Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  
Национальная тематика

Мокшэрзянь национальнай драматическяй театрать директороц, Республикань культурань Заслуженнай работниксь Е.Н.Пулов:«МАКССЕМС ОТВЕТТ ЭРЯФТЬ КИЗЕФКСОНЗОН ЛАНГС!»

—Евгений Николаевич, кодама творческяй тефт мольфти ня шитнень Мордовиянь национальнай театрась театральнай од сезононц панжемда инголе?
—Сентябрь ковста сявомок, мзярда театрась лиссь отпускста, од вийса минь кярьмодеме эсь тевоньконди.
Васенцекс, Мордовиянь национальнай драматическяй театрась участвондась «Волга театральная» межрегиональнай фестивальса, кона етафтовсь сентябрь ковть омбоце пялестонза Самара ошса. Тостонь М.Горькаень лемса драматическяй театрать сценанц лангса минь няфтеськ «Делец» спектакльть, конань А.Толстоень пьесанц коряс путозе Мордовиянь режиссерсь Владимир Рузанов. И путозе аф кальдявста, вдь тя спектакльть инкса Мордовиянь национальнай театрась фестивальса казьфоль мянь кафта Дипломса!
 «Делец» спектакльсь, коса главнай рольхнень налхкозь минь од актероньке А.Егранов, Д.Мишичкин и актрисась Е.Исайчева, тусь ваныть мяльс. Тя няевсь сянь эзда, што 700 вастонди театрань залсь пяшксель ломаньда.
Самараста театрась тусь гастрольс Санкт-Петербургу. Тоза минь тердемазь Театрань и кинонь деятелень «Алеко» центрась. Санкт-Петербургса, Россиянь культурать столицаса, минь няфнеме спектакльхть колма шит. И аф ваномок сянь лангс, што Санкт-Петербургса лама синцень и ширде саф театрада, тостонь зрительть тейнек удалась дивандафтомс. Сяс тоса ни минь театраньконь эстокиге тердезь од гастрольс—Нижняй Новгороду.
Тяка пингть аф юкснесаськ Мордовиянь зрительтьке, конанди аноклатама од спектакль, конань мархта панчсы Мордовиянь национальнай драматическяй театрась Театральнай од сезононц.
—И кодама спектакльса  Национальнай театрась панчсы Театральнай од сезононц?
—Од сезонть театрась ушедсы 24 октябрьста «Ташта койса» спектакльса. Сянь путсы Мордовия Республикань искусствань Заслуженнай деятельсь Андрей Ермолин, конань постановканза зрительти цебярьста содафт аф аньцек Мордовияса, но и Россиянь ламоц лия регионца. Спектакльса инь няевикс рольхнень налхксазь Мордовия Республикань содаф Народнай артисттне Мария Плотникова, Виктор Гудожников и республикань Заслуженнай артисткась Тамара Весеньева.
Сяс мон надиян: «Ташта койса» спектакльсь, кона путови мокшэрзянь етай веконь драматургть Ксения Петровать пьесанц коряс,  туй зрительть мяльс. Тяста од ломаттне няйсазь, кода и кодама эряфса эрясть ингольдень мокшэрзятне.
—Сезонть панжевомда меле, коза моли гастрольс и кодама фестивальса ерай няфтемс мокшэрзянь искусствать национальнай театрась?
—Тяни Мордовиянь национальнай драматическяй театрать репертуарса 20-да лама спектакль, конат путфт мокшэрзянь, финно-угорскяй лия народонь и рузонь драматуркнень пьесаснон коряс. Тяда башка, репертуарсонк тяфта жа лама спектакльда, конат путфт мокшэрзянь фольклорть коряс. Сяс и оцю, и емла зрительти ули мезе ваномс национальнай театраса.
Гастрольхнень колга. Кода мон азыне тяда инголе, минь Санкт-Петербургса тердемазь Нижняй Новгороду. И мон надиян: Од кизоть самс, мярьктяма, декабрь ковста, няфтьсаськ тоса мокшэрзянь национальнай театральнай искусствать. Од кизода меле арьсетяма етафтомс гастрольхть Альметьевск, Бугульма, Казань ошса и эздост маластонь аймакса. Кода содаф, тоса эряй мокшэрзянь оцю диаспора. И тостонь мокшэрзятненди, арьсян, пара ули ваномс спектакльхть, конаса актерхне корхтайхть и морайхть мокшень и эрзянь кяльса.
А тяда меле ни национальнай театрась одуряд моли гастрольс Санкт-Петербургу. Сяс мес кода няфтезь тяда ингольдень гастрольхне, мокшэрзянь национальнай театральнай искусствась тушенды тостонь зрительть мяльс. Аф ваномок билеттнень сатомшка оцю питнеснон лангс, зрительсь пяшкотькшнезе залть эрь спектакльса. Сяс минь саме мяльс тиемс тоса сяда кувака гастрольхть, штоба кочкамс средстват од постановканди. Инь мяльс туфть эздост ератама няфтемс «Майатул» финно-угорскяй народонь театрань Международнай фестивальса. Сон етай сай кизонь октябрьста Ижевск ошса.
—И кодама од постановкаса, Евгений Николаевич, ерай кеняртьфтемс зрительть национальнай театрась?
—Од спектакльхне путовихть мокшэрзянь, финно-угорскяй и лия народонь драматуркнень пьесаснон коряс. Эсост зрителеньке няйсыне тя пингонь эряфть сембе ширензон. И надиян: сон муй спектакленьконь ваномста ответт кизефкснень лангс, конатнень путнесыне инголенза эряфсь!
—Спасиба.
В.НЕСТЕРОВ.

10.10.2013 №40

Новости

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021   № 14
МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

7 апрельста  республикать столицаса С.Д.Эрьзянь лемса изобразительнай искусствань республиканскяй музейса ётафтовсь «Мокшэрзянь мифология» энциклопедиять презентацияц.

 

Тя академическяй трудть пцтай 20 кизоста аноклазь Мордовия Республикань Правительствать видеса гуманитарнай наукань НИИ-нь и  республикань лия  инь содаф учёнайхне, а тяфта жа художникне, редакторхне и техническяй сотрудникне. Энциклопедияти сувась мокшэрзянь народонь национальнай мифологиясь, кона эвондась аф фкя тёжянь кизода инголе и кона эряй модать лангса лама-лама тёжянь киза.

 

«Мокшэрзянь мифология» энциклопедиясь нолдаф 300 экземплярса, конатнень эзда 280 экземплярсь максф Российскяй Федерациянь государственнай, образовательнай организациянь и научнай учреждениянь библиотекатнень фондс.

 

15.04.2021   № 14
ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021   № 13
ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021   № 13
АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021   № 13
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин