Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Спорт

М.Е.ЕВСЕВЬЕВОНЬ ЛЕМСА МГПИ-сь САФТСЫ ФУТБОЛСОВОК!

Мекольдень кизотнень Мордовияса спортти шарфневи пяк оцю мяль. Спортсменоньконь сатфксснон инкса марятама оцю гордость. Аф кальдявста пряснон няфнесазь и футболистоньке. М.Е.Евсевьевонь лемса Мордовскяй государственнай педагогическяй институтонь «МГПИ-Мордовия» футбольнай командать оцю путксоц республикасонк футболть виияфтомаса. Аф кунара «Мокшень правдать» корреспондентоц васьфнесь тя командать тренеронц И.В.Шинкаренконь мархта, кона отвечась кизефксоньконь лангс.
—Игорь Владимирович, мзярда ушедозе кинц «МГПИ-Мордовия» футбольнай командась?
—Сон пуроптфоль 2011 кизоня. Тяда инголе институтса ульсь футбольнай команда, но сон пуромкшнесь шуроста. Аньцек эста, мзярда эрявсь примамс участия кодамовок пялькстомаса. А стама команда, конань улельхть тяфтама сатфксонза, ашель. Эряви азомс, МГПИ-са ульсть асу футболистт, конат налхксть лия командаса. Мзярда сань тоза работама, цератне, конатнень тренировандайне нинге школаса тонафнемстост, аньцек поступасть тя вузу.
—Азонтт «МГПИ-Мордовия» футбольнай командать сатфксонзон колга.
—2013 кизонь 18-27 сентябрьста Санкт-Петербургса етась вуснень еткса футболть коряс Россиянь Первенствать Финальнай турнироц, коса сатоськ нилеце вастть. Койсон, тя пяк цебярь результат. Вдь Финалса пялькстсь кемготува команда. Тяда инголе синь сяськсть зональнай этапнень эса. Российскяй Первенствань кити тейнек цебярь стартокс арась Мордовиянь вуснень еткса республиканскяй пялькстоматнень эса сяськомась. Июньцта примаме участия футбольнай турнирса, кона етась Казаньца. Тоса заняськ омбоце вастть и тертьфтолеме Финалти.
—Мезьста и коса ушедыть тренеронь тевцень?
—Тренеран нильгемонь киза. Тя тевть ушедыне Ухта ошса студенческяй футболста тостонь Индустриальнай институтса. Сяльде сань Саранскяи, коса арань Н.П.Огаревонь лемса Мордовскяй государственнай университетть футбольнай команданцты тренеркс. Мархтонза 1986 кизоня араме чемпионкс. Тернемазь «Светотехникав» тренеркс, атказань, но кафта кизода меле мяльне полафтсть, сяс примайне тя тердемать. 1995 кизоня пуроптфоль «Биохимик» командась, кона мольфтезе тевонц кемонь кизот. Сяда меле тренеролень «Амкар» и «Крылья Советов» футбольнай клупнень эса. Сяльде мрдань Мордовияв.
—Кода ладявсь эряфце мокшэрзянь масторса?
—Тяни главнай тренеран Од футболистонь анокламань межрегиональнай центраса. Ламоц воспитанниконе налхкихть Россиять сборнайсонза. Центрать васенце задачац—анокламс футболистт Мордовиять главнай команданцты.
—Кирдят-аф соткст ся налхкихнень мархта, конат тяни лия командасот, кепотьксонди, Россиять сборнайсонза?
—Мархтост няенттяма, гайфнетяма фкя-фкянди. Пара мялезон, мес «касфтонь» тяфтама асу ломатть.
—Мзяра кизоста сявомок приматада ширезонт од футболистт?
—Сявондьсаськ кота кизоста сявомок шабатнень. Ламотне эздост курокста няфнесазь эсь пряснон цебярь ширде. Васенце тевсь, кона ащи инголенк—ётафтомс синь «юнай» футболть эзда оцювоннети.
—Кодапт мяльхне-арьсематне сай пингонь футболть коряс?
—Лама корхнетяма сянь колга, што Мордовияти эряви профессиональнай омбоце командась, кона налхколь омбоце лигаса. Кемонь воспитанниконе налхкихть омбоце лигаса лия региоттнень эса. Синь ули кода пуроптомс марс, кочкамс нинге мзярошка перспективнай од ломань, тердемс оцю опыт мархта колма-ниле мастер и, арьсян, тейнек тя удалай.
—Спасиба.
И.ПЯТИНА.

16.01.2014 №2
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин