Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  
Спорт

Денис Нижегородов: «ФАКЕЛТЬ КАНДОМАЦ ТЕЙНЕ—ОЦЮ ГОРДОСТЬ!»

«Мокшень правдать» мекольдень номеронзон эса аф весть пачфнеме «Сочи—2014» Олимпийскяй толонь эстафетать Саранскяи пачкодеманц колга. Тя событиять участниконзон еткса Мордовиянь ламоц содаф  ломаттне. Фкясь эздост—Олимпийскяй налхкомань кафтонь-крдань призерсь, Россиянь спортонь Заслуженнай мастерсь Денис Геннадьевич Нижегородов. Аф кунара корреспондентоньке васьфнесь марнек мирса-масторса содаф спортсменть мархта и эняльдсь отвечамс кизефксонзон лангс.
—Денис Геннадьевич, сембе, кинь ульсь мялец арамс Олимпийскяй толонь кандыкс, заявкасост сермадсть, мес теест ули кода тянь тиемс. Мезе тяштеть тон?
—Весть тейне гайфтсть Спортивнай якамать коряс Мордовия Республикань Олимпийскяй подготовкань (В.М.Чёгинонь) центраста и азозь, што кочкавихть толонь кандыхть. ЦОП-ть эзда аф кржа спортсмен азсь мяль примамс участия эстафетаса. Етксостолень монга. Заявлениясон «Мес тейне ули кода арамс факелонь кандыкс?» кизефксть лангс отвечань «Сяс мес мон—олимпийскяй налхкомань призеран». Целайнек, тя лувксса стама ломатть, конат тевснон мархта лама тисть Мордовияти, спортть касоманцты-виияманцты.
—Саранскяйть кодама ульцяванза кандсак толть?
—Ня шитнень электроннай почтазон сась серма, коса сембось лац-ряц азф. Мон кандса Олимпийскяй толть Саранскяй ульцява. Максови эрявикс экипировка. Этапозень номероц 21. Нинге серматфоль, што ули кода тердемс содафоньконь, ялганьконь Мордовиять историяса тя оцю событиять ванома.
—Тон—Олимпийскяй толонь кандыят. Улема, ламос арьсеть тянь колга. Ули-аш ваймосот таколдома?
—Мзярс аф пяк таколдан. Лятфнеса, кодама мяльне-арьсемане ульсть Казанень Универсиадать толонц кандомста. Пара мялезон, мес лемозе сувафтф факелоносецнень еткс. Улема, ваймосон таколдомась касы эста, мзярда Олимпиадать толоц сядонга малады Саранскяйти.
—Эряфсот кодама сатфксцень инкса марять гордость?
—Сембода оцю гордость марян Грециянь Афины ошса Олимпийскяй налхкоматнень инкса, коса сатыне омбоце вастть. Тяда инголе арань Россиянь чемпионкс. Сиянь медальда меле ушедонь  надияма эсь лангозон.
—Кода ванат спортса соперникнень лангс?
—Эсь соперниконень уважандасайне. Ламотне эздост эсь командастонк. Якамать коряс странаньконь школац—инь виись, сяс сембе минь—фкя семья лаца.
—Лятфтак, пожалуйста, кода эсот шачсь спортти кельгомась?
—Спортти мяль шарфнема ушедонь нинге шабакс, сяс мес шачень спортсменонь семьяса. Алязень оцюфт сатфксонза ласькомаса. Сон тонафтомань спортть кельгома и 18 кизоса вятемань тренерти В.М.Чёгинонди. Эряви азомс, ушеткшнень ласькомать эзда. Виктор Михайлович азсь мяль, штоба варжалине вийнень якамаса. Тяфта, аф эряскодозь, тонафнезь ушедсь спортивнай «эряфозе».
—Ули-аш мяльце, штоба идце—стирце Настя кельголезе спортть?
—Улян павазу, кда Настя арай ялгакс спортти. Но шабать вятнема лама секциява, штоба шарьхкоделезе, мезсь теенза сембода мала. Профессиональнай спортсь—тя аф кельгома тев, а стака, пяк стака работа.
—Спасиба.
 
И.ПЯТИНА.

14.11.2013 №45

Новости

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

20 октябрьста Саранскяйса Культурань Республиканскяй дворецса ушедсь мокшэрзянь масторса фкя инь кельгови илась—«Шумбрат, Мордовия!»—«Vivat, Чемпионат!» народнай творчествань республиканскяй фестивальсь. Тядде сон етафтови комсь кафтувоцеда и лемтьф 2018 кизонь футболть коряс Миронь чемпионатти. Тяддень фестивальть девизоц—«И тя сембось сонь колганза».
Кода фалу, ковда ламос Культурань Республиканскяй дворецса кармайхть етнема муниципальнай райоттнень и Саранск ошень округть отчетнай концертсна, а стане жа «Мокшэрзянь масторть мастерствац» декоративно-прикладной и изобразительнай творчествань выставкатне.
Ваныхненди ули кода няемс инь цебярь творческяй коллектифнень, артисттнень выступленияснон, содафтомс народнай мастерхнень работаснон мархта.

25.10.2018   № 42
Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018   № 40
Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018   № 39
 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин