Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Культура

"КУЛЬТУРАНЬ АВТОПОЕЗДСЬ"- ЗУБОВО-ПОЛЯНАСА!

«Культурань автопоезд» культурно-образовательнай проектсь ня шитнень работа вятсь Мордовия Республикаса. 16 майста сявомок, «Культурань автопоездсь», конань составс сувсихть республикань культурань содаф деятельхть, ульсь Мордовиянь лама районца. И 18 июльть самс, мзярс тя проектсь кармай етафтовома республикаса, региональнай культурань деятельхне полафтыхть опытса Мордовиянь эрь райононь культурань работникнень мархта.
Тянь колга корхтафоль республикань Государственнай Собранияти Мордовиянь Оцюнять В.Д.Волковонь Посланиясонза. Сон мярьгсь, кле, тя кизось, Россияса азф Культурань кизокс, региональнай культурань деятельхненди эряви пачкодемс республикань райононь эрь клубти и библиотекати. И козякофтомс работань опытснон. Васендакиге—няфтемс Мордовия Республикань эряйхненди региональнай театратнень и концертнай организациятнень творческяй тя пингонь проектснон—спектакльснон и концертснон. А республикань библиотекатненди и музейхненди—тя пингонь музейно-выставочнай проектснон и информационно-библиотечнай технологияснон.
30 майста «Культурань автопоездсь», конанди вятикс Мордовиянь культурань и туризмань министрть заместителец С.Н.Баулина, ульсь Зубово-Полянскяй районца. Делегацияти тяфта жа сувасть: Мордовиянь А.С.Пушкинонь лемса библиотекань, Республикань Культурань дворецонь и региональнай культурань учреждениянь лия сотрудникне.
«Культурань автопоездонь» делегациять Зубово-Поляна поселкань районнай Культурань кудть маласа васьфтезь кшиса-салса культурань тостонь работникне. Тяда меле Зубово-Полянскяй райононь культурань отделонь начальниксь А.В. Якунин няфтезе сафненди национальнай декоративно-художественнай изделиянь выставкать, коза лихтьфтольхть Зубово-Полянань идень художественнай школань тонафнихнень произведениясна. И, эряви азомс, шабатнень произведениясна пяк тусть выставкань ваныхнень мяльс.
«Культурань автопоездсь» ушедозе эсь работанц Зубово-Полянань районнай Культурань кудса райцентрань и велень культурань и библиотекань работникнень мархта марстонь заседанияста. Пуромксса ульсь Зубово-Полянскяй муниципальнай райононь Администрациянь оцюнясь С.С.Сурдин.
Заседанияса тись доклад республикань культурань и туризмань министрть заместителец С.Н.Баулина. Эсонза Светлана Никитовна шарфтозе культурань работникнень мяльснон Россиянь Президентть майскяй Указонзон вешфксснон пяшкодемаснон лангс. Мордовия Республикаса ня вешфкснень коряс культурань работникнень зарплатасна кассь 21 тежянь цалковайти. Сяс государствась учи культурань работникнень ширде од сатфкст и цебярь работа. Лиякс мярьгомс, стама работа, кона няевиста кеподьсы народть культуранц эрь велеса и республикань эрь ошса.
Выступлениядонза меле С.Н.Баулина етафтсь пуромфнень мархта мастер-класс культурань конкурсно-развлекательнай тя пингонь программатнень коряс, конат эрявихть етафнемс шабатнень и эряфкшу ломаттнень мархта, и отвечась райононь культурань работникнень сембе кизефксснон лангс.
Тяда меле С.Н.Баулина Мордовиянь Культурань и туризмань министерствань Почетнай грамотаса казезень культураса лама киза работаманкса и оцю сатфксонкса: Мокшень Пимбур велень библиотекань заведующайть Т.Н.Васильевать, Ширингуши велень средняй школань учительницать Л.А. Гудожниковать и лиятнень.
Зубово-Полянскяй райононь Администрациянь оцюнясь С.С.Сурдин эсь выступлениясонза азсь спасиба «Культурань автопоездонь» делегацияти профессиональнай оцю лезксонкса районнай культурань работникненди. Кода мярьгсь Сергей Степанович, тя лезкссь лезды райононь культурань работникненди Зубово-Полянскяй районца мокшэрзянь национальнай культурать виияфтомаса.
Выступлениядонза меле С.С.Сурдин Зубово-Полянскяй муниципальнай райононь Администрациянь оцюнять Почетнай грамотаса национальнай культурать виияфтоманкса казьфтольхть ламоц районнай культурань работникне. Етксост—Од Потьмань Культурно-досуговай центрать художественнай руководителец В.Н.Федотова, Мокшень Пимбуронь библиотекань заведующайсь Н.В.Кузнецова и лиятне.
«Культурань автопоездсь» тяда меле поладозе эсь работанц секциява. Тоса тяфта жа етафтовсть мастер-класст сянь коряс, кода сяда цебярьста ладямс работать культурань эрь учрежденияса и эрь библиотекаса.
«Культурань автопоездсь» Зубово-Полянаса аделазе эсь работанц «Ночь ошибок» спектакльса. Сонь няфтезе пуромфненди Мордовиянь Рузонь драматическяй театрась.
«Культурань автопоездть» работаса оцю лезкс макссть райононь Администрациянь оцюнясь С.С.Сурдин и райононь культурань отделонь начальниксь А.В.Якунин. И теест тянкса—оцюдонга оцю спасиба республикань национальнай культурать эзда!
В.НЕСТЕРОВ.

06.06.2014 №
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин