Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Экономика

Минь интервьюньке

 
—Александр Иванович, кодама васта занци велень хозяйствань отраслясь районть экономикаса?
—Велень хозяйствань труженикнень праздникснонды итогонь тиемста содавсь, што минь райононьке лувондовсь и лувондови велень хозяйствань продукциянь касфнемаса и мимаса инголе моликс сембе республикаса. Финансовай ширде козякоткшнетяма серонь, сиволень, лофцонь мишендемать вельде.
Мекольдень кизотнень няевиста касондыхть показательхне кода полеводстваса, стане и животноводстваса. Ламолготкшнихть общественнай жувататнень лувкссна, разнай культураса витцевихть паксятне, коста сявондеви аф кальдяв урожай. Конешна, аф сембе вастова тефне ладяфт фкя лаца. Ламоцне нинге пеняцякшнихть погоднай условиятнень лангс. Тя эсь прянь аралама. Тяфтама сталмотнень сяськондьсазь тевонь кельгихне. Кеняртьфти ся, што мекольцетнень лувкссна кизоста кизос касонды.
—Александр Иванович, кодама результатса шумордазь паксянь работатнень райононь аграрийхне?
—Тяда ингольдень кизоть коряс велень труженикнень показательсна салсихть мяль и эвондафнихть надияма сай пингонди цебярь сатфксненди. Тядде сяда вишкста етафневсть агротехническяй мероприятиятне тунда и кизонь кофнень. Тевс сувафневсть од технологиятне, инновационнай метоттне. Кда фалу шнашендоськ ся хозяйстватнень, коса паксятне сяда урожайнайхть, козят, тядде эрявихть лятфтамс и сятнень, коса паксятне шуваруфт. Нят «Развитие села» ГУП-нь «Старосиндровское» и «Старорябкинское» подсобнай хозяйстватне, «Глобал-Поволжье» ООО-нь предприятиясь, «Новокарьгинское» кооперативсь.
Подсобнай хозяйстватнень эса сатфксонь сатомаса пара валса лятфтама «Развитие села» ГУП-нь директорть заместителенц Виктор Яковлевич Исайкинонь. Сонь руководстванц ала Сире Синдруса и Сире Рябкаса тядде рамаф лама од техника и прицепной инвентарь. Оцю качестваса и нюрьхкяня пингста тоса етафтфт агромероприятиятне. Эрь гектарста получаф 25 центнеронь. Тя оцю сатфкс. Тяда башка, кафцьке хозяйствань коллектифне касфтозь животноводческяй продукциянь получамаса показательхнень. Тяса аноклаф тялонди сембось: сатомшка кормадост, петьфт помещениятне, а Сире Рябкань Од Зубаревань отделенияса строяви жуватань од помещения.
Башка лямбе валхт мялезе азомс инголе молихнень колга. Нят «Селищенское» ООО-нь, «Куликовское» СХПК-нь, «Свободный труд» хозяйствань, «Мокша»    ООО-нь коллектифне. Азф хозяйстватнень эса эрь гектарста получаф 30-да ламонь центнер сера, а кой-кона паксятнень лангста кочкасть 60-да ламонь центнер тозер и видьмонди кукуруза. Велень хозяйстваса сембе видонь продукциянь получаманкса «Селищенское» ООО-нь председательсь, МР-нь Госсобраниянь депутатсь Сергей Семенович Ухаботов казьф Мордовиянь Славань II степенень орденца. «Свободный труд» артелень председательти Виктор Михайлович Настюшкинонди максф МР-нь Оцюнять премияц. «Од ки» крестьянско-фермерскяй хозяйствать вятиец Иван Дмитриевич Перякин казьф РФ-нь Велень хозяйствань министерствань золотой медальса. Тяддень сатфкснень инкса райононь велень труженикне разнай лемонь казне получасть кафксть сяда лама нона кизотнень коряс. И кажнай казьфть колга можна азондомс пефтома лама. Синь пяк кельгсазь эсь тевснон, лац шарьхкотькшнесазь, што шумбрашись ламода ащи козя шра лангть эзда.
—Мзяра ломаньда тяни трудендай велень хозяйствань тевса, Александр Иванович?
—Ужяль, но кизоста кизос велень хозяйствань труженикнень лувкссна кири. Кепотьксонди, тя тевса заняф 1537 ломань. Кржа или сатомшка, азомс стака. Тиендемок анализ синь работаснонды, ламотне мярьгольхть: тевсь аф лувксса, а качестваса. И нинге поладолине: ламось ащи велень труженикнень и специалисттнень опытснон, маштомошиснон, содамошиснон и, конешна, машинно-тракторнай паркть уликсонц эзда. Но зиянць сянь эса, што ламоц хозяйстватнень эса аш грамотнай специалистт, а коса улихть, тоса и показательхне цебярьхть. Агрономонь, ветеринаронь, зоотехниконь, инженеронь анокламати минь шарфнетяма башка мяль. Од цератне и стирнятне направленияс коре кучсевихть тонафнема аф аньцек местнай агроколледшненди, но и Россиянь лия агровусненди, Н.П.Огаревонь лемса МГУ-в. Тяфтама специалисттне тонафневихть хозяйстватнень средстваснон лангс. Дипломонь получамда меле мртцихть хозяйствав, коса максови теест и эряма васта. Кепотьксонди, аньцек тядде комозьда лама семья сувась од кудс. А сай кизонди ушедови нильгемоньда лама тяфтама объектонь строяма. Аф пелезь можна азомс, велеть ули вандыец.
                                                                                                                                          В.ЕРЕМКИН.
                                                                                                                      Снимкаса: А.И.Петряков.

15.12.2014 №
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин