Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Мокшане о мокшанах

АСУШИЦ КАСЫ НАЦИОНАЛЬНАЙТИ КЕЛЬГОМАТЬ МАРХТА

Содаф, што тяниень пингть ламоц иттне, од ломаттне шарфнихть оцю мяль компьютерти, Интернетти, тостонь налхкшненди, социальнай сеттненди. Но кеняртьфти ся, што аф сембе. Улихть оттнень еткса стамот, конатнень ваймосна венеми атяньконь-бабаньконь койснонды-обуцяснонды, старандайхть касфнемс содамошиснон синь эряфснон-ащефснон, кяльснон, культураснон вельде. Ирина Морозова тонафни Саранск ошень 9№ школаса котоце класса. Теенза кемгафтува киза. Аф ваномок тянь лангс, кунара ни арьсесь сай пингонь профессиянц колга. Стирнять оцю мялец арамс национальнай кялень и литературань учителькс. А мокшень или эрзянь кялень—нинге ашезе арьсе. Вдь кафцьке кяльхне теенза кельговихть и малат седити. И тя сяс, мес тядяц национальностьс коре эрзява, Атяшевскяй, а аляц—мокша, Инсарскяй районцта.
9№ школаса тонафневи эрзянь кяльсь. Учительницась Н.А.Кочеваткинась стирнять колга азонды аньцек шнама валхт. Урокнень пингста вятьсы прянц пяк активнайста, фалу анок лисемс доскати. Максси учительницати лама кизефкс, конат сотфт национальнай кяльть, историять и культурать мархта. Эвондакшнихть синь сяс, мес Ирина урокта башка сонць лувонды специальнай литература мокшэрзятнень колга. Вов и кой-коста стирняти аф шарьхкодеви тя или тона вастсь. Тонафтысь оцю мяльса отвечси стирнять кизефксонзон лангс.
Ирина Морозовась кельгсыне мокшэрзянь щапнень-каряпнень. Энциклопедиятнень-меснень эса ванондсыне сядонгольдень панархнень, инголькснень, коняфкснень, кямотнень, карьхнень и стак тов. Ингольдень щапнень эса ламось полафтсь. Тяниень панархнень эса, можна мярьгомс, ашезь ляда мезевок ингольденнетнень эзда. Но мзярдонга аф юмай мокшэрзянь панархнень эса мазы якстерь тюссь и орнаментсь.
Тяда башка, Ирина оцю мяльса якай театральнай и кштимань кружокс. Театральнайса путневихть мокшэрзянь сценкат национальнай кяльса. Сембонь эса Ирина примси участия. Кштимань кружокса тонадозень эрзянь и мокшень пцтай сембе кштиматнень. Маштомошинзон няфнесыне школьнай сембе концерттнень и мероприятиятнень эса. А эрзянь кялень и литературань «панжада» урокса сон фалу васенцесь. Лезды учительти ладямс-арьсемс план урокти.
Ирина Морозовась маряй гордость мокшэрзянь масторть инкса. Аф сёпондсы национальностенц. Тядянц, Татьяна Владимировнань мархта, сидеста якайхть ваймама лямбе шири. Тоса етафневихть концертт. Ирина Морозовась аф виздезь няфнесы пуромфненди маштомошинц—мокшэрзянь кштиматнень и кайги, мазы вайгяльса морсесыне мокшень и эрзянь сиде моронятнень.
Сяда тов Иринань ули оцю мялец улемс участницакс Мордовиянь кодамовок ансамбльса. Тянди маштомошит пуропни шиста шис. Надиятама, што стирнять сембе мяленза-арьсеманза пяшкодевихть.
 
Л.НИКОЛАЕВА.
 

30.01.2014 №4
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин