Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Здоровье

МЕДИЦИНСКЯЙ ОД ТЕХНОЛОГИЯТНЕНЬ ВЕЛЬДЕ САТНЕВИХТЬ ОЦЮ

Мордовия Республикань психиатрическяй больницясь мекольдень кизотнень лац содаф аф аньцек минь регионцонк, но и ичкозе сонь эздонза. Тя и шарьхкотьф. Пчкафтомань учреждениясь козякофтф тяниень пингонь од оборудованияса, оцю квалификациянь специалистт работайхть тоса. Корхтазевоме медицинскяй наукань докторть, МР-нь Заслуженнай врачть, главнай врачть медицинскяй частьть коряс заместителенц С.В.Кирюхинать мархта. Светлана Владимировна васендакиге етафтсь мархтонк эсь лацонь экскурсия больницява. Мезсь повсь сельмос васендакиге, видеста мярьгомс, афи азови. Сембе вастова аруши, кабинеттнень-меснень эса латцеф тяниень пингонь од аппаратура. Кепотьксонди, ГБО-нь (гипербарическая оксигенация) сеансне етафневихть БЛКС-301 и БЛКС-301 М барокамератнень эса, конат аноклафт Россияса. Эряви азомс, што тяфтама аппаратурась ноляви тевс космонавт-тнень анокламста. Да кали сембе уликсть колга азови тя аф оцю статьяса. Аф, конешна. Но главнайсь, ломаттне пчкафневихть пяк цебярь оборудованияса и пяк цебярь условияса. Тянь колга и пачфтсь тейнек С.В.Кирюхина.
 
—Светлана Владимировна, эрь варжаксттама историяти и лятфтатама отечественнай психиатрияса, можна тяфта мярьгомс, революционнай оцюдонга оцю полафткснень колга.
—Ётай веконь сизьгемонце кизотнень песта аноклафоль проект республиканскяй психиатрическяй од больницяти. Лямбирскяй райононь Берсеневкань модатне кочкафтольхть тя тевонди. Но тя или тона туфталонкса строямань тевсь лоткафтфоль колма кизос. Сянкса, штоба срхкафтомс тевть вастстонза, эрявсь од, эрьгав, оцю содамоши мархта руководитель. Тяфтамкс азфоль Вячеслав Григорьевич Подсеваткин. 1983 кизоня сон кочкафоль психиатрическяй больницянь главнай врачекс. Од руководительти эстокиге савсь решандамс аф теждя лама кизефкс. Сталмонь сяськондезь тевсь мольсь инголи. И 1983 кизонь декабрьста панчфоль ни васенце наркологическяй отделениясь, а 1984 кизонь августста 100 вастонди омбоце наркологическяй отделениясь. Тяфта аськолксонь аськолкс Вячеслав Григорьевичень руководстванц пингста молевсь и тянивок молеви инголи.
—Больничнай комплекссь, кода содаф, эксплуатацияс максф сембоц кеветие ковста. Тя ульсь эстонь кафксогемонце кизотнень эсь лацонь рекордокс.
—Тя афкукс тяфта. Но больницять строямс можна нюрьхкяня пингста, кда сатомшка техникась и рабочай кяттне. А вов ефси лия тевсь водендамс обществать одкс арьсема, водендамс сонь нравственнай ширдень питнишити, пуроптомс ваймонь сярятьф мархта ломаттнень перьф лямбе атмосфера и пара ваймокс улема—тя аф теждя. Сянкса и Вячеслав Григорьевич работань васень шитненькиге старандась шарфтомс тянь лангс башка оцю мяль, тя, сонь валонзон коряс, государственнай важностень тев. Вдь психиатриясь—тя васендакиге «страждающайхть», конатнень ули кода мрдафтомс обществати шумбракс-тазакс.
—Светлана Владимировна, и эрямань, и пчксемань, и больницяв мадомань условиятневок лиятольхть. Тяни мезе азат тянь коряс?
—Афкукс, психиатрияса госпитализациясь латцевсь вов кода. Фкя  отделениясотольхть и сят, конат аньцек састь пчксема, и пациенттне, конат аноклавсть ни куду. Тяфтама шабракс улемать сюнеда врачнень сембе старандамасна юмсель. Тяни сембось тянь коряс полафтсь. И полафтсь цебярь шири.
—Психиатрияса специалист-тне пяк эсь пингоннекс лувондсазь пчкафтомань колма этапонь принципть. Лоткак, пожалуйста, тянь лангс, Светлана Владимировна.
—Пчкафтомать тяфта ладязь курокста и сатфксонь сатозь сетьмофтьсы психопатологическяй состояниять. Пациентть, кона поступась приемнай отделенияв, ванондсазь полипрофессиональнай бригадань специалисттне, коза сувсихть психиатр, невролог, терапевт, а стане жа медицинскяй психолог. Нинге приемнайса сембе ширдень обследования етай сярядись. Кда васьфтевихть психотическяй ширдень расстройстват, пациентть мархта етафтови пчксемань васенце этапсь, кона мольфтеви реанимациянь и интенсивнай терапиянь отделениятнень эса. Тоза путневихть вельф кальдявста прянь маряйхне (острай и хроническяй расстройства мархтотне). Тоса работась мольфтеви сутканьберьф, етафтови комплекснай и интенсивнай лабораторно-инструментальнай обследования и кярьмотькшневи пчкафтомати.
—Тяфтама отделениятнень эса медицинскяй персоналть инголе кодама васень задачась?
—Врачне и медицинскяй сестратне тя пингть сембе вийса старандайхть лихтемс пациент-тнень алкогольнай, наркотическяй и токсикологическяй интоксикациянь состоянияста. Тяса тевс нолявихть пчкафтомань интенсивнай метоттне, конат лездыхть сяда курок лихтемс ломанть тя стака состоянияста. Ня отделениятнень эса пчкафневихть и ся пациенттне, конат сярядихть острай психотическяй урмаса или мзярда ня урматне эреклакшнихть.
—Кодама оборудованияса козякофтфт ня отделениятне и мзяра ломаненди синь арьсефт?
—Средняйста комсь ломаненди. Реанимационнай залхнень эса ладяф тяниень пингонь медицинскяй оборудования. Тоса улихть и персональнай палатат кафта ломаненди. Эсост ладяфт индивидуальнай санузелхт и спутниковай телевидения. Специальнай оборудованиять вельде ули кода ваномс пациенттнень прянь вятемаснон мельге. Бактерициднай лампатнень вастс отделениява ладяфт специальнай приборхт помещениятнень эса дезинфекциянь етафтомс. Тяда башка, кода правила, вяре лятфнеф отделениятнень эса ули экстракорпоральнай детоксикациянь (веронь аруяфтомань) процедурань етафтомс специальнай кабинет, ладяф и лия пяк эрявикс аппаратура.
—Светлана Владимировна, ваймонь урмаса сярядихненди (душевнобольнойхненди) кодама инь цебярь лекарствась?
—Ряцок лияда башка, фкя инь пчкафты лекарствась—тя лангозост мялень шарфнемась и пара ваймокс улемась, мезть мархта тяфтама урмаса сярядихнень еткста кржа кие васьфни. Вов мес больницяса пациенттнень лангс шарфневи башка оцю мяль, заботендави колгаст, эжневихть тяса покодихнень седиень лямбосост. Сяс мялезе газетать вельде пшкядемс лувихненди и эняльдемс улемс сяда пара ваймокс, лямбонь казендикс, лиянь сярятьфонь маряйкс.
—Спасиба, Светлана Владимировна!
—Уледа шумбрат!
 
Н.КУБАНЦЕВА.
 
СНИМКАСА: Медицинскяй наукань докторсь, профессорсь,
РФ-нь и МР-нь Заслуженнай врачсь, МР-нь здравоохранениян
 министерствань главнай психиатрсь-экспертсь, республиканскяй
психиатрическяй больницянь главнай врачсь В.Г.ПОДСЕВАТКИН 

13.02.2014 №6
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин