Поиск по сайту: 
 

Архив
 май 
 2022 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Благотворительность

«КРУГЛАЙ ШРАСЬ» ЛЕМТЬФОЛЬ ДОБРОВОЛЕЦОНЬ МЕЖДУНАРОДНАЙ ШИТИ


 

СОДАФТ ПАРА ТЕВСНОН МАРХТА


 

КОНЦЕРТТНЕ МОЛИХТЬ КИЗОНЬБЕРЬФ

Краснослободскяй райононь районнай агитбригадань самодеятельнай артисттнень фалу учсесазь и лямбоста васьфнесазь сембе велень эряйхне. Культурань центрати республиканскяй художественнай самодеятельностень фестивальхнень эса оцю сатфксонкса казьфоль автоклуб-вездеход. Эсонза ули ся, мезсь эряви артисттненди. Машинась етави сембе китнень эзга, эсонза ладяф башка электроустановка, конань вельде валдопневихть ся помещениятне, коза пуромкшнихть ваныхне и концертнай площадкатне.
Художественнай самодеятельностень артисттне фалу тевсот. Концертт няфнихть тунда, кизонда, сексенда, тялонда. Серонь видемста, урожаень урядамста, фермаса, клубса…
Моросна аф фкя лацоннет: лирическяйхть, эстраднайхть, народнайхть, сиде моронят, танецсна мокшень, рузонь, татаронь. Артисттнень лувкссна полафни, но ваныхне фалу лямбоста васьфнесазь баянисттнень С.Ининонь, А.Чугункинонь, Ю.Черентаевонь,   солисттнень Л.Данилюконь, К.Хрящиковать, Л.Гарбузонь, А.Гуреевать, М.Петрушковать, А.Заворзаевать, «Гармония» и «Грация» кштимань группатнень, конатнень руководительсна И.Дряшина и Н.Вожинская. Мяльс тушендыхть самодеятельнай творческяй «Забава», «Эдельвейс», «Родничок», «Ветеран» коллектифне.
 
06.12.2012 №48

 

СИРЕШИСЬ АФ ЩЕНЯЦЕ

Маластонь пингть Атюрьев­скяй райононь Оцяду велень сире ломанень пансионатса эряйсь М.А.Голов отмечасы 75 кизонь юбилеенц.
—Илась оцю. Мезе учат эздонза?—кизефтине Михаил Андреевичень.
—Казнет тейне аф эрявихть,—отвечась сиренясь.—А инжихненди пяк кенярдян. Мон вдь аф родфтома-плямафтома ломанян. Тядязень и алязень мянь кафкса идьсноль. Улихть брадоне, сазорне, племянниконе. Улихть уноконе. Учан эсост.
Шачсь-кассь Михаил Андре­евич Горьковскяй областень Вознесенскяй райононь Суморьева велеса. Мольсь 1937 кизось. Пингсь стакадонга стакаль. А тоса ушедсь войнась. Лиякс азомс, шабакс пингоц и ашель. Мзярда кассь, пуроптсь эстеенза семья. Рьвянди кочказе велень стирнять Мариять, конань мархта эрясть колмогемоньда лама киза. Эряма вастокс теест ульсь Темниковскяй райононь Алексеевка велесь. Сембось мольсь лац. И Михаил Андреевич, и рьвац колхозонь тефненди макссть колмогемоньда ламонь киза. Ульсь хозяйствасна, пересна. Кирдсть жуватат. А тоса Мария Петровнац тусь лия эряфс. Михаил Андре­евич вов ни ветеце кизось эряй Оцядувонь сире ломанень пансионатса. Мезевок сонь аф пичефтьсы. Тяса симдьсазь-андсазь, ваныхть мельганза, макссихть медицинскяй лезкс.
—Кальдяв ся, што ялгане кулость,—поладозе Михаил Андреевич.—Да и церазевок пингта инголе тусь лия эряфс. Эрясь Саровса. Тяни лядсь унокозе. Кода-бди сувсесь варжамон. И тянксовок оцю спасиба.
М.А.Головонь кодяма ломаньда Оцядувонь пансионатса лама. И пяк пара, што синь инксост тяса пичедихть, макссихть сембе ширдень лезкс.
 
И.ВЕШКИН.
25.10.2012 №42

 

ЁТАСЬ «ДОСТОЙНАЙ ТРУДТЬ ИНКСА» АКЦИЯ

24 сентябрьста сявомок и 7 октябрти молемс Мордовияса етафтовсь «Достойнай трудть инкса» акция, конанди тиф ушеткс 2008 кизоня миронь 130 странаса. Васень тевоц, штоба максомс международнай профсоюзнай движенияти лезкс.
Акциять мяльса кирдезь,  республикань трудовой коллектифнень эса етнесть собраният, конференцият, «круглай шрат», коса корхтамась мольфтевсь достойнай трудонь стандартонь проектть колга, конань аноклазе Россиянь Афзависимай профсоюзонь Федерациясь.
4 октябрьста, акциять мяльс сявозь, Союзонь кудса ульсь Республиканскяй «круглай шра» «Достойный труд—основа социальной политики» темать коряс, конань вятезе Мордовия Республикань Профсоюзонь федерациять председателец Анатолий Иванович Солдатов. Профсоюсне, работодательхне, законодательнай и исполнительнай властень представительхне корхтасть ся прябалатнень колга, конат васьфневихть социально-трудовой сфераса.
11.10.2012 №40

 

САЙ ПЕНСИЯТНЕНЬ КОЛГА АРЬСЕМА ОДСТОКИГЕ

Ня шитнень Мордовия Республикать эзга Россиянь Пенсионнай фондть отделениясонза етафтфоль пресс-конференция, кона лемтьфоль пенсионнай грамотностень Всероссийскяй шити. Сонь эсонза примасть участия Мордовия Республикать эзга РФ-нь ОПФ-нь ГУ-ть Управлениянц заместителенза Н.Ушакова и Н.Борисова, Пенсионнай фондонь структурнай подразделениятнень и группатнень вятисна.
Пуромфнень инголе корхтамстонза Н.Ушаковась пачфтсь-азондсь сянь колга, кода важна эрь од ломанти сай пенсиять квалма арьсемс, содамс нинге школаса тонафнемста. Тянь коряс тяни странаса етафтови акция. 25 сентябрьста сявомок миньцонк сембе пенсионнай фондонь Управлениятнень эзга етафтфтольхть панжада кенкшень шит. 2012 кизонь 1 сентябрьста сявомок и декабрти молемс сембе учебнай заведениятнень эса етафтови РФ-са пенсиянь ладямать и макссемать колга курс. Сонь вельденза пачфтеви тонафнихненди пенсионнай законодательстваса инь эрявиксть колга. Тянкса Россиянь Пенсионнай фондсь нолдазе «Все о будущей пенсии: для учебы и жизни» учебникть омбоце изданиянц.
Кода азфоль пресс-конференцияса, республикасонк обязательнай пенсионнай страхованиянь системать мархта тяни фатяфт пцтай сембе эряйхне.
Кажнайть лангс панчф индивидуальнай лицевой счет, коза сувафневихть страховой взносне, конатнень етафнесазь тоза работодательхне.
Тяддень 1 сентябрти Мордовияса лувондови 248,3 тежянь пенсионер, тяконь лувксса 230,1 тежянь трудовой пенсиянь получай и 18,2 тежянь—государственнай. Средняй пенсиясь тяни республикаса 8217 цалковай. Тядде кафксть пенсияти тифоль индексация: 1 февральста (7 процентс) и 1 апрельста (3,4 процентс).
 
27.09.2012 №38

 

ТЯСА АЗОРОНДАЙ ВАЙМОНЬ СЕТЬМОШИСЬ

Ули Саранск ошса войнань и трудонь ветеранонь пансионат, коса эряйхть-ащихть сире ломатть. Пансионатса тячи эряй 163 сире ломань: нят васенце, омбоце, колмоце группань инвалитт. Кода азозе пансионатть директороц Николай Иванович Николаев, учреждениясь работай 1986 кизоста сявомок. Пингсь аф емла, пцтай комсь котува киза ни тиендевихть тяса пара тефт. Тячи пансионатса 117 работник. Но тяка пингть аф сатнихть медсестратне, санитархне и лия персоналсь. Эряви азомс, што тяфтама учрежденияса стака работамс: и пандыхть аф мзяра, и мяльце колави сиренятнень инкса, мзярда содат синь аф теждя эряфснон колга. Республиканскяй бюджетста ноляви аф кржа средства ремонтонь тиемс. Цебярьгофневи ломаттнень эряма вастсна, рамсеви эрявикс оборудования и стак тов.
Пансионатса эряйхне арсихть фкя-фкянди малакс, стака пингть лездыхть фкя-фкянди, а кой-конат нльне мушендсазь эсь кельгомаснон. Шуроста, но улендихть пансионатса свадьбат. Тяфта, колма кизода инголе шоворсть Александр Ильич и Вера Алексеевна Ермакофне, аф кунара арасть мирдекс-рьвакс Константин Викторович Никрошевич и Валентина Сергеевна Клепикова. Аф стак корхнихть, што кельгомась аф ваны кизотнень лангс.
Башка лезкс макссеви пансионатса кунара эряйхненди. Инь сиренясь етксост шачсь 1917 кизоня. Улихть и конатненди топодсь вейхксогемонь колмува и вейхксогемонь нилие киза.
Пансионатонь эряйхнень эзда кулендевихть аньцек пара и лямбе валхт сембе руководствать и персоналть колга. Тейнек удалась корхнемс пансионатса фкя эряйть Нина Васильевна Тарапкинать мархта. Вов мезе сон тейнек азондсь:
—Тяса эрян кемоньшка киза ни. Сембось мялезон. Персоналти азома башка спасиба. Вдь тяса работамась аф теждятнень эзда. Васенцесь, тя сембонди содаф, што пандыхть аф мзяра. Омбоцесь, инь стакась ся, што эрь медсестрась, эрь санитаркась етафтсыне эсь пачканза сембе минь сярятьфоньконь, кизефтьсазь, кодама минь пичефксоньке, прябаланьке. Вийс коре старандайхть максомс тейнек лезкс. И тя кеняртьфти, шарьхкодеви, што масторлангса улихть нинге пара вайме ломатть.
Эрямась тяса мяль аф мольфти. Шкайти верондайхненди панчф церькав. Эрь недляшиня пансионатонь эряйхне якайхть храму. А праздниконь шитнень ломаньда кафксть сяда лама.
Аф юкснесамазь общественностсь. Концерт мархта сашендыхть районцта, Саранск ошень школаста тонафнихне и лият. Синь и кштихть, и морайхть, сашендыхть аф аньцек оцю илань пингста, но и стак шиня. Тяда башка, ванонттама и телевизор, сембе кулятнень мархта содафнетяма. Кода содаф, аф кунара республикасонк етась оцю ила—мокшэрзянь народть Российскяй государствань нароттнень мархта ладязь эрямаснон 1000 кизонь юбилейсь. Оцю мяльса ванонь тя событиять мельге. Вдь 1000 кизонь юбилейсь—тя марнек Россиянь ила. Содаф, пяк лама ломань пуромкшнесь Мордовияв лия регионцта. Тя пяк кеняртьфти.
«Мокшень правда» газетась—инь кельгома печатнай изданиязе. Фалу лувондан эсонза и содафнян тядянь-алянь родной кяльса сянь колга, мезе тиендеви кода республикасонк, стане и мирса-масторса.
Л.РЕЗОВА.
20.09.2012 №36

 

АНОКЛАФ ОД МАРКА

Россиянь Почтать ули сонцень путксоц мокшэрзянь народть Российскяй государствань нароттнень мархта ладязь эрямаснон 1000 кизонь илать праздновандаманцты. Предприятиясь нолдась почтовай марка, кона лемтьф юбилейти. Сонь гашенияц етась 23 августста Саранскяйть главнай выставочнай центрасонза—Мордовэкспоцентраса. Юбилейнай штемпельса няфтьф илать лемоц и гашениять датац, а эсь подписьснон путозь Мордовия Республикань Оцюнясь Владимир Волков, Самарскяй областень губернаторсь Николай Меркушкин и Связень федеральнай агентствать руководителец Олег Духовницкий.
Лемтьф оцю илати маркать гашениянц ролец сянь эса, штоба шарфтомс Россиянь и миронь лия нароттнень мяльснон тя няевикс событияти. Юбилейнай маркатне и конверттне пачкодихть странать сембе уженянзонды и тя кармай улема эсь лацонь путксокс Россиянь культурань и национальнай койхнень-обуцятнень ванфтомаса.
30.08.2012 №34

 

ВАСЕНЦЕКС МОРДОВИЯСА, РОССИЯСА И МИРСА!

1000 кизонь илать етафтомда инголе «Антология Одного стихотворения» лем ала Мордовиять столицаса лиссь поэтическяй книга. Эзонза сувась 103 авторонь произведения. Эздост 24 поэтсь—рузонь поэзиянь классик, а 79—Мордовиянь содаф поэт.
Антологиять панчсесы А.С. Пушкинонь стихотворенияц. А мельганза максфт С.Есенинонь, Ф.Тютчевонь, М.Лермонтовонь, И.Анненскяень, И.Бунинонь, А.Блоконь, Б.Пастернаконь и рузонь лия великай поэттнень стихсна.
Мордовиянь поэзиясь Антологияса няфтьф республикань инь содаф поэттнень стихотворенияснон вельде. Нят—А.Доронин, Н.Ишуткин, А.Арапов, А.Шаронов, К.Тангалычев, А. Столяров, К.Смородин, А.Смородина, Ж.Тундавина, В.Юдина, А.Терентьев, С.Сеничев, М.Кемаль, Р.Орлова, Н.Мокшин, В.Нестеров, В.Федосеев, В.Гадаев, В.Лобанов, А.Тяпаев, П.Ключагин, Ч.Журавлев, С.Белоключевский, В.Корчеганов, В.Ващалкин, Н.Рузанкина, С.Ламбина, Н.Кострицина и лиятне. Антологияс тяфта жа сувасть республикань од поэттнень стихотворениясна. Нят—И.Торилова, О.Савлова, М.Ребрушкина, А.Ефремов, А.Лазарев, В.Брындина, Е.Панова, А.Акамова, Н.Святойкина, А.Филипчук, М.Сонина.
Тяса нинге эряви азомс, што «Антология Одного стихотворения» книгась эсь лацонне лама ширде. И вов мес.
Васенцекс, сонь кочкаец-пуроптыец Мордовиянь Заслуженнай поэтсь Алексей Громыхин макссь права республикань эрь поэтти сонцень мяленц коряс сувафтомс Антологияс инь цебярь стихотворениянц. А тя принципть коряс Антология кочкаф васенцеда сембе мирса. Омбоцекс, Антологиясь, конас пуроптфт рузонь классикнень и республикань инь содаф поэттнень стихсна, лемтьф мокшэрзянь народть 1000 кизонь иланцты. И, колмоцекс, Антологиясь эсь лисеманц вельде няфнесы, што Мордовиясь тяниень Россияса арась нинге фкя афкуксонь духовнай и культурнай центракс.
Тя книгать инкса азома спасиба тяфта жа «Республика молодая» газетать редакциянцты и меценат-просветительти С.К.Гурьяновти. Синь материальнай лезксснон вельде нолдаф Антологиясь. Тяда башка, С.К.Гурьяновсь тиезень А.С.Пушкинонь и М.Ю.Лермонтовонь скульптураснон, конатнень снимкасна мазоптозь книгать обложканц. А стихонза, конат азондыхть Нарчатка княжнать колга, сувасть Антологияс.
Штоба Антологиять лисеманц колга кулясь сяда курок пачкодель лувити, Мордовиянь национальнай театраса 14 сентябрьста етафтови Поэзиянь оцю илядь, коса республикань инь содаф поэттне лувсазь эсь стихснон. И азсазь пуромфненди эсь мяльснон мокшэрзянь народть 1000 кизонь иланц значениянц колга Россиять тя и сай пингонь эряфса!
 
В.НЕСТЕРОВ.
23.08.2012 №33

 

АФ ЮКСНЕСАЗЬ ТРУДОНЬ ВЕТЕРАТТНЕНЬ

Июльста почтань работникне отмечазь эсь профессиональнай праздникснон. Атюрьевскяй райононь почтаса работайхнень седи ваксста поздравляндазь райононь оцюнясь И.С.Гусаров, Торбеевань почтамтонь начальниксь О.Б.Заверткина, лиятне.
Почтаса работай тевонь кельги и оцю коллектив. Аф кржа династияда. Кепотьксонди, Кяшалонь связень отделениять лама пинге вятезе мокшавась А.П.Матюшкина. Тусь пенсияс. Тевонц сяда тов поладозе стирец Л.И.Мустайкина, кона  работай связень отделенияса. 34 киза макссь Атерень почтати А.К.Сюняева. Тяни тевонц мольфтьсы стирец А.А.Еремкина.
Почтань работниконь шиста лама поздравленияда кульсть Е.В.Кижапкина, В.Н.Кузьминова, Г.И.Алешкина, А.Н. Равочкина, Л.И.Мустайкина, А.А.Еремкина. Аш кода аф лятфтамс Атерень почтальоттнень Н.Н.Равочкинать, П.И. Сяткинать, Е.П.Ивашкинать, М.Н.Надинать, Е.А.Пугаевать, А.К.Волгапкинать и лиятнень.
Ашезь юкста и трудонь ветераттнень М.И.Сурайкинонь, П.Т.Демкинать, А.К. Сюняевать, Е.Ф.Пиняскинать, А.С.Липайкинать, Е.С.Ведяковать и лиятнень. Сембе синь праздниконь шиня получасть ярмаконь премият.
—Спасиба, што аф юкснесамазь,—мярьгсь Трудонь ветеранць, Атерень почтань подпискань отделть ингольдень вятиец П.Т.Демкина.—Сембе эряфозень максыне почтати. Кувака пингста мезе аньцек ашель. Но минь, ветераттне, кяденьконь ашеськ ноля мзярдовок. Работаме и сатнеме аф кальдяв сатфкст.
 
И.ВЕШКИН.
16.08.2012 №32

 

 
 
 

 
НОВОСТИ

Зубово-Полянскяй райононь оцюнясь В.А.Поршин:«Эрь тевсонк васенце вастса ащи ломанць!»

Зубова Полянась васенцеда лятфневи 1680 кизоста сявомок Керенскяй засечнай чертань служилай ломаттнень Зубофнень фамилияснон коряс, синь тя ширеса азорхтольхть. Лемть омбоце пяльксоц пачфни, што тяса кужель, вирьса шуфттнень эзда ароптф вастоль. Сире пинкнень тияк ётнесть Шацк-Спасск алашань кись, Зубова Полянань почтовай станциясь. Машина кить строямста посёлкась вишкста кассь. Тяниень пингть Зубово-Полянскяй районца улихть оцю предприятият, конат лезнихть виияфнемс марнек Мордовиять экономиканц. Кепотьксонди, «Плайтерра» фанерань нолдай компаниясь и Вышинскяй деревообрабатывающай комбинатсь. Лама киза Зубова Поляна посёлкаса ноляй электроннай оборудования «Радиодеталь» заводсь. Оцю тефт тиендихть наказамань ётамань учреждениятне. Пцтай эрть эса улихть стамань цехт, шуфтонь и металлонь обработкать коряс производства. Аф кржа рабочай васта максси «Талина» компаниясь, кона мольфти районца аграрнай бизнес. Инголи моли технология мархта ня предприятиятне сявондихть работама сембе ширде аноклаф, квалифицированнай ломатть, сянкса зарплатавок пандыхть цебярь.
 
 

Корреспондентоньке аф кунара васьфнесь Зубово-Полянскяй райононь оцюнять Владислав Алексеевич Поршинонь мархта и кизефнезе, кода Мордовиянь инь оцю районца ётафневихть эряфс национальнай проекттне.

12.05.2022  № 18
 
 
 
 

МОРДОВИЯНЬ ОЦЮНЯСЬ ПОЗДРАВЛЯНДАЗЕНЬ ВЕТЕРАТТНЕНЬ

Шуваланяста, 5 майста, Артём Здунов васетькшнесь Мордовиянь ветеранскяй активть мархта. Васедемаса примасть участия республикань райононь ветеранскяй организациянь председательхне и члеттне.

 

Тяддень мартста организацияти топодсь 35 киза. Мордовиянь Оцюнясь азозе, што Ветеранонь советть оцю значенияц регионца, сон путни сатомшка оцю путкс од поколениять воспитандаманцты. Корхтафоль памятниконь тиемать коряс Военно-историческяй обществать мархта марстонь работать и Сурскяй рубежень строяйхненди музеень панжемать колга.

 

«Кда аф тинь советонте, тейнек улель стака ламоц важнай задачатнень пяшкодемста. Башка мяль тячи, конешна, эряви шарфнемс од ломаттнень воспитандамаснонды, сянди, мезе тиендеви школатнень эса. Интернетса лама аф видексонь информацияда, конань вельде ули кода тиемс кальдяв од ломаттненди, сяс кадондомс мялень апак шарфтт тя категориять аш кода»,—мярьгсь Артём Здунов васедемать панжемста.
 

12.05.2022  № 18
 

СЕДИЕНЬ ТАКОЛДОМА И ОЦЮ КЕНЯРДЕМА КАННИ ТЕЙНЕК 9 МАЕНЬ ШИСЬ!

Победань шиня Саранскяйса и Мордовиянь райоттнень эса ётафтовсть мероприятият, конат лемтьфтольхть 1941-1945 кизотнень Великай Отечественнай войнаса Сяськомать 77 кизонь топодеманцты.

 

Саранскяйса Победань площадьса ётафтовсь торжественнай митинг. Ся кизонь пелькс событиянь участникненди и свидетельхненди сюконяма, сяськиень поколенияти спасибань азома, сембонь сятнень лятфтама, кит тяни ашет мархтонк, сашендсть ошеряйхне и Мордовиянь столицань инжихне.

 

Торжественнай митингть панжемста Мордовиянь Оцюнясь Артём Здунов поздравляндазень пуромфнень странаньконь историяса Великай шить мархта: 

 

«77 кизода тяда инголе Советскяй народсь аралазе родной Отечестваньконь,  нолдазе воляс фашизмать  эзда ламоц странатнень и нароттнень. Республикасонк шачф-касф ломаттне тиендсть героень тефт сембе фронттнень эса: Брестскяй крепостть араламста, Москуть, Ленинградть, Севастопольть инкса ащемста, Сталинградть ала и Курскяй дугать лангса тюремста, Украинань, Белоруссиянь союзнай республикатнень и сембе Европать воляс нолдамста. Тылонь труженикне, аф ваномок ашушить и вачашить лангс, сатнезь Победать станокнень ваксса, паксяса, Сурскяй рубежса и госпитальхнень эса. Марса аватнень и сире ломаттнень мархта тылса стакат-сталмот кирдсть шабатне. Вечнай толть ваксса минь сюконяфнесаськ пряньконь сембонь сятнень лятфтаманкса, кие ашезь мрда войнаста, кие эреклафнезе народнай хозяйствать войнада меле. Сембось тя тиф минь инксонк, шабаньконь, сяськиень сай пингонь поколениятнень инкса!»

 

 
12.05.2022  № 18
 

«Бессмертный полк России» ООД-ть Мордовия Республикань региональнай отделениянц штабонц руководителец Н.А.КРУЧИНКИН: «ТЯДДЕ "БЕССМЕРТНЫЙ ПОЛК" ШЕСТВИЯСЬ КАРМАЙ АСЬКОЛЯМА МАРНЕК СТРАНАТЬ ЭЗГА!»

05.05.2022  № 17
 
 

Касы коронавируснай инфекцияса сярядихнень лувкссна

29 апрельста ётафтовсь коронавируснай инфекциять инголдаманц и келемоманцты кить персеманц коряс региональнай оперативнай штабть  заседанияц. Сонь работасонза примась участия Мордовиянь Оцюнясь Артём Здунов.

 

«Коронавируснай инфекцияса урмаськодомать мархта тефне Мордовияса ашесть полафта—300-та лама пациент пчксихть ковиднай госпитальхнень эса. Ваномс, штоба Маень праздникнень пингста массовай пуромксне афольхть ара урмаса сярятькстыхнень лувксснон касомаснонды туфталкс»,—мярьгсь регионть руководителец.

 

МР-нь Правительствать Председателенц заместителец Галина Лотванова азондсь эпидемиологическяй  тяниень пингонь ситуациять и коронавируснай инфекциять эзда населениять вакцинациянц мольфтеманц колга.

 

Ётай недялять коряс 19 процентта кассь госпитализированнайхнень лувкссна, сяда лама арась стационарса пчкафневи идьта. Коллективнай иммунитетсь кирсь и тячиень шити сон арась 52,7 процент.

 

05.05.2022  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин