Поиск по сайту: 
 

Архив
 сентябрь 
 2018 
пн вт ср чт пт сб вс
     12
3456789
10111213141516
17181920212223
24252627282930
Мокшане о мокшанах

Ётай пингть апак содак аф ули сай пингоньке

Районнай центрать, Рузаевкать эзда кемгафксувошка вайгяльбе вастса ащи мокшень велесь—Перхляйсь. Етат ульцянзон эзга и няйсак: велесь кода веле. Салайхть сельмованф куттне, павазуста, да мярьголень аф ашуста эряйхть ломаттневок. Но кульсак-марясак велеряйхнень азксснон, и инголет панжи велеть нинге фкя шамаликоц—тя сонь историяц.
…Инголен «Устно-поэтическое творчество мордовского народа» сборниксь. Яфиесайне сонь лопанянзон, морафтан, кодама ефкст, азкст серматфт Перхляйть колга. Синь сембе кода-бди фкя лацоннет: азкст колдуттнень, шкайхнень колга. Но мезсь пови сельмос-еньц васендакиге, тя ся, што эрь ефксса, легендаса главнай геройхне—вии ломатть. А кда сяда лацкас арьсемс ня легендатнень лангса, аф стака шарьхкодемс, што ломаттнень афкуксонь вийсна ялгаксшиса. Азкснень, ефкснень эса ломаттне сяськондезь сембе равжа вийхнень марса.
Фталу лятф кизот
Марса перхляряйхне сявозь павазу эряфть баярхнень кядьста. Арасть синць азоркс и ушедсть од эряфонь строяма. Но вов кизефкссь: кода строямс од эряф содамошифтома? Сяс тостонь эряйхне сиренек-однек озсесть школьнай партатнень ваксс.
Тейне, ня строчкатнень сермадыснонды, удалась эсь пингстонза корхнемс Перхляень школань васенце пионерхнень эзда фкять, тяни покойнайть Алексей Максимович Тингаевонь мархта. Марса мархтонза аф фкя киза работаме тостонь школаса.—Стакаль эста эряфоньке,—лятфнесь оцю стаж мархта педагогсь. Аф юкставихть и коллективизациянь, и кулаконь панцемань кизотне. Но эряфсь мольсь…
Но эстонь стака пинкнень аф содафоль, мес паньфтольхть велеста Дальняй Востоку ламоц велеряйхне. Кепотьксонди, веньгучкать сявфтольхть и прважафтольхть масторбев П.И.Польдяефнень, Кубанцефнень и ламотнень лиятнень семьясна. 1938 кизоня муворукс лувфтольхть и паньфтольхть тага колма земляконьке. Нят ульсть Попов, кона ся ичкоздень пинкнень работакшнесь колхозонь пчеловодкс, Макулов и Кизолов. Коза сявозь, мезе мархтост, кодамовок куля тянь колга апак маряколь.
Эрясть Перхляень, да аф аньцек тястонь эряйхне пяк ашуста, сембе вастова азорондась рдазсь, урматне. Кулакне сембе вийса старандасть шорямс од эряфонь строяйхненди, активисттненди, кода маштсть тиендезь эсь равжа тевснон. Но сембе сяка видешись сяськсь. Валом-валом одкс кармась латцевома эряфсь. Коль сяда кемокснесь, пуропнесь вий марстонь хозяйствась. Но народть сембе цебярь планонзон, валда арьсеманзон колазень Великай Отечественнай войнась. Седиень сязьфти тя кулясь курокста шарозе сембе масторть. Ламоц алятне и цератне тусть Родинаньконь аралама. Ниле сядода лама алявайме прважафоль войнас и Перхляй велеста, синь пялесна ашесть мрда меки—максозь эряфснон тячиень валда эряфть инкса…
Коль шуромкшнихть фронтовиконь ряттне. Но мялямста сембе сяка аф нардавихть сятнень лемсна, конат эряфонь аф ужяльдезь тюрсть кяжи врагть каршес. Лятфтасаськ эздост фкять, Отечественнай войнань I степенень, Якстерь Звездань орденонь, аф фкя медалень кавалерть Н.Н.Трякинонь. Велеса мярьгондсть теенза «Латыш». Сон, мяляфтса, азонкшнезе, што тя лемсь педсь теенза нинге войнань кизотнень, мзярда арась ялгакс латышскяй содаф писательть Соломон Эйдусонь мархта. Улендсь ингольдень фронтовиксь и Ригаса, коса васетькшнесть фронтовой ялгатне и лятфнесть толу киснон-янцнон колга. А геройти Трякинонди ульсь мезе азондомс, вдь сон машфтсь лама фашист.
Великай Отечественнай войнань герой и мокшень содаф писательть Леонид Федорович Макуловонь, кона шачсь-кассь мокшень тя велеса, брадоц Иван Макулов. Вов мезе серматф сонь колганза «Очерки истории Мордовской АССР» книгать омбоце томсонза: «Афкуксонь геройкс тюрсь фашисттнень каршес Сталинградть маласа Рузаевскяй райононь Перхляй велень эряйсь Иван Макулов. Фкя бойть пингста сонь танкац стройсоль кемнилие част. Экипажец машфтсь кемзисемге пушка, сисем танкат, кафта сятт ведьгемоньда лама фашист. Сонць Макулов стакаста ранендафоль, но тюремань паксять ашезе кадонда. Аньцек бойхнень сетьмомда меле прважафоль госпитали».
Войнаста велень сембе шумбра алятне тушендсть фронту, но ашесть вельхнев сор тишеса паксятне. Тракторонь рычакнень ваксс мирдьснон вастс озсесть аватне, шобдаста шобдас работцесть колхозонь паксятнень лангса атятне и шабатне. Пцтай сембе урожайсь прважсевсь фронту. Лятфтасаськ пара валса сятнень, кит войнань кизотнень работцесть тракторса. Шарьхкотьф, ашет ни синь шиса, но колгаст аф юкснема тяниень поколенияти. Нят К.П.Стеклянникова, М.И.Ильина, Е.И.Ильина, М.А.Исаева и лиятне.
Кизотне лиихть нармонь лаца и мрдафневихть аньцек мялямса. Афкукс, колхозса эста ашель кинди работамс велень хозяйствань техникать мархта. И кой-кодама содамошинь сатомда меле озсесть тракторс аватне-стирьхне. Содаф, лама ли тиеви авань вийти, но сембе сяка кятть ашесть ноля. Кой-коста паксясольхть шобдаста шобдас, сизсесть аф азовомшка кода, но аньцек лятфнезь, што тиендихть странати пяк эрявикс тев, и тага эрьгя сашендсь эзост.
Пара полафткст
Лядсть фталу войнань, войнада мельдень стака кизотне. Сембе вастова кярьмотьфоль мирнай трудти. Етай веконь 20-це кизотнень песта и 30-тнень ушетксста Перхляйса, кода и сембе вастова ульсь коллективизация. Ульсть тоса кафта колхост. Нят «1-я пятилетка», а меле 18 партсъездть лемса. Председателькс разнай кизотнень ульсть П.Г.Исаев, А.И.Ерофеев, П.Н.Тихонов и лиятне. Войнада меле ня кафта колхосне шовордафтольхть марс и тяфта «шачсь» «Мир» колхозсь. Реорганизациясь ашезь ета и перхляйскяй колхозть вакска. 60-це кизотнень «Мир» хозяйствась арась «Шишкеевский» совхозти отделениякс.
80-це кизотнень ушетксста пуроптфоль «Подлесный» совхозсь. Тифоль Рузаевкаста Перхляй асфальтса ацаф ки. Васенце директоркс ульсь В.Н.Ильин, меле—В.М.Лапштаев. Синь руководстваснон пингста тифоль пяк лама. А инь главнайсь—пачкодсь вели газсь, эвондась Молодежнай ульцясь, тиевсь лама лия полафткс. Кода совхозонь директорсь, стане и эстонь парткомонь секретарсь В.Н.Архипов лац содазь, што цебярь кадрафтома ичкози аф пачкодят. Сяс сембода лияда башка, оцю мяль шарфтсть кадрань кизефксненди.
—Минь васень задачаньке сянь эсоль,—мярьгсь васедемстонк В.Н.Архипов,—штоба уликс средстватнень вельде лездомс арамс средняй звенань руководительхненди и специалисттненди афкуксонь командиркс, штоба кажнайть работац отвечаль ся вешфксненди, конат путфт велень хозяйствань труженикнень инголи…
«Подлесный» совхозть сатфксонза кепсесть мяль. Но 90-це кизотнень ушетксста тефне полафтсть, хозяйствась ушедсь алубантт молема. И тевсь пачкодсь сянди, што совхозсь арась частнай предприятиякс. Но велесь, катк и ламода кирсь-шамсь, стаки эряй, ингольцекс мяляфтыхть Ерофеефнень династияснон колга, Тингаефнень, Макулофнень и ламотнень лиятнень квалма. Гордостень маряма вастокс велеряйхне лувондсазь педагокнень И.П.Пьянзовонь, В.М.Федотовать К.Н.Надоровать, Н.П.Чигиревать, Т.И.Ильинать и ламотнень лиятнень, конат сембе эряфснон лемдезь сянди, штоба велень иттнень еткса сяда лама улель разнай направлениянь специалистта. И тя теест удалсесь.
Аф фкя кемотть киза етась ся пингста, кода селкфоль велеса церькавсь. Но ломаттне седиса-ваймоса учсть, мзярда велеснон вельхксса кайгозеви церькавонь пайгсь. И сон кайгозевсь. Тяфта кармась служама Свято-Введенскяй храмсь Перхляйса. Но тя сембось афоль сатов, кда афольхть уле лездыхть. Да афи най рабочай вийса, а ярмакса. Мувсь тяфтама пара вайме ломань и Перхляйса. Тя Анатолий Андреевич Сардаев, кона шачсь-кассь тяса, кона тячемс аф явонды шачема уженянц мархта. Сонь вийсонза тифоль реконструкция ингольдень церькавти, сон лездсь и колокольнять строямаса, пайкнень повфтамаса. Тянемс ломаттне аф юкснесазь велеряйснон. Арьсян тяфта, што храму эрь сайти каяма крескя Анатолий Андреевичень шумбрашинц инкса. Пара улель, кда сяда сидеста васьфневольхть тяфтама лямбе вайме ломатть. Эста, пади, веленьковок афольхть шамонда, афольхть ляткшне целай курнят ведьфтома.
 
Н.КУБАНЦЕВА.

19.09.2013 №37

Новости

Александр Воробьев посетил новый завод по производству мороженого в Кочкуровском районе

Александр Воробьев посетил новый завод по производству мороженого в Кочкуровском районе
В рамках региональной недели депутат Государственной Думы РФ, член комитета ГД по аграрным вопросам Александр Воробьев побывал с рабочим визитом в Кочкуровском районе.
Он встретился с руководителем агрофирмы «Норов» Александром Поздняковым. «Норов» является крупным сельскохозяйственным предприятием Республики Мордовия. Это многопрофильное предприятие занимается животноводством и растениеводством, переработкой и строительством. В начале августа здесь запустили новую линию по производству мороженого.
Как отметил Александр Поздняков, было выпущено пять пробных партий мороженого. Их уже можно найти в продаже в местных магазинах. Сейчас идет выпуск фирменной этикетки, и буквально через несколько дней новое мороженое появится в магазинах Саранска и республики.
Александр Воробьев осмотрел оборудование и пообщался с сотрудниками завода. По словам заместителя директора завода по глубокой переработке Вячеслава Гузнаева, здесь будет налажено производство пяти наименований продукта: мороженое в вафельном стаканчике, маленький и большой рожки, эскимо, пломбир. Ассортимент будет постоянно расширяться.
«Новый завод – новые перспективы», - говорят молодые специалисты. Зарплата здесь составляет от 30 тысяч рублей, поэтому рабочие приезжают сюда из соседних сел и мордовской столицы.
В этот же день Александр Воробьев посетил социальный центр в селе Семилей. Он пообщался с местными жителями. В разговоре была затронута тема изменений в пенсионной системе. Депутат отметил, что Президент России Владимир Путин в своем обращении сказал, что с 1 января 2019 года предлагается начать выплаты 25% надбавки к фиксированной выплате страховой пенсии для неработающих пенсионеров, живущих на селе, со стажем не менее 30 лет в сельском хозяйстве. Эта инициатива была внесена комитетом Госдумы РФ по аграрным вопросам, и была одобрена Президентом.
31.08.2018   №
МАРСТОНЬ САТФКСНЕ КЕНЯРТЬФТИХТЬ

Ковылкинскяй муниципальнай районцта
24 августста Мордовия Республикань Государственнай Собраниять Председателец В.В.Чибиркин рабочай визит мархта ульсь Ковылкинскяй муниципальнай районца. Тяса сон ванозень социальнай, культурнай и  спортивнай  од  объекттнень, конаса пяк козя районць.
Васенда В.В.Чибиркин Ковылкинскяй муниципальнай райононь оцюнять В.И.Ташкинонь мархта ванозь Кочелаево велеса физкультурно-оздоровительнай комплексть. Эсонза спортивнай и тренажернай оцю залда, тенниснай кортта башка, тяфта жа ули тя пингонь бассейна, конаса аф аньцек уендема, но и сай пингонь рекордонь путома тонафнихть велень 200 шаба. Синдедост башка, кода бассейнаса, стане и спортивнай залса недяляти колмоксть кемокснесазь эсь шумбрашиснон Российскяй армиянь военнослужащайхне и правоохранительнай органонь сотрудникне.
30.08.2018   № 34
Шумордавсь «Шумбрат, школа!» акциясь

29 августста Саранскяйса Мокшэрзянь национальнай театраса ётась «Шумбрат, школа!» акциять финалоц. Пингстонза школьнай принадлежностень комплектт получасть Саранск ошень лафчста обеспечендаф семьятнень эзда васенце классу моли сяда стирня и цераня.
«Шумбрат, школа!» акциясь кемонь кизот моли «Единая Россия» Всероссийскяй политическяй партиять Мордовскяй региональнай отделениянц, Партиять социальнай платформанц, Мордовия Республикань Государственнай Собраниять депутатскяй корпусонц и  Саранск ошень округонь депутатонь Советть, Мордовия Республикань Населениять заняфшинц, социальнай араламань, трудонь министерствать, «Милосердиянь и шумбрашинь российскяй фонд» Общероссийскяй благотворительнай общественнай фондть Мордовскяй республиканскяй отделениянц, Мордовия Республикань Профсоюснень Федерацияснон, а стане жа индивидуальнай предпринимательхнень, предприятиятнень и общественнай организациятнень патронажснон ала.
Акциять етафтыенза кочксихть школьнай принадлежностть лафчста обеспечендаф и лама идень семьятнень эзда васенце классу моли шабатненди. Акциясь уленди республикань сембе райоттнень эса.
Национальнай театрав  пуромфнень Содамошинь малаткшни шить мархта поздравляндазень «Единая Россия» Всероссийскяй политическяй партиять Мордовскяй региональнай отделениять Секретарец, Мордовия Республикань Государственнай Собраниять Председателец В.В.Чибиркин.
—Несколька шида меле республикань школатне панчсазь эсь кенкшснон шабатненди. Мордовияса лама тиендеви образованиять виияфтоманц инкса. Панчсевихть од школат, арьсеви строямс школат нинге. Школатнень эса сембось тиф тяниень пингонь вешфкснень  коряс, иттненди макссевихть питнефтома учебникт,—мярьгсь Владимир Васильевич.
Тя шиня васенце классу молихнень поздравляндазь Мордовия Республикань Профсоюснень Федерацияснон председателец С.В.Борисов, «Новотроицкий» Агрохолдинг» ООО-ть директороц, «Единая Россия» Партиять Мордовскяй региональнай отделениянц Региональнай политическяй советонц членоц В.В.Руженков, лиятне.
Эрь идсь получась канцелярскяй принадлежностень набор, лия казнет.
Меколи ульсь «Эдельвейс» шоу-группать концертоц.
Т.Альшина.
30.08.2018   №
ШКОЛАСА ТОНАФНИХНЕНЬ КАЗЕЗЬ ПУТЁВКАСА «АРТЕКУ»

МР-нь Госсобранияса ульсь «Единая Россия» партиять и партиять патриотическяй платформанц «Здоровое будущее» федеральнай проектонц рамкаса «Вода и здоровье» Всероссийскяй акциять региональнай этапонц сяськиензон каземасна.
МР-нь Госсобраниять Председателенц заместителец Иван Москаев шарфтсь мяль сянди, што «Вода и здоровье» акциясь сявсь ушеткс 2018 кизонь январьста. Сонь итогонзон коряс—активнай участиянь примаманкса и тиф оцю работанкса—Мордовиясь тага арась примеркс Россиянь лия региоттненди. Акциять мяльса кирдезь республикаса ётась 3 тёжянть малава экологическяй урок школатнень эса и МР-нь Гигиенань и эпидемиологиянь центрать видеса. Школаса тонафнихне аруяфнезь эшинятнень и кочксезь кархчнень лихтибрятнень перьф, тиендсть исследованият ведти. Акциянь участникокс арасть Мордовиянь 387 образовательнай учреждения и 53 тёжяньда лама школаса тонафни. Акциянь «лидеркс» азфоль 2 тёжяньда лама стирня и цёраня.
И вов МР-нь Госсобранияса казезь цебярьдонга цебярьхнень. 15 «лидерсь»—Мордовияста школаса тонафнихне—казьфтольхть «Артек» идень Международнай центрав путевкаса. А кирдемок мяльса Мордовиять акцияса активнайста участиянь примаманц, сонь федеральнай штабоц макссь дополнительна 5 путевкат «Артеку». Тя недялять 13 регионцта 20 школьник молихть идень Международнай центрав 10-це сменати.
МР-нь Госсобранияса чествовандазь аф аньцек школаса тонафнихнень, но и наставникнень. «Единая Россия» партиять региональнай отделениянц Секретаренц, МР-нь Госсобраниять Председателенц Владимир Чибиркинонь Благодарностензон мархта «Вода и здоровье» Всероссийскяй акциять ётафтомаса лезксонкса казьфтольхть «Сделаем вместе!» Всероссийскяй движениять МР-са региональнай штабть членоц, штабть секретарец, Саранск ошень округонь администрациять Социальнай политикать коряс департаментть директоронц заместителец Ольга Ручина, «Сделаем вместе!» Всероссийскяй движениять МР-са региональнай штабонц членоц, РФ-нь Госдумань депутатть Василий Пискаревонь помощникоц Ольга Суродеева, министерстватнень и ведомстватнень представительсна.
30.08.2018   №
Ванфтольхть пенсионнай системать цебярьгофтоманц мархта сотф кизефксне

Ванфтольхть пенсионнай системать цебярьгофтоманц мархта сотф кизефксне
21 августста Саранскяйса «Единая Россия» Всероссийскяй политическяй партиять Мордовскяй региональнай отделениянц секретарец, Партиять Генеральнай Советонц членоц В.В.Чибиркин ётафтсь пресс-конференция. Владимир Васильевич макссь комментарийхть «Единая Россия» партиять Генеральнай Советонц и фракциянзон руководительснон Советснон марстонь заседанияснонды, конань пингста корхтамась мольфтевсь пенсионнай системать цебярьгофтоманц колга.
В.В.Чибиркинонь валонзон коряс, пенсионнай системать цебярьгофтоманц мархта сотф кизефкссь пяк эрявикс, сон таколфтсыне сембе ломаттнень. Инь оцю задачакс ащи пенсиятнень касфтомасна. Ся системась, кона ули тяни, веши лац-ряц арьсеф корректировка. Инь оцю стакась-сталмось сянь эса, што эрь кизоня пенсионерхнень лувкссна касы миллион пяле мархта ломаньда, а работайхнень лувкссна кири. Эрь кизоня Пенсионнай фонду федеральнай бюджетста поступай колма триллионда лама цалковай. Ня средстватнень улель кода нолдамс ламоц отраслятнень и структуратнень виияфтомаснонды.
Мордовияса келиста ванфоль пенсионнай системась и сонь цебярьгофтоманц мархта сотф ширетне. Тя тевса примасть участия общественностть представителенза, депутаттне, эксперттне. Поступасть предложеният, сембе синь пуроптфт марс.
Вяре азф заседанияса примафоль решения, конань эса азфоль мяль Российскяй Федерациянь Государственнай Думань депутаттнень и Федерациянь Советонь члеттнень пенсионнай сембе преференцияснонды отменань тиемать, а стане жа алятненди 60 кизонь и аватненди 55 кизонь топодемста эрь ковонь ярмаконь пандоматнень, ЖКХ-нь услугатнень инкса пандоматнень коряс компенсациять, медикаментонь рамамста компенсациять и ширень кирдемань лия мератнень ванфтомаснон коряс.
«Единая Россия» партиясь ащи сянкса, што коррупционерхнень и взяткань сявихнень кядьста сявф сембе ярмакне кучевольхть видеста Пенсионнай фонду.
Пресс-конференцияса ванфтольхть и лия кизефкст.
Т.АЛЬШИНА.
22.08.2018   №
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин