Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Наука и жизнь

Мордовиянь Правительствать видеса гуманитарнай наукань НИИ-ть директороц, Российскяй Федерациянь наукань Заслуженнай деятельсь, историческяй наукань докторсь, профессорсь В.А.Юрчёнков:

«РОССИЯТЬ ИСТОРИЯНЦ ИНКСА МАРЯН ГОРДОСТЬ!»
 
Россиянь Президентсь В.В.Путин 2012 кизонь декабрьста странань историкнень инголи путсь задача сермадомс школатненди Россиянь историянь стама учебникт, конатнень эзда школаса тонафнихне фкя лаца шарьхкоделезь, кода эвондась и касондсь Российскяй государствась.
Тя кизонь 16 январьста В.В.Путин нинге весть васетькшнесь Российскяй историческяй обществань ученайхнень мархта, конат аноклазь Россиянь историянь учебникнень концепцияснон. И нинге весть серьгядезень учёнайхнень сермадомс школаса тонафнихненди историянь стама учебникт, конатнень лувомда меле шабатне цебярьста шарьхкоделезь, кодама великай странаса синь эряйхть.
И минь надиятама: Россиянь Президентть вешфксоц странань историкненди марстонь вийса пяшкодеви. Сяс мес, Российскяй историческяй обществань ученайда башка, ниле ковста, мзярс мольфтевсть корхнематне Россиянь историянь учебникнень концепцияснон квалма, сонь колганза эсь мяльснон тяфта жа азозь региональнай историкне, учительхне, религиознай конфессиянь и общественнай организациянь деятельхне.
Миньцонк, Мордовия Республикаса, Россиянь историянь учебникнень концепцияснон коряс пуромксне, коса региональнай историкне, религиознай и общественнай деятельхне азозь сонь колганза эсь мяльснон, етафтовсть республикань Правительствать видеса гуманитарнай наукань НИИ-са. Сянь колга, кодамкс ня пуромксонь ломаттнень мяльснон коряс эряви улемс Россиянь историянь учебникненди, тячиень номерса азонды НИИ-ть директороц, Российскяй Федерациянь наукань Заслуженнай деятельсь, Всероссийскяй военно-историческяй обществать региональнай отделениянц председателец, Мордовиянь общественнай палатань сопредседательсь, историческяй наукань докторсь, профессорсь В.А.Юрчёнков.
 
—Сермадомс Россиянь историянь од учебникт, конатнень коряс тя пингонь школаса тонафнихне ушедольхть содама эсь Отечестваснон историянц стамкс, кодамкс сон ульсь афкукс, эсонк кошарды сонць пингсь!
Варжаксттама, кепотьксонди, етай веконь 20-це кизотнень опытснон лангс. Эстовок вятевсть дискуссият, кодамкс эряви няфнемс од поколениятненди Россиять историяц. И тяда меле школаса и мянь высшай учебнай заведенияса Россиять историянц ушедсть тонафнема «Русская история в сжатом очерке» фкя учебниконь коряс, конань сермадозе профессорсь М.Н.Покровский. И кода минь шарьхкодьсаськ, тя учебникса Россиять тяда ингольдень историяц азондовсь-няфневсь аф сяшкава видеста и аф педа-пес.
Эсонза, мярьктяма, мезевок ашезь азондов государственнай реформатнень колга, конатнень эсь пингстонза етафтозень эряфс оцязорсь Иван Грознай. Но тяка пингть келиста азондовсь шабатненди и студенттненди: кле, Иван Грознаень мянь кафксоль рьвадонза. Тяфта жа мезевок тя учебникса ашель серматф Пётр Перваень реформанзон и сатфкснень колга, конатнень сонь оцязорондаманц пингста сатозень Россиясь. Но серматфоль: кле, тя оцязорсь кулось «визькс» урмада. Ульсть ня учебникса лия ешмотка, конатнень вельде тонафнихне вятневсть тяфтама мяльс: кле, Россиянь тяда ингольдень историяса пцтай мезевок цебярь ашель.
Но етай веконь 30-це кизотнень ушетксста, мзярда СССР-са ушедсь модернизация, государствась полафтозе ванфонц Россиять тяда ингольдень историянц лангс. И 1932 кизоня серматфоль Россиянь историянь од учебник. Эсонза ламода сяда крхкаста и видеста няфтьфтольхть историческяй пцтай сембе деятельхне и процессне, конат тиезь-касфтозь Российскяй Империять!
Етай веконь 90-це кизотнень ушетксста государствать ванфоц странаньконь тяда ингольдень историянц лангс оду полафтсь. И Россиянь пцтай эрь университетсь или институтсь ушедсть синць сермадома Россиянь историянь учебникт, конатнень эса странать тяда ингольдень эряфонц колга сермадсть стане, кода маштсть. Ламотне ня «историческяй труттнень» эзда нолявсть Американь миллионерть Соросонь и омба масторонь лия финансисттнень ярмакснон лангс… Тевсь пачкотькшнесь мянь сянди, што Россиянь «историянь учебникт» эста ушедсть сермадома философт, писательхть, журналистт, школань учительхть…
Но тя пингсь етась. И тячи Россиять государственнай идеологияц полафтсь, сяс мес инголенза тага стясь модернизациянь кизефкссь. Тячи эрявихть историянь и литературань од учебникт, конат кемоксталезь Россиянь лама нациянь народть странасонк сембе ширдень модернизациять етафтомста.
—Валерий Анатольевич, кода мон шарьхкодихтень, Россиянь народти ня пинкнень эрявихть историянь и литературань стама учебникт, конат максольхть теенза идеологическяй и морально-нравственнай нежет.
—Афкукс тяфта. Сяс мес козовок аф кондясти, мзярда етай веконь 90-це кизонь историянь и литературань учебникса мезевок аф азондови Зоя Космодемьянскаять и «Молодая гвардия» од ломаттнень подвигснон колга. А синь и СССР-нь лия геройхнень эряфснон и тевснон инкса марясть гордость миньцонк лама поколения. Сяс сась пинге, мзярда тейнек, научнай и лия общественностти, марстонь вийса эряви тиемс семботь, штоба историянь и литературань од учебникне няфнелезь Россиять историянц стамкс, кодама сон ульсь афкукс. Кода мярьгсь Россиянь Президентсь В.В.Путин, тя тевсь—марстонь тев. Сяс странасонк историянь од учебникнень концепцияснонды сувасть войнань и трудонь ветераттнень, общественнай и религиознай конфессиянь организациятнень и, конешна, федеральнай и региональнай историкнень мяльсна-арьсемасна.
—Мордовиянь научнай и лия общественностсь кодама мяльхть-арьсемат сувафтсь Россиянь историянь од учебникнень концепцияс?
—Всероссийскяй военно-историческяй обществать региональнай отделениянц пуромксса минь ламос ванондоськ историянь учебникнень концепцияснон, кона аноклафоль федеральнай уровеньца. Вете частт минь спорсеме и «сялонкшнеме» сянь коряс, мезе эряви сувафтомс эсь ширденк концепцияс. Итоговай документса, конань кучеськ Москуву, минь аф аньцек азоськ эсь мяленьконь историянь од учебникнень концепцияснон коряс, но и сувафтоме тоза конкретнай предложеният.
Мярьктяма, концепцияс сувафтфт декабристтне, но ашет Герцен и Огарев. И мезевок аф азондови синь общественно-политическяй тевснон колга. Кда тянь кадомс тяфтак, эста школаса тонафнихненди аф шарьхкодеви, коста сявовсть Чернышевскяй, народоволецне… Тяда меле, концепциять коряс, большевикнень партиясна эвондась аньцек 1917 кизоня. А тя вдь ефси аф тяфта.
Лиякс мярьгомс, кой-кона вастса колафоль историческяй тефнень касомань-вииямань логикасна. И минь тянь, кода маштоме, петеськ.
—Валерий Анатольевич, сидеста историкнень, политолокнень, писательхнень и лия содаф ломаттнень кургста сашендови кулемс: кле, Россияса тя и етай пингонь поколениятнень еткса сязевсть историческяй и морально-нравственнай сотксне. И сязевсть синь, кле, сяс, мес тя пингонь од ломаттне кальдявста содасазь Россиять афкуксонь историянц. И мянь аф шарьхкодьсазь, кодама странаса синь тячи эряйхть.
Тонь койсот, Россиянь историянь од учебникненди удалай машфтомс ня прябалатнень?
—Мон афолень мярьге, што сембе сотксне поколениятнень еткса Россияса сязевсть.
Кепотьксонди, историческяй наукаса и етай веконь 90-це кизотненьге сермадсть Россиять историянц квалма историческяй документтнень коряс. И мянь кепсесть историческяй од темат, конатнень колга историкне тяда инголи ашесть сермада. Мярьктяма, ГУЛАГ-ть афкуксонь историянц квалма. Фкя тев лувомс сянь, мезть сермадсь сонь колганза А.Солженицын. И ефси лия тев лувомс сонь колганза сянь, мезть сермадсь архивнай документтнень коряс профессиональнай историксь. И минь тячи содасаськ, што писательсь, аф содамок историческяй документтнень, пяк и пяк касфтозе ГУЛАГ-онь заключеннайхнень лувксснон. И, тяда башка, няфтезе СССР-ть эсь романонзон эса кодама-бди монстркс.
Тя пингонь историкне эсь трудсост няфнесазь, што тя ефси аф тяфта!
Тяконь эряви азомс и «голодоморть» колга, конань, кле, етай веконь 30-це кизотнень пингста Украинаса тиезь Сталин и Россиясь.
Сяс, монь койсон, Россиянь историянь учебникне, конат кармайхть серматфт од концепциянь коряс, ламоть обществасонк путсазь эсь вастозост. И тянь мархта кемокстасазь сембе ширдень соткснень аф аньцек народоньконь поколениянзон, но и Россиянь лама нациянь народть еткса!
—Спасиба, Валерий Анатольевич.
В.НЕСТЕРОВ.
 

13.02.2014 №6
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин