Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Здоровье

САХАРНАЙ ДИАБЕТСЬ—ПЕЛЬКС УРМА

Ужяленди, ётксонк сидеста васьфневихть сахарнай диабетса сяряди ломатть. Теест пяк стака эрямс тя урмать мархта. Аф кунара корреспондентоньке васьфнесь врачть-эндокринологть Алевтина Александровна Головановать мархта и эняльдсь отвечамс кизефксонзон лангс.
—Кит сярядихть сахарнай диабетса? Азондода колганза.
—Сахарнай диабетсь лувондови XX-XXI веконь аф инфекционнай эпидемиякс, конань лоткафтомс аш кода. Но ученайхне путнихть вийхть сянкса, штоба мумс лисема васта тя прябалать эзда. Диабетсь явондови кафта типова: инсулинозависимай и инсулинть эзда аф зависимай. Васенце типса сярядихнень оцю пяльксснон диабетсна эвондась наследственностть вельде. Лиякс азомс, кие-бди радняснон эзда сяряди или сярядсь тя урмаса. Тяфтама ломаттнень эса диабетсь ушеткшни нинге одста. Теест етафневи инсулинотерапия. Пациентоньконь 93 процентсна сярядихть омбоце типса. Теест инсулинца пчкафтома аф эряви.
—Мезенкса эвондакшни сахарнай диабетсь? Ули-аш кода араламс пря эздонза?
—Эвондакшни урмась наследственностть, вельф оцю сталмоть, мезсь лувондови башка прябалакс тяниень пингонь ломаттнень еткса, артериальнай гипертензиять и аф правильнайста ярхцсемать сюнеда. Сахарнай диабетсь аф инголдави, сонь ули кода шашфтомс сяда товолу, кда ваномс эсь мельгат. Эсь пингстонза етнема медицинскяй осмотра. Оттненди весть кизоти, а сяда эряфкшуфненди—весть 3-4 ковти.
—Кода содамс ломанти, сяряди-аф сон сахарнай диабетса? Кодапт урмать признаконза?
­—Сярядихне шарфнихть мяль сянь лангс, што синь ушедсь коськома курга потмосна, сидеста сашенды симомасна, сидеста якайхть ушу, лафчста марясазь пряснон, синь китни киськсна, мезсь уленди вельф оцю сахарть пингста. Кой-коста урмась аф няфнесы прянц и мушендови сон апак учсек, веронь анализонь максомста. Лац ванома шабатнень мельге, конат шачсть 4 килограммада сяда оцю сталмоса.
—Кда тя урмась муф, кода вятема ломанти пряц, кода пчкафтома?
—Аф пяк оцю сахарть пингста минь мярьгонттяма пациентоньконди ванфтомс пря. Аф симома алкоголь мархта симомбяльда, аф таргама, ноляма тевс башка диета, штоба кирьфтамс сахарть, ванома сталмоть мельге. Вельф лама сталма мархта ломаттненди мярьгонттяма нолямс тевс препаратт, конат аф кадсазь урмать вихонзама.
—Мезьса пелькс сахарнай диабетсь?
—Сон пелькс осложнениянзон мархта. Еткозост сувсихть полинейропатиясь, ангиопатиясь, санонь гастявомась, мзярда токавихть сембе саттне, суронь сосуттнень эзда сявомок прянь саттненди молемс, мезсь вяти энцефалопатияти. Кой-коста ломанць лоткай няемда. Пелькс осложнениякс лувондови нефропатиясь, мзярда урмась токасыне пичемарьхнень и ломанць нюрьхкяня пингта меле кулы. А стане жа васьфневи гангренась, кона вяти ампутацияти. Но тя уленди сятнень мархта, конат аф шарфтыхть эрявикс мяль урмати.
—Кодама ломаньда сяда лама? Конат шарфнихть мяль шумбрашиснонды или, конат аф ваныхть мельганза?
—Ужяленди, но ломаненьке кизоста кизос сяда кальдявста ваныхть шумбрашиснон мельге. Эсь пингстонза аф примсихть эрявикс мерат, мезсь канды теест оцю прябалат. Шумбрашити шарфнема башка мяль.
—Спасиба.
И.ПЯТИНА.
 
 
 
Кда прафтат ня ярхцамбяльхненди:
Кшити. Улема, аф сатни эсонт азотсь. Менюти сувафтома стама ярхцамбяльхть, коса лама белокта (кал, сиволь, пяштть, бабань снав).
Куяти. Шарьхкотьф, што аф сатни кальцийсь. Вегетарианецнень организмасна сидеста веши скал вай сяс, мес рационцост кржа куяда, и кельме ширень эряйхнень, конатненди аф сатни Д витаминць.
Чайти и кофети. Ня симомбяльхненди прафтомась корхтай сянь колга, што организмати аф сатни фосфорсь, натрийсь, железась.
Калгода или шонгара ярхцамбяльти. Аф сатни ведсь. Аф юкснема симондемс 8-10 стакан ведь шити, можна кайсемс лимононь сок.
Кельме симомбяльхненди. Улема, аф сатни марганецсь.
Штукатуркати. Организмась веши краска, мода, пур, севонь, активированнай уголь. Тяфтавок уленди! Тя корхтай сянь колга, што аф сатни кальцийсь и Д витаминць. Сидеста тяфтама мяль эвондай ит-тнень, пеки аватнень и малокровияса (анемияса) сярядихнень эса, конатненди эряви железа.
Маслинатненди и оливкатненди. Ня ярхцамбяльхненди прафтомась пачфни щитовидкать урмаськодоманц колга.
Банаттненди. Кда «шаракоды прясь» кенерьф банаттнень эзда, башка мяль шарфтома седити: теенза эряви калий. Фкя фруктать эса 600 миллиграмма калий. Но синь пяк калорийнайхть. Пелят эчколгодомс—полафтыть томатса, акша бабань снавса или инжирса.
Видьмотненди. Кинь оцю мялец шулгондомс видьмода, сятненди аф сатнихть витамиттне-антиоксиданттне.
Арахисти и бобовайхненди. Организмати эрявихть В группань витамитт.
Дыняти. Пяк эрявксни лафча нерва мархта и седиень урмаса сярядихненди. Пяле дыняса 100 килокалория, сяс эчколгодомада аф пелема.
Морепродуктатненди. Теест прафтомась корхтай йодать аф сатоманц колга.
Эйти. Эвондакшни оцю мяль поремс эй пакшкя? Улема, эряви козякофтомс организмась железаса.
Палф ярхцамбяльти. Аф сатни углеродсь.
Мезе пачфнихть тянь квалма психолокне.
Керы ярхцамбяльти прафтомась корхтай сянь колга, што эряфса аф сатни «перецкя».
Пяшттненди и калгода фруктатненди—ули оцю мяль фалу улемс сяськикс, улемс васенцекс.
Шоколадти прафтыхть сят, кинди аф сатни кельгомась.
Нервнай и кяжи ломаттненди кельгови сивольсь, сяда пяк траксоннесь, а сетьмотне и сятявнятне башка мяль шарфнихть фруктатненди и перень серотненди.
Тевонь содайхне и ответственнайхне кельгсазь колбасать и пидеф сивольть.
Кунеляйхне кельгсазь вайть.
Шашлыксь и копченай ярхцамбяльсь «няфтьсыне» романтичнай ломаттнень, конатнень оцю мяльсна путешествондамс.
Фалу арьси ломаттне кельгсазь морять казнензон.
Лофцонь ярхцамбяльхненди прафтомась корхтай сянь колга, што аф сатни мялямсь.
Помидорань кельгихне—пара вайме ломатть.
Оржаста маряй ломаттне сяда сидеста кочксесазь куярхнень, а сят, кинди аф сатни смелшись—капстать и бабань снавть.
Психолокнень мяльснон коряс, сят, кит сидеста прафтыхть перень серотненди, пяк туткодыхть, пелихть стакада.
 
 
 
БАНАНОНЬ ЧАЙСЬ— КОЗДА
Ули аф оцю советозе. Мзярда ширезон инжикс сашенкшни унокозе, теенза 6 кизонят, и апак учент урмаськоткшни, козы, аноклакшнян бананонь чай: шовсян оцю варя мархта теркаса аф оцю банан, лисенди ямня. Тя ямнять кайсеса чайти. Штоба унокозти афоль уле пси, чайть аф ламода кельмофнеса. Тяфтама чайть унокозе симондьсы емла копоркскянь. Танцти и польза канды. И тяфта 3 шит. Лезды.
Т.ЖУРАВЛЁВА.
 
 
 
МУЦЯТЯДЯЗЬ УРУФНЕ?
Лама кизода инголе пяк муцямазь уруфне (чирей). Фалу яксень хируркненди, штоба керфтомс синь. Тя пингс лядсть вастсна. Сяльде тейне макссть совет. Аньцек марясасть, што эвондась уру (сон шарьхкодеви киськть китнемста), ушедода эстокиге шовсемонза пяльхкянтень или сембе сурхнень мархта (сяда инголе лацкас штасть кядентень или шовасть одеколонца). Тиендян тяфтама «массаж» шиньберьф, кругса шарфнезь, тяка пингть кемоста люпшнемок.
И кда аньцек лисьф урусь аф ламода сяряди, сякокс шовсесть—кирдесть аф ламос тя сярятьфть. Верть поступаманц мархта сон юмай, аф ляды вастоцка.
В.Филиппова.
 
 
 
ШТОБА АФ УРМАСЬКОДОМС
Сяда шуроста улендема тяфтама вастса, коса лама ломаньда—етксост васьфневихть гриппса, ОРВИ-са сярядихть.
Ульцяв лисемдонт инголе шалхксь вадема оксолиновай мазьса. Сон аф нолдасыне вируснень носоглоткати.
Урмать сяда пара инголдамс, а аф пчкафтомс. Сяс гриппонь эпидемиятнень пингста прясь ванфтома гомеопатическяй и растительнай препараттнень тевс нолнезь. Синь ладяйхть иттнендивок.
Аф эряви юкснемс панчсемс форточкать эрь шиня: вирусне пелихть якшамда!
Башка мяль шарфтома ару фруктатнень и овощатнень лангс, конат козят С витаминца—капстать, сельдерейть, апельсинть, кивить.
 

10.04.2014 №14
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин