Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  
Спорт

СПОРТСЬ И ФИЗИЧЕСКЯЙ КУЛЬТУРАСЬ МОРДОВИЯСА АСЬКОЛЯЙХТЬ КЕЛИ АСЬКОЛКССА

Российскяй Федерациянь Правительствась оцю мяль шарфни странань региоттнень эса спортть виияфтоманцты. Башка васта тя тевса занци «Российскяй Федерацияса физическяй культурань и спортонь виияфтомань 2006-2015 кизотненди» федеральнай целевой программась, кона 2006 кизонь 11 январьста примафоль Правительствать Постановлениянц коряс. Программаса васенцекс ащи ся, кода обеспечендамс велень райононь эряйхнень тяниень пингонь спортивнай сооруженияса и тиемс семботь, штоба странань эряйхне улельхть ялгакс спортти и вятельхть шумбра эряф.
Мордовиясь арась васенце регионкс, кона примась участия вяре азф программать и «Российскяй Федерацияса футболть виияфтоманц» подпрограммать эряфс етафтомасост. Программать мяльса кирдезь, 2006-2010 кизотнень республикасонк строяфоль 100-ть малава объект—лама функциянь залхт (синь улихть пцтай эрь райцентраса), стадиотт, Ледовай Дворецт, бассейнат. Кой-конатнень лаца аш лият марнек мирса-масторса. Кепотьксонди, республиканскяй Лыжно-биатлоннай комплекссь, 2010 кизоть ушетксста панчф ВМХ-велоспортть коряс центрась. Вельхкс ала велодромсь—уникальнай, лацонза лия аф муят аф аньцек Европаса, но и целайнек мирса-масторса. Республикать столицаса строяф «Мордовия» спортивнай комплекссь, кона лувондови республикань спортивнай эряфонь афкуксонь центракс.
Спортти пяк оцю мялень шарфнемать и эрявикс сембе условиянь тиемать вельде кизоста кизос касы спортть мархта ялгакс арай ломаттнень лувкссна. Можна мярьгомс, Мордовиясь моли инголи странань пцтай сембе региоттнень коряс. Тяда башка, физическяй культурать и спортть инкса ламода удалси инголдамс и машфтомс винада симомать, наркоманиять, ладямс шумбра-таза эряф.
Тяниень пингть Мордовияса стаки етафневихть эряфс программась и подпрограммась, конатнень колга лятфнеме тя материалть ушетксста.
Аф кржа спортивнай объект строяфоль Мокшэрзянь народть Российскяй государствань нароттнень мархта ладязь эрямаснон 1000 кизоть топодеманц мяльса кирдезь. Нинге тя оцю юбилейти анокламста аф весть сашендовсь кулендемс, што ся, мезсь строяви 1000 кизоть мяльса кирдезь, строяви лама лама кизонди. И тя афкукс тяфта. Ломаттне, конат якайхть ня спортивнай объекттненди, кенерсть ни шарьхкодемс синь эрявиксшиснон, сяс оцю мяльса серматфнихть пря секциятненди, вятнесазь тоза идьснон, пачфнихть тянь квалма содафснонды… Лиякс азомс, мокшэрзянь масторса физическяй культурась и спортсь арсихть массовайкс, мезсь аньцек кеняртьфти. Тячи нинге весть лятфтасаськ кой-кона спортивнай объекттнень, конатнень вельде тя удалси сатнемс.
«Мордовия» спорткомплекссь
 (Саранск ошса).
«Мордовия» спорткомплексса тренажернай кафта залхт, трибуна мархта универсальнай зал, конань, кда эрявксты, ули кода тиемс концертонь залкс, боксонь, фитнесонь залхт, ласькомань манеж, тренировкань, художественнай гимнастикань залхт, бассейна.
ВМХ-велоспортть коряс центрась
 (Саранск ошса).
ВМХ-трассать кувалмоц 360 метра. Эсонза улихть анокламань техническяй сембе средстватне, вельхкс ала велодромса етафневихть учебно-тренировочнай занятият.
Физкультурно-оздоровительнай
комплекссь (Рузаевка ошса).
Лама функциянь залса ули кода етафнемс тренировкат, волейболть, баскетболть, мини-футболть, шра лангонь теннисть, тяжелай атлетикать коряс пялькстомат.
Лама функциянь залсь (Торбеевскяй райононь Татаронь Ювня велеса).
Лама функциянь залса етафневихть тренировкат, шумбрашинь пети занятият, пялькстомат спортонь ламоц виттнень коряс.
Кода няйсаськ, массовай спортсь и физкультурась кочксихть вийхть аф аньцек Саранскяйса, но и республикань сембе райоттнень эса.
Аф кржа спортивнай объект петеви и нолдави тевс маластонь пингть. Мордовиясь нинге и нинге весть кемокснесы сянь, што сон—спортонь республика, кона тяни учсы Олимпийскяй толть саманц. Эстафетась мокшэрзянь мастору пачкоди 2014 кизонь январьста.
Материалть анокламста оцю лезкс макссь Мордовия Республикань Спортонь и физическяй культурань министерствать пресс-службац.
Материалть аноклазе Т.АЛЬШИНА.

14.11.2013 №45

Новости

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019   № 17
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин