«ПОЮ ВЕЛЕТЬКЕ УЛИ ПУТКСОЦ МОКШЭРЗЯННЕТЬ ВАНФТОМАСА»,—тяфтама мяль азсь Кадошкинскяй райононь Пою велень администрациянь оцюнясь, велень Советонь депутатсь, Мокшэрзянь народонь VI съездонь делегатсь Валентина Петровна Рудакова

—Вов тяни, мархтонт корхнемста, лядьсть мялезон Т.Шевченконь валонза, коса корхтави: «Кинь эса аш кельгома эсь масторонцты, сят седиса ашудонга ашу ломатть»,—ушедозе азксонц Валентина Петровна. И тя вдь афкукс тяфта. Лятфтан аф лама эсь колган. Мон шачень велеса, серезеньге касыне тяса и работама вастондивок кочкайне шачема-касома уженязень. Лиякс мярьгомс, мзярдовок ашель мялезе явомс мархтонза. Велесь монь емла родиназе. Да вдь оцю Родинаньковок ушеткшни велеста. А кда тяфта, то теенза и сонь эряензонды эряви шарфнемс оцю мяль.
—Кода арьсят, Валентина Петровна, тянь коряс улихть нинге прябалат?
—Сембе вешфкснень пяшкодемасна аф теждя, да тя тиендеви аф руцянянь яфодезь. Кда корхтамс целайнек российскяй веленьконь колга, то синь юкстафокс лемдемс аш кода. Эрьда, хуш кепотьксонди сявсаськ минцень Пою веленьконь. Мяльце кеподи, мзярда етат велень ульцятнень эзга и приметасайть, кода корхнихть мокшетне, пайгокс ащи куттнень, конатнень инголе разнай маркань машинат, кудга водендаф газ, веденксовок аф эряви якамс ичкози. Пувордак кранть и вов ведсь кудсот. Полафткст… полафткст, конатнень колга можна азондомс пефтома. И тя кепси мяль.
—Валентина Петровна, кодама кизефкс мархта сяда сидеста сашендыхть ломаттне велень оцюняти?
—Афкукс, ломаттнень васень нежедема вастсна—велень администрациясь. Но сяс, мес сонга аф козя, оцю тефт тейнек аф тиевихть, а конат вийс корят, пяшкотькшнесаськ. Мярьктяма, урмаськодсь ломанць, администрацияньконь техникаса сон пачфневи больницяв. Марса школань тонафнихнень мархта лезневи сиренятненди. Мярьктяда, мезе тиеви идень вийса. Согласнаян тяфта арьсихнень мархта. Но вдь магазину молемась, кудса порядкань тиемась нилеце класса тонафнитивок вийс коре. И синь тянь тиендьсазь оцю мяльса. Тяни моли сире ломанень месячниксь. Тя пингть етафнетяма сиренятненди лемтьф илат, коса торжественнай пялькста меле казендеви теест продукта мархта пакетт. Анокламасост лезнихть «Алякс» и «Изолайн» ООО-тне и велень администрациясь,предпринимательхне.
—Инголи Поювонь средняй школаса тонафнихнень лувкссна пачкотькшнесь вейхкса сядоти. А тяни?
—Тя афкукс ульсь тяфта. Ужяль, но тяни школасонк тонафневихть иттне аньцек нилеце классти молемс (а содамошинь касфни тя заведениясь од, салай сельмованф), сяда тов синь школьнай автобусть мархта пачфневихть Адаж вели. Тя, шарьхкотьф, мяль аф пяк кепси, но коза молят. Оттнень велеса аф пяк кирдьсайть, да и одс шачихнень лувкссновок кири.
—Аш коса покодемс, сяс и тушендыхть велеряйхне лия вастова?
—Мон тяфта афолень мярьге. Нинге 2000 кизотнень омбоце пялестост Паёваса эвондась растениеводческяй предприятиясь, кона канни «Алякс» лем. Предприятиясь витцеви площаттнень лангста сявонди аф кальдяв урожай. Аш кода аф лятфтамс и строительнай утеплителень анокламаса «Изолайн» предприятиять, коса работайхнень оцюшкасна од ломатть. Тоса покодихть аф аньцек Пою велень эряйхне, но и шабра веленнетне. И сяда меле, кода работазевсть азф ограниченнай ответственностень обществатне, ламотне, конат эсь пингстонза кадондозь велеть, меки мрдасть шачема уженязост и стройсесть кутт, водендасть семьят.
—И тяни мзяра ломань лядсь ингольдень тя пяк оцю вели?
—Пропискас коре лувондови 503, а афкуксонь эряйда 430 ломань. Эряви азомс, што шава кутт пцтай аш. Кизонь пингть пяшкотькшнесазь синь дачникне.
—Мезсь тяни таколфттанза тонь, Валентина Петровна, кода велень администрациянь оцюнянь, кода велень Советонь депутатонь?
—Кизефкста лама, но инь васенцесь—велева кинь строямась. Тяни мольфтеви работа документонь анокламать коряс. Тиеви тя, сувави «Софинансирование дорог» программати.
—Пою велесь—мокшень аймак. Азк, пожалуйста, кода ащи тевсь тиньцонт национальнай кизефкснень коряс?
—Мярьголень, аф кальдявста. Миньцонк тянемс ванфтовсть национальнай щапне, койхне-обуцятне. Варжакстат мокшень нарядоньконь лангс, сельмотнень пчкясь афолить сяве лангстост. Пяк синь мазыста аноклафт. Корхтамок национальнайть колга, аш кода аф лятфтамс краеведческяй музейть, коса няфтьф Поють сембе пингонь историяц. Панчфоль сон 1990 кизоня. А тя оцюдонга оцю тевть срхкафтыец ульсь А.В.Наумов, а лездсть сембе сят, кит аф озадонь седихть ащесть минценнети, национальнайти. Тяни краеведческяй музейса несколька сядот экспонат. Аньцек аш тяни шиса Александр Владимирович, но сонь «идец» урозкс ашезь ляда—сон сяда тов повсь рьванц, ингольдень педагогть Клавдия Даниловна Наумовать кядялу.
—Валентина Петровна, тон кочкафат мокшэрзянь народть VI съездонь делегатокс. Кда максови вал тейть тя оцюдонга оцю, пяк эрявикс пуромксса, коза сайхть инжихть ламоц вастста, мезень колга мольфтелить корхтамать?
—Сембода лияда башка, конешна, лоткалень сянь лангс, штоба сембе ся задачатне, конат путовихть съездса ваномс, решандавольхть, а меле етафтовольхть эряфс. Тя вдь котоце тяфтама оцю пуромкссь. А етафтовсть-аш эряфс сембе ся кизефксне, конат кепсевсть эсост? Сяс пяк оцю мялезе, штоба синь афольхть ляда кагод лангс. Сатови тя—тиеви оцю аськолкс инголи национальнайть ванфтомаса.
—Пяшкодевост сембе арьсематне, Валентина Петровна!
—Спасиба.
                                                                                                                                         КУБАНЦЕВА.