Поиск по сайту: 
 

Архив
 ноябрь 
 2018 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Мокшане о мокшанах

КУТТНЕ АФ ФКЯ ЛАЦОТОЛЬХТЬ

Мокшэрзятненькудсна, эряма вастсна векста векс пяк полафнесть. Кунара ульсть модати шувф эряма вастт, землянкат, тоса валом-валом ломаттне кеподезь эряма вастснон вяри, пачкодсть куттненди. Эряма куттневок аф фкя лацоннетольхть. Сяда сире пинкнень ульсь фкя куд.
Коса вирьхть ашельхть, ашель мезьста шапомс сруб, мордвась тиендсь севонень и саманонь кутт.
Пингонь етазь кармасть путнема кутт кудонголь мархта. Кудботмось ушневсь, тоса лямболь, тоса эрясть, кудонголе кельмоль, тоса кирдезь эрь мезьснон.
Тяда меле кудонгольть вастс кармасть тиендема нинге фкя лямбе эряма куд. Мокшетне лемдезь сонь фталуце кудкс. Сувама вастть тиендезь коса-кода, мокшетне фталуце кудти петфнесть нинге кудонголь.
Сяда тов мокшэрзятне кармасть путнема колма кутт. Тяфтамот путнесть сят, кинь касондсь семьясна, кинди кафта куттне ашесть сатне ни.
Потма ширде мордовскяй куттне аф фкя лацоннетольхть. Тя ащесь сянь эзда, коза путфоль пянакудсь, косоль шкай ужесь и кенкшсь. Шкай ужесь аф пянакудть ингольденнесь, а кона эздонза ащи кержи шире. Пянакудсь путневсь фталуце кудть фкя ужезонза. Мокшень куттнень эса пянакуд кургсь лияста ванць кенкшть шири.
Кунардонь пинкнень мокшень и эрзянь куттнень эса озсема вастонди путневсть кувака скомнят. Мокшень эряма кудса ульсь, тяфта лемневи, кершпяль. Тя доскаса ацаф кепотьф васта, серец 35-36 сантиметра, сон латцевсь пянакудть эзда стенать шири, тяза ацсесть васта удомс.
Пянакудть инголе стенать кувалмова латцевсь мрга эземсь. Эземть ала тиендевсь кядьгонянь путнема васта, конанди мокшекс мярьгольхть потмар. Лия стенать кувалмова латцевсь сяда кели озсема васта—эзембря. Эзембряв аф аньцек озсесть, тяза ацсесть васта удомска. Пянакудть инголе стенати вяри повфнесть лапаня, тозонга марсевсть кядьгонят: куцюфт-месть и стак тов.
Кудбрять, фронтонть, карнизть, вальмятнень и наличникнень мокшэрзятне кармасть тиендемост ни руснень коряс. Сидеста кудбрятнень вельхнезь дранкаса и тёсса. Ламотне вельхневсть шужярьса.
Мзярда кармасть тиендема стропилань кудбрят, кармась полафневома сонць вельхксське. Ингольдень шужярть, тёсть, дранкать вастс тусть сяда нарде вельхтямбяльхть—севонень черепица, жесть, толь, рубероид, шифер. Тяфтамоса вельхнесазь мокшэрзятне кудбряснон тянивок. Эрь кудть архитектурац, уша ширдень мазопнемац ащесь сянь эзда, кодамоль азорсь. Козя сон, аф пяк козя или ефси ашу. Кудть уша ширдень мазышиц ащесь велень плотникнень маштомошиснон эзда. Кудть эсь лацоннекс тиендезь вальмя наличникне. Васенда ульсть виде досканяста тиф наличникт, лангсост ашельхть кодамовок узорхт.
Мокшэрзятнень кудтост, кардтост и утомдост башка, ульсть нинге серонь косьфнема и ванфтома вастсна. Ульсть и пулфонь косьфнема вастт, стяфневсть стяда олкт, потмоса шувондовсь лотка, тоса крьвясневсь тол, эздонза моли лямбось косьфнезень пулфнень.
Переса, эрьхке или ляй трвав путнесть банят. Банятнень шапондозь шочкста, ульсть синь киякссна и поталаксна. Баняти петфтафоль тесонь или илиста кодаф баня кудонгольня. Банятнень трубасна ашельхть. Эсост аф аньцек парьсесть, но и етафневсть эрь кодама койхть, обрятт. Баняса шачфнесть итть,  пчкафнесть разнай урмат.

10.01.2014 №1
 
 
 

 
НОВОСТИ
 

УШЕДСЬ «Шумбрат, Мордовия!»—«Vivat, Чемпионат!» ФЕСТИВАЛЬСЬ

25.10.2018  № 42
 
 
 

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018  № 40
 
 
 

Республикань предприятиятнень продукциясна пачфневи миронь 80 странас

Пяденцяста, 28 сентябрьста, Мордовия Республикань Оцюнясь В.Д.Волков примась участия торжественнай пуромксса, кона лемтьфоль Машиностроителень шити. Мероприятиясь етась Рузонь Государственнай драматическяй театраса. Залу пуромкшнесть республиканскяй предприятиянь представительхне, отраслянь ветераттне.
Пуромфнень поздравляндамста В.Д.Волков лемдезе машиностроениять республикань экономикать  седикс и моторкс, вдь сонь эздонза ламода ащи лия сфератнень работасна.
Азфоль, што тяддень кафкса ковста промышленнай производствань индекссь арась 111 процент. Странаса тя фкя инь цебярь показательсь. 2018 кизоня республикаса нолдаф 119 миллиард цалковаень питнеса промышленнай продукция, мезсь 13 процентта сяда лама мелянь кизоть коряс. Республиканскяй кемготува предприятиятнень эса эряфс етафневихть производствать  келептеманц и одкстопнеманц коряс проектт. Касонды инновационнай продукциять лувксоц. Производствань марстонь объемть эса сонь талекац—29 процент. А тяфтама отраслятнень эса, кода электроннай и оптическяй изделиянь производствась, тя показательсь пачкодсь 77 процентс.
04.10.2018  № 39
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин