участникне якасть областень народонь ялгаксшинь куду. Автобусса тоза ардомста экскурсоводсь азондсь ошть колга. Сире мазы зданиятне кеподьсазь мяльцень, аньцек эрявихть синь петемс-мазоптомс, тиемс реставрация.
Самарскяй областьса эряй 150 народность. Мокшетне и эрзятне лувксс коре ащихть колмоце вастса руснень и татархнень мельге. 2010 кизонь переписень даннайхнень коряс, Самарскяй областьса эряй 65 тежянь мокша и эрзя.
Ялгаксшинь кудсь кирди кеме соткст 40 общественнай организация мархта. Сонь видесонза работай художественнай самодеятельностень 18 коллектив. Тяда башка, нолявихть эрь народть кяльса газетат, редакциятне тяка жа зданиясот, панжевсть воскреснай школатка.
Экскурсияда меле сембе пуромсть актовай залу. Инжихнень инголе няфтьфоль мялень салай концерт.
Пингсь, мярьгат, лиезь-лийсь. Колмоце ошсь, коза лоткафоль, ульсь Ульяновскяйсь. Афи азови, кода лямбоста, седикс-ваймокс васьфтьфтольхть экспедициянь участникне тяса. Волгать вельхксса кайгсть мокшень и эрзянь морот. Перьфпяльге марявсть весяла корхнемат, шутендамат.
Ашель кода аф няемс сянь, конашкава кельгсазь Поволжьянь нароттне мокшэрзянь культурать, конашкава мала теест сон. Да и кода сонь аф кельгомс, кда аньцек варжакстат мокша и эрзя аватнень, синь мазы щамснон лангс, кульсайть лама вайгяльса мазыста морамаснон, седице эзкиге солай, ваймосот эвондакшни надияма сембе цебярть лангс. А мокшень и эрзянь моротне Волгать вельхксса кайгсть сидеста, сяс мес кочкавсть теплоходу ся ломаттне, конат седишкава кельгсазь эсь народснон, эсь койснон, эсь обуцяснон.
Сяльде экспедициянь участникне пуропневсть «круглай шрас». Корхтамась мольфтевсь «Ульяновскяй областьса образованиянь и культурань учреждениятнень эса родной кяльсь и национальнай культурась» темать коряс.
Мекольце ошсь—Казанць. Татарстанцовок эряйхть мокшет и эрзят. Экспедициять васьфтема лисендсть Татарстанонь мокшэрзянь национально-культурнай автономиянь председательсь С.В.Новиков, Ялгаксшинь кудонь директорсь И.И.Шарипов, Татарстанонь народнай ансамблень участникт, мокшень и татаронь творческяй коллектифт.
Казанць, кода содаф, сембе вийса аноклай Универсиадати. Ошсь мазыдонга мазы, сембоса няеви  азорксши и аруши. Ульсь аф лама пинге ваномс Татарстанть столицанц. Аф каттанза озадонь седихть Казанень Кремлясь, коса лац ванфтовсть архитектурань, историянь и археологиянь памятникне.
А теплоходса экспедициясь сяда тов поладозе эсь тевонц. Етафтовсть «круглай шрат»: «Перспективы развития физической культуры и спорта в Республике Мордовия» (вятезе  МР-нь спортонь министрть заместителец В.В.Цыбусова), «Итоги переписи 2012 года. Социально-экономическая характеристика мордовского населения РМ и субъектов Российской Федерации» (вятись Мордовия Республикать эзга демографическяй статистикать коряс государственнай статистикань отделонь вятись Л.И. Чапоргина), семинархт, лия мероприятият.
Теплоходонь участникнень етксоль и мокшень содаф поэтессась П.В.Алёшина. Пяк удалафста етась сонь поэзиянь илядец. Кулхцондыхне лямбоста, седишкава примазь Полина Владимировнань стихонзон, кой-конат эздост нльне эвондафнесть сельмоветть.
Мекольце васедемась тага Саратовсоль. Тяса путфтольхть панчфт Вечнай Огонть ваксс, коса ащи Великай Отечественнай войнаса шавфненди стеллась. Тяда меле экспедициясь якась Саратовскяй областень эряйхнень лама народонь «Национальная деревня» парку. Тяса ули мокшэрзянь кудга. Самай тяса тифтольхть экспедициять работанцты итокт. МР-нь национальнай политикать коряс министерствать эзда казьфтольхть инь активнай участникне. Тяфта шумордазе работанц XII экспедициясь-фестивальсь, кона кадсь эрть седис лямбе лятфнемат, од мяльхть-арьсемат.
З.Шукшина.

04.07.2013 №26

Новости

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

Мордовиянь Оцюнясь Владимир Волков 15 январьста етафтсь 2019-2020 кизотнень федеральнай адреснай инвестиционнай программатнень, а стане жа национальнай проекттнень эса республикать участиянь примаманц коряс кизефкснень ваномаса рабочай совещания. Совещанияса примасть участия республикань Правительствать Председателец Владимир Сушков и министронь кабинетонь члеттне.
Владимир Волков китькстазе, што национальнай проекттнень эса участиянь примамась—тя афкуксонь возможность Мордовияти эряскофтомс виияфтомань сяда важнай направлениятнень коряс задачатнень решандамаснон, получамс федеральнай бюджетста ярмак ся проекттненди, конат эрявихть республикань эряйхненди и синь водендафт экономикать и социальнай сферать виияфтоманцты.
17.01.2019   № 2
Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019   № 1
10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019   № 1
Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018   №
Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018   №
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин