Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

В Правительстве РМ

Ванондовсть футболть коряс Миронь чемпионатти строяви стадионть перьфонц строяманц коряс кизефксне

3 мартста Мордовиянь Оцюнясь Владимир Волков етафтсь рабочай совещания, кона лемтьфоль Саранскяйса етафтови 2018 кизоня футболть коряс Миронь чемпионатти строяви стадионть перьфке территориять строяманц коряс кизефксненди.
Территориять планировканц проектонцты сувси 97 гектар мода Инсар ляйть кафта берякованза. Ванондовсть тя площадьса социально-культурнай назначениянь объектонь строямать коряс варианттне: торговай комплекст, выставочнай центрат, эряма кутт, аквапарк и сяда тов.
Мордовиянь Оцюнясь мярьгсь республикань правительствати анцяйняньбес ванондомс российскяй и омба масторонь инвесторхнень застройкаса участвондамаснон коряс кизефксть. «Планц коре минь макстама тянди 40 гектарть малава мода. Тяконь мархта, инвесторхненди ули кода надиямс теест выгоднай условиятнень лангс частно-государственнай партнерствань механизматнень тевс нолямань рамкаса»,—мярьгсь Владимир Волков.
Сявомок мяльс республикань Оцюнять замечаниянзон, стадионть перьф территориять планировкань проектонцты тиевихть петькст, а сяльде кучеви утвержденияс Россиянь Строительствань и жилищно-коммунальнай хозяйствань министерствав.
Тяфта жа ванондовсть «Тавла» жилой комплексть омбоце микрорайононц строяманц коряс кизефксне.
Совещаниять работаса примасть участия Мордовиянь Правительствать Председателец Владимир Сушков, сонь заместителенза—строительствань и архитектурань министрсь Евгений Терелов и целевой программань министрсь Алексей Меркушкин, Саранскяень мэрсь Петр Тултаев, проектнай организациянь представительхть.
В.Д.Волков васетькшнесь машиностроительнай комплексонь руководительхнень мархта
Тяка шиня Мордовиянь Оцюнясь етафтсь рабочай совещания республикань машиностроительнай комплексонь предприятиянь руководительхнень мархта. Ванонтфтольхть властть и бизнесть фкя-фкянь мархта сатфксонь сатнезь работамаснон коряс кизефксне.
Кода мярьгсь Владимир Волков, оцю промышленнай предприятиятнень стабильнайста мольфтеви работаснон эзда оцюшкада ащи регионца эряфонь уровенць. «Тядде тейнек эрявихть касфтомс промышленнай производствать и региональнай продуктатнень объемснон, инь кржась—6 процентта»,—китькстазе республикань Оцюнясь.
Ванондовсь промышленнай экономикань секторса заработнай платать касфтоманц коряс кизефкссь.
«Тя тячи фкя инь важнайдонга важнай задачась,—мярьгсь Владимир Волков.—Но зарплатась должен касомс трудть производительностенц, карьхцнень кирьфтамаснон, производствать одкстоптоманц вельде». Корхтамась мольсь и кадраса предприятиятнень обеспечендамаснон колга. Республикань Оцюнясь руководительхнень мяльснон шарфтозень рабочай специальностень коряс кадрань анокламань кизефкснень лангс.
Ульсь ванф энергетикаса ценообразованиянь темась, кона ноляви тевс промышленнай производствань объекттнень эса. Владимир Волков макссь поручения республикань Тарифнай политикань и энергетикань министерствати ваномс поставщикнень и потребительхнень марстонь интересснон коряс варианттнень.
Стане жа ванонтфт кооперациять виияфтоманц и республиканскяй промышленнай предприятиятнень конкурентоспособностьснон касфтомаснон коряс кизефксне.
Ня кизефкснень ванондомаса примасть участия Мордовиянь Правительствать Председателенц заместителец—промышленностень, наукань и од технологиянь министрсь Александр Седов, республикань тарифнай политикань и энергетикань министрть заместителец Сергей Нищев, Мордовия Республикань Оцюнять видеса промышленнай предприятиятнень директоронь Советснон председателец Юрий Репин.

06.03.2014 №9
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин