Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Спорт

СОДАСТЬ МИННЕТНЕНЬ!

    Лиссабонца етафтфоль международнай идень омбоце форумсь, кона пуроптфоль «Газпромть» «Футбол для дружбы» глобальнай социальнай проектонц мяльса кирдезь.
    Мероприятияса примасть участия 450-да лама идь и од ломань 16 европейскяй странаста: Белоруссияста, Болгарияста, Великобританияста, Германияста, Италияста, Францияста и стак тов. Саранск ошть эзда Лиссабону прважафоль «Мордовия» клубонь 13 кизоса футболистсь Илья Аверяскин. Сон кочкафоль Россиянь ошень Сборнаень капитанкс, коза сувафтфтольхть «Зенит», «Рубин», «Волга», «Крылья Советов», «Урал» и российскяй футбольнай лия клубонь и спортивнай школань налхкихне. Ильянь руководстванц ала российскяй од футболисттне сатозь колмоце вастть!
    Ня шитнень «Мордовия» клубонь футболистть Илья Аверяскинонь мархта ульсь васедема Мордовия Республикань пресс-центраса.
    Од цераньке футбольнай паксяса няфтезь пряснон аф кальдявста. Групповой этапса команданьке етафтсь колма матчт и сембоса сяськсть. Катфтольхть фталу Италиянь, Голландиянь и Франциянь сборнайхне. Полуфиналса россияттнень, ужяленди, етазь паксянь азорхне—португалецне. Колмоце вастонкса налхкомаса миннетне сяськозь Турцияста од ломанень командать.
Форумть мяльса кирдезь, европейскяй инголе моли футбольнай клубонь и спортивнай школань од спортсметтненди удалась улемс главнай футбольнай событияса—УЕФА-нь чемпиононь Лигань финальнай матчса «Бенфика» стадионца.
    «Футбол для дружбы» проектть задачац—спортть вельде тонафтомс од ломаттнень лия национальносттнень и культуратнень уважандама, шарфтомс мяль шумбра эряфти. Тяда башка, тя проектсь етафтовсь Франц Беккенбауэронь патронаженц ала. Футболса Мировой легендась мярьгсь, што проектть питнец сянь эса, што сон няфти кит тяниень пингонь од ломаттненди аф аньцек спортса, но и эряфса.
    Илья Аверяскин сембе пингс кармай мяляфтомонза Чемпиононь лигань финалть, международнай футбольнай форумть, Лиссабон ошть и Атлантическяй океанть. Но Лиссабонть мархта од церать явомс аш мялец. Кемоньшка кизода меле надияй мрдамс Россиянь национальнай сборнайть составса.
Л.РЕЗОВА.

05.06.2014 №22
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин