Мокшэрзянь народть Межрегиональнай общественнай движениянц Зубово-Полянскяй отделениянц Председателец И.В.Цилин:«ЗУБОВО-ПОЛЯНСКЯЙ РАЙОНЦТА СЪЕЗДОНЬ ДЕЛЕГАТТНЕ—ЭСЬ НАРОДОНЬ АФКУКСОНЬ ПАТРИОТТ»

—Иван Васильевич, тон Мокшэрзянь народть Межрегиональнай общественнай движениянц Зубово-Полянскяй отделениянц Председателецат. Мезе азолеть тя организациять работанц колга?
—Общественнай организациясь тяниень пингонь лемонц каннесы 1999 кизоста, Мокшэрзянь народть III съездстонза сявомок. Движениять тевонза шарфтфт Российскяй Федерацияса и Мордовия Республикаса мирть, нароттнень ёткса ялгаксшить кемокстамаснонды, национальнай культурать и образованиять касомаснонды-вииямаснонды. Движениясь кирди кеме соткст финно-угорскяй нароттнень российскяй и омба масторонь организацияснон мархта, вяти издательскяй, телерадиовещательнай, образовательнай, культурно-просветительскяй тефт.
—Организациясь лувондови межнациональнайкс, лисенди, работась мольфтеви аф аньцек республикасонк?
—Афкукс тяфта. Тяниень пингть мокшэрзянь народть национальнай движенияц пуроптозень эрь кодама общественнай вийхнень: областной национально-культурнай центратнень и автономиятнень сядонь членцнон, пцтай сембе Россияса, омба масторонь кой-кона странатнень эса национальнай кизефкснень лангс башка мялень шарфты эрек ломаттнень. Движенияти сувасть эрь кодама профессиянь, религиознай конфессиянь, политикать и целайнек эряфть лангс аф фкя лацоннекс ваны ломатть. Сембонь синь пуропнесыне мяльсь лездомс эсь народонцты, инголдамс кяльть, культурать ванфтомаснон мархта сотф прябалатнень, касфтомс национальнай эсь прянь маряманьконь. Регистрировандаф  движениянь 81 общественнай объединения Россиянь 25 субъекттнень эса. Аф кунара ладяфт соткст Крым Республикаса национальнай мокшэрзянь центрать мархта.
Арьсян, пара улель, кда Мордовиянь  райоттнень эса улельхть национальнай политикать коряс министерствань алдонь структурат. Улихть вдь райононь Оцюнятнень заместительсна: социальнай кизефкснень коряс, культурань, образованиянь  отделонь начальникт.
—Иван Васильевич, эрьда корхтатама съездти анокламать колга. Лама киза работать Зубово-Полянскяй райононь Журавкинскяй основной общеобразовательнай школаса историянь и обществознаниянь учителькс, директоркс. Кодама питне макссят V съездта меле образованияса полафткснень лангс, кирдемок мяльса национальнай эсь лацонь ширетнень?
—Мялезе китькстамс школьнай образовательнай программать кафта национально-региональнай компонентонзон. Васендакиге—тя «Мокшэрзянь крайть историяц, культурац» предметть тонафтомац. Курсс сувафтфоль республикань рузонь и национальнай школатненди нинге 1980-це кизотнень. Васенце кизотнень ашельхть аф учебникт, аф программат, и учительхненди сашендовсь кочксемс материал эрь кодама источникнень эзда. Минь, кода мярьгондихть, вачкиеме сембе пайкненди, муцяме пря снярс, мзярс 2000 кизотненди ашесть лисе учебникт тя предметть коряс. Мазы иллюстрация, козя документальнай материал мархта. И мезе? Ёфсикс апак шарьхкотть ся, мес «Мокшэрзянь крайть историяц, культурац» курссь мекольдень кизотнень кирьфтавсь.
И омбоце моментсь—тя мокшень, эрзянь кяльхнень тонафтомасна. Тянемс аш методическяй материал мокшень кяльть и мокшэрзянь литературать коряс. Арьсян, ня кизефксне улихть кепотьфт съездса.
Кеняртьфти ся, што мокшень, эрзянь кяльхне вятевихть Мордовиянь сембе школатнень эса омбоце класста сявомок котоцети молемс. Тя сембось кармась аф ламнянь-аф ламнянь ётафневома эряфс и кодавок аф токсесы общероссийскяй государственнай образовательнай стандартть. Аф ваномок тянь лангс, васень пингть аф сембе школатнень эса иттнень шачфтысна-касфтысна пара мяльса васьфтезь мокшень, эрзянь кялень урокнень. Павазонди, тяни киндивок аф сашендови няфнемс шачема-касома кяльть мархта ряцок лия кяльть тонафнеманц цебяренц. Кеняртьфти ся, што мокшень, эрзянь кяльхнень республикадонк башка тонафнесазь Татарстанонь, Башкириянь, Ульяновскяй, Самарскяй, Пензенскяй, Оренбургскяй и Нижегородскяй област-тнень эса колма тежяньда лама идь 144 школаса. А вов мокшень, эрзянь кяльхнень грамматикаснон тонафнемасна рузонь иттненди нолдама аньцек эсь мяльснон коряс. Тянь колга астама съездса.
—Улема, образовательнай учреждениятне аф лотксихть аньцек кяльть тонафтоманц лангс?
—Азан аньцек кой-кодама кепотькст. Ётафтф мониторингть коряс, райононь комсь кафтува общеобразовательнай школатнень эса улихть краеведческяй музейхть, уженят, коса няфтьф мокшэрзянь народть историяц,  культурац,  эрямань-ащемань эсь лацонь ширенза. 6 № Зубово-Полянскяй идень садса пуроптф «Мокшаваня» фольклорнай ансамбль, Парцинскяй идень садса—«Пайгоня» ансамбль, Тархан-Потьминскяй школаса—«Тяштеня» ансамбль,      2№ Явасскяй идень садса работай «Келуня» кружоксь, Зубово-Полянскяй гимназияса—«Мокшэрзянь народть культурац и коенза» кружоксь. Сембоц лама эрь кодама кружок, клуб, национальнай группат улихть райононь пцтай сембе школатнень эса, педагогическяй колледжса, идень садса, идень творчествань центраса. Кеняртьфти ся, што тифт синь аф вярдень мярьгомать коряс, а тядятнень-алятнень, мокшэрзянь народть вандыенц инкса седикс-ваймокс таколды ломаттнень мяльснон вельде.
—Иван Васильевич, ёран китькстамс Зубово-Полянскяй райононь культурань работникнень сатфксснон. Синь лац содафт аф аньцек республикасонк. Сидеста газетаньконь лопанянзон эса пачфнетяма зубово-полянскяй артисттнень Саранскяйса, Москуса, Россиянь лия ошнень и веленятнень эса творческяй сатфксснон колга. Кирдьсак мялезень, репертуарсост келиста няфтьф национальнай эсь лацонь ширесь?
—Тя афкукс тяфта. Аньцек еран шарфтомс мяль сянь лангс, што Культурань управленияти сувсихть аф аньцек культурно-досуговай центратне. Улихть нинге библиотечнай системань, районнай краеведческяй музеень, музыкальнай школань, искусствань школань, художественнай школань работникт и кодама ломатть тоса работайхть! Мзяра Мария Константиновна Вишняковать лаца эрек ломаньда бисерса сермадыда! Сембе финно-угорскяй мирса-масторса содаф васенце мокшэрзянь бардсь Николай Балашкин! Тя вдь самородкат, национальнай коень ванфтыхть. И тяфтапт улихть мокшэрзянь эрь велеса!
Шабразе, национальнай кизефкснень коряс оппонентозе, фалу корхнесь: «Да мезе тинь, мокшэрзятнень, культурасонт «точк-мочк луганясода» башка ули?» Ульсь и ули. Тя литератураньке, мороньке, изобразительнай искусстваньке, артистоньке—сембось афи лятфтави. Мес кодама-бди «татушкатне» или «морай бензоколонкатне» шинек-венек цинняйхть нльне нолдаф утюгста, а Галина Макшевать мора мархта дисконзон костовок аф мусайть? Тянемс фкя мокшэрзянь ученайть кургста кулендьса: «Нльне велень хозяйствань наукань кандидаттне толкавакшнесазь тейнек историческяй, кялень кизефкснень...». Сяс и толкавакшнесазь кялень кизефкснень велень хозяйствать коряс специалисттне, мес мордвоветтне шарфнихть тянь лангс аф сатомшка мяль.
Кафта кизот мельцек улень «Танцевальная мозаика» районнай смотраса-конкурсса. Унокозе кштий. Седицень токасы кштимасна. Лама идень кштимань коллективда; мазыхть, козят, сельмованф салайхть костюмсна. А кодама творчествась! Ваныхненди няфтьфтольхть рузонь народнай, Россияса эряй ламоц лия народонь, омба масторонь кштимат. Прясь шаракоткшнесь вальснень, мазуркатнень, кадрильхнень и хоровоттнень, самботь и танготь эзда. Кштиматнень эса няфтьфоль пцтай мирсь. Сембе мирсь и сембе нароттне,  мокшэрзяда башка. Фкявок мокшэрзянь кштима ашель... Тя ульсь ётай кизоть. Тядде тевсь полафтсь. Нильгемоньда лама номерхнень эзда ульсь фкя «Левженская пляска», конань путозе Леплейскяй искусствань школань художественнай руководительсь Л.И.Гинина. Сюкпря тейть, Любовь Ивановна!
Улема, кржа мезе шарьхкодян кштимань тевса, но ужели мумба-юмба африканскяй плямать кштиманза—тя ся, мезе эряви иденьконди?
—Тянь мархта пелькс прамс аф кунардонь пингонь тапорксти: мезе-бди «кирдемс и аф нолнемс», а мезе-бди эцекшнемс вихцода?
—Аф кирдьса тя мяльть. Аф эряви мезевок эцекшнемс вихцода или аф мярьгондемс тиемс. Эряви кельгомс, тонафнемс, содамс лия нароттнень культураснон, кельгомс синь. Но эрьда карматама содама мера. А эрь кодама творческяй смотратнень, республиканскяй и районнай пялькстоматнень Положенияс сувафтолень вов мезе: «сембода пяк пара мяльса васьфтевихть номерхне мокшэрзянь народть национальнай коензон няфтемаснон мархта номерхне». Эряви касфтомс-виияфтомс культураньке—тянди тернесайне творческяй коллективонь руководительхнень, сембонь, кие таколды мокшэрзянь народть вандыень шинц инкса.
—Иван Васильевич, арьсян, Зубово-Полянскяй районцта съездс молихть тяфтама ломатть?
—Зубово-Полянскяй районцта кочкаф 15 делегат. Нят образованиянь, культурань, медицинань и лия сферань представительхть. Ёткстост азома Зубово-Полянскяй ошень поселениянь администрациянь Оцюнять П.Н.Сисигинать, Зубово-Полянскяй райононь депутатонь Советть Председателец В.И.Брезгин, Жуковскяй средняй школань мокшень кялень учительть Н.Н.Кинякинать, Медико-социальнай экспертизань бюроть Зубово-Полянскяй филиалонц руководителец Н.П.Романовась. Синь и сембе лядыксне аф аньцек уважаемай содаф ломатть Зубово-Полянскяй районца, но и эсь народонь афкуксонь патриотт.