Кие мезень колга сёрмады "Мокшень правдав"?

Ужяль, но кизоста кизос велетне шамондыхть. Ломаньда ляткшни коль сяда кржа и кржа. Ламоц велетнень эряйсна эряфкшу ломатть. А синь фкя тевсна: тялоньберьф учсемс идьснон и унокснон ошста самаснон. Кеняртькшнихть ся пингти, мзярда кудботмосна пяшкоди идень вайгяльда. А тя уленди аньцек кизонда, лямбе пингоня. Сяда видеста азомс, сиренятненди стака эрямс велеса ськамост. Аш кинди теест лездомс.
Тяфтама шами аймакнень еткс сувси и Ковылкинскяй райононь Цятна велесь. Тяса лядсь кемготувошка куд. Ит- тнень колга корхнемска аш месть. Велеса аньцек фкя семья, коса касфтыхть вете итть. Аш школа, сяс шабатненди сашендови якамс ялга шабрань вели. Штоба тоза пачкодемс, эряви етамс кафта вайгяльбет. Тевть стакалгофтсы ся, што аш велети моли цебярь ки. Пиземста или тялонда машинаса Цятна вели аф пачкодят.
Инь кальдявсь ся, што селговсь медпунктсь. Велеса пцтай сембе эряйхне сиренят, шумбрашисна аф кодама, врачень лезкс эрявксни сидеста. Маластонь фельдшерсь аньцек шабрань велеса. Тоса лавкаське.
Аньцек кизонда Цятнаса пцтай эрь кудсь пяшкотькшни ломаньда. Велесь сргози тялонь удомать эзда, эреклай. Инь лама инжида Цятна велесь пуропни Тройцяста. Родной шачема-касома уженязост сашендыхть Москуста, Санкт-Петербургста, Мурманскяйста и лияста. Тяфта ульсь тяддевок. Ломаттне ичкозде сашендсть, штоба васедемс кельгома тядяснон-аляснон, акаснон-брадснон, ялгаснон, лятфтамс идькс пингснон. Цятнась тя пингть арси васедемань родной уженякс.
Тядде, Тройцянь шиня, Оцю Озяз велень эряйхне сашендсть Цятнав концерт мархта. Мокшень кштиматне-моротне пуроптозь велеряйхнень и инжихнень велень медпунктть инголи. Кайгсть мокшень, рузонь морот и сиде моронят. Концертонь аноклайхненди лездсть синць ваныхневок: кштисть, морасть, вииста цяпасть кятть. Меколи оцюнек-емланек морасть мора шачема-касома родной уженять колга. Сон токазе ламотнень седиснон, кой-кинь ашесть кирдев сельмоведенза. Улема, лятфтазь весяла идькс пингснон, кельгома велеснон етай пингонц. Тяни тя сембось ичкозе-ичкозе и ацергоды эрь велеряйть седиец сянкса, мес шуроста кулендевихть тяни мокшень морот, гармониянь вайгяль, од ломанень пеетькшнемат. Но Тройцянь шиня сембось мрдась меки. Концертта меле сембе пуромсть козяста аноклаф шрать ваксс. А меле велеть келес кайгсть мокшень мазы моротне и сиде моронятне. Илядьс Цятнава якасть мокшень щамса-карямса наряжаф мокшаватне и эздост ашесть ляткшне инжихне—русневок. Од ломаттне оцю мяльса снимандафтсть национальнай костюмса щаф-наряжаф мокшаватнень мархта.
Тяфтама шитнень вельде эряй Цятна велесь. Тялоньберьф учи лямбе пингть и панжада ваймоса васьфнесыне идензон и инжиензон. Надиятама, што тя койсь-обуцясь Цятна велеса аф юмай, а сяда тов кемокстай и виияй.

Л.НИКОЛАЕВА.

 

 

 

Моразь стаян мокшень
панар,
Салмокссь содасы кить-
янть,
Щаса праздникс—павакс
 аран
Сембе пингста одкс улян.

Ня валхне пяк ладяйхть мокшавати Матрёна Сергеевна Кечинати. Аш тев, конань афолезе тие: Ковылкинскяй райононь Порапа велеса «Мокшава» фольклорнай ансамбльса морсемада башка, ули талантоц спектакльса ролень налхкомаса, кштимаса. Матрёна Сергеевна сермады мокшень щапт, бисерста кодай цифкст, тии петькст, цект и стак тов. Сон наряжакшнесыне аф аньцек Порапань, но и маластонь велень аватнень.
Ванат Матрёна Сергеевнань лангс и дивандат, мзярда семботь кенерькшнесы тиемс.
Шачсь мокшавась 1952 кизоня Порапаса колхозниконь семьяса. Шумордась 8 класст и илядень школа. Кемзисемге кизоса лиссь рьвакс, а 1971 кизоня мирденц мархта тусть эряма Калининградскяй области. Эряви азомс, Мордовиясь эста ашуволь, сяс Порапаста ся пингть тушендсь лама семья.
Калининградскяй областьса «За мир» колхозса Матрёна Сергеевна работась вете кизот. Семьяти эстокиге макссть эряма васта, кафта пурхцт, тракс. Порапаса ся пингть пицельхть керосинкаса, а меле ащесть газовай баллотт. Порапань куднятне кальдяфтольхть, а Калининградскяй областьса кирпицень, перьфсост сатт. Лавкасост мишендсть колбаса, калхт. Кодама аньцек щапт ашельхть: кофтат, платьят, ульсь кода рамамс мзяра мяльце котф.
Инголи тя аймакса эрясть немецт. Войнада меле теест мярькфоль кадомс эряма вастснон. Немецне тумстост калмосезь питни паршиснон модати, арьсесть, што мрдайхть инксост. Садга кассть шукшторукст, марлюфт, инезикст, сливакст.
Матрёна Сергеевнань мирдец кизонда постуфоль, тялонда ванфтозе фермать. Сонць работась дояркакс. Кизонда тракснень потьнезь колмоксть, сяс сашендовсь стяшендомс 3 частста шобдава.
Сембось бта цебярель Калининградскяй областьса, но ашель весялаши. Ломаттне содасть аньцек работа. Матрёна Сергеевна сидеста лятфнезе Порапать, илатнень, морай ялганзон.
Калининградскяй областьса эрясть 5 кизот, кочкасть ярмаконя и мрдасть шачема велезост. Порапаса путсть кирпицень куд. Матрёна Сергеевна мирденц мархта касфтсть ниле шабат. Авась работцесь Порапань откормосовхозса, Ковылкинань ПМК-са, идень садса нянечкакс.
Тяни Матрёна Сергеевна пенсияса. Эряйхть мирденц мархта кафонест оцю кудса. Шабасна и уноксна сидеста сашендыхть инжикс. Авать пара мялезонза, што велеса ванфтовихть кунардонь илатне, Порапань клубса фалу кулевихть мокшень морот. А сяда оцю павазга теенза аф эряви!

Т.МАКЕЕВА.
Ковылкинскяй райононь Порапа велесь.

 

Тядя… Тя валсь эрь ломанть эряфса занци няевикс васта. Сон инь мала и питни эрь ломанти. Эсонза шить и лямбоц, и валдоц.
Тядясь казенди эряф. Тядяда сяда мала и питни ломань  масторлангса аш. Но арьседа, теждя или аф тядять эряфоц?! Кодама сталмот сон няйсь Великай Отечественнай войнань и сяда ингольдень аф теждя кизотнень! Ашезень ужяльде тядясь виензон мезьсовок, старандась лездомс кода-аф кода маласькофтомс сяськомать.
Тейне ульсь 8 кизот, мзярда ушедсь войнась. Лац мяляфтса, кода алятнень мархта ряцок аватне тушендсть фронту и аф пелезь тюрсть врагть каршес. Сембе велень тефне прасть синь лафтуснон лангс. Аватне сокасть, видесть, касфтсть сера. Тядять ся пингоня сидеста можналь няемс тракторть рычагонзон, автомобильть руленц ваксста. А кодама вачаши няйсть аватне и синь идьсна тылса! Ламоцне вачашить эзда таргозькшнесть и кулсесть. И тяни, мзярда аф ломанень тефт тиендевихть Украинаса, стаки мяльце кайгиста ювадезь мярьгомс: «Ломатть, сетьмода! Эрьда ванфтсаськ мирть, эрьда эрятама павазуста, а аф седиень сязьфтезь».
—Кодама сталмот савсь няемс ся пинкнень,—лятфнесь Великай Отечественнай войнань и трудонь ветеранць Татьяна Степановна Назарова. Татьяна Степановна мекольцесь кафта браттнень и вете сазорхнень еткста. Тядянц мархта аляц кирдсть кафта тракст, ведраж, тувот, учат и несколька сараз. Сяс кудса тевда ульсь лама, сембе ит- тненди сатнесь, и Таняти тяфта жа.
1933 кизоня поступась тонафнема Кулишейскяй начальнай школав, конань шумордазе цебярь оценкаса. Эряфсь мольсь, ульсть арьсемат сай пингонди. Но семботь срафтозе-калафтозе войнась. Таняти ульсь 15 киза. Брадоц Иван аралась Родинать эса Востокса. Пачкодемок куду, сон кулось получаф ранатнень эзда. Брадоц Степан юмась куляфтома Донбасть маласа. Аляц, Степан Иванович, империалистическяй войнань участниксь, кулось кудса. Татьяна Степановна эста лятфтазень васенце учителензон школаса. Надежда Николаевнать Од Усадста, Клавдия Никитичнань Рузаевкаста.
Школать шумордамда меле велень стирнясь, штоба лездомс тядянцты, кармась работама колхозса. Паксяса кочксесь розьбрят. Сяльде ушедсь тиендема сяда стака тефт. Колхозонь председательсь, няемок стирть старандаманц, путозе бригадиркс. Кизонда Татьяна Степановна стяшендсь атекшнень мархта. Кудонь тефнень тиемда меле  етнезень сембе бригадань ломаттнень и азонкшнезе кодама работа тиема и мезе мархтост сявома: пеелем, цянга, тарваз. Татьяна Степановна лац маштсь тишень капань марама. Тянди сельме кайсесть алятневок. Мзярда Кулишейка велесь сувась «Мир» совхозти, тостонь директорсь, Николай Андреевич Начаркин, тернезе Татьяна Степановнань капань марама Мокшень Баймаконь и Од Усадонь паксятнень лангса.
1946 кизоня Татьяна Степановна лиссь рьвакс фронтовикти Александр Дмитриевич Назаровонди. Мирдец пенсияс лисемозонза работась машина киса. Тяни сон аш шиса. Марса касфтсть вете итть.
Совестьс коре работаманкса Татьяна Степановна аф весть казентьфоль казнеса. Сидеста хозяйствань Почетонь доскаса ульсь сонь фотографияц. Кочксезь Од Усад велень Советонь и Рузаевскяй райсоветонь депутатокс. Сон ульсь соцсоревнованияса сяськикс.
Татьяна Степановна и пенсияс тумда меле работась «Мир» совхозса сисем кизот. Трудовой стажец—50 киза. Аф кунара трудонь кельги тя ломанць тусь эряфста, но колганза пара лятфнематне кармайхть мольфтевома сяда товга.

 

В.КУДАШКИН.

ШКОЛАСТА—МИШЕНДЕМАНЬ ТЕВТИ

В.В.Шнякин Оцяду велень поселенияса содаф лац. Мокшалясь работцесь школаса. Мекольдень кизотнень заняф мишендемань тевса, Оцядуса ули лавкац. Сонць ускси товар, рьвац мишендьсы.
—Прибыльнай тевсь?—кизефтине Валентин Васильевичень.
—Аф пяк,—отвечась алясь.—Конкуренциясь пяк вии. А велеряеньконь доходсна аф сяшкава оцюфт.
Валентин Васильевичень мархта аш кода аф согласиндамс. Аньцек Оцядуса ветешка лавка. Мишендемань тевса заняф и связень отделениясь. Сембось ули. Почтавга тят сашенда, кда эряви, семботь кудозт кандсазь. Пцтай эрь шиня велева якайхть автолавкат. Велеряйхне якайхть товаронь рамама Атерень, Темникавонь, Краснослободскяень, Торбеевань рынкатненди, коса товарське сяда свежай и питнетневок сяда емлат.
—Стака улемс лавкань азоркс,—мярьгсь Валентин Васильевич.—Прибыль пцтай аш, а карьхцта пяк лама.

И.СИДОРОВ.